الثلاثاء، 29 يوليو 2008

حفـــــــــــلة شــــــــــــــــم الفسيـــــــــــــــــخ


يوم شم النسيم الناس كلها بتخرج وتتفسح وتروح تشم الهواء والنسيم العليل .....احنا بقى اتفقنا انا وماما واخواتى اننا نروح النادى لان يوم شم النسيم النادى بيعمل حفلة هايلة فيها مطربين ومطربات مشهورين.

ماما بصت لى وقالت" ايه رايك لو نعزم خطيبك وحماتك على الحفلة؟؟"

انا برخامة" نعزمهم؟؟ ليه هما فقرا....وبعدين الحفلة كده هتبقى غم......... احنا ناقصين يا مامتى قرف ومصايب

ماما" يا ستى يلا اهو يوم فى السنة معلش خليها علينا........... امال ها تعيشى معاهم العمر كله ازاى؟؟

انا " ده لو كان فى بقيه عمر معاهم ان شاء الله "

كوكو جه قبل شم النسيم يزورنا ..........قلنا نقوله على الحفلة هو وست كبه مامته.

انا" صحيح ما قلتليش يعنى هانقضى شم النسيم فين؟؟

كوكو " فكرتينى كل سنة وانتى طيبة بس لسه مش عارف ........عموما انا كنت باخد ماما وبنخرج نتمشى سوا"

انا فى سرى" يا اختى كميلة عين امه....وتلاقيكم بتروحوا تقعدوا فى الجنينة وتسبيلوا لبعض"

كوكو" بس تعرفى يمكن السنة دى ما نخرجش اصل ماما تعبانة حبتين واحتمال نقضيه فى البيت.

انا برخامة "والله له تعبانة من ايه سلامتها الف سلامة"

فى سرى"قصدك مش بتاعة خروج ودفع لكن لو عرفت ان فيها عزومة هاتخف وتجى هواء"

بصت له وقلت" طيب ايه رايك لو تيجوا تحضروا معانا حفلة النادى .....ده بيعمل حفلة ممتازة واليوم بيبقى جميل جدا"

كوكو" والتذكرة بكام؟؟

انا "طيب اسال ايه البروجرام بتاع الحفلة ........مش التذكرة بكام"

فى سرى"وانت صحيح هتسال على ايه غير كده ...واللهى لوقع قلبك واخضك شوية"

التذكرة ب 100 جنيه"

كوكو مخضوض" ايه 100 حرام عليكوا .........وانتم هاتروحوا ايه الافترى ده"

انا بتناحة" ايه بتقول ايه....احنا مفترين"

كوكو" لا اقصد ان النادى هو اللى مفترى ....دول ناس عندهم جشع ....قال 100 جنيه قال ده الواحد يخرج يتفسح ويتغدا ويحلى بيهم"

انا فى سرى" يقطعك يا شيخ ....الميه جنيه بتعمل كل ده ايه يا ابنى هو انت عايش فى زمن صلاح الدين الايوبى"

كوكو" يا حبيبتى سيبك انتى بلا حفلة بلا كلام فاضى.....تعالى نروح اى جنينه ...اه القناطر ما فيش غيرها وناخد معانا فسيخ وسردين ونقضيها"

انا فى سرى" منك لله يا ابن ام قويق ....ايه الزفارة دى وكمان هنروح نبهدل الجناين.....ارحمنا يارب"

على العموم يا سيدى...... ماما عزماك انت وطنط على الحفلة يعنى مش هتدفع حاجة ولا مليم "

كوكو بعنتظة" يا ستى مش على الدفع ده الواحد يوزنهم فلوس انا بكلم على الطمع انا اصلى ما حبوش .....وان شاء الله هقل لماما واشوف رايها ايه....وكمان انتم اللى عازمين ...وضحك"

انا فى سرى" اه منك ومن بخلك...ما كنا من شوية على القناطر........ لكن دلوقتى ابو بلاش كتر منه"

جــــــــــــــــــــــــــــــاء مــــــــــــــــــــــــــــــوعد الحفـــــــــــــل

بصينا لقينا كوكو وطنط جايين النادى وشيلين شيل........ ولا اللى مسافرين البلد

طنط" ازيكم ....كل سنة وانتم طيبين "

انا " وانتى طيبة يا طنط بجد فرحانين اوى اوى علشان جيتى"
وفى سرى" بس لو كنتى ما جيتيش كنا هنفرح اكتر واكتر"

طنط" وانا اقدر اخرلكم طلب ده انتى حبيبتى وروح قلبى"
وانت يا حاجة ازيك وحشتينى......كل سنة وانتى طيبة....بس يا ختى ماله شم النسيم عندكم غالى اوى كده...."
ماما" يا ستى الغالى يرخصلكم ........والسنة اللى جاية يكونوا المفاعيص دول هما اللى عازمين"

واول ما سمعت الجملة دى وكان الحرب قامت ............بصت لماما وقالت" يا ختى وعلى ايه الغرامة دى....واللهى ما كان له لزوم هو احنا برضوا بتوع حفلات وكلام فارغ ...ولا هو دفع فلوس وخلاص"
لا لا يا دودى مش عايزاكى تبقى كده مع جوزك بعد الجواز...."اه الاصيلة تعيش مع جوزها على الحصيرة"

انا فى سرى"يا لهوى عليكى يا ست انتى ....وانتى مالك وانتى كنتى دفعتى حاجة من جيبك ...امال لو كنا دفعناكم كنتى عملتى ايه؟؟"

واللهى كانت فضحتنا فى النادى .........وقالت لعضو عضو

كوكو" ماما معاها حق ....وعلى ايه الفلوس دى حرام .........كنا خرجنا بيهم احسن واتفسحنا وجبنا اكل وكان فاض كمان"

انا " يا لهوى يا خرابى قاعد تقسملنا فلوسنا كمان....منك لله يا ابن ام كوكو ..........صحيح ما انت المحتكر الوحيد لماركة بخيلكو"

كان مكتوب لك فين ده يا دودو؟؟ اه اكيد فى صفحة الحوادث"

ماما " طيب ايه رايكم نتغدا سوا نطلب سندوتشات كده وعصير"؟

طنط طبعا اتخضت" اه انتم عازمينه بقى على التذكرة وهتدفعونا حقها فى الاكل.....لا والنبى انا عملت حسابى على كده وجبتلكم غدا معايا مفاجاة وهاتعجبكم موت"

اه ما احنا ناس بنعرف الاصول ...انتم يبقى التذكرة عليكم واحنا الغدا

امال".....علشان نبقى ردينا العزومة وزيادة كمان"

انا وماما تنحنا وانا فى سرى" بقى تمن التذكرة هتردهلنا غدا؟؟ اللهى نخلص منكم يا قادر يا كريم ...جبتولنا استبحس"

شوية وراحت فتحت الشوال اللى معاها اقصد الشنط الكتير دى اللى كانت معاها ............وفجأه شمينا ريحة خلت كل الناس فى النادى عاملين يبحلقوا ويتفرجوا علينا .

وكاننا معانا ديناميت او مفرقعات وحماتى طبعا ......كانت خبيره المفرقعات

وانا رحت سديت مناخيرى انا وماما من الريحة......... والناس جتلهم حالة من كتم النفس وكل اللى حوالينا بعدوا عنا

ماما بصت وقالت " اتفضحنا اتفضحنا"

وبصينا لقينا طنط مطلعة فسيخ وسردين ماتوا من ربع قرن ومعاهم بصل اخضر ..........وشوفوا انتم بقى الريحة عتقت اد ايه وكانت من حظنا وحظ اعضاء النادى يشاركونا الريحة الفظيعة دى"

طنط" دوقوا عمايل ايديا.......مخليلاه من يجى كام شهر علشان يعتق ولا تقولى فسخانى ولا ديوله"

بصت حواليها لقت الناس بتتفرج علينا " يا خرابى شفتم الناس هاتتجنن ازاى .....بس للاسف ما عيش اعزم الناس دى كلها "

انا فى سرى"ما فعلا هيتجننوا بس من ريحة الزفارة ..........اللى انتى اتحفتى مناخيرهم بيها....وابقى قابلينى لو مطرب واحد غنى النهاردة"

كوكو خد حته فسيخ وطلع من الشنطة التانية فرن عيش بحاله.......... اظاهر انهم كانوا هيعزموا النادى كله فعلا

كوكو" الله يسلمك ايدك يا ست الكل جميل وريحته باينه....معتق مش اى كلام هو ده الفسيخ ولا بلاش...ها تعرفى تعملى زيه يا حبيبتى"

انا فى سرى" تسلمك ايدك على ايه ....على النتانة والريحة المفحفحة دى"

شوية جه بتاع الامن بعد ما الاعضاء اشتكونا وقال لنا بالذوق....." يا فندم الحاجات دى ممنوعة هنا والريحة بهدلت الدنيا يا ريت لو تتفضلوا"

حماتى بقى انقضت عليه زى الوحش المفترس" جرى ايه يا خويا هو الاكل ممنوع ولا ايه....ده فسيخ هو حاجة وحشة...ونزلت ضرب فى الراجل بالفسيخ "

المهم انا اتسحبت انا وماما ومشينا بالذوق وقلنا فى سرنا ........الحمد لله انها جت على اد كده والعضوية ما تلغتش

وكل شم نسيم وانتم فسيخ وسردين"

هناك 75 تعليقًا:

zahra يقول...

انا نفسى اسأل سؤال واحد بس
هو انتى لما مش طايقاه و لا طايقه امه و لا طايقه عمايله و لا طايقه سيرته مكمله ليه فى الخطوبه دى
طيب اللى متجوزه اهى اتدبست و خلاص لكن المخطوبه بقى ايه اللى مصبرها ؟

kochia يقول...

هو كوكو ده مش بيتعب
بيجيب الطاقة والنباهة دي منين

اكيد من امه
ربنا يعين

رحيق الحياة يقول...

هيييييييه أول تعليق

كل سنة و إنتي طيبة يا ننوسة

أنا لو من دودو حشيل يوم شم النسيم من حياتي خالص

قال شم النسيم قال

و علي إيه ما نعد في البيت أحسن

ننوسة ربنا يجازيكي

ضحكت من قلبي

تحياتي علي أسلوبك الراقي

Unique Gurl يقول...

ههههههههههههههه
والله فتحتي نفسي
انا بحب الفسيخ و الرنجا اوي :D
حلو اوي البوست
:) تحياتي

بسمه عبدالباسط يقول...

هههههههههههههههههههههه

لا بجد حلوة قوى

لا وكمان عملوا اللى عليهم وهيردوا لكم تمن التذاكر فسيخ ورنجة

ههههههههههه

الريم يقول...

سيبها تاكل فسيخ يمكن يكون مسمم وربنا يفتكرها بوست دمه خفيف اخر حاجة

إبن مصر يقول...

كل سنه وانتى طيبه وتعيشى وتاخدى غيرها
والمره الجايه تجيب معاها مششششش وحتة جبنه قديمه وفحل بصل
هههههههههههههههه
انا والله بشوف البوست وكأنى شايف الفنانه احسان القلعاوى هى الحما مع الإعتزار ليها انما ابقول على الأدوار بتاعتها
تحياتى
وفسيخه هنيه تكفى ميه او تلتميه على حسب عدد اعضاء النادى والحمد لله العيش كتير
هههههههههه
تحياتى ليكى
nageh

بنت مصريه يقول...

ههههههههههههههههههههههه
وماله يا حبيبتى
ممكن تكون فهمت غلط وفاكره انها حاجه كده زى جنينه الحيوانات
القناطر الحديقه الدوليه
ههههههههههههه
بس بجد موقف تحفه
لا تحسدوا عليه الصراحه هههههههه
بوست جميل احييكى

karim يقول...

اولا اشكرك على مرورك. ثانيا اللى كان فى عونك دية اصلا غلطتك مدام انتى مش كنتى عايزاهم اصلا ليية تعملى كدة فى نفسك و فى مامتك, ملحوظة انا عندى نفس المشكلة هههههههههه

karim يقول...

ليية من الاول كل دة فى الخطوبة امال بعديين فى اية دة لو فيية بعدين. ياترى انتى لسة معااة؟

karim يقول...

اللة يكون فى عونك هو انتوا لسة مخطوبين؟

rovy يقول...

ازيك يا عروسه وحشانى جدا
معلش والله انا قصرت اليومين اللى فاتوا غصب عنى المهم انك بخير و البوست يجنن و كوكو كمان يجنن بس بجد و مامته هى اللى ملأت مستشفى المجانين اكيد ..
انتى متأكده انك تقدرى تستحملى كوكو ومامته اكثر من كده ؟؟؟؟
ربنا معاكى ......
دمتى بخير فى حفظ الله
تقديرى و تحياتى

الملاك يقول...

السلام عليكم ورحمة الله وبركاته
أولا أحب طبعا أشكرك على تشريفك الكريم لى
بوست رائع بجد على فكرة أسلوبك فى الكتابه رائع لانى بحب الاسلوب ده جدا فأرجو أن تقبلينى زائر دائم لمدونتك
تحياتى

Asmaa mahaba يقول...

ههههههههه
وايه اللى رماكى على المر متقوليش الامر منه مفيش امر من كدا
وحياتك وصيلى كوكو على حتتين سريدن وفسيخ الواد بطيخ حيموت عليهم
تحياتى ليكى سومه_87

الملاك يقول...

السلام عليكم ورحمة الله وبركاته
أولا طبعا أشكرك كثيرا أختى ننوسه على تشريفك لى وأحيكى على مدونتك الجميله والبوست الرائع ده على فكرة أسلوبك رائع فى الكتابه وانا بحب الاسلوب ده جدا
أتمنى لكتابتك المزيد من التقدم والرقى
تقبلى تحياتى وتقديرى

زى الهوا يقول...

ههههههههههههههههه , ايه الحمااااااااااه دى ؟؟ فظيعة وبخيلة وكلامها مش الله سكر , وكوكو اخد منها البخل , ربنا يخليهولك هههههههههههههههه

نونو يقول...

يا نهار الوااااااان
نفسى اعرف بس من اية ؟
هى الست دى مفيش فاييدة منها كل بوست بجد
بقؤلك ربنا معاكى
ربك اللى بيستر

mohra يقول...

اتفضحتوا و اللى كان كان

nody يقول...

طب وبتاع الامن عمل ايه معاها بعد كده
كده ما تكمليش

انتم الغلطانين كنتم المفروض تقدوا شم النسيم فى جنينه الحيوانات
تحياتى

Lady E يقول...

انا متابعة المدونة الجميلة بتاعتك من فترة

بس مش عارفه المذكرات دي حاجات حصلتلك فعلا ولا من وحي خيالك

لان مفيش بنوته تكره خطيبها ومامته للدرجة دي وتكمل معاه

ربنا يوفقك ويسعدك يا رب

ahmed_k يقول...

يا سلااااااام عالفسيخ
وكمان لما يكون بيتي
جوعتينا هههههههههه

blue-wave يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
والله تحفه بجد
يخرب بيت جنانك
بجد بتجيلك ازاى الأفكار دى؟
تحفه والله

nado يقول...

عروستنا الجميله وحستينى قوى.............

قولت ليكى ...................1 مره فضى الشبكه المهببه دى واتتى صبره شايفه اخرته ايه احمدى ربنا ان النادى مارفعش عليكم قضيه....
دومتى مبدعه

ذو الوجه المبتسم يقول...

اولا اشكرك على زيارتك الاولى لمدونتى المتواضعة
ثانيا انتى بجد رائعة
وطبعا رائعة شوية على اللى انتى عملتيه ده
ده جنان بجد هههههههههههه
طبعا دى ممكن تكون خواطر مش حقيقة
لكن كتير بيحصل كده
اسلوبك هائل جدا
ربنا يوفقك
ممكن تقبلينى زائر دائم لمدونتك ؟؟

تجربه المحب يقول...

بجد المدونه بتاعتك لذيذه اوى اوى وبعدين لو كان الكلام بيضحك بجد فهو بيحو معانى تدل على مشاعر كتير غيظ و والم وحزن مش بيقولوا شر البليه ما يضحك وعموما كويس
اننا بنعرف ننفس عن نفسنا شويه والا حنطأ وعموما ربنا يسعد الجميع

M.a.r.y.o.o.o.m يقول...

ههههههههههههههههههه
والله انا لو منك كان زماني انتحرت وريحت نفسي ربنا يصبرك
ههههههههههههههه

Unknown يقول...

أولا .. أسجل إعجابي بشخصيتك المرحة و دمك الخفيف
ثانيا .. أسلوبك و سردك لحفلة شم الفسيخ جعلني أتخيل النادي و كوكو و أمه و الأعضاء و الفضيحة كاملة و كأني كنت موجود في مكان الحدث ،،، ياريت تفكري في كتابة السيناريو ، أعتقد هاتكوني ناجحة جدا جدا ...
ثالثا .. إن سمحتي لي .. و إن تقبلتيني كصديق .. كوكو بخيل و هايخلي عيشتك جحيم .. وواضح إن في بينكم فرق اجتماعي ،، و أمه هاتهريكي تعليقات و توجيهات ، وواضح إنك مش طايقاها أساسا في اللقاءات العابرة ، فما بالك و انتي زوجة ابنها و يمكن تنط لك يوميا و تنامو في بيت واحد .. يا ننوسة الموضوع صعب ، و الخطب جلل ، ياريت تدي كوكو و أمه سكة ..
رابعا .. أنا بجد سعدت بمرورك علي مدونتي ، و ياريت تزوريني من آن لآخر لأنك هتلاقي إن شاء الله مواضيعك خفيفة الظل و دمها خفيف زيك ( مازالت في المطبخ بتستوي ) و علي فكرة انا بحب فيروز جدا و حافظ اغلب اغانيها و بغنيها طبعا لأن صوتي حلو بشهادة الأصدقاء و اللي أهم من الأصدقاء ، شهادة حرمنا المصون ، بس هي بتحبني أغني لها لهاني شاكر ( معاك )
أتمني فعلا نكون أصدقاء ...
خامسا .. سامحيني علي الإطالة و سامحيني لأني كلمتك عن نفسي شوية .. أصل أنا رغاي جدا و أيضا مستمع جيد جدا
و أخيرا تهنئة من القلب علي مدونتك الجميلة و علي مواضيعك الأكثر جمالا
و تقبلي تحياتي

صباح الصباح يقول...

هههههة العريس دة عاوز حريصة بتاعة ونيس مش عامز عروسة ننوسة

سوسا ومودى يقول...

هههههههههه
مش عارفه أقول أيه بجد
بغصض النظر عن شعورك النبيل ناحيته وناحيه مامته
بس أكيد يوم ميتنسيش خصوصا لو كان دمه خفيف أوى كده

ميرو انتكة يقول...

السلام عليكم
ازيك يا جميل
ربنا يكون فى عونك فعلا انتى ازاى مستحملاه هو والست مامته انا لو منك افركش الموضوع اريح لى واريح الجمجمة منهم والله
ههههههههههه

يلا خير خير مدونتك لذيذة ودمها خفيف قوى ربنا معاكى يا توتى وتكونى قد المسؤلية المستحيلة دى قصدى طبعا حماتك

سلامة سلامة

غير معرف يقول...

السلام عليكم
أولاً اذيك يارب تكوني بخير
أنا جاية عشان أعرفك بمجلة علّي صوتك
أصدقائنا وأعزائنا المدونون

الآن

مجلة علّي صوتك
مجلة المدونين
منهم وإليهم
لينكها http://3allisotak.net/

شهرزاد يقول...

ههههههه
ربنا يعينك
في الخطوبة وكده.. في الجواز هتعمل ايه
حماتك دي؟؟
عجبتني خبيرة المتفجرات .. ههههه

دمك خفيف جدا

بوست رائع

تحياتي لك

حسن حنفى يقول...

ههههههههههههههههههه

البوست معبر عن نفسه

no comment

تقبلي مروري

كيكى عوووووو يقول...

عوووووووووووووووووووووووووو انا جيت اتخدتى
............................
كنتى خلتى يروح القناطر يا فوزية؟
هههههههههههههههههههههههههه
حماتك دى..عايزة رنجية مسممة وطايرة تقتلهم هى وكوكو
هههههههههههههههههههههههههه
وحشتينى
كتيرررررررررررررررررررررررررررررر
وبحبك
برضة
كتيرررررررررررررررررررررررررر
اوووووووووووووووووووووووووووى
اسفة على الغيبة بس هتوحشينى اوووووووووى
لان فى ظروف عائلية وانا لازم ابقى جانبهم
اةةةةةةةةةةةةةةة
الواجب ينادينى
واهى راحة من التدوين باعافية
ههههههههههههههههههههههه
خدى بالك من مدونتى
هتوحشينى كتيرررررررر
اوووووووووووووووووووووووووووووووى
هفتقدك
باااااااااااااااااااااااااااى
عوووووووووووووووووووووووووووووووو
اموااااااااااااااااااااااااة

كيكى عوووووو يقول...

هتوحشينى بجد

Ehab يقول...

بقالي فتره مش متاب اخبار كوكو بتاعك ده
حرام عليك فطست منكم انتم الجوز
قريت اربع بوستات ومش قادر اكمل قلبي وجعني من الضحك
حماتك دي مشكله بجد دمها فقري ربنا معاكي بقى

ههههههههههههههههههههههه

الهانم شوية شوية .........كانت هتنزلها لنا فى الاخبار تحت عنوان جبنلها عصير علشان تبرطع زى الحمير!!

وبعدين سلامتك من البرد ربنا يكرمك بقى وتخفي علشان تقومي تبرطعي عليهم براحتك

الا هو الأمريكان كيتشن ده حلو يعني

ابقى قوليلي بقى علشان يمكن افكر فيه


سلاااااااااااااااااااااااااااااام

رؤية يقول...

^-^
مذكرات جميلة جدا،
ومن الواضح انى هاكون متابعة جيدة ليها،
فى انتظار المذكرة القادمة،
تحياتى لك.

RASHA يقول...

عندك قدرة جميلة على خلق البسمة على الشفاه تسلم اناملك

إشراقة أمل يقول...

ههههههههههههه
عروسة ننوسة كل سنه وانتي طيبة
بس تلاقس الاعضاء اشتكت على ام كوكو مش عزمتهم على الفسيخ الى عملاة بايديها
والحمد الله انه مش حد كان معاة القلب ولا حاجة وراح فيها كان بقت جناية ههه
تحياتي
اشراقة

بنت الاسلام يقول...

يااااااربي علي البخل

اهو ده النوع الوحيد من الرجالة اللي مايتعاشرش

اسلوبك جميل جدااا

رئـــــيسـة حزب الأحلام يقول...

انا مابحبش الفسيخ ولا الرنجة
من زمان اوى
واوعى تزعل ياقمر
تحياتى

M.a.r.y.o.o.o.m يقول...

ياعروسة يا عسل انا اديتك تاج وياريت تعملي واجبك ومش تنسي

Mafrousa يقول...

هههههههههه
يعني تضرب الراجل بلفسيخ المنتن و لسة عااايش
هههههههه
اعتقد انه مات من الريحة
و الله يا بنتى شم الفسيخ ده حاجه و حسة
ههههه
انا بشم رنجه بس
كل رمضان و انتي طيبة
و سيبك من ككو الضعيف ده

RaRa يقول...

ربنا يعينك ويصبرك
انا اتخنقتلك فعلا
يابنتى سيبك منه
وربنا يكرمك بلأحسن

!!! عارفة ... مش عارف ليه يقول...

الجماعة دوول نسيوا الخس والملانه
والترمس
ولا علشان ملهومش ريحة

بي كوووول
الحياة كفاااااااااااح
شدي حيلك كلنا لها


تحياتي
وليد

نونو يقول...

بصى بقى ليكى عندى تااااااااااج
وحياة كوكو تحلية
تحياتى ليييييكى
يا ننننوسة ان شاء الله ارجع من السفر الاقيييكى منزلة بوست مكسر الدنيا

momken يقول...

هو شم النسيم ده مش بيجى مره كل سنه
ايه الى جاب امه فى الحر ده

وبعدين سبيها تاكل اهى هى الى جبتها لروحها

ويبقى ربنا انقذك فى اليوم المفترج ده

دمك عثل
والبوست جامد

تحياتى

maha zein يقول...

هههههههههههههههههههههههههههههههه
يخرب بيت عقل ام كوكو
وكوكو
وانتي معاهم
غلب ايه ده يا ربي
قال كوكو قال
بس بصراحة الفسيخ شكله جامد
والله رحته دخلت مناخيري
كنتي شيلتيلي طيب
بس ددمك شربات
تسلميلنا

Unknown يقول...

هههههههههههههههههههههههههههههههههه
يخرب بيت عقلك انت تحفة تحفة تحفة والله فظيعة جدا والست حماتك دى عسل والله بس هو انتوا اتعرفتوا عليها منين البنى ادمة دى..ربنا معاكى

حنين القلب يقول...

يا بنتى ارحمى نفسك
كوكو ده هيجننك وامه هتجيب ليكى ضغط
انتى بتكرهى نفسك اوى كده
وبعدين دول مش يتعزموا فى نادى
دول كبيرهم يقعدوا فى جنينه الحيوانات
ويفرشوا وياكلوا ويلموا الناس عليهم

دمك زى السكر
تقبلى مرورى

غير معرف يقول...

اشكرك اولا لمرورك على مدونتى ولتعليقك وذلك شيء يشرفنى جدا
ثانيا احب ان احييك على اسلوبك الممتاز
واكيد هاكون عايشة معاكى لحظة بلحظة فى مدوناتك

حسن حنفى يقول...

اعتزلت التدوين

شكرا انكم قبلتوني في عالمكم الفتره

دي

ويشهد الله كم احببتكم فيه

almasry يقول...

أموت وأعرف انا بعلق والتعليق بيروح فين؟؟؟؟؟؟؟؟


انتى حاطه بليه بيخطف التعليقات؟



والنعمه أغتاله انتى عارفه انى قفايا بسم الله ماشاء الله داق المر على ايد الظباط ف مش هتكبر عليا حكاية اغتيال بيله


اسمعى كلام وطاوعينى أحسن ليكى


طبعا ده انا بهزر فيه


تحيـــــــاتى
المصــــــــــــرى

ياسر يقول...

هههههههههههههههههههه
والله مشكلة وموقف بجد
لاا تحسدي علية
بس غلطي بردك كنتي لقيتي
المتفجرات والشنط وطبعا عارفة
حماتك اكيد مجهزة مفاجاءة كان بلاش
النادي
تحياتي

مصر يا موكوسه .....يا مزارع الكوسه يقول...

اقوم انا و مجموعه من المدونين بعمل حملة لانقاذ اطفال الشوارع
التفاصيل هنا
http://awraqwasrar.blogspot.com/
نرجو اشتراك الجميع

حنين القلب يقول...

والله يا حبيبتى انتى ليكى الجنه
وبعدين انتى صغننه
فركشى الخطوبه دى احسنلك
بدل ما بكرة هتغنى ظلموه
ربنا يصلح حالك
دمك سكرررررررررررررر

عاشقة القمر يقول...

بجد بوست جميل بس مستنيه ايه احسن تركي داه قبل جواز كده بعد ها بكون ايه ههههههههههه

ahmed_k يقول...

فينك يا ننوسه
طولتي الغيبه

Lady E يقول...

جوجو وحشتيني اوي يا قمرايا

يا رب تكوني بخير

كل سنة وانتي طيبة ومتطوليش علينا في البوست الجاي وحشتني كتاباتك الجميلة

حسن حنفى يقول...

حضرتم مش كتبتي من زمان

يارب تكوني بخير

نونو يقول...

اذيييييييييكى اخبارك
عايزيم جدييييدك

M.a.r.y.o.o.o.m يقول...

سيادتك يا هانم بقالك 3 اسابيع مكتبتيش اي حاجه عل المانع خير يارب
وحشتيني طحن

الكاتب احمد كاجوال يقول...

السلام عليكم
بعد التحية و السلام نفيدكم علما بأن مدونة
شباب الصحبة
بدأت المرحلة الاولي من العمل و نحن نقدم الان أجرأ و أكثر المقالات التي تتنوع ,, نرجو منكم المشاركة من جديد ابداء الرأي علي المواضيع وبدأ التعليق ,, كما أرجو المشاركة في الاستفتاء

دة أمل ليا و شرف ,, انا حكون سعيد لو تمنحهولي

مجهود أكثر من 5 شهور ينتظر أجابة فرد

و جزاكم الله خيرا علي كافة الاحوال
http://so7bah.blogspot.com/

سارة يقول...

ههههههههههههههههههههه

طوبه فضه وطوبه دهب يقول...

بجد ربنا يكون فى عونك اسلوبك جميل بس فعلا دا شخصيه لا تطاق ولا تحمتمل انا لو منك ما اكملش ولا دقيقه زياده لما كده فى الخطوبه امال بعد الجواز هيوفر ومش هياكلنا او ممكن ياكلنا يوم ويوم ربنا يصبرك على ما بلاكى تحياتى عزيزتى

طوبه فضه وطوبه دهب يقول...

بجد ربنا يكون فى عونك اسلوبك جميل بس فعلا دا شخصيه لا تطاق ولا تحمتمل انا لو منك ما اكملش ولا دقيقه زياده لما كده فى الخطوبه امال بعد الجواز هيوفر ومش هياكلنا او ممكن ياكلنا يوم ويوم ربنا يصبرك على ما بلاكى تحياتى عزيزتى

طوبه فضه وطوبه دهب يقول...

بجد ربنا يكون فى عونك اسلوبك جميل بس فعلا دا شخصيه لا تطاق ولا تحمتمل انا لو منك ما اكملش ولا دقيقه زياده لما كده فى الخطوبه امال بعد الجواز هيوفر ومش هياكلنا او ممكن ياكلنا يوم ويوم ربنا يصبرك على ما بلاكى تحياتى عزيزتى

طوبه فضه وطوبه دهب يقول...

بجد ربنا يكون فى عونك اسلوبك جميل بس فعلا دا شخصيه لا تطاق ولا تحمتمل انا لو منك ما اكملش ولا دقيقه زياده لما كده فى الخطوبه امال بعد الجواز هيوفر ومش هياكلنا او ممكن ياكلنا يوم ويوم ربنا يصبرك على ما بلاكى تحياتى عزيزتى

طوبه فضه وطوبه دهب يقول...

بجد ربنا يكون فى عونك اسلوبك جميل بس فعلا دا شخصيه لا تطاق ولا تحمتمل انا لو منك ما اكملش ولا دقيقه زياده لما كده فى الخطوبه امال بعد الجواز هيوفر ومش هياكلنا او ممكن ياكلنا يوم ويوم ربنا يصبرك على ما بلاكى تحياتى عزيزتى

ايمان العرفاوي يقول...

ممممممممممممم
مش عارفة لو من وحى خيالك ولا ده الواقع
لو الواقع انصحك ماتكمليش اشترى نفسك وسعادتك
لو من وش خيالك ابدعتى
دمك خفيف جدا

هدى صفوان يقول...

والله انتى دمك تحفة بس هو فيه اللى اكتر من كدة طبعا ... انا خرجت مع خطيبى قصدى اللى كان خطيبى اول خروجة دفعنى من جيبى من غير ما يتكسف ولا وشه يحمر خجلا ... كوكو ابن النبيهة دة حكاية طبعا بس يا رب يزهق مرة ويدفع من جيبه

ليكوريكا يقول...

ومن الفسيخ ما قتل

انا عندي برد اساسا وشميت الرحه وانا قاعد عالجهاز دلوقت

ربنا يكون فعونكم

ومستنيين خبر فسخ الخطوبه عالعيد الكبير بقي

كل سنه وانتي بخير

لاسع افندى يقول...

الموضوع دمه خفيف جدا
بس البخل ده مالوش علاج

احلام جوليا يقول...

بجد دمك ذي السكر موتيني من الضحك ايه ده بجد كنت بتفكري كده وانت بتكلمي الننوس كوكو مسكينة والله يا بنتي امال حتعيشي معاه ازاي والله عسل بجد دمك شربات
تقبليني من اصدقائك الجدد

model يقول...

بصي يا دودو ، اوعي و اياكي و حذاري و على الله و احذرك ان تتمي هذه الزيجة
يا شيخة ده ايه النيلة دي
و كمان بتدلعيه و تقوليلوه كوكو، ده انا دمي اتحرقلك يا شيخة
امال لما شحنة البخل المنوفي دي في الخطوبة امال لما تتجوزوا هيعمل ايه خيسرحك تشحدتي في الموالد
و بعدين الست تنرفز و انتي ملاحظة ، فلسعي ة لا يستاهل
ده ايه ده
يا اعوذ بالله
اصل انت مش طايقاه و هو لا يطاق و لا الست والدته لحيزبونة القرشانة الدندبيس دي
و بعدين دي باين عليها هتعقرب حياتك
يا شيخة اخلعي بلا مصايب
اخلعي دلوقتي بدل ما تهعيشي معاه 30 سنة و بعديها تفتكري تعملي ثورة قبل ما يموت ب 6 اشهر و تخسري النفقة و السقط و اللقط
و الله معصبة
بس جايالك تاني اما اشوف اخرة حماتك ايه
المرة الجاية خديها عند ميدان التحرير تشم قنابل مسيلة للدموع و غازات سامة

موديل