الأربعاء، 27 فبراير 2008

بالدبل فرحونا.........ومن قفانا جرجرونا

النهاردة بقى كلنا قاعدين منتظرين الباشا العريس والست حرمه..عفوا اقصد امه وهما طبعا طلبوا يجوا علشان عايزين يحددوا ميعاد الفرح والشبكة والذى منه..
المهم وصل العريس والست مامته وقعدنا كالعادة نحط الحادق والحلو والسخن والبارد وقامت الست هانم قالت احنا بقى النهاردة جايين نحط النقط على الحروف ونتفق على ميعاد الفرح طبعا كان قصدها تنقطنا احنا مش الحروف ما علينا قالت احنا عايزين بقى نفرح بعروسة ابنى الجميلة دى وبننوس عين امه فى الكوشة واشيل ولادهم...
ماما قالت بعد ما ضحكت يارب يسمع من بقك ربنا وبصت لبابا وقالت شوف بقى يا حاج هنعمل الشبكة فين عايزين نفرح بالبنت دى اخر العنقود قام بابا قال طبعا امال واحنا عندنا كام عروسة ....احم احم انا طبعا دى انا
الست هانم بقى اتخضت كده وكأن لدعتها عقربة وبرقت كده وبصت لابنها وقالت فرح ! احنا هنعمل الشبكة والفرح مع بعض ويا ريت نوفر ويبقوا عندكم هنا فى البيت مهو واسع
بصراحة كلنا تنحنا وبصينا لبعض وبابا قالها ازاى يا ست هانم لا طبعا احنا عايزين نفرح ونعزم القرايب والاصدقاء وهنا مينفعش قامت طلعت زى القرد وقالت ليه يا حاج ما المكان هنا شرح وبرح وواسع اوى قلت فى سرى"يا ساتر عليكى كأنك هتوريثنا بالحياة....وكأنها التكية بتاعة باباكى قعدة تقسمى زى ما انتى عايزة يا ساتر"
ماما بصت كده واتنرفذت لا طبعا مينفعش يا ست حسناء كمان احنا لازم نعمل شبكة لوحدها وفرح لوحده امال البنت هتلبس الشبكة كده من غير حس ولا خبر؟ ازاى يعنى ايه الكلام ده؟
الهانم بقى اه ....لا ما هو اصل الشبكة هتكون حاجة بسيطة كده مش محتاجة فرح مش دى بردوا هدية العريس للعروسة؟
ماما بقى كانت هتخرج من شعورها ايه؟؟؟حاجة بسيطة يعنى ايه يا ابنى متتكلم احنا اتفقنا على شبكة كويسة تليق بالبنت ولا ايه؟؟
ولا انتم ناوين تشبكوها بدبلتين!! وفى سرى"والله تلاقيهم كانوا عاملين حسابهم على دبلتين فضة ....اه اصلها شبكة صيد مش دهب!
الباشا بقى بص لماما وقال اصل يا طنط ويبص لمامته ما تتكلمى يا ماما اه اصل كل حاجة ماما هى اللى بتعملها وتقررها وتقولها وشوية شوية هى اللى هتلبس الشبكة وتقعد جنبه فى الكوشة!!
المهم بصت لنا كده وقعدت تقول معلش الصبر جميل (وبسهوكة وحيلة)يا جماعة كوكو اصله معهوش فلوس يعمل فرح ....بينى وبين نفسى اه مهو اصله بيكاكى بس دى الحاجة الوحيدة اللى بيعرفها
بصينا لبعض وقلنا امال ايه؟دى احنا كنا عايزين نعمله فى دار او فندق يليق بمستوانا ..الهانم بقى قالت ايه...دار او فندق طيب وكوكو هيجيب منين بصوا اذا كنتم عايزين تعملوا اعملوا انتم اهو بردوا بتفرحوا ببنتكم..احنا بصراحة مش معانا تكاليف الفرح.اه شوية شوية كان هيبقى فرح فى فندق شوارعيكو!
بابا بقى حب يصلح الموقف قبل ما ماما ترتكب جناية وترميهم من البلكونة وقال خلاص ماشى يا جماعة الخطوبة علينا والفرح عليكم مفيش فرق راحت فرحت اوى كده وشمت نفسها اه اهو كده الكلام ...ماشى وربنا يسهل من هنا لحد الفرح وكأنها هتخنسر وهدبسنا ومش هتعمل فرح ولا حاجة
المهم ماما قالت وهى متغاظة منهم ومن بابا طيب يا ستى نتفق بقى على الشقة والعفش علشان نبقى على نور من اولها انتم طبعا عارفين مستوى البنت ولازم تكون الشقة كويسة وفى مكان كويس
راح الباشا بص لمامته اه طبعا ماما اتكلمى انتى ...اه اصل ماما هى اللى قاعدة جوا بقه وبتتكلم نيابة عنه.
قالت ان شاء الله بس يبقى وش العروسة حلو عليه واحنا نجيبها فى احسن حته ربنا يكرم "وكأنهم بيشحتوا على"
ماما قالت هو معندوش شقة؟؟قالت لها بصراحة لا بس ان شاء الله كوكو هيجيبها اهو يحوش هو والعروسة مع بعض مش هى بردوا بتشتغل؟؟؟ اهو القرش على القرش مع كام جمعية هيدخلها كوكو ويجيبوا الشقة ونفرح بيهم ...بصراحة كلنا اتخضينا وكأن الكلام نزل علينا رصاص ايه القرش على القرش يا خى قرش ياكلك انت وهى ..ونفرح بيهم دا احنا مش هنفرح خالص .
ماما قالت هو مش محوش تمن الشقة؟امال جى يتجوز ازاى؟ الست هانم حلمكم علينا يا جماعة براحة انتم عارفين شباب اليومين دول هما حيلتهم حاجة يا حسرة فلوسهم رايحة على المواصلات وعلى السجاير ومرتبهم ادى وش الضيف ..عينى عليهم معلش اعذروا وبصلة طبعا ده استنادا الى مقولة ده بصلة المحب خروف وهو اصلا محيلتوش حق لا البصلة ولا الخروف!
بابا بقى قال وبعدين يا بنى صحيح الكلام ده امال انت جى تتقدم على اى اساس ؟
بص لبابا بخجل وبلئم كده ...معلش يا عمى انت بردوا عندك اولاد شباب زى واكيد الظروف واحدة وانا والله هعمل كل جهدى والبركة فى ماما مش كده يا حبيبتى؟
هى بقى اه كده يا حبيب ماما والله لو معايا ما قصر يا كوكو
ماما قالت بس مش معقول كده يعنى احنا هنعمل خطوبة لحد امتى "انا قلت لحد اجل غير مسمى" طنط بقى ان شاء الله بالكتير سنتين ويتجوزوا ..ماما قالت طيب والعفش نظامه ايه؟
الهانم ردت محلولة هدخل كوكو جمعيتن باسمين وتدبر متقلقوش وانتم بقى همتكم معانا...وتبص لى وانت يا عروستنا يا حلوة خلى بالك من شغلك اوعى تسيبه الايد على الايد بتساعد وانا بصلها متنحة"اه ماشى شوية شوية تقوليلى انه هيقعد هو فى البيت وانا اللى هشتغل وارجع له بالمرتب واجيب له كمان السجاير!
يا دى النيلة ايه الخيبة دى ...والله انا حاسة انه بيشحت على وشوية شوية هناجر اوضة البواب نتجوز فيها يا دى الهنا يا دى الهنا ....اهو النحس جه وملاش غيرى انا "
الغريبة ان بابا قعد يمشى المواضيع ويطيب خاطر ماما وكأنه اخر راجل فى العالم اصل بابا كان نفسه يفرح بيه اوى وكمان كان بيقول انه شخص لا بيهش ولا بينش وانه طيب دى كانت وجهة نظر بابا وكمان انه بيتكسف ودى صفة مش موجودة فى شباب اليومين دول المهم ماما وافقت باعجوبة بس بشرط انه يجهز شقة وعفش خلال سنة
وطبعا ابقوا قابلونى دى ان اشترى جزمة وشراب يبقى كويس ...
وجاء يوم شراء الشبكة ...........وطبعا الهانم كانت محضرلناصايغ معرفتها حاجة وصاية بيبع نحاس مش دهب المهم موفقتش وقررت انى اختار الشبكة من عند الجوهرجى اللى يعجبنى اه ما هى دى الحاجة الوحيدة اللى هختارها "ما هى دبلة الخطوبة اللى تلبسها متتجوزش الا لما تبقى كركوبة".
ودخلنا المحل واتفرجنا وعينى كانت هتطلع على حاجات تحفة بس لميت الدور واختارت حاجات معقولة لكن لقيت الهانم مش عاجبها وعمالة تبص لابنها وتتامز يمين وشمال عايزة هى اللى تختار..مش بقولكم هى اللى هتلبسها!
كمان كانت اختيارتها ايه... بصراحة كريمة موووووووووووووووووووت طبعا بتريق ده الود ودها تشترى لى شبكة فضة اصلها بتعزنى اوى ومش بتبخل على بحاجة!
وشوية تغمز لابنها وتاخده على جنب عاملين يتفاوضه مع بعض على اللى هيدفعوه..واخرتها ماما اللى كملت فلوس الشبكة اصلها بصت لماما وقالت لها معلش مكناش عاملين حسابنا الا على دبلتين ومحبس وخاتم صغير كده طبعا ماما اتكسفت ادام الجوهرجى ودفعت الباقى وهزات راسها كده معلش الجيب واحد...وهى ايه شوية شوية هتولع فى الواد وامه والشبكة وانا كمان!
راحت الهانم بعد ما خرجنا مزغرطة بصوت مسرسع وهو ايه فرحان اوى وعمال يبوس فى ايدها وكتافها فكرنى بفيلم ابو العربى وصلاح عبد الله بيقول(الله الله عليكى يا ماما زغروتك حلوة اوى كمان يا ماما).
طبعا ما هى كانت فرحانة اننا بناخد على قفانا وعاملين ندفع وبعدين راحت بصلنا كده وقالت"طيب هاتوا الشبكة بقى نخليها عندنا لحد الفرح"
ماما اتغاظت موت وبصت لها كده ايه؟ الشبكة يا هانم بتفضل عند العروسة لحد يوم فرحها
الهانم بقى مش عاجبها طبعا قالت اه اصلنا عايزين نفرج قرايبنا عليها علشان يفرحوا
فى سرى"يا لئيمه...بقى بردوا علشان يفرحوا ولا علشان تضمنى حقك؟ اه اصلها خافت نرجع فى كلامنا راحت ماما اتكسفت وايدتهلها ...بصت لها وقلت بصوت واطىء"يــــــــــــارب تضيع منك ويتوه ابنك يا قادر يا كريم...
وساعتك تحب تقول ايه فى مناسبة زى ادى"حسبى الله ونعم الوكيل"

الأربعاء، 20 فبراير 2008

شــــوكة...وسكـينة...وشـــال يموه


طبعا النهاردة انتم مستنين تعرفوا ايه اللى حصل بعد قراءة الفاتحة........والحمد لله بعد مرور ايام واسابيع العريس بدات تتفك عقدته على ايدى أصله أظاهر كان معقد حبتين او كان عنده حالة معرفش ايه هى بالظبط المهم انه الحمد لله اتظبط وفك كده وبقى فريش على الاخر والاحلى انه بقى بيتكلم.......
وبدأ يجى يزورنا من غير ماما اخيرا بس لاحظت عليه حاجة انه كل مرة بيزورنا فيها بيجى ايد وراء وايد قدام فاضى ولا علبة شيكولاته ولا ورد ولا اى حاجة قلنا مش مهم يمكن بيحوش علشان تجهيز الفرح والذى منه.... وكنا فى يوم عازمينه على الغدا قام ايه بقى لقينه والحمد لله اينف اوى وبيقرف قال ايه من كل حاجة قلت فى عقل بالى "وكأننا حاطين صراصير فى الاكل "المهم حطينا الآكل على السفرة اللى اللى بعتقد ان ماما طبعا فى البيت بتقوم بدور السفرة وبتأكله هى فى بقه "ننوس عين أمه".
وحطينا الاكل قدامه وبدانا اولها بشوكة وسكينة؟ وبصراحة شكلنا كده كنا هننتهى بالاخرانيه !وشوية مين العامل دى؟؟ ومين الغاسل الطبق ده؟؟ومين اللى حطه على السفرة؟؟ وشوية شوية هنتسأل جبنا أكل والخضار منين ومين الوصلهم لحد البيت؟ والميه اللى بنغسل بيها متفلترة ولا لا؟ لغاية ان شاء الله ما هنوصل لمين اصلا اللى اخترع الاطباق......يعنى المهم مش هنسيب ولا عامل فى مصر الا لما نجيب سيرته وشوية كمان كان هيأخد بصماتنا!!
قلت يا بت اصبرى خلى نفسك طويل هو العمر فاضل فيه اد ايه؟ودايما معاه كنت اتحلى بسياسة النفس الطويل
واللهم طولك يا روح بالرغم من انها طولت لحد ما بقت اد زلومة الفيل! وكلنا بقينا نأكل وسيبينه مع نفسه يعك اللى عايز يعكه احسن ما كلنا هنقوم عليه ضربة رجل واحد......وحبتين بعد الاكل قمت قدمت عصير لقيته بيطلب منى شال يموه"اصل ألواد إيه ابن ذوات" وانا هتنقط منه وقلت يا سلام شال يموه والله تلاقيك بتشرب من عند عم حنكورة بتاع العصير اللى على ناصية بيتكم..حاجة ايه مش اى كلام وقلت ما علينا لما نشوف بقى هنتكلم مع بعض نقول ايه..لقيته عمال يتكلم عن ماما طول القعدة ماما بتطبخلى الاصناف اللى بحبها انتى بتعرفى تطبخى؟ وانا ايه شوية وهتشل وقلت والله كبيرك معايا سندوتشات فول وطعمية طالما القعدة هتبقى على ماما
وشوية ماما دى ست طيبة جدا وبتحبك خالص تعرفى اصلها ست بتعرف ربنا ومتدينة اوى تعرفى انا جبت لها الدش مخصوص علشان تتفرج على القنوات الدينية اصلها مبتحبش غيرهم رحت قلت له بجد والله طيب كويس وفى سرى"وانما الاعمال بالنيات!!وبقيت عماله ادبدب برجلى كده على خفيف واخبط بايدى على رجلى ها....وبعدين "اظاهر اننا مش هنخلص طالما مجتش يبقى القعدة كلها عليها لا كانت جت احسن على الاقل كنا اتكلمنا فى حاجة تانية يا دى النيلة على البخت".
تعرفى اصل ماماه.....رحت هبا فيه ايه هو النهاردة مفيش حاجة غير الكلام عن ماما ولا ايه يا ريت حضرتك تغير المحطة راح قال وهو مكسوف تحبى نتكلم فى ايه اه اقولك كلمينى عن نفسك والله ساعتها حسيت انى قاعدةمع واحد من زمن الاستاذ عبد الوهاب ...او مع دكتور نفسانى رايحة اتعالج عنده كل ده وانا مستحمله واعدى واقول يلى مش مشكلة لسه هنعرف بعض اكتر وشوية لقيت ربنا هيفتح عليه فى الكلام وهينطق وبدأت شفايفه تنفصل عن بعضها لقيت موبايله رن!!
رد... اه اهلا ماما وحشتينى يا حبيبتى حاضر حاضر بس كده حاجة تانى...عيونى يا ست الكل اامرينى حاضر والله مش هنسى ربع ساعة واكون عندك...مش هتأخر متخافيش لا اله الا الله وقفل"تعرفوا كان هاين على اشيله هيلا بيلا وارمى من على السلم واحنا ايه ساكنين فى الدور التاسع "
"وبغيظ"قلت ايه خير ان شاء الله قالى خير لا بس اصل ماما بتطمئن على وبتقولى متاخرش علشان عايزانى اجيب طلبات وانا مروح للبيت.
بصراحة انا اتخضيت وهبيت فيه ايه؟اصلى استغربت هو لسه فى راجل فى الدنيا بيروح يجيب الطلبات من السوق لمامته؟دى البنت مبتعملهاش !!وبردوا قلت معلش اصبرى يا هبلة دى حاجة حلوة الراجل متعاون واكيد بعد كده هيساعدك انتى كمان....وبعدين قلت له هو انت اللى بتجيب الطلبات واختك مش بتجيبها ليه؟ قالى اصلها مش بتعرف تشترى حاجة انا اللى بعرف اشترى كل حاجة فى البيت!وكان كله فخر وسعادة الواحد بردوا لازم يشترى الحاجة بنفسه رحت قلتله "بتريقة"اه معلش اسفة اصل معلوماتى ان الحاجات دى تخصص ست البيت معلش" قام قال لى نبقى نكمل كلامنا بعدين ممكن استأذن علشان وعدت ماما متاخرش سلام بقى...قلت له بسخرية اه طبعا واحنا نقدر على ذعل ست الكل مع الف سلامة ويا ريت تبقى تشرب اللبن قبل ما تنام وتغسل رجليك..
وابتسمت كده بغيظ وصرخت ماما بابا تعالوا سلموا ومن وراءه بعد ما خرج كنت هحدف الاطباق اكسرها على راسه وقلت فى سرى" منك لله يالى كنت السبب"!!.

السبت، 16 فبراير 2008

يا فرحتى يا فرحتى ....النهارده قراية فاتحتى



النهاردة بقى هو يوم وميعاد الزيارة التانيه للعريس اياه ابن امه .كلنا قاعدين لابسين وجاهزين ومحضرين الحلو والحادق ومن كله حاجات انما ايه عمر ماماته ما شفتاها .بس يلى قلت مش خسارة لغاية دلوقتى هو عريسى....
وسمعنا صوت ناس كتير تحت البيت رحنا جرينا انا وقرايبى على البلكونه وبصينا لقينا العريس وامه واخوه وخلانه وخلاته....اتخضينا ايه ده يا منيل جايب معاك الفريق القومى ماما كانت هتصوت قالت ايه ده كله "وبرقة"ايه شغل الناس البلدى ده هو احنا لسه عملنا حاجة امال فى الخطوبة هنعمل ايه ..وبتكلم نفسها خلاص كانت هتتجنن "اه اكيد هيجيب الشارع كله معاه ....لالالالا انا قلبى مش مستريح للجوازة دى طيب كان يقول دى قلة ذوق .معلش اصل ماما ست بنت ناس كده وابهه حاجة عليوه مش زى ست قفا عفوا... اقصد الست حماتى وبعدين شرفونا ومبقناش عارفين نقعدهم فين بالرغم من ان الريسبشن كبير لكن العدد كان كتير وقعدنا نسلم هنا وهنا ونحط طبق هنا وهنا وكوباية هنا لما تعبنا وكان هاين علينا نقولهم قوموا معندناش بنات للجواز.

شوية ابص الاقى واحدة عملة الوانات كتير كده والتانية حط ورد هنا وهنا زى الست اللى كانت فى عبد الغفور البرعى"لابسة ورد ورد ورد"والتالتة الانيقة اللى فيهم كانت عاملة حاجات غريبة اوى قلت ايه دول ستات زينا ولا انا بيتهيالى!!ولقيت ماما كل شوية بتضحك من تحت لتحت وكأنها بتتحسر على وعايزة تقول ايه دول بقى دول قرايب دول!.وبصراحة كمان كانوا اوفر فى الكلام.
شوية يبصولى من تحت لتحت وواحده تطبطب على كتفى شوية كده وكانت هتخلعهولى وتاخده وهى ماشية وحبتين واحده تطبطب على رجلى وحماتى تقولى خدى قشريلى دى"فاكرونى بمارى منيب "مع لبنى عبد العزيز." وهى بتقولها خدى قشر البندق باسنانك علشان تشوفها مركبة طقـم ولا لا!.
قال يعنى بيطمنوا وكانوا بيعملولى كشف هيئة علشان كده الباشا كان جايب معاه كونسولته.
مع انهم كلهم فى نظرى رجالة مقلوبين ستات....المهم واللهم طولك يا روح ضحكة صفرا لديه وفتحة بق لديه وهزة راس لديه الحكاية مشيت المهم اننا خلصنا كل الاصناف اللى عندنا وكانهم ماكلوش بقالهم سنة والبت الشغالة ياعينى غلبت معانا كانت شوية وهتسيب لنا البيت يضرب يقلب وجت حطت اخر حاجة قدامهم قاموا ايه بصوالها كده وسلمواعليها وقالولها" انت ليه مش بتقعدى معانا كل شوية تقدمى حاجة وتدخلى "الهوانم كانوا فاكرينها قريبتنا"رحت قلتلهم لا دى الشغالة وممسكتش نفسى من الضحك وقلت فى سرى عادى ما يضرش....بس يلى كل ده ما كانش فارق معايا اد ما كان فارق الراجل اللى هتجوزه المهم هو اى نعم كل واحدة من قرايبه كانت بتزغر لجوزها من بعيد كان بيتكتم لكن قلت وانا مالى المهم هو ...انا عايزة راجل اسمع كلامه مش العكس وقلت يمكن هو مش زيهم وخليكوا فاكرين كلمة راجــــل دى اوى ها.......علشان هنحتاج لها بعد كده فى كلامنا كتييييير .حبيتين وراحت الهانم حماتى فطت كده زى الفالوطة وقالت"نقرأ الفاتحة" وكنا يعنى متكلمناش فى حاجة ولا دخلنا فى تفاصيل والرجالة ما شاء الله عليهم ولا كلمة ولا نفس كأنهم فى معسكر وبياخدوا الاوامر من الستات .قام بابا وماما اتكسفوا وحسوا انهم ادبيسوا المهم قراناها . وشوية وزغروطة والعريس ولا هو هنا وكأننا كنت بنقراها لحد تانى خالص يعنى بصراحة الراجل عمل اللى عليه كفاية انه لبس وجه ورفع ايده قرا الفاتحة وسلم الحمد لله مشيوا وصوت حماتى لسه بيرن فى ودنى مبروك يا كوكو صبرت ونلت يا عيون ماما يلى بقى سندنى يا حبيب ماما وراح الباشا كوكو مسلم ومسند ماما ووخدها فى ايده ولا الحابيبه.
وبصيت لقيت المعسكر اللى عندى بيبصلى وبيقولولى"بتريقة" مبروك يا سوسو خلاص قرانا الفاتحة .
فبصيت لهم بغيظ كده وقلتلهم اه احنا قرانا لكن كل واحد ونيته وانا نيتـــــى بقى"وبسخرية"اتمنيت انها تكون على روح الــمـــــرحومة !!.

الجمعة، 15 فبراير 2008

الحليــــــــــــــــــــوة ابن أمـــــــــــــــه



احلى احساس فى الدنيا لما الواحدة تحس انها مرغوب فيها وجايلها عريس ويا سلام بقى لو كان واد حليوة تبقى ايه زاطــــــت .

المهم رحت فرح مع ناس قرايبنا فرح يعنى مش اد كده بصراحة كان دون المستوى اه اصلى مش بحضر اى فرح وبعدين لقيت هناك واحدة ست ايوا والله تشبه الستات بتبص على اوى وعماله تبحلق وتدقق من فوق لتحت شوية شوية هتاكلنى فعملت نفسى مكسوفة ومش واخدة بالى حبة ولقيتها ساحبة قريبتى زى الحرامية وهاتك يا رغى وودوده قلت عادى يمكن بتسال على حاجة.وشوية لقيتهم بيبصولى وبيتكلموا قلت اه دى الحكاية فيها اينا يمكن فى حاجة انا لابسها عجبتها ....اه اصلى انا بنت امورة ولذيذة كده....بعدين لقيتها بتسلم على قريبتى اوى وهزت لى راسها قال يعنى تعرفنى رحت ضحكت ضحكة خفيفة كده بتاعة الناس المؤدبه ولقيت قريبتى لما روحنا البيت فرحانة اوى وقالت لى دى عايزة عروسة لابنها وانتى عاجبتيها اوى ايه رايك؟؟؟

بصراحة انا فرحت وزقططت كده من جوايا لكن قلقلها انا ماليش دعوة قولى لماما .....وقلت فى عقل بالى "يارب ميطلعش زى اللى قبله". اصلهم كانوا عايزين متحف يتحطوا فيه

وفضلت الست اللى المفترض هتبقى حماتى هاتك يا تليفونات دوشتنا عايزة تعرف راينا قلت كويس دا انا عاجبتها خالص ودى بداية مشرقة للتعامل مع الحموات لكن اللى كان بيشغلنى سؤال......هو لسه فى رجالة بتسمع كلام ماماتها حتى فى اختيار العروسة ؟

قلت مش مهم يمكن الراجل مودب ومش بيعرف حد صحيح امال هيتجوز ازاى شكله راجل محافظ وكمان مطيع لاهله وطالما بيحبهم يبقى اكيد هيحبنى ويحافظ على.

المهم ان قريبتى كانت فرحانة اوى وكان العريس جايلها هى وقعدت تقولى دى امه ســـت تحفة دمها خفيف وزى العسل شربات ياريت حماتى تكون زيها........

قلت يلى لما نشوف وجاء اليوم المعتاد ودق جرس الباب طبعا اتشيكت كالعادة واستنيت فى الاوضة لما ينادوا على بس ايه بصيت كده شوية من بعيد وهما داخلين اطقص واشوف الاخبار ايه.

وللاسف مشوفتش حاجة لكن قريبتى جت فرحانة وقالت يالهوى الواد حليوة ومسمسم فرحت اوى قلت اخيرا واد حليوة احمدك يارب"فى سرى طبعا".اه هو انا مدلوقة ولا ايه؟هما مش عارفين هيناسبو مين ولا ايه؟

واستنيت لحد ما جه ميعاد كشف الهيئة وخرجت وسلمت وقعدت جنب ماما بس اول لما خرجت لقيته قاعد على الكنبه لاذق فى ماماته وشوية شوية هيطلع فوق حجرها حبة وقدمت العصير وحطه وشى فى الارض لكن ببص بردوا وازغد من تحت لتحت لقيته كمشان كده ومقلوب جوه بعضه .

قلت مش مهم علشان اول مرة يمكن بيتكسف ولو انى مش عارفة رجالة ايه دى اللى بتتكسف امال احنا نعمل ايه؟

لكن بصراحة الواد كان حليوة وشكله وسيم وبعدين لقيت الست مامته بتمسك العصير وتدهوله فى ايده وتتحايل عليه يشرب خد يا حبيبى خد اشرب يا كوكو .
بصراحة انا اتخضيت ايه ده شوية شوية هتجيب بزازة .....ايه هو الاخ ابن امه ولا ايه؟اه شكل الليلة مش معدية وغطينى وصوتى على ياما دمى هيفور حبتين كمان ومدت ايدها خدت بيتى فور وشوية راحت حطت له واحدة فى بقه ....قلت اللهم طولك يا روح خلينا شوية بلاش نظلم الراجل.
وقعدت ابص كده على الهانم امه يا سلام ست كاملة بصحيح "بسخرية"لابسة ومتشيكة على سنجة عشرة ومنزلة قصتين وحطة 2 كيلو بوية فى وشها ومهشتكة كده وشايفة نفسها على الاخر قلت ميجراش وانا مالى المهم هو......
واستنى يفتح بقه وهو كانه مش فى الدنيا ولا اللى عليها
قلت فى سرى"يا روش اتكلم يا ابن الناس الكويسين افتح بقك"ولكن لا حياة لمن تنادى
والست مامته عماله تقول احنا هنجيب ونعمل وعندنا كل حاجة بس العروسة تأمر وتشاور على الهى عايزاه وتعاكسنى منبعيد والنبى طعمة وحلوة شوية شوية هتجوزنى هىمش ابنها.ومع ذلك قلت متتسرعيش اديله فرصه معلش الجدع شكله خرج بيوت ومالوش فى سكة العط ولا ديوله وبردوا يعنى دى حاجة حلوة اهو مش هيبص كده ولا كده وهيكون على اد ايدينا...
المهم ماما وبابا كل ما يجوا يتكلموا تقول كله موجود شبكة مهر عفش فرح كل حاجة فى احسن مكان حضر دا احنا نديها عينينا بس هى تشاور وكوكو ينفذ دى يجيبلها حتة من السما واحنا نلاقى زى عروستنا؟
قلت فى عقل بالى "لا طبعا وانتم تطولوا"دا انا الحمد لله من كله.يعنى بيضة مقشرة.....
واتفقنا على كل حاجة وقاموا يمشوا لقيته بيسلم على وايده ناعمة ولا البنات خرع كده ذى الجيلى وبردوا قلت مش مشكلة يمكن ما بيروحش "جيم".
وبعدين احسن ما الواحدة تاخد واحد ناشف يكسر عضمها زى ناس وافتكرت واحدة جارتنا كان جوزها طويل وعريض جتة يعنى بس ايه كان مفشفشها وكانت دايما تقول بموت فيه لحد ما هتموت منه مش فيهّ!
ما علينا المهم سلمت عليه وعلى طنط اوسة"اقصد حماتى مستقبلا"وهى عمالة تبوس وتحضن وتطبطب على ولا اللى مشفتش بنات طول عمرها......وبعدين لقيتهم عندى بيبصوا لبعض ويقولولى ها ايه رايك؟قمت بصيت وضحكت وفى سرى يلى اهو حليوة ومسمسم لما نشوف هنستنى لحد امتى؟ اهو جدع وخلاص وعلى راى المثل "ضل راجل ولا ضل حيطة" وقريبتى الله يخليها بصت كده وقالتلى
ها اظن الراجل ما يتعيبش وامه كمان سكره ده يتاخد من وشها "فبصيت لها لده وقلتلها برقة اه انتى شايفة كده قالت اه طبعا قلت لنفسى"ولو انى عندى احساس كده انها هتاخد على قفاها......."اقصد يتاخد من قفاها"
والبقيـــــــــــــــــــة تاتى!!!!!

الخميس، 14 فبراير 2008

الجــــــــــــــــــــــواز من افنــــــــــــدينا


تخيلوا اول مرة يدق بابنا عريس....ولما سمعت ماما بتقول فى عريس اتقدملك قلت زى نبيلة السيد فى الفيلم" معجولة دى عريس يا بوى" ..عريس يا ماي.مع العلم انى كنت اليطة ونغشة وحلوة كده وشايفة نفسى حبتين ولما عرفت ان فى عريس جاى ولسه واصل من بلاد بره طازة قلت لا لازم تبانى يا بت وكأنك بدر منور ولا القمر فى زمانه وقعدت اشوف هلبس ايه واحط فوشة هنا وفوشة هنا وفجاءة لقينا الباب بيخبط فقلت للهانم اختى اللى مبتتحركش من مكانها ابدا انت يا فالحة قومى افتحى الباب شوفى مين اللى متصربع على عمره ده ..قامت قالت يوه كل حاجة انا هو مفيش غيرى فى البيت ده ولا ايه؟؟قلتلها معلش افتحى ياختى وامرك لله بكره اوصى بابا يجيبلنا شغالة او واحدة تقعد وراء الباب شغلتها تفتحه وتقفله علشان الهانم على رجليها نقش الحنة.افتحى ياختى افتحى وفتحت لقيت عيل صغير بيقولها عمو بيقولكم انه هيجى كمان ساعة ماشى ابقى قولى لبابا يا شاطرة.قامت الهانم اختى اتامزت بشفايفها وخرجت صوت ولا صوت الضفدعة شاطرة طيب يا سيدى تأمرش بحاجة تانية؟وقفلت الباب وبعدين قالت اجهزوا بقى لحسن العريس باشا هيجى كمان ساعة ولازم يشوفنا على سنجة عشرة يلى يا ختى انتى وهى عايزين نخلص منكم بقى .قلتلها طيب يلى يا حلوة روقى البيت لحسن قرب يجى وايه كل واحدة منهم قعدت تتحايل على التانية ويتعزموا على بعض.المهم لبست واتشكيت على الاخر وحططت ميكب وقعدت ابص فى المراه واقول ما تزوقينى يا ماما اقوام يا ماما واختى تبصلى وتقلى مين ادك النهاردة لما نشوف بقى العريس شكله ايه وانا قلت اه اياك يطلع واد حلو كده ومسمسم مش عجر.وقعدنا نعمل العصير ونحضر الجاتوه لغاية لما الباب خبط قمنا كلنا جرينا نستخبا وكاننا هنلعب استغماية فماما قالت يا هبلة انتى وهى يا خيبتنا وقمنا بصينا لبعض وضحكنا قالت واحدة تفتح يا مزاغيد الراجل على الباب راحت الهانم الصغيرة فتحت وهى راسمة الدور ومكسوفة وصوتها واطى ومش طالع وقالت اهلا بحضرتك ثوانى انادى بابا فسمعنا بيقولها اوام يا شاطرة قالت فى سرها "شاطرة هو كله النهاردة بيقولى يا شاطرة ليه ايش عارفهم انى شاطرة ومش خيبة "بابا يا بابا واحد بيسأل عليك ادخله فرد بابا طبعا وقليله ثوانى وجاى قامت قالت له اتفضل فى الصالون فبصينا كلنا من بعيد لقينا واحد طويل زى النخلة وشايل فى ايده ورد والايد التانية فى جيبه وايه دخل بيه مسبهوش بره اظاهر كان هياخده وهو نازل تانى.ولما بابا راح وسلم عليه قاله انا الاستاذ سيد محاسب بشركة مقاولات فبابا قال اهلا وسهلا تشرفنا واخواتى هاتك يا ضحك سيد اسمه سيد الاسامى دى بطلت من زمان ويضحكوا رحت مصبرة نفسى وعلشان الكسفة قلتلهم ايه الراجل مش باسمه يا هطل بشخصيته فقعدوا يضحكوا ويغنوا بصوت واطى سيد يا سيد قمت قلت فى سرى يفضحك ربنا الحكاية باينة من اولها مش كفاية انه شبة الزعافة !سمعنا بابا عمال يقول شرفت يا بنى يا مرحب البيت نور وهو ايه يا سلام على الالطه اللى اهله فيها حاطط رجل على رجل ويقول مرحب بك يا عمى طبعا البيت منور بيه وبصحابه قام بابا نده ماما يا حاجة تعالى سلمى على الضيوف وفين الواجب انتى بخيلة ولا ايه؟وضحك الشاى اوام راح المخفى رد وقال لا بلاش شاى عادى انا مش بشرب الا ابو فتلة قام بابا قال وهو محرج هاتوا حاجة ساقعة احسن وجاتوه يقوم يرد يقول انتم بتجيبوا الجاتوه من ابو كام ؟؟فبابا دارى على الموضوع ندخل فى التفاصيل يا بنى ايه طلباتك؟ساعتها ماما نادت على براحة تعالى خدى الحاجة وقدميها ...
رحت داخلة معاها وقلت بردوا ميجراش اهو ناخد فكرة ونبص بصة يمكن من قريب احسن وقدمت الساقع والجاتوهوسلمت انا وماما ولما بصيت ودققت فى شكله قلت فى سرى اعوذ بالله ايه ده وعلى ايه الالطة دى خسارة الجاتوه فى جتتك دا احنا جايبين الحتة ب 2.50يعنى مش لاى حد وقلت ولو ان الشكل مش كل حاجة اما نشوف يمكن يكون فى مميزات تانية وشوية ماما غمزتنى قال يعنى افتحى بقك واتكلمى وانا ايه منطقتش وقعد يقول لبابا انا كنت مسافر الامارات وعندى كل حاجة شقة لا شقتين فاتحهم على بعض فى مدينة نصر وعندى مكتب محاسبة بتاعى مشغل فيه تلاتة فكرنى بالراجل اللى كان مع محمد صبحى انا عندى تلاتة وكمان عندى يا عمى عربية اخر موديل وهجيب لعروستنا عربية والشبكة اللى تختارها وكمان ممكن افتحلها سنتر تجميل اهو تتسلى رحت قلت لنفسى بغيظ"السنتر ده تفتحه ليك انت علشان انت محتاج يجى 100 عملية تجميل"وحسيت كده انه اليط ومتعنتظ ومناخيره فى السما على ايه مش عارفة وكل حاجة يستعرض قاعد يقولى تعرفى يا انسة انا بحط اغلى برفان فى العالم ايو والله رحت ابتسمت ابتسامة خفيفة وقلت من تحت درسى اه شمه ما هو واضح وانا عماله اقول الريحة الغريبة دى جاية منين؟قام فرح اوى بنفسه كده وقام قال اصلى برفان يجنن رحت هزا راسى اه اه ماشى وكمان تعرفى انا بلبس اغلى انواع الهدوم والساعات كله مستورد وحياتك ولو لقيت حد لابس حاجة موجودة عندى برميها حتى ولو مكنتش لبستها غير مرة واحدة بصراحة حسيت انه اوفر اوى قلت فى سرى ايه ياربى ده ايه البلوة ده انا عايزة واحد لذيذ وابن ناس بجد مش بيتمنظر ايه فين الرجاله الحلوة المتواضعة اللى تجذب الواحد من اول نظره؟ودورت وشى لماما وبصوت واطى بقى دى يبقى اخرة صبرى حرام عليكوا يرضيكى برضه اتجوز الزرافة الاليطة دى؟ راح بابا خد باله وقال اهلا اهلا يا بنى والله ولاد الاصول بيبان عليهم قام الظريف بصلى وهو بيضحك وانتى بقى بتحب تلبسى اى ماركات؟اه علشان ابقى ابعت اجيبهملك من بره رحت بصله ها انا مش بلبس بتريق راح مخضوض كده على عمره قلتله اقصد مش بلبس الا مصرى بحب المصرى على راى نانسى عجرم وبشجع الصناعة المصرية اوى اصل اللى من بره مش بيعجبنى اصله بيبقى منفوخ كده ونافش ريشه على الاخر وطبعا انا كنت برمى الكلام علي ساعته وبعدين راح قال طيب تحبوا اجيب الحاجة امتى؟علشان تتعرف وقبل ما نرد النور قطع!!!!!!رحت قلت بلاش بلاش تيجى خليها مكانها وفى سرى اذا كان قطع منك ومن وشك امال لما تيجى هى هتولعولنا فى البيت؟يا دى النيلة على البخت انا ناقصة عله مكفاية الواحد معلول بما فيه الكفاية وفجاءة لقيت بابا بيقول بنت رحت قلت انا اقصد ان احنا اللى نروحلها يا بابا خلي الحاجة مستريحة واستأذن وعلطول النور جه راحوا اخواتى ضحكوا بصوت عالى وقالوا بسخرية" الخير على قــــــــدوم العرســـان ".