الثلاثاء، 21 أكتوبر، 2008

وحشتونى موت وقريبا نلتقى


وحشتونى جدا جدا وعارفة ان الغيبة طولت ...................بس معلش اعذرونى موضوع الكتاب ده طلع حاجة صعبة جدا عموما ان شاء الله اخلص من موضوع الكتاب ده وهتلاقونى علطول


الخميس، 28 أغسطس، 2008

ما تيجوا تشاركونى الحلم




وحشتونى جدا بجد واللهى كنت مفتقداكم الفترة اللى فاتت بس اعذرونى وباركولى ان شاء الله هعمل اول كتاب ليا وغالبا هايكون موعد نزوله فى معرض القاهرة الدولى للكتاب ويارب ما يكونش الكتاب الاخير ..


****اخيرا الحلم هيبقى حقيقة ****

طبعا انتم دلوقتى عايزين تعرفوا محتوى الكتاب هايكون ايه ...ان شاء الله هانزل فيه حلقات جديدة خالص مع اعادة صياغة الحلقات القديمة من عروسة ننوسة .....وطبعا ده هيخلينى اتوقف عن كتابة اى حلقات جديدة هنا فى المدونة .


كمان فى اقتراح حلو اوى....... انا بفكر فيه وهو انى اعرض على دار النشر انكم تشاركوا معايا فى كتابة الحلقة الاخيرة لعروسة ننوسة
يعنى انا هاسيب النهاية تكون مفتوحة لخيالكم انتم........ وتتصوروها زى ما انتم عايزين


وده عرفانا منى ليكم بالجميل وبمساندتكم ليا وتشجعيكم


ودار النشر هتختار افضل حلقة" الحلقة الاخيرة" و ننزلها باسم صاحبها فى الكتاب
الكل يستعد من الان فصاعد لكتابة الحلقة الاخيرة....... يلا اجهزوا وان شاء الله اول ما احدد مع الدار مساحة الحلقة هتكون اد ايه......... هاقولكم علشان تبتداو تبعتوهالى.
هتوحشونى بس انا هافضل متابعة مدونتكم...... وكمان هعمل مدونة جديدة فى عروسة ننوسة ارجو انكم تتابعوها


الخميس، 21 أغسطس، 2008

وحشتونى جدا جدا

بشكركم كلكم على سؤالك وان شاء الله مش هطول الغيبة بس اصلى كنت مسافرة وكمان بفكر فى فكرة مجنونة وهى عمل كتاب والموضوع بس واخد منى شوية تفكير
اعذرونى وان شاء الله قريب تقروا الجديد

الثلاثاء، 29 يوليو، 2008

حفـــــــــــلة شــــــــــــــــم الفسيـــــــــــــــــخ


يوم شم النسيم الناس كلها بتخرج وتتفسح وتروح تشم الهواء والنسيم العليل .....احنا بقى اتفقنا انا وماما واخواتى اننا نروح النادى لان يوم شم النسيم النادى بيعمل حفلة هايلة فيها مطربين ومطربات مشهورين.

ماما بصت لى وقالت" ايه رايك لو نعزم خطيبك وحماتك على الحفلة؟؟"

انا برخامة" نعزمهم؟؟ ليه هما فقرا....وبعدين الحفلة كده هتبقى غم......... احنا ناقصين يا مامتى قرف ومصايب

ماما" يا ستى يلا اهو يوم فى السنة معلش خليها علينا........... امال ها تعيشى معاهم العمر كله ازاى؟؟

انا " ده لو كان فى بقيه عمر معاهم ان شاء الله "

كوكو جه قبل شم النسيم يزورنا ..........قلنا نقوله على الحفلة هو وست كبه مامته.

انا" صحيح ما قلتليش يعنى هانقضى شم النسيم فين؟؟

كوكو " فكرتينى كل سنة وانتى طيبة بس لسه مش عارف ........عموما انا كنت باخد ماما وبنخرج نتمشى سوا"

انا فى سرى" يا اختى كميلة عين امه....وتلاقيكم بتروحوا تقعدوا فى الجنينة وتسبيلوا لبعض"

كوكو" بس تعرفى يمكن السنة دى ما نخرجش اصل ماما تعبانة حبتين واحتمال نقضيه فى البيت.

انا برخامة "والله له تعبانة من ايه سلامتها الف سلامة"

فى سرى"قصدك مش بتاعة خروج ودفع لكن لو عرفت ان فيها عزومة هاتخف وتجى هواء"

بصت له وقلت" طيب ايه رايك لو تيجوا تحضروا معانا حفلة النادى .....ده بيعمل حفلة ممتازة واليوم بيبقى جميل جدا"

كوكو" والتذكرة بكام؟؟

انا "طيب اسال ايه البروجرام بتاع الحفلة ........مش التذكرة بكام"

فى سرى"وانت صحيح هتسال على ايه غير كده ...واللهى لوقع قلبك واخضك شوية"

التذكرة ب 100 جنيه"

كوكو مخضوض" ايه 100 حرام عليكوا .........وانتم هاتروحوا ايه الافترى ده"

انا بتناحة" ايه بتقول ايه....احنا مفترين"

كوكو" لا اقصد ان النادى هو اللى مفترى ....دول ناس عندهم جشع ....قال 100 جنيه قال ده الواحد يخرج يتفسح ويتغدا ويحلى بيهم"

انا فى سرى" يقطعك يا شيخ ....الميه جنيه بتعمل كل ده ايه يا ابنى هو انت عايش فى زمن صلاح الدين الايوبى"

كوكو" يا حبيبتى سيبك انتى بلا حفلة بلا كلام فاضى.....تعالى نروح اى جنينه ...اه القناطر ما فيش غيرها وناخد معانا فسيخ وسردين ونقضيها"

انا فى سرى" منك لله يا ابن ام قويق ....ايه الزفارة دى وكمان هنروح نبهدل الجناين.....ارحمنا يارب"

على العموم يا سيدى...... ماما عزماك انت وطنط على الحفلة يعنى مش هتدفع حاجة ولا مليم "

كوكو بعنتظة" يا ستى مش على الدفع ده الواحد يوزنهم فلوس انا بكلم على الطمع انا اصلى ما حبوش .....وان شاء الله هقل لماما واشوف رايها ايه....وكمان انتم اللى عازمين ...وضحك"

انا فى سرى" اه منك ومن بخلك...ما كنا من شوية على القناطر........ لكن دلوقتى ابو بلاش كتر منه"

جــــــــــــــــــــــــــــــاء مــــــــــــــــــــــــــــــوعد الحفـــــــــــــل

بصينا لقينا كوكو وطنط جايين النادى وشيلين شيل........ ولا اللى مسافرين البلد

طنط" ازيكم ....كل سنة وانتم طيبين "

انا " وانتى طيبة يا طنط بجد فرحانين اوى اوى علشان جيتى"
وفى سرى" بس لو كنتى ما جيتيش كنا هنفرح اكتر واكتر"

طنط" وانا اقدر اخرلكم طلب ده انتى حبيبتى وروح قلبى"
وانت يا حاجة ازيك وحشتينى......كل سنة وانتى طيبة....بس يا ختى ماله شم النسيم عندكم غالى اوى كده...."
ماما" يا ستى الغالى يرخصلكم ........والسنة اللى جاية يكونوا المفاعيص دول هما اللى عازمين"

واول ما سمعت الجملة دى وكان الحرب قامت ............بصت لماما وقالت" يا ختى وعلى ايه الغرامة دى....واللهى ما كان له لزوم هو احنا برضوا بتوع حفلات وكلام فارغ ...ولا هو دفع فلوس وخلاص"
لا لا يا دودى مش عايزاكى تبقى كده مع جوزك بعد الجواز...."اه الاصيلة تعيش مع جوزها على الحصيرة"

انا فى سرى"يا لهوى عليكى يا ست انتى ....وانتى مالك وانتى كنتى دفعتى حاجة من جيبك ...امال لو كنا دفعناكم كنتى عملتى ايه؟؟"

واللهى كانت فضحتنا فى النادى .........وقالت لعضو عضو

كوكو" ماما معاها حق ....وعلى ايه الفلوس دى حرام .........كنا خرجنا بيهم احسن واتفسحنا وجبنا اكل وكان فاض كمان"

انا " يا لهوى يا خرابى قاعد تقسملنا فلوسنا كمان....منك لله يا ابن ام كوكو ..........صحيح ما انت المحتكر الوحيد لماركة بخيلكو"

كان مكتوب لك فين ده يا دودو؟؟ اه اكيد فى صفحة الحوادث"

ماما " طيب ايه رايكم نتغدا سوا نطلب سندوتشات كده وعصير"؟

طنط طبعا اتخضت" اه انتم عازمينه بقى على التذكرة وهتدفعونا حقها فى الاكل.....لا والنبى انا عملت حسابى على كده وجبتلكم غدا معايا مفاجاة وهاتعجبكم موت"

اه ما احنا ناس بنعرف الاصول ...انتم يبقى التذكرة عليكم واحنا الغدا

امال".....علشان نبقى ردينا العزومة وزيادة كمان"

انا وماما تنحنا وانا فى سرى" بقى تمن التذكرة هتردهلنا غدا؟؟ اللهى نخلص منكم يا قادر يا كريم ...جبتولنا استبحس"

شوية وراحت فتحت الشوال اللى معاها اقصد الشنط الكتير دى اللى كانت معاها ............وفجأه شمينا ريحة خلت كل الناس فى النادى عاملين يبحلقوا ويتفرجوا علينا .

وكاننا معانا ديناميت او مفرقعات وحماتى طبعا ......كانت خبيره المفرقعات

وانا رحت سديت مناخيرى انا وماما من الريحة......... والناس جتلهم حالة من كتم النفس وكل اللى حوالينا بعدوا عنا

ماما بصت وقالت " اتفضحنا اتفضحنا"

وبصينا لقينا طنط مطلعة فسيخ وسردين ماتوا من ربع قرن ومعاهم بصل اخضر ..........وشوفوا انتم بقى الريحة عتقت اد ايه وكانت من حظنا وحظ اعضاء النادى يشاركونا الريحة الفظيعة دى"

طنط" دوقوا عمايل ايديا.......مخليلاه من يجى كام شهر علشان يعتق ولا تقولى فسخانى ولا ديوله"

بصت حواليها لقت الناس بتتفرج علينا " يا خرابى شفتم الناس هاتتجنن ازاى .....بس للاسف ما عيش اعزم الناس دى كلها "

انا فى سرى"ما فعلا هيتجننوا بس من ريحة الزفارة ..........اللى انتى اتحفتى مناخيرهم بيها....وابقى قابلينى لو مطرب واحد غنى النهاردة"

كوكو خد حته فسيخ وطلع من الشنطة التانية فرن عيش بحاله.......... اظاهر انهم كانوا هيعزموا النادى كله فعلا

كوكو" الله يسلمك ايدك يا ست الكل جميل وريحته باينه....معتق مش اى كلام هو ده الفسيخ ولا بلاش...ها تعرفى تعملى زيه يا حبيبتى"

انا فى سرى" تسلمك ايدك على ايه ....على النتانة والريحة المفحفحة دى"

شوية جه بتاع الامن بعد ما الاعضاء اشتكونا وقال لنا بالذوق....." يا فندم الحاجات دى ممنوعة هنا والريحة بهدلت الدنيا يا ريت لو تتفضلوا"

حماتى بقى انقضت عليه زى الوحش المفترس" جرى ايه يا خويا هو الاكل ممنوع ولا ايه....ده فسيخ هو حاجة وحشة...ونزلت ضرب فى الراجل بالفسيخ "

المهم انا اتسحبت انا وماما ومشينا بالذوق وقلنا فى سرنا ........الحمد لله انها جت على اد كده والعضوية ما تلغتش

وكل شم نسيم وانتم فسيخ وسردين"

الأربعاء، 16 يوليو، 2008

تلاته عصير .............وصلحه


الواحد بقاله كام يوم مخستع وتعبان .....رجعت من الشغل عيانه وعندى شوية برد ماما اول ما شافتنى قالت" ايه ده وشك اصفر كده ليه زى الليمونه ....مالك ايه اللى جرالك؟؟

انا" يعنى هيكون ايه اللى جرالى من ساعة الخطوبة الهنيه وانا تعبانه ومستويه"...بس عندى شوية برد

"فى سر" منك لله يا كوكو.......... يا ابن ام قويق"

طيب يا ماما انا هادخل استريح شويه

شوية ولقيت ماما جت تصحينى"اصحى خطيبك بيتصل يطمئن عليكى"

انا" كده بردوا يا ماما حرام عليكى فزعتينى .....مش كفايه الكابوس اللى شفته فيه كمان اصحى على سيرته والله ده حرام"

ماما "بنت عيب ردى الراجل بيعمل الواجب"

المهم كلمته وقالى انه هايجى هو وتنت اوسة الننوسة واخدين بالكم من تنت دى اصلى بدلعها......علشان يزورونى ويطمئنوا انهم لسه ما خلصوش عليا.

وصلوا بالسلامة ومعاهم 3 علب عصير من ابو جنيه وربع طبعا الحاجة مش بقيمتهم زى ما انتم عارفين ..........وكتر الف خيرهم انهم اشتروا اصلا ده فى حد ذاته انجاز.

انا بقى كنت عيانه جدا وعماله اكح واعطس والبرد اشتد اوى....... اول ما دخلوا عليا الاوضه طبعا انا نايمة على السرير........ واول ما طنط دخلت راحت مشاورة بايدها من بعيد ولا اللى ايدها مقطوعة.

"سلامتك يا عروسة ابنى الف سلامة.....متاخذينيش مش هقدر اسلم عليكى ........اصلى بتعدى بسرعة والواحد مش ناقص"

انا" لا يا طنط وانا بردوا يرضينى اعديكى......بعد الشر عليكى" وفى سرى" قال بعد الشر قال "

كوكو جاى يسلم عليا...راحت مامته شدته من القميص وقالت له بشويش" من بعيد لحسن تتعدى يا حبيبى"

المهم انها حاسستنى انى عندى جرب"

قلت يلا هيصة بهيصة وعياء بعياء ......قعدت ابرق لها واهرش لحد ما رعبتها وما بقتش قاعدة على بعضها!

شوية راحت بصت وقالت لماما"وهى مين اللى عداها ....اكيد حد فى الشغل وتيجى تجبلكم انتم القرف"

ماما ردت" والله مش عارفة بس الموضوع مش مستاهل ده شوية انفلونزا"

طنط "لا بس خلى بالكم بردوا الواحد ما يضمنش احسن لها تقعد فى اوضة لوحدها وما حدش يدخل عليها"

انا فى سرى" الهى تتحبسى طول عمرك يا بعيدة فى اوضه ضلمة ومليانه فيران...ليه شايفانى عندى حصبه ولابسالك احمر"؟؟

كوكو بص لى بحنان واشفاق "سلامتك يا حبيبتى ان شاء الله اللى يكرهوكى يارب ميه مرة"

انا فى سرى" اخيرا فتحت بقك ومااااااااماااااااااات"ماااااااااااااااااااااااااء" وان شاء الله يارب اللى يكرهونى مليون مرة مش ميه بس بس يارب الدعوة تستجاب وانتم فاهمين قصدى بقى"

طنط" وبعدين معاك بلاش تقعدى مع حد عيان ........اه ولا انتى بقى ناوية بعد الجواز ترجعى كل يوم للواد عيانه......وضحكت "

لا احنا عايزين عروسة مفرفشة ومنعنشة"

انا فى سرى" اه......دى تلاقيها فى الموالد مش هنا حضرتك.....وبعدين انتى خايفة على حق الدواء اللى هيدفعوا ابنك مش كده ؟؟ اه من لئمك ومكرك يا ست انتى.....شوية شوية تقولى ......عايزة شهادة ضمان مدى الحياة"

شوية الباب خبط ماما بصت لكوكو"معلش يا حبيبى افتح الباب ده شكله حد من الصيدليه اصل بعت اجيبلها دواء"

كوكو ببجاحة"وحضرتك دفعتى حقه؟؟

ماما تنحت"لا افتح انت بس وانا هاديك الفلوس"

طنط"يا اختى بلا دواء بلا كلام فاضى......هاتلها بس انتى العصير اللى انا شاريهولها ده حلو اوى فواكه ومغذى"

فى سرى"الله الغنى عن عصايرك والله تلاقيكى بصالى فيه شكلك عايزة تمويتينى مش تخففينى"

انا"ماما لا انا مش عايزة عصير.....هاتى اى حاجة تانية"

طنط برقت كده واتامزت" يا اختى بلا دلع بنات ميرء.......هو العصير مش احسن من ابصر ايه ......الميلك كشك اللى بتشربيه علطول ده......ده انتى حتى علمتيلى الواد يشربه كل شوية يا اختى بلا كلام فارغ"
والله ما عارفة عاجبكم فيه ايه......حاجات كلها صناعى مش طبيعى"

انا فطست من الضحك انا وماما"ميلك كشك......يا لهوتى يا انا يا امه
شويه شويه هيبقى بصارة كمان ..وبدل ما نطلب مع الميلك شيك شاليموه هنطلب تقليه"

ايه الجهل والفضايح دى...اه لو كان سمعك عم ماكدونالدز......كان زمانه لم عزاله من البلد كلها ورحل"

كوكو" معلش يا حبيبتى ماما اصلها بتحبك وتخاف عليكى اوى"

انا" اه مفهوم .........ما هو باين اهو"

حبه وراحت بصت لماما" يا حاجة بنتك وشها اصفر........ قومى بس هات لها العصير اللى انا شارياه"
انا" والله ما ليش نفس شوية وابقى اشرب العصير اللى حضرتك شارياه .......وقعدت ااكد على كلمه شارياه لحسن تفضحنا....... وتقول نسبناه لنفسنا ولا حاجة"

شوية وجت واحدة جارتنا تزورنى لما عرفت انى تعبانه .......وجايبه معاها كارتونه تفاح وكارتونه عصير

الجارة" سلامتك يا حبيبتى الف الف سلامة.....والله زعلت لما عرفت من ماما انك عيانه وقلت لازم اجيلك"

انا " ربنا يخليكى لى يارب وما يحرمنيش منك"

طنط" اتامزت....... اه اعملى فيها تامر حسنى بقى......يلا يعنى ما سمعناش منك البقين الحلوين دول....ولا ناس ناس ...."

الجارة" ودى معقولة......... ده انتى الخير والبركة يا حاجة"

انا" شايفة الناس اللى عندها ذوق.....مش اللى معدومين منه خالص يا باى"

شوية راحت بصت لماما" يا حاجة هات لها العصير اللى انا اشترتهولى ........ايه انتى مكسلة ولا ايه"

وراحت بصه للجارة" اه اصلى والنبى لما عرفت انها عيانه قلت اشترلها عصير ياوتها شوية"

الجارة "كلك كرم يا حاجة وذوق ربنا يخليكى ليها"

الهانم شوية شوية .........كانت هتنزلها لنا فى الاخبار تحت عنوان جبنلها عصير علشان تبرطع زى الحمير!!

"فى سرى" ما تسكتى بقى ارحمينا والله اقوم اكبه كله على راسك وراس ابنك .........وارتاح .............شوية .........شوية تطالبينا بحقه 3 جنيه و75 قرش.

جارتنا بصت لماما" بقولك ايه انا جبتلها من العصير اللى بتحبه هات لها منه "

ماما "طيب تشربى عصير يا حاجة انتى وكوكو"

كوكو" ماشى يا طنط بس يا ريت ساقع ويكون فريش"

فى سرى " اصل الباشا كان فاكر نفسه عند فرغلى بتاع العصير"

طنط " اوكيه بس ساقع اوى وما يكونش مسكر وفى كوبايه"

فى سرى" عماله تتامرى على ايه على العصير ابو 3 جنيه!!

ماما " وانتى يا حبيبتى هاجيبلك معاهم"

انا " اوكيه يا ماما بس شوكولاته"

طنط "اشمعنا يا اختى هتشربى دلوقتى...ما هو من شوية ما كانش ليكى نفس .......اتفتحت يعنى دلوقتى"؟؟

اه يا طنط اصلها بتفتح كل يوم من 5 الى 6 .........وضحكت

المهم شربوا العصير وطنط فطت من مكانها وقالت" نستاذن احنا بقى علشان لسه هنزور بنت اختى ..........اصلها بعافيه حبتين"

ماما "لا سلامتها الف سلامة سلموا عليها"

كوكو بصى لى واتسهوك" سلامتك يا حبيبتى شدى حيلك....وانا هاطمئن عليكى كل يوم"

طنط من بعيد " سلامتك يا روحى ....هابقى اطمئن عليكى "

انا " الله يسلمكم ميرسى"

شوية وراحت طنط عطست راحت بصت لكوكو وقالت " شفت ادينى اتعديت ......مش قلتلك نبقى نيجى لما تخف اتفضل ادامى "

وراحت بصت لماما وقالت لها "بقولك ايه .... هى مش جاراتكم جابت لكم كرتونة عصير؟؟
ماما ردت" اه ليه فى حاجة؟؟
طنط" لا بس كنت بقول طالما عندكم كرتونة عصير ..... هاتى العصير اللى انا اشتريته........ نرجعه اصل خسارة كده هيبقى كتير........... ونبقى نجيبلها غيره المرة اللى جايه "

الثلاثاء، 24 يونيو، 2008

مــــــــــــــــــــرتبة هـــــــــــدية....للـــــــست حــــــــــــــــــشــــــــريه



كوكو وطنط قاعدين....... يكلموا مع بابا وماما فى بقيه العفش

ماما قالت لكوكو" ها يا حبيبى تحبوا ننزل امتى علشان نشترى بقيه لوازم اوضه النوم يلا بقى خلصونا عايزين نفرح"

كوكو ...ماما انتى ايه رايك تحبى ننزل امتى؟

طنط زكية " وهو ايه اللى فاضل فى اوضه النوم يا حاجة؟؟ ما احنا خلاص خلصنا كل حاجة .......مش فاضل الا الرافيع والتنجيد.

انا وماما وبابا بصينا لبعض ....تنجيد!!

طنط " ايوه انتم نسيتم ولا ايه ؟؟ وبعدين التنجيد عليكم مش علينا علشان نبقى متفقين اما الحاجة ساقعه بتاعه التنجيد زى بعضه ......خليها علينا علشان متغرموش ادينا عدانا العيب.

انا فى سرى وانا مفروسة "يا شيخة وجايه على نفسك كده ليه هتجيبى حاجة ساقعة .....ما كفايه انتم

"هو فيه اسقع منكم"

ماما قالت ".يا حاجة تنجيد ايه...... وحاجة ساقعة ايه احنا مش هنجد "

طنط برقت لماما وفطت من مكانها زى الفرقع لوز.....وفجأه اتحولت وبقت شبه زكيه زكريا

وقالت "ايه مش هتنجدوا ازاى ايه الكلام الفارغ ده......ناوين تنيموا الواد على الارض ولا ايه ؟؟

اظن دى كمان فيها تقاليع....... زى بتوع الشورتيم ؟؟ تقصد الشوتايم

انا فطصت على روحى من الضحك......وقلت لها " يا طنط احنا مش محتاجين تنجيد وكلام من ده ........احنا هنشترى كله جاهز

طنط... برقت وقالت" نعم جاهز..... لا بقى كله الا التنجيد انا ابنى لازم يتنجدلوا..... اه.....هو اقل من الناس ولا ايه...... ونجيب زفه وهيصة ونعزم الحبايب والاقارب.....ونطبل ونهيص

وهو فى جواز من غير تنجيد؟ لا...... انا لازم افرد البطاطين والالحفة كده قصادى وافرج الناس واكيد العوازل

وراحت عملت زى فيلم هنيدى" فى ناس معينين احب اوصلهم رساله معينه.

"لازم اعرف الكل ان ابنى اتجوز جوازه فل الفل"

انا فى سرى "واحنا مالنا ومال الرسايل بتاعتك ...انتى هتعمليلنا فيها ساعى بريد!


" وبعدين بطاطين ايه.... والحفة ايه يا ست انتى .....احنا هنجهز ولا هنفتح دراى كلين؟؟

هى بقى اتنططت وقالت

يا ختى انا اول مرة اشوف جواز كده ....راحت بصالى ....يا بت بقى كفايه فرجة على الدش اللى خربلك عقلك ده


انتى عايزة الناس تضحك على ابنى........... وتاكل وشه وتقول منجدش؟؟

انا بصيت لها وقلت" يا طنط ....التنجيد ده موضه وبطلت...... دلوقتى احنا فى عصر السرعه

راحت بصيت لى وقالتة " لا ما تخافيش اذا كان على السرعه هخلى المنجد يخلص فى ساعتين مش هياخد وقت"

ماما ردت عليها " ليه بس يا حاجة.... ما احنا هنشترى جاهز وهيبقى احلى من القطن ....والتنجيد والهيصة دى ..وان شاء الله هيعجبك

انا بقى" يا طنط الحكايه كلها مرتبه ومخدات .... مش محتاجة منجد يقعد يضرب القطن ويبعزقه على الارض ...... ولا محتاجة لمه وهيصة وقرايب...... وجيران....... واهو نوفر على حضرتك حق الحاجة الساقعة"

رحت بصت لى" وافقى انتى بس ......ومالكيش دعوة .....وانا فى ديك الساعة لما اغرملك""

انا فى سرى" صحيح ...الحاجة الساقعة بالنسبه لك غرامة"

طنط نطت من على الكرسى وغمزت لابنها

" عاجبك الكلام ده يا كوكو يا حبيبى... خطيبتك عايزة تشمت الناس فينا ......اودى وشى فين من الجيران ....اودى

وشى فين من قرايبنا ؟؟ يا ارض انشقى وابلعينى ....يا كسوفى

"انا فى سرى" والله يا ريت الارض تنشق وتبلعك...... بس مش وانتى عندنا"

انتى جايه توقعلنا البيت..... هو احنا ناقصين ....مش كفايه...... ناكسيتنا فيكى انتى وابنك

كمان هتخلينا ننكس البيت؟؟

وعلى العموم..... لو الارض تنشق وتبعلك عندنا مش مشكلة..... انا اصلح البيت على حسابى

بس هى تبلعك يا شيخة انتى.... وبططينك والحفتك دى اللى عايزة تذلى بيهم الناس.

طنط بصت لبابا" اتكلم انت يا حاج ساكت ليه ...عاجبك كلام بنتك بقى دى الاصول؟؟

كمان المرتبه بقى فيها قديم وابصر ايه جديد؟

انا فى سرى" طبعا .....عايزنا ننجد ونجيب فرقه بزمامير....... ونغنى ونهيص.... وتعزم الجيران..... وعيله العيله وكله على حسابنا

بابا بص لها وقال " يا ست الحاجة هدىء نفسك ....العفش عفشهم والحاجة حاجتهم ريحى انتى نفسك وسيبهم على راحتهم"

ماما ردت" يا حاجة مفيش حد بينجد خلاص ......الناس كلها بتشترى جاهز وبعدين قطن ايه وكلام فاضى ايه ....دلوقتى كله سفنج وسوست والالحفة فيبر ...كده يعنى حاجة شيك تليق بابنك وبنتى"

طنط " فبر ايه... وكارتون ايه..... انتم هتنيموا الواد على ورق علشان تكسروا ضهره ....لا ما فيش احسن من القطن"

انا فى سرى" فبر ايه وكارتون ايه هو احنا هنيمه على كراسة....ارحمينا من فقاقتك دى واسكتى"

طنط قعدت تعدد على عمرها ولا اللى عندها ميت......وكأن المرتبه دى تقرب لها...... او من بقيه عيلتها "

شوية راحت بصت لكوكو " عاجبك كده يا افندى ...اعمل ايه بقى فى النقوط اللى كنت بنقطه فى تنجيد القرايب والحبايب ....مين اللى هيرد النقطة دى دلوقتى ...ها "

كوكو" معلش يا ماما حقك على ابقى اخصميه من مرتبى "

انا وماما بصينا لبعض وتنحنا ......انا فى سرى" يا نهارك اسود قولى بقى كده..... كل ده علشان النقطة ؟؟ الهى تتنقطى كمان وكمان زى ما نقطتينا وعلتينا

ماما بصت لكوكو " خليك فاكر يا ابنى عدى علينا بكره علشان ننزل نشترى المرتبه.

كوكو" حاضر يا طنط بس هو مين اللى هيشيل المرتبه!؟

انا وماما فى نفس واحد وبنتريق" احنا..... يعنى هيكون مين؟....راح رد علينا " اه اذا كان كده معلش"

وانا وماما كنا هنتشل منه وهنحدفه هو ومامته من البلكونه

طنط بصت له وهى مش عاجبها" هو انت كل حاجة حاضر ....لما نشوف اخرتها ايه فيك انت والمعدله"

احم احم ..........تقصدنى انا طبعا

وجـــــــــــــــــــــــــــــــــــاءت النقـــــــــــــــطه التاليه

انا قلت لماما .....ايه احنا مش هنتغدا قبل ما ننزل؟

ماما ردت" لا يا حبيبتى مفيش وقت....... خطيبك زمانه جاى متاخريناش وهو يبقى يغدينا"

انا ضحكت " يغدينا ...حرام عليكى يا ماما يبقى انتى كده......... ناويه تموتينا من الجوع "

المهم كوكو وصل ومعاه واحد قريبه ...اظاهر جايبه علشان يشيلنا الحاجة .....اصل كوكو رقيق بياكل رقاق كتير.......مش بتاع الحاجات دى....وكان جايب معاه عربيه واحد صاحبه علشان نحط فيها الحاجة......... ده نظرا طبعا للتوفير

بصيت له وحبيت اتريق وقلت له " ايه ده مش معقول تكون طلعت اللى تحت البلاطه واشتريت عربيه؟؟

راح بص لى ببرود " لا طبعا يا حبيبتى وانا عبيط علشان ابعزق فلوسى.... ده انا بعت البلاطة نفسها......وبعدين دى عربيه واحد صاحبى............ بيحبنى اوى ولما طلبتها قالى متغلاش عليك

واهو نوفر حق تاكسى!

قلت له" لا فالح ما انت هتحط بحق التاكسى بنزين"

رد قال" لا ما انا واخدها منه فيها بنزين

انا قلت له" يا ساتر يارب ....... طيب ربنا يستر وترجعهاله سليمه"

شوية ولقيناه ياخد كل مطب ومطب......... ولا كانه راكب عربيه لورى ومحمل معاه غنم.

...المهم انه دغدغنا.... حبه ......والعربيه وقفت بينا ...فضيت بنزين

يقوم يقول وهو بيبص للعربيه ....وده وقته بردوا يعنى لازم تغرمينا ...........ما الواحد كان خد تاكسى اوفر

شوية ودخل محطة البنزين ......نلاقيه طلب من الراجل خمسه لتر... تخيلوا ؟؟

شوية شوية كان هاين عليه يحطلها زيت اكل علشان يوفر"

رحت بصيت لماما وقلتلها.....هيغدينا ها؟؟

اذا كان مش راضى ياكل العربيه اللى هتوصلنا هياكلنا احنا؟

"والله لو كانت العربيه بتتكلم..... لكانت صرخت 100 صوت ......والله صعبانه عليا "

ماما قالت لى" انا علشان مش هاكل؟؟ قلتلها .......لا العربيه..... بس صاحبها يستاهل

المهم وصلنا المعرض ..... ودخلنا نشترى المرتبه....... لقيناه عمال يبص يمين ويبص شمال ولا فاهم حاجه فى اى حاجة

ويقول " والله ماما كان عندها حق التنجيد احسن واوفر ....ده شغلهم اى كلام ....بقى القطن..... ولا حشو ورق الكلينكس ده؟؟

انا بصيت له وانا فى قمه الغيظ وقربت اشد فى شعرى.....ورق كلينكس ! ارحمنى يارب

المهم اشترينا المرتبه......... قبل ما صاحب المعرض يسمعوا ويضربه بيها....... واحنا معاه

شوية ولقينا طنط بتتصل بكوكو........انا بصت له وقلت" ايه خير .....فى حاجة ..وفى سرى" الحربايه عايزة ايه".....ناويه تسم بدنا بايه المرة دى؟

رد وهو بيضحك بسخافه" والله ماما بتحبك موووت"

بصت له وقلت فى سرى....ان كان القمح يساوي التبن ....يبقي الحما تحب مرات الابن

كوكو قال"اصلها بس بتقول هتجيلنا على الشقة....... علشان تشوف المرتبه

رديت بغيظ" قصدك تعاينها.

المهم وصلنا الشقة ولقينا الست حماتى وصلت

وقعدت تتفرج على المرتبه وتضغط عليها شمال ويمين وفوق وتحت .......المهم ماخلتش فيها حته الا لما عملتلها كشف

هيئه ......اصلها تقريبا كانت شغاله منجد قبل كده

وراحت قعدت على المرتبه تتنطط ولا العيال الصغيرين

وراحت بصت لى وقالت" لا والله برافو عليكى .......حلوة ومتينه تستاهل حقها ....ومريحة كمان ....الا قوليلى هى دى محشيه اسفنك؟؟

راح كوكو فرح اوى وقال لها " تصدقى يا ماما نفس الا قلته لما كنا بنشتريها فعلا حلوة ومريحه

حماتى بصت لابنها وقالت" لا بقولك ايه ......زى ما اشتريت لعروستك مرتبه اسفنك ..........لازم تشترى لامك

حبيبتك واحده .....اه بدل المرتبه القطن اللى قطمت دهرى"

انا وماما لما سمعناها بتقول كده كنا هنقلبها من على المرتبه هى وابنها......امال كنتى عاوزانا ننجد ليه لما القطن بيقطم الدهر؟؟

انا بقى من باب المجامله وانا مفروسة" اتفضلى يا طنط ...وهى تغلا عليكى...وفى سرى ...خسارة فى جتتك"

راحت فرحت اوى وبصت وقالت"خلاص مقبوله ......واهى تبقى بدل فلوس النقطة اللى ضيعتوها عليا "

الاثنين، 2 يونيو، 2008

عــــــــزومــة مراكبيــــــــــــــــــــه على الطبليــــــــــــــــــــه


الكابتن كوكو هو وطنط حماتى اللى طبعا كلكم عارفين اد ايه انا بموت فيها وازاى مقدرش يعدى على يوم من غير ما اسمع صوتها او اشوفها"متشفوش وحش ان شاء الله"

بابا بقى قال لما اكسفهم شوية ولو انهم زى ما انتم عارفين "ما بيحسوش على دمهم" اصلى بابا فال انهم المفروض يعزمونا عندهم فى البيت معقول تبقى البنت مخطوبة وما نعرفش بيت اهل خطيبها؟

ماما...."اكسفهم يمكن يحسوا وقولهم انت كانك بتهزر"...احنا عايزين نعرف بيتهم وحياتهم شكلها ايه.

بابا بقى قاعد مع كوكو وبص له وضحك" ايه يا بنى اللى ما فى مرة قلت يا عمو اتفضل عندنا انت وطنط....ايه انتم بخلاء ولا ايه....وضحك؟

انا فى سرى"ده برضوا سؤال يا بابا...ده عدى المرحلة دى بكتير وما شاء الله عليه بقى رئيس جمهورية البخلاء وعنده شعب وبلد بحالها "عيلتهم"كلهم بخلاء والحمد لله"...معلش اصل بابا مش متابع الانتخابات كويس"!

ماما ضحكت "صحيح انتم معزمتوناش ولا مرة انتم مش عايزين نزوركم ولا ايه؟

حماتى وهى مفروسه وبتطلع الكلمة بالعافية مع ابتسامة صفراء"معقول يا حاجة ازاى تقولى كده....دا احنا بيتنا بيت الكرم والجوده...بس انتم بس تشرفونا"

بصراحة الود ودها تقول انتم كده زفتونا قرفتونا هتدينونا...اه ما احنا هنخليهم يستلفوا كده او يحوشوا علشان العزومة!

كوكو بص لبابا وماما "خلاص يا طنط انتم معزومين عندنا ان شاء الله يوم الخميس الجاى.....وبص لمامته"ولا ايه رايك يا ماما الميعاد مناسب ليكى؟

راحت هزا راسها وقال يعنى بناخد ميعاد من وزيرة الخارجية"من كتر مشغوليات ساعدتها"

ماما قالت" وبالمرة بقى نتفق على بقية العفش عايزين نخلص بقى"

وجـــــــــــــــــــاء موعـــــــــــــد الزفارة" ااااااف"

عفوا اقصد الزيارة"

اشترينا هدية وجاتوه ورحنا ولما شافونا استقبلونا ولقينا عندهم ناس لدرجة اننا كنا قاعدين فوق بعض"طبعا ده كنايه عن وسع المكان"

المهم سلمنا وخدت طنط اوسة الهدية والجاتوه وقالت بعد ما عينتهم طبعا " وايه لزومه التعب ده بس ما كانش له لزوم والله ...احنا كلفناكم كده"

ماما "لا ولا تعب ولا حاجة ......دى حاجة بسيطة كده".

انا فى سرى" مالهاش لزوم! ده احنا اصلا لو كنا مجبناش حاجة كنا اتفضحنا فى المنطقة "

شوية وكوكو يبص لنا ويضحك"منورين والله يا طنط" الست مامته بصت له كده وغمزت له يقوم يقدم الحاجة الساقعة والجاتوه"ده على اساس انه الشغالة"

المهم قدم الحاجة ساقعة وعزمت هى علينا عزومة مراكبيه"ما تشربوا يا جماعة البيت بيتكم ولا انتم مش عطشانين....."

واول ما بدانا نمد ايدينا هبت فينا خضتنا بصت لماما "لا بلاش انتى يا حاجة البيبسى مش كويس عليكى علشان السكر اه بعدين تتعبى تقولى مننا"

انا بقى اتفرست قلت لها"طيب ما فيش دايت يا طنط؟

راحت بصت لى كده بثقة"لا والنبى مش بــــــــــايت" انا مبدخلش بيتى الا كل حاجة طازة! احنا لسه شارينه "

انا وماما قعدنا نضحك فى سرنا ورحت قلتلها" سورى يا طنط انا اقصد بيبسى من غير سكر"

بصت لى وقالت"لا ...انتى اصلك ليكى حاجات بصراحة مش عندنا وبعدين مش مهم احنا نبقى نعمل للحاجة حاجة تانيه"

حبيتن وبدانا نمد ايدينا على الجاتوه وكان فى طبق كل واحد حتة واحدة قالت لى "بلاش تاكلى منه كتير ...اه انا خايفة عليكى لحسن تتخنى وانتى مش ناقصة"انا بصراحة اتكسفت وكان هاين عليا احدفها بالشوكة والحوسها بالجاتوه"

وبصت لماما "وانتى بلاش يا حاجةعلشان السكر والنبى انا خايفة عليك ليعلا"

الصراحة حبه"وكانت هتقوم تلم الاطباق مننا ...وتقولنا كفاية كده اكل ومشاريب!

ماما قالت تحبوا نشترى بقيه الحاجات امتى؟وتحبوا نشترى ايه الاول؟

ردت طنط" السفرة دى اهم حاجة فى الجهاز..وانا عايزاها ب 12 كرسى"

انا وماما اتخضينا....ماما قالت"ايه يا حاجة سفرة ايه احنا اتفقنا على المطبخ الاميريكان" ايه لزومها السفرة؟

هبت فينا كانت هتعضنا"الحق يا ابنى اسمع شوف عايزين يجوزوك من غير سفرة علشان الناس تاكل وشنا"

انا قلت لها"يا طنط المطبخ الاميريكان مش بيحتاج سفرة..وفى سرى" 12 كرسى ينزلوا على راسك يفشفشوها ان شاء الله"

كوكو بص لماما"يا طنط اصل السفرة شىء اساسى عند ماما ..امال بس هناكل ازاى على الارض؟

بصراحة هو حسسنى انه هو ومامته اللى هيتجوزوا مش انا ...انا قلت له"يا ابنى افهم المطبخ الاميريكان فيه بار وكراسى يعنى مش بيحتاج سفرة.....ده حاجة مودرن"

الهانم سمعت كده هبت فيا" لا ...لا السفرة ام 12 كرسى يا بلاش...."اظاهر انها كانت عندها عقدة من رقم 12"

انا قلت فى سرى " بلاش ...بلاش وهو ده حاسباه عليا عريس....يا شيخة روحى افطميه الاول ...قال عايزة سفرة قال...روحى هاتيله عروسة لعبه!

ماما حاولت تفهمها بشويش وكوكو يقول.....معلش علشان خاطر ماما السفرة لازم دى حاجة اساسية عند الناس كل قرايبنا وجيرانا واصحابنا عندهم سفرة انا ابقى اقل منهم...وبعدين مش مهم نبقى نحط السفرة جنب البار"

انا بقى"اه ده على اساس انى ساكنه فى معرض مش شقة"

وكنت هطق من غباوته.... سفرة جنب مطبخ اميريكان فكرنى ساعتها بهانى رمزى"فى غبى منه فيه"ياربى هو بعينه بغباوته"

شوية وقعدت الهانم تبرطم وتقول"انا مش عارفة ايه التقاليع الغريبة دى شوية شوية هتقوليلى اوضة النوم لا كمان...وراحت بصت لى وقالت كله منك ومن "ميلودى"والشوف تايم"اللى لحسوا مخك"

انا وماما بصينا لبعض وقلنا نكتفى بالجرعة دى المره دى وقمنا نستاذن"

كوكو"معقول ودى تيجى يا طنط؟لا عيب والعشاء"

ماما قالت بسخريه لا يا حبيبى مفيش داعى احنا خلاص بطننا اتملت على الاخر كفاية كرم ماما معانا"

هى قالت"لا ودى تيجى بردوا لازم تتعشوا....امال انا حضرت المحمر والمشمر لمين انتم لازم تدوقوا اكلنا....لحسن تقوله علينا بخلا"

انا فى سرى"معقول بخلا ...حتى بامارة البيبسى والجاتوه"

شوية لقيناها جايبة الاكل وداخله بيه الاوضة قعدنا نبص شمال يمين ...مالقناش سفرة.....وشوية لقيناهم بيعزموا علينا والاكل محطوط على تربيزة صغيرة جدا شبه الطبليه!

كوكو"يلا يا جماعة اتفضلوا."

طنط" ايه انتم مكسفوين ولا ايه...يلا احنا اهل "

انا وماما انتباتنا حالات غريبة دخلت كلها فى بعضها شوية تنحان على ضحك على ذهول

انا بصيت لكوكو وقلت بسخرية"امال فين السفرة ام 12 كرسى؟؟

كوكو ضحك بهبل ورد قال"سفرة مين قال اننا عندنا سفرة ب 12 كرسى ده ولا ب6 حتى....اصل ماما بصراحة بتفضل الاكل على الطبلية اصلها صحية!!

وكل نقطة وانتم منقوطين!