الجمعة، 15 فبراير، 2008

الحليــــــــــــــــــــوة ابن أمـــــــــــــــه



احلى احساس فى الدنيا لما الواحدة تحس انها مرغوب فيها وجايلها عريس ويا سلام بقى لو كان واد حليوة تبقى ايه زاطــــــت .

المهم رحت فرح مع ناس قرايبنا فرح يعنى مش اد كده بصراحة كان دون المستوى اه اصلى مش بحضر اى فرح وبعدين لقيت هناك واحدة ست ايوا والله تشبه الستات بتبص على اوى وعماله تبحلق وتدقق من فوق لتحت شوية شوية هتاكلنى فعملت نفسى مكسوفة ومش واخدة بالى حبة ولقيتها ساحبة قريبتى زى الحرامية وهاتك يا رغى وودوده قلت عادى يمكن بتسال على حاجة.وشوية لقيتهم بيبصولى وبيتكلموا قلت اه دى الحكاية فيها اينا يمكن فى حاجة انا لابسها عجبتها ....اه اصلى انا بنت امورة ولذيذة كده....بعدين لقيتها بتسلم على قريبتى اوى وهزت لى راسها قال يعنى تعرفنى رحت ضحكت ضحكة خفيفة كده بتاعة الناس المؤدبه ولقيت قريبتى لما روحنا البيت فرحانة اوى وقالت لى دى عايزة عروسة لابنها وانتى عاجبتيها اوى ايه رايك؟؟؟

بصراحة انا فرحت وزقططت كده من جوايا لكن قلقلها انا ماليش دعوة قولى لماما .....وقلت فى عقل بالى "يارب ميطلعش زى اللى قبله". اصلهم كانوا عايزين متحف يتحطوا فيه

وفضلت الست اللى المفترض هتبقى حماتى هاتك يا تليفونات دوشتنا عايزة تعرف راينا قلت كويس دا انا عاجبتها خالص ودى بداية مشرقة للتعامل مع الحموات لكن اللى كان بيشغلنى سؤال......هو لسه فى رجالة بتسمع كلام ماماتها حتى فى اختيار العروسة ؟

قلت مش مهم يمكن الراجل مودب ومش بيعرف حد صحيح امال هيتجوز ازاى شكله راجل محافظ وكمان مطيع لاهله وطالما بيحبهم يبقى اكيد هيحبنى ويحافظ على.

المهم ان قريبتى كانت فرحانة اوى وكان العريس جايلها هى وقعدت تقولى دى امه ســـت تحفة دمها خفيف وزى العسل شربات ياريت حماتى تكون زيها........

قلت يلى لما نشوف وجاء اليوم المعتاد ودق جرس الباب طبعا اتشيكت كالعادة واستنيت فى الاوضة لما ينادوا على بس ايه بصيت كده شوية من بعيد وهما داخلين اطقص واشوف الاخبار ايه.

وللاسف مشوفتش حاجة لكن قريبتى جت فرحانة وقالت يالهوى الواد حليوة ومسمسم فرحت اوى قلت اخيرا واد حليوة احمدك يارب"فى سرى طبعا".اه هو انا مدلوقة ولا ايه؟هما مش عارفين هيناسبو مين ولا ايه؟

واستنيت لحد ما جه ميعاد كشف الهيئة وخرجت وسلمت وقعدت جنب ماما بس اول لما خرجت لقيته قاعد على الكنبه لاذق فى ماماته وشوية شوية هيطلع فوق حجرها حبة وقدمت العصير وحطه وشى فى الارض لكن ببص بردوا وازغد من تحت لتحت لقيته كمشان كده ومقلوب جوه بعضه .

قلت مش مهم علشان اول مرة يمكن بيتكسف ولو انى مش عارفة رجالة ايه دى اللى بتتكسف امال احنا نعمل ايه؟

لكن بصراحة الواد كان حليوة وشكله وسيم وبعدين لقيت الست مامته بتمسك العصير وتدهوله فى ايده وتتحايل عليه يشرب خد يا حبيبى خد اشرب يا كوكو .
بصراحة انا اتخضيت ايه ده شوية شوية هتجيب بزازة .....ايه هو الاخ ابن امه ولا ايه؟اه شكل الليلة مش معدية وغطينى وصوتى على ياما دمى هيفور حبتين كمان ومدت ايدها خدت بيتى فور وشوية راحت حطت له واحدة فى بقه ....قلت اللهم طولك يا روح خلينا شوية بلاش نظلم الراجل.
وقعدت ابص كده على الهانم امه يا سلام ست كاملة بصحيح "بسخرية"لابسة ومتشيكة على سنجة عشرة ومنزلة قصتين وحطة 2 كيلو بوية فى وشها ومهشتكة كده وشايفة نفسها على الاخر قلت ميجراش وانا مالى المهم هو......
واستنى يفتح بقه وهو كانه مش فى الدنيا ولا اللى عليها
قلت فى سرى"يا روش اتكلم يا ابن الناس الكويسين افتح بقك"ولكن لا حياة لمن تنادى
والست مامته عماله تقول احنا هنجيب ونعمل وعندنا كل حاجة بس العروسة تأمر وتشاور على الهى عايزاه وتعاكسنى منبعيد والنبى طعمة وحلوة شوية شوية هتجوزنى هىمش ابنها.ومع ذلك قلت متتسرعيش اديله فرصه معلش الجدع شكله خرج بيوت ومالوش فى سكة العط ولا ديوله وبردوا يعنى دى حاجة حلوة اهو مش هيبص كده ولا كده وهيكون على اد ايدينا...
المهم ماما وبابا كل ما يجوا يتكلموا تقول كله موجود شبكة مهر عفش فرح كل حاجة فى احسن مكان حضر دا احنا نديها عينينا بس هى تشاور وكوكو ينفذ دى يجيبلها حتة من السما واحنا نلاقى زى عروستنا؟
قلت فى عقل بالى "لا طبعا وانتم تطولوا"دا انا الحمد لله من كله.يعنى بيضة مقشرة.....
واتفقنا على كل حاجة وقاموا يمشوا لقيته بيسلم على وايده ناعمة ولا البنات خرع كده ذى الجيلى وبردوا قلت مش مشكلة يمكن ما بيروحش "جيم".
وبعدين احسن ما الواحدة تاخد واحد ناشف يكسر عضمها زى ناس وافتكرت واحدة جارتنا كان جوزها طويل وعريض جتة يعنى بس ايه كان مفشفشها وكانت دايما تقول بموت فيه لحد ما هتموت منه مش فيهّ!
ما علينا المهم سلمت عليه وعلى طنط اوسة"اقصد حماتى مستقبلا"وهى عمالة تبوس وتحضن وتطبطب على ولا اللى مشفتش بنات طول عمرها......وبعدين لقيتهم عندى بيبصوا لبعض ويقولولى ها ايه رايك؟قمت بصيت وضحكت وفى سرى يلى اهو حليوة ومسمسم لما نشوف هنستنى لحد امتى؟ اهو جدع وخلاص وعلى راى المثل "ضل راجل ولا ضل حيطة" وقريبتى الله يخليها بصت كده وقالتلى
ها اظن الراجل ما يتعيبش وامه كمان سكره ده يتاخد من وشها "فبصيت لها لده وقلتلها برقة اه انتى شايفة كده قالت اه طبعا قلت لنفسى"ولو انى عندى احساس كده انها هتاخد على قفاها......."اقصد يتاخد من قفاها"
والبقيـــــــــــــــــــة تاتى!!!!!

هناك 16 تعليقًا:

موجة يقول...

انا جاي أحجز أول تعليق
وراجع أقرأ تاني

موجة يقول...

هههههههههههه
بداية جامدة قوي يا جنة
واضح اننا كسبنا مدونة ليها وزنها في عالم التدوين
مبروك علينا
بس عارفة
انا كده ممكن أبقى آخد خبرة من الأمور دي علشان لما أروح أتقدم أعرف أتفادى ايه
هههههههههه

عبدٌ من عباد الله يقول...

الحمد لله ان الواحد اتجوز من زمان
على كل مستنيين الباقى

و يا ريت بلاش صورة الطفل اللى بيشرب سجاير دى حقيقى مش كويسه

فى صور كتير جميلة ننكم تحطيها

أنا إنسان يقول...

أولا
الظاهر ان حضرتك عامله خطه للكتابه في هذه المدونه الكريمه
ثانيا
عجبني جدا النقد الساخر ده
بس ياريت توضحي ايه هدفك من النقد
!!!!!!!!!!
ثالثا
الاسلوب العامي اللي حضرتك بتكتبي بيه في قمه الرشاقه والجمال
بس فيه الفاظ غريبه شويه
عموما
جميل جدا
.........
ملحوظه
ياريت تشيلي الفيرفكشن

عروس البحر يقول...

مدونتك جميلة موت
تحياتي

Eman Eltaher يقول...

هههههههههههههه
لا بجد كتاابتك حلوة و بتسخرى من حاجات تشل فعلا ف حياتنا و اى بنت ممكن تواجهها لما بيتقدم عريس لها

ربنا يوفقك للى فيه الخير
شكرا لزيارتك الكريمة و ان شاء الله يدوم التواصل

تحياتى

s@gi l'ombre يقول...

اشهد يا زمن الأعجوبه
تم ميلاد مدونه لاذعه أخرى بأسلوب رشيق ووعى محلى نسائى بحت
متابع
قريت افندينا وقريت المسمسم
ومستنى بقيه السلسله
بدايه رائعه ... مشوقه
بس ياريت تراعى بعض الألفاظ الدخيله فى النص يعنى ...بس عموما أنا ضفتها عندى
سلام

Ahmed Al-Sabbagh يقول...

ههههههههههه

الصديقة العزيزة

اولا مبروك على المدونة الجديدة

وانا مبسوط اوى لانى بخلص دلوقت كتاب غادة برايد اللى هو عايز اتجوز

ولانى اندمجت معاه كنت زعلان انه هيخلص

دلوقت بقى مش هزعل

لانك هتكملى المغامرات الجميلة اللى بتقابلها اى بنوتة اثناء المقابلات العروسية ههههههههه

ده احنا طلعنا عاهات بشكل ههههههههههه

وان شاء الله هبقى متابع جيد

تقبلى تحياتى

احمد الصباغ

احساس صريح و حى يقول...

عزيزتى
شوفى لو هنتكلم جد يبقا تقولى هو لو خرع ممكن يبقا راجل وينشف مع الوقت انا عارف ساعات الدلع الزيادة بياذى الشاب بس ممكن شئ يغيره وانتى ممكن تكونى الشئ ده

واكيد بكرة لما يتجوز هينشف غصب عنه من هموم العيشة والاولاد والدنيا

هستنا اشوف عمل ايه وعملتى ايه مع حيلة مامته ده

اسلوبك جميل جدااا

تحياتى
كان نفسى تشوفى البلوج التانى فى موضوع جامد

تحياتى
سلام

جمهورية مصر العربيه يقول...

هاى جنه
بصى مش هاقولك زى المره اللى فاتت ان انتى ضدنا كرجاله والكلام ده ..... لأ
لو الواد ده فعلا ابن امه يبقى ادامك حل من اتنين تشوفى غيره او تتجوزيه ولو ناويه تتجوزيه يبقى ادامك حل من اتنين ياتستنى امه لما تودع بعد عمر طويل ويبقى هو الدلدول بتاعك
ياتغيريه وفى كل الأحوال عليكى تستحمليه .
المهم بقى اللى انا عايز اعرفه هو البنات عايزين ايه بالضبط واحد يبقى شخصيه قويه ويشخط ويأمر وماتتحركيش غير باذنه
ولا واحد يقول حاضر وبس
مستنى الرد فى اقرب وقت ان شاء الله

nefertiti يقول...

بجد على فكره مدونتك اكتر من رائعه واسلوبها ظريف جدا

بس هو الكلام ده حصلك فعلا ولا دى قصص و طرائف زى ما انتى كاتبه فوق ههههه

رئيس جمهوريه نفسى يقول...

اول مره ليه فى البلوج بتاعك بس شكلها مش اخر مره عجبنى اسلوبك فى الكتابه قوى سلس جدا وسهل ممتنع ووصفك للمواقف بينقل صوره مش مجرد كلام وبس
تحياتى

السكندرى يقول...

الأخت جنة
سلام الله عليكى ورحمته وبركاته

أولا تهانئى بدخولك عالم التدوين
الذى أستشعر أنه إزداد كاتبه ساخرة لها مستقبل فى الأدب الساخر إن شاء الله

ثانيا

أحب ان أذكرك وأذكر نفسى والأخوة الزوار

بأن المصطفى صلى الله عليه وسلم وهو من كان وجهه مثل القمر وتغزل فى جماله الشعراء حتى إن أحمد شوقى قال فيه

وصحب زليخا لو رأين جبينه لآثرن بالقطع القلوب على الأيدى

ورغم كل هذا الجمال كان متواضع به
ويعلم أنه هبة من الله له تستحق الشكر
لذلك كان حينما ينظر فى المرآه ويرى جمال خلقة وصنعة الله فيه كان يدعو ويقول

أللهم أحسن خُلُقى كما أحسنت خَلقى

لأن جمال الوجه مع سوء الخلق لا شىء فيا حبزا أن يجتمع الأثنين فى إنسان
جمال الوجه مع حسن الخلق


ثالثا
بخصوص الخاطب المحترم

أرى ان مقياسك للرجل فيه بعض الأشياء غائبة عنك
لذلك أردت ان ادلك على حديث نبوى يعرفنا فيه النبى كيف تختار البنت من يكون زوجها فقال صلى الله عليه وسلم

إذا جاءكم من ترضون خلقه ودينه فزوجه إلا تفعلوا تكن فتنة فى الأرض وفساد كبير

لذلك أنصحك بأن تسألى أولا عن خلقه وواضح من كلامك أنه محترم بس عايز شوية ثقة بالنفس وأنه يكون مالك لقراراته وانه يحتاج لأن يتحرر من تبعيته لأمه مع عدم المساس بقداسة الأم عنده

أما الجزء الغائب والذى لم تلقى أنتى الضوء عليه ألا وهو الدين
فهل سألتى عنه هل هو يحافظ على الصلاة أم لا
هل يغض البصر أم لا
هل يصوم ويزكى أم لا

فهذا هو الأهم من الشكل والمنظر والمستوى الإجتماعى
لأنه بالضرورة لو كان كذلك متدين فإنه بالضرورة سيكون خير زوج لكى
لأن أسوته فى تعامله معك سيكون سيد الخلق محمد صلى الله عليه وسلم
وهو معلوم عنه أنه كان خير زوج لنساءه رضوان الله عليهن جميعا

رابعا أريد ان أعلق على الكيفية التى تم بها إنتقاء حماتك لمخطوبة أبنها

أنا أرى انه أسلوب ليس متزنا بالطبع مع إحترامى لكى فأنا لا أعيب فيكى لا سمح الله
ولكنى فقط أرى أن أسلوبها فى الإختيار ينقصه بعض النضج

فالنبى صلى الله عليه وسلم دل الشباب على الأسلوب الأمثل للإنتقاء والإختيار
فقال صلى الله عليه وسلم

تنكح المرأة لأربع
لدينها
وجمالها
وحسبها
ومالها

فأظفر بذات الدين تربت يداك

أى أن الناس حينما يختارون منهم من يختار على اساس الجمال واخرون على اساس المال أو الحسب وقليل من يختار على أساس الدين

فهو ينصح الشباب بأن يختاروا على أساس الدين وهو الفوز الحقيقى وهو الإختيار الأمثل

وهنا أذكرك بموقف حدث مع هارون الرشيد
كان عنده من الجوارى الكثير ومن كل الأجناس
ولكن كانت أقربهم لقلبه جارية حبشية سوداء فطساء
فحينما سئل عن السبب قال
أنه كان يلقى الأموال على الجوارى فكن جميعا يلهثن على المال إلا هذه كانت عندها عزة نفس وكانت وقورة وذات خلق فكانت هى أحب الجوارى إليه

أخيرا
أحب أن احيكى على هذه المدونة الرائعة
وارجو ان تستغليها فيما يرضى الله
حتى تكون فى ميزان حسناتك
وأن تستمرى فى كتاباتك الساخرة فهو لون من الأدب العربى قل من يكتبونه هذه الأيام

والسلام عليكم ورحمة الله

مدونة يلا نفضحهم يقول...

ما أروعه محراب التدوين الذي جعلنا نعرف ونتعرف علي الكثير من المدونين الشرفاء الذين إمتلأت قلوبهم وعقولهم بحب هذا الوطن والعمل والسهر علي رفعته وعزته والقضاء علي الظلم الذي يستشري بين جنباته ....

=======================

إنضم معنا في حملة الألف مدون للإفراج عن المدون الدكتور إبراهيم الزعفراني
علي مدونة يلانفضحهم : http://www.yallanefdahom2.blogspot.com/
الدكتور الزعفراني الفارس النبيل

N0Ga يقول...

جنة انت بجد في منتهي الروعه
انا نفسي ابقي من اكتر متابعينك بس مشاغلي بقي المهم
انا بلف علي كل البوستات و دي اول مره اعملها و الله ياللا مش خساره فييكي


نوجا

somaa يقول...

ههههههههه يا بنتى ضل الحيطه احسن احيانا....دا مش حتعرفى تكلميه غير بفرمان من الست الوالده
تحياتى ليكى سومه_87