الأربعاء، 20 فبراير 2008

شــــوكة...وسكـينة...وشـــال يموه


طبعا النهاردة انتم مستنين تعرفوا ايه اللى حصل بعد قراءة الفاتحة........والحمد لله بعد مرور ايام واسابيع العريس بدات تتفك عقدته على ايدى أصله أظاهر كان معقد حبتين او كان عنده حالة معرفش ايه هى بالظبط المهم انه الحمد لله اتظبط وفك كده وبقى فريش على الاخر والاحلى انه بقى بيتكلم.......
وبدأ يجى يزورنا من غير ماما اخيرا بس لاحظت عليه حاجة انه كل مرة بيزورنا فيها بيجى ايد وراء وايد قدام فاضى ولا علبة شيكولاته ولا ورد ولا اى حاجة قلنا مش مهم يمكن بيحوش علشان تجهيز الفرح والذى منه.... وكنا فى يوم عازمينه على الغدا قام ايه بقى لقينه والحمد لله اينف اوى وبيقرف قال ايه من كل حاجة قلت فى عقل بالى "وكأننا حاطين صراصير فى الاكل "المهم حطينا الآكل على السفرة اللى اللى بعتقد ان ماما طبعا فى البيت بتقوم بدور السفرة وبتأكله هى فى بقه "ننوس عين أمه".
وحطينا الاكل قدامه وبدانا اولها بشوكة وسكينة؟ وبصراحة شكلنا كده كنا هننتهى بالاخرانيه !وشوية مين العامل دى؟؟ ومين الغاسل الطبق ده؟؟ومين اللى حطه على السفرة؟؟ وشوية شوية هنتسأل جبنا أكل والخضار منين ومين الوصلهم لحد البيت؟ والميه اللى بنغسل بيها متفلترة ولا لا؟ لغاية ان شاء الله ما هنوصل لمين اصلا اللى اخترع الاطباق......يعنى المهم مش هنسيب ولا عامل فى مصر الا لما نجيب سيرته وشوية كمان كان هيأخد بصماتنا!!
قلت يا بت اصبرى خلى نفسك طويل هو العمر فاضل فيه اد ايه؟ودايما معاه كنت اتحلى بسياسة النفس الطويل
واللهم طولك يا روح بالرغم من انها طولت لحد ما بقت اد زلومة الفيل! وكلنا بقينا نأكل وسيبينه مع نفسه يعك اللى عايز يعكه احسن ما كلنا هنقوم عليه ضربة رجل واحد......وحبتين بعد الاكل قمت قدمت عصير لقيته بيطلب منى شال يموه"اصل ألواد إيه ابن ذوات" وانا هتنقط منه وقلت يا سلام شال يموه والله تلاقيك بتشرب من عند عم حنكورة بتاع العصير اللى على ناصية بيتكم..حاجة ايه مش اى كلام وقلت ما علينا لما نشوف بقى هنتكلم مع بعض نقول ايه..لقيته عمال يتكلم عن ماما طول القعدة ماما بتطبخلى الاصناف اللى بحبها انتى بتعرفى تطبخى؟ وانا ايه شوية وهتشل وقلت والله كبيرك معايا سندوتشات فول وطعمية طالما القعدة هتبقى على ماما
وشوية ماما دى ست طيبة جدا وبتحبك خالص تعرفى اصلها ست بتعرف ربنا ومتدينة اوى تعرفى انا جبت لها الدش مخصوص علشان تتفرج على القنوات الدينية اصلها مبتحبش غيرهم رحت قلت له بجد والله طيب كويس وفى سرى"وانما الاعمال بالنيات!!وبقيت عماله ادبدب برجلى كده على خفيف واخبط بايدى على رجلى ها....وبعدين "اظاهر اننا مش هنخلص طالما مجتش يبقى القعدة كلها عليها لا كانت جت احسن على الاقل كنا اتكلمنا فى حاجة تانية يا دى النيلة على البخت".
تعرفى اصل ماماه.....رحت هبا فيه ايه هو النهاردة مفيش حاجة غير الكلام عن ماما ولا ايه يا ريت حضرتك تغير المحطة راح قال وهو مكسوف تحبى نتكلم فى ايه اه اقولك كلمينى عن نفسك والله ساعتها حسيت انى قاعدةمع واحد من زمن الاستاذ عبد الوهاب ...او مع دكتور نفسانى رايحة اتعالج عنده كل ده وانا مستحمله واعدى واقول يلى مش مشكلة لسه هنعرف بعض اكتر وشوية لقيت ربنا هيفتح عليه فى الكلام وهينطق وبدأت شفايفه تنفصل عن بعضها لقيت موبايله رن!!
رد... اه اهلا ماما وحشتينى يا حبيبتى حاضر حاضر بس كده حاجة تانى...عيونى يا ست الكل اامرينى حاضر والله مش هنسى ربع ساعة واكون عندك...مش هتأخر متخافيش لا اله الا الله وقفل"تعرفوا كان هاين على اشيله هيلا بيلا وارمى من على السلم واحنا ايه ساكنين فى الدور التاسع "
"وبغيظ"قلت ايه خير ان شاء الله قالى خير لا بس اصل ماما بتطمئن على وبتقولى متاخرش علشان عايزانى اجيب طلبات وانا مروح للبيت.
بصراحة انا اتخضيت وهبيت فيه ايه؟اصلى استغربت هو لسه فى راجل فى الدنيا بيروح يجيب الطلبات من السوق لمامته؟دى البنت مبتعملهاش !!وبردوا قلت معلش اصبرى يا هبلة دى حاجة حلوة الراجل متعاون واكيد بعد كده هيساعدك انتى كمان....وبعدين قلت له هو انت اللى بتجيب الطلبات واختك مش بتجيبها ليه؟ قالى اصلها مش بتعرف تشترى حاجة انا اللى بعرف اشترى كل حاجة فى البيت!وكان كله فخر وسعادة الواحد بردوا لازم يشترى الحاجة بنفسه رحت قلتله "بتريقة"اه معلش اسفة اصل معلوماتى ان الحاجات دى تخصص ست البيت معلش" قام قال لى نبقى نكمل كلامنا بعدين ممكن استأذن علشان وعدت ماما متاخرش سلام بقى...قلت له بسخرية اه طبعا واحنا نقدر على ذعل ست الكل مع الف سلامة ويا ريت تبقى تشرب اللبن قبل ما تنام وتغسل رجليك..
وابتسمت كده بغيظ وصرخت ماما بابا تعالوا سلموا ومن وراءه بعد ما خرج كنت هحدف الاطباق اكسرها على راسه وقلت فى سرى" منك لله يالى كنت السبب"!!.

هناك 32 تعليقًا:

3abdo me7tas يقول...

لا حول ولا قوة الا بالله
اللى نفسي اعرفه بجد الكلام ده حقيقى ولا انتى بتألفى
اصل لو حقيقى يبقى يا رحمن يا رحيم عليك والبقاء لله ولا عزاء لماماه قصدى للسيدات

ايه ده كله ايه دا كله
بقى انف يا ساتر شكله كده مدخلش جيش
امال لو كان دخل الجيش كان عمل ايه
امال احنا كنا بناكل العيش وكان عليه صراصير ازاى ولا بناكل السلطة والمكرونه بدودها ازاى
بقولك ايه ما تسيبك منه وتتجوزينى انا
اهى مليش انا فى السكة بتاعت ماماه ولا الأنافه دى
وعلى فكرة العريس ده مغلطش
على رأى المثل
اللى ملوش خير فى ماماه ملوش خير فى حد
مدونتك جميلة بجد وأكيد مش هتبقى آخر زيارة
شرفينا انتى بس بالزيارة وانا كل يوم أبقى هنا
أصل انا اللى بيزورنى بزوره
:P
طبعا هزار
جزاك الله كل خير ويرزقك بالزوج الثالح بإذن الله
salamat

جمهورية مصر العربيه يقول...

طاب عايزه ايه بس زى ما قلتلك قبل كده ياتسيبيه ودورى على راجل حمش وتستحملى
ياتقبليه وتستنى لما امه تودع وتبقى انتى الكل فى الكل ويروح يجيب اللى انتى عايزاه وتقول شمال يروح شمال وتقولى يمين يروح يمين
بس اللى انتى ما جاوبتيش عليه بقى هو سؤالى البنات عايزه ايه راجل حمش ولا راجل كده وكده ......؟

Hosam Yahia حسام يحى يقول...

الله يكرنك


ويكرم ماما

مدونتك جميله

والى الامام دائما

Ahmed Al-Sabbagh يقول...

هههههه

بجد المدونة دى عسل عسل عسل

وليها مستقبل حلو اوى

على فكرة احنا المدونين بنتقابل فى عدة اماكن زى كافتيريا دار الاوبرا مثلا لكن المكان الرئيسى للتجمع هو كافية البورصة

عموما احنا احنا هنتقبل بكرة لو حضرتك تحبى تشرفينا يبقى جميل

انا ايميلى
ahmed4u21@yahoo.com


احمد الصباغ

صحفية روشة يقول...

يعنى عليكى وعلى اللى جرالك يا ختشى
مكنش يومك يا ننوسه
طب طالما الواد كده
انهى الموضوع من اوله
لو حاسه انو مش نافع
مينفعش تاخديه مادة تكتبى عنها البنى ادم ده هتصتيبحى بوشه كل يوم الصبح
وتتمسى بلليل
لازم تلحقى نفسك بسرعة

احمد الجيزاوى يقول...

الواد اى عمل نفسه ابن ناس دة بصراحه دة حركه مفقوسه وشكله انه يل من شارع المدبح وعليه حكم والمباحث بدور عليه وجى يستخبه عندكم
ههههههههههههههههههه
تحيانتى لحضرتك
وشرف كبير جدا ليه انى اتعرف على حضرتك

حبة حاجات (ايمان) يقول...

ههههههههههههههههههه
اسلوبك زى العسل زيك
انا طبعا يشرفنى انك زرتينى ومتتخيليش اد ايه انا انبسطت على كلامك الجميل دا
ربنا يكرمك يا قمر وعاايزه اشوفك على طوووول

الربان يقول...

تحياتي

اسلوبك ساخر...وجميل...

اقول لحضرتك ان هناك بالفعل من شبابنا
من يطلق عليه"خام" اي لم يمر بتجارب في
حياته سواء عاطفية او غيرها.

حضرتك ممكن تغيري في شخصيته مثل هذه الاشياء...الا إذا كانت مستفزة بشكل لا يحتمل..

انا ايضا لا احبذ ان تقوم الاخت او الزوجه بالشراء من السوق...لابد للرجل
ان يقوم بمسؤليته تجاه بيته و اسرته سواء امه و اخوته او زوجته و ابناؤه.
وجهة نظر قد لا تعجب الاخرين .

تحياتي و تقديري ودمت بألف خير.

رئيس جمهوريه نفسى يقول...

ااقولك على حاجه هو يقعد فى البيت مرتاح ومامته تيجى تزورك تتكلم معاكى اكيد تعرفه اكتر من نفسه وحتفيدك كويس

appy يقول...

بيتهيأ ليه النوعيه دى مش موجوده اصلا او لو موجوده تبقى نادرة قووووووووى يعنى فى الناس الكلاس اللى المفروض ده كان بيكون موجود فيهم مبقاش فيه وأصحابى كلهم او اصحابهم اللى بشوفهم مش كده خالص بس لو مش عجبك خلاص سيبيه لو كلامك حقيقى ومش بتكتبى كلام من دماغك يعنى
بس اسلوب كويس بتاعك
ميرسى لزيارتك كوكبى

mado80 يقول...

اشكرك علي تشريفك ليا بالزياره وان شاء الله تبقي بدايه لتواصل بيننا

موضوعاتك جميله أوي ومدونتك هايله جدا والله

ان شاء الله مستقبل باهر في عالم التدوين

تحياتي لكي وألف تقدير لشخصك الكريم

raspoutine يقول...

طيب مقولتيلناش ناوية تعملى ايه مع بتاع الشوكة والسكينة ده
احنا مستنين

نوراى يقول...

جنه

اسمك حلو اوى اوى

يارب اكون قريتة صح

انا مبسوطة جدا انك زرتى مدونتى علشان اعلاف مدونتك اللى دمها خفيف اوى دى

بصى انالسى ما قريتش كل البوستس بس هقراها على رواقة واديلك كومن على كل بوست

انا قلت اجى بس امسى وهرجع تانى استنينى بقة

يالا سلام موقت

دومتى بكل خير يا جنه

نوراى

عبدٌ من عباد الله يقول...

first i'am sorry i have no arabic letters in my keyboard


rabna ysabarek

shreen يقول...

gannah
اسلوبك زى العسل فى السرد
منتهى البساطه والتلقائيه
كنت حاسه كان واحده صاحبتى بتحكيلى اللى حصل
ما كانش فى اى نوع من الغربه وانا بقرا كلامك

فى واحد عسل زيك كده
وبيكتب بنفس اسلوبك
اهو اللينك بتاعه

http://soooo-30.blogspot.com

والله ما دعايه ليه ولا حاجه
انا بس حسيت ان روحكم واحده

عن حكايه العريس بتاع امه ده بقى
بصى يا ستى
جوز بنت عمى مامته نفس الحكايه
مره كان بيتغدا عندنا
ماماته طلبتنا فى البيت بتاع 7 مرات
بصى
الو محمد جه ولا لسه؟
ايوه يا طنط
طيب

الو
محمد اكل
لسه بيتغدا يا طنط

الو معلش يا حبيبتى
هو انتم عاملين ايه ع الغدا لحسن هو فى حاجات مش بيحبها وممكن تكونوا عاملينها وهو محرج يقولكم فيقوم من على الغدا جعان

خدى بالك
كل ده يا جنه
وده مش عريسى انا
ابتديت اتشل وبقى نفسى ارميه هو وامه
من البيت

اتصلت تانى
كنت جبت اخرى

قالت الو
رحت قايللها ايوه يا طنط
قالتلى ممكن اكلم محمد
قلتلها فى الحمام
تحبى اخش اشوفه بيعمل ايه واقول لحضرتك

الست قطعت النفس شويه
وبعدين قالتلى
طب ممكن لما يخرج يطلبنى

المره الجايه بقى
اكملك على جوز بنت خالى ومامته

تحياتى

نصيحه اخويه :
لو ما فيش حب بينك وبين العريس ده
فكك منه
اجرى ولا تبصى وراك

:)

dina يقول...

ههههههههههههههههههههههه
لا لا دا عدا حمادة عزو...الله يمسيها بالخير كريمة مختار
يا ساتر يا رب
لا دا انا اعنس احسن بدل ما اتجوز واحد و مامته

سكــر يقول...

ههههههههه
دمك زى العسل يا جنه

وكويس انك عرفتينى والله
ان دا من تاليفك

خيالك صخب جدا

تقبلى تحيتى

احمد سكر

فيزو2000 يقول...

كل ده بعد قراءة الفاتحة , طب كان ايه هيجرى لو كنتوا قراتم القرآن كله كان
هيحصل ايه .
على العموم الايام القادمة ستكشف الكثير
واضح انها رحلة طويلة لايعرف مداها الا الله
استمرى ولك الصبر او النجاة
فى انتظار احداث جديدة .

almasry يقول...

ازيك
انتى طبعا من كلامك فهمت انك أكبر منى لكن فى نفس مجالى انا هعتبرك اختى الكبيره ده طبعا لو حبيتى انتى طبعا والواضخ من كلامك ان تفكيرك نسائى بحت لكن وجهات النظر هتتقارب انشاء الله اتمنى زيارتى على المدونه المتواضعه بتاعتىwww.sahafy.blogspot.com

فرنسا هانم يقول...

هو عم حنكوره بتاع العصير فاتح فروع فى كل الجمهوريه ولا ايه ؟؟؟
مدونه جميله وعجبتنى
تحياتى

مدونة يلا نفضحهم يقول...

الآن وحصريا علي يلا نفضحهم أخطر قضية تعذيب وانتهاك لحقوق الإنسان في مصر الحاج عبد الله يروي قصته http://www.yallanefdahom2.blogspot.com/

موجة يقول...

حرام عليكي يا جنة و الله
ههههههههههه
الواد ابن ناس وده واضح جدا
بس فكرتيني بمحمد سعد في فيلم كتكوت
لما بتقوله : اتنين شاليموه .. تاخد شاليموه ؟
قالها : لا بلاش علشان أعرف اتغدى
هههههههههههه

خالص تحياتي
احمد

حقيقي بوست رائع
بس ممكن تشلي حروف ما قبل التعليقات دي اللي تحت .. بتزهقني

simple girl.. ..simple dream يقول...

جنة يا بنتى انقذى نفسك من الليلة الكحلى دى
تقعدى فى بيت ابوكى بكرامتك ولا انك تتدفنى فى بيت واحد انت مش طايقاه
ربنا يقدملك اللى فيه الخير

حدوتة مصرية--ياسر شمس الدين يقول...

ممكن احكيلك قصة
صلى على النبى
كان يا ما كان فيه واحد اتقدم لواحده وعملة فترة خطوبة جميلة اوى وكانوا بيحبوا بعض جدا
وكانوا هيتجوزوا فى بيت مامته
وكان الولد بيحب مامته جدا جدا
وفى يوم من ذوات الايام قبل الزفاف بكام يوم البنت اتصلت بالولد وقالتله عيزاك ضرورى
اخد بعضه وراحلها قالتله انا مش هقدر اتجوزك الا لو مشيت مامتك من البيت او وديتها دار للمسنين انا مش هتجوزك انت ومامتك فياريت تفكر وترد على
غاب الولد كام يوم ورجع قالها مع انى بحبك حب كبير جدا بس امى ما اقدرش اعمل فيها كده وانا مش هتجوزك وكل واحد يروح لحاله
البنت مسكت فيه وقالتله ده كان اختبار واللى ما لوش خير فى امه مالوش خير فى حد
واتجوزوا وعاشوا فى تبات ونبات وخلفوا صبيان وبنات والصبيان مراتتها طلعت تحبها زى ما هى كانت بتحب حماتها
وتوته توته خلصت الحدوتة
***************************************
طولت عليكى وانا قاصد ممكن يكون عندك صبر تعدى تقرى كلامى وكلام غيرى لانهم بيقولوا رايهم فى موضوع انتى كتباه ولو عندك نفس الصبر فى تعاملك مع حماتك المستقبليه ونفس مقدار الحب اللى بتحبى بيه مدونتك تحبى بيه حماتك هتنجحى جدا معاه وعلى فكره
بر الولد بامه هيدخله الجنة ولكن برة بزوجته مش اكيد هيدخلة الجنه
وانا عن نفسى لو اللى هتجوزها ان شاء الله زعلت امى بس ولو لمرة يبقى حياتها انتهت معايا
ممكن اكون سئ فى النقطة ديه بس مش عقولة انا اتجوز واحده اديها كل حياتى وحبى وعمرى وحنيتى وفلوسى وجهدى وكل حاجه فى حياتى تبقى ليها وعشانها وتزعل اللى امى اللى ليها الفضل عليا انى بقيت راجل قادر افتح بيت واشتغل وانجح فى شغلى

جميز يقول...

gannah

واضح انك زعلتى من تعليقى , لكن أرجو انك متنزعجيش من الإختلاف , الإتفاق و الإختلاف وراء الحكمة من تواصل المدونين

عموما , باعتذر عن أى لبس أو سوء تفاهم

تحياتى

صاحب المضيفة يقول...

يارب يصبرك على اللي انتي فيه



ويلازقك خير مما تتمني

تحياتي

نوراى يقول...

جنة

اية اخبارك يا جميل


اية يا بنتى خفة الدم دى بصراحة دمك خفيف جدااااا

بصى بقة يا ستى

انا را ئى فى العريس دة تفكك منة فورا بجد حتى لو بتحبية

لان من الواضح انك شخصية مختلفة عنة تماما وبعيدا عن انة ابن امة

دى حكاية محلولة ممكن تكسبة مامتة وتبقة برضة الكلمة كلمتك

بس صدقينى اذا البنت مش هتحس برجولة الانسان اللى هتتجوزة يبقى بلاش تتجوزة من الاصل

بصى هقولك حاجة بسيطة خالص

اذا ما كنتيش هتبقى مبهورة بكل حاجة فية

او اذا ما كنتيش هتشوفىة انة بيكملك وملايكى ومحوط عليكى وكبير جدا فى عينك

يبقى بجد بلاش منة خالص

لا الجواز مش لعبة اذا ما كنتيش هتموتى فى اللى هتتجوزية يبقى بلاش تتجوزية

نوراى

اسلام رفاعى يقول...

يظهر امه طالعلك فى البخت ونصيحة منى فكك منه ده حيقرفك هو وامه

علاء يقول...

ما شاء الله مدونتك روعة
ربنا يحميكي

اجري على الله يقول...

الاستاذه gannah
اولا كان الله في العون ولا اراكم الله مكروها في عريس لديكم

ثانيا واضح انك تتمتعي بقدر كبير من الصبر يعني مش كبير قوي

ثالثا انا عن نفسي باشتري ما تطلبه مني الست الوالده من السوق علشان النبي صلى الله عليه وسلم كان في عمل اهله
ويعدين براحه شويه على الراجل

سلام عليكم وتحياتي لكي
الشاعر بن هلال

الجمعاوي الاصيل يقول...

ههههههههههههههههه

في منتهى الجمال

منتظريين الباقي

Soooo يقول...

بصي
هو انا متابعك بطريقه انتي مش متخيلاها
بس كان عندي حالة احباط على خنقه اني اروح اي مدونه واقرى واكتب اي تعليق


المره دي بقى قلت لأ انا لازم اعلق

اول حاجه .. اسلوبك ساخر وجميل جدا جدا
تاني حاجه .. في تقريبا مشكله في طريقة التنسيق لان في بعض الكلام من الناحيه الشمال مش باين قوي .. بس اعتقد ان اللي بيقرا الموضوع استنتجه زي مانا استنتجته
تالت حاجه .. الله يكرمك ياشيخه .. اتصرفي في الاشاعه اللي طالعه علينا دي .. مش اشاعة اننا ماشيين مع بعض ولا بتاع لا سمح الله .. بس في ناس معتقده انه انتي انا وانا انتي .. يعني معتقدين اننا شخص واحد
ماعرفش ازاي وليه
وماعرفش برضه هتثبتي عكس كده ازاي


بس بيني وبينك .. انتي كاتبه ساخره حلوه قوي قوي قوي




سلامووووووووووووووووووز