الثلاثاء، 24 يونيو 2008

مــــــــــــــــــــرتبة هـــــــــــدية....للـــــــست حــــــــــــــــــشــــــــريه



كوكو وطنط قاعدين....... يكلموا مع بابا وماما فى بقيه العفش

ماما قالت لكوكو" ها يا حبيبى تحبوا ننزل امتى علشان نشترى بقيه لوازم اوضه النوم يلا بقى خلصونا عايزين نفرح"

كوكو ...ماما انتى ايه رايك تحبى ننزل امتى؟

طنط زكية " وهو ايه اللى فاضل فى اوضه النوم يا حاجة؟؟ ما احنا خلاص خلصنا كل حاجة .......مش فاضل الا الرافيع والتنجيد.

انا وماما وبابا بصينا لبعض ....تنجيد!!

طنط " ايوه انتم نسيتم ولا ايه ؟؟ وبعدين التنجيد عليكم مش علينا علشان نبقى متفقين اما الحاجة ساقعه بتاعه التنجيد زى بعضه ......خليها علينا علشان متغرموش ادينا عدانا العيب.

انا فى سرى وانا مفروسة "يا شيخة وجايه على نفسك كده ليه هتجيبى حاجة ساقعة .....ما كفايه انتم

"هو فيه اسقع منكم"

ماما قالت ".يا حاجة تنجيد ايه...... وحاجة ساقعة ايه احنا مش هنجد "

طنط برقت لماما وفطت من مكانها زى الفرقع لوز.....وفجأه اتحولت وبقت شبه زكيه زكريا

وقالت "ايه مش هتنجدوا ازاى ايه الكلام الفارغ ده......ناوين تنيموا الواد على الارض ولا ايه ؟؟

اظن دى كمان فيها تقاليع....... زى بتوع الشورتيم ؟؟ تقصد الشوتايم

انا فطصت على روحى من الضحك......وقلت لها " يا طنط احنا مش محتاجين تنجيد وكلام من ده ........احنا هنشترى كله جاهز

طنط... برقت وقالت" نعم جاهز..... لا بقى كله الا التنجيد انا ابنى لازم يتنجدلوا..... اه.....هو اقل من الناس ولا ايه...... ونجيب زفه وهيصة ونعزم الحبايب والاقارب.....ونطبل ونهيص

وهو فى جواز من غير تنجيد؟ لا...... انا لازم افرد البطاطين والالحفة كده قصادى وافرج الناس واكيد العوازل

وراحت عملت زى فيلم هنيدى" فى ناس معينين احب اوصلهم رساله معينه.

"لازم اعرف الكل ان ابنى اتجوز جوازه فل الفل"

انا فى سرى "واحنا مالنا ومال الرسايل بتاعتك ...انتى هتعمليلنا فيها ساعى بريد!


" وبعدين بطاطين ايه.... والحفة ايه يا ست انتى .....احنا هنجهز ولا هنفتح دراى كلين؟؟

هى بقى اتنططت وقالت

يا ختى انا اول مرة اشوف جواز كده ....راحت بصالى ....يا بت بقى كفايه فرجة على الدش اللى خربلك عقلك ده


انتى عايزة الناس تضحك على ابنى........... وتاكل وشه وتقول منجدش؟؟

انا بصيت لها وقلت" يا طنط ....التنجيد ده موضه وبطلت...... دلوقتى احنا فى عصر السرعه

راحت بصيت لى وقالتة " لا ما تخافيش اذا كان على السرعه هخلى المنجد يخلص فى ساعتين مش هياخد وقت"

ماما ردت عليها " ليه بس يا حاجة.... ما احنا هنشترى جاهز وهيبقى احلى من القطن ....والتنجيد والهيصة دى ..وان شاء الله هيعجبك

انا بقى" يا طنط الحكايه كلها مرتبه ومخدات .... مش محتاجة منجد يقعد يضرب القطن ويبعزقه على الارض ...... ولا محتاجة لمه وهيصة وقرايب...... وجيران....... واهو نوفر على حضرتك حق الحاجة الساقعة"

رحت بصت لى" وافقى انتى بس ......ومالكيش دعوة .....وانا فى ديك الساعة لما اغرملك""

انا فى سرى" صحيح ...الحاجة الساقعة بالنسبه لك غرامة"

طنط نطت من على الكرسى وغمزت لابنها

" عاجبك الكلام ده يا كوكو يا حبيبى... خطيبتك عايزة تشمت الناس فينا ......اودى وشى فين من الجيران ....اودى

وشى فين من قرايبنا ؟؟ يا ارض انشقى وابلعينى ....يا كسوفى

"انا فى سرى" والله يا ريت الارض تنشق وتبلعك...... بس مش وانتى عندنا"

انتى جايه توقعلنا البيت..... هو احنا ناقصين ....مش كفايه...... ناكسيتنا فيكى انتى وابنك

كمان هتخلينا ننكس البيت؟؟

وعلى العموم..... لو الارض تنشق وتبعلك عندنا مش مشكلة..... انا اصلح البيت على حسابى

بس هى تبلعك يا شيخة انتى.... وبططينك والحفتك دى اللى عايزة تذلى بيهم الناس.

طنط بصت لبابا" اتكلم انت يا حاج ساكت ليه ...عاجبك كلام بنتك بقى دى الاصول؟؟

كمان المرتبه بقى فيها قديم وابصر ايه جديد؟

انا فى سرى" طبعا .....عايزنا ننجد ونجيب فرقه بزمامير....... ونغنى ونهيص.... وتعزم الجيران..... وعيله العيله وكله على حسابنا

بابا بص لها وقال " يا ست الحاجة هدىء نفسك ....العفش عفشهم والحاجة حاجتهم ريحى انتى نفسك وسيبهم على راحتهم"

ماما ردت" يا حاجة مفيش حد بينجد خلاص ......الناس كلها بتشترى جاهز وبعدين قطن ايه وكلام فاضى ايه ....دلوقتى كله سفنج وسوست والالحفة فيبر ...كده يعنى حاجة شيك تليق بابنك وبنتى"

طنط " فبر ايه... وكارتون ايه..... انتم هتنيموا الواد على ورق علشان تكسروا ضهره ....لا ما فيش احسن من القطن"

انا فى سرى" فبر ايه وكارتون ايه هو احنا هنيمه على كراسة....ارحمينا من فقاقتك دى واسكتى"

طنط قعدت تعدد على عمرها ولا اللى عندها ميت......وكأن المرتبه دى تقرب لها...... او من بقيه عيلتها "

شوية راحت بصت لكوكو " عاجبك كده يا افندى ...اعمل ايه بقى فى النقوط اللى كنت بنقطه فى تنجيد القرايب والحبايب ....مين اللى هيرد النقطة دى دلوقتى ...ها "

كوكو" معلش يا ماما حقك على ابقى اخصميه من مرتبى "

انا وماما بصينا لبعض وتنحنا ......انا فى سرى" يا نهارك اسود قولى بقى كده..... كل ده علشان النقطة ؟؟ الهى تتنقطى كمان وكمان زى ما نقطتينا وعلتينا

ماما بصت لكوكو " خليك فاكر يا ابنى عدى علينا بكره علشان ننزل نشترى المرتبه.

كوكو" حاضر يا طنط بس هو مين اللى هيشيل المرتبه!؟

انا وماما فى نفس واحد وبنتريق" احنا..... يعنى هيكون مين؟....راح رد علينا " اه اذا كان كده معلش"

وانا وماما كنا هنتشل منه وهنحدفه هو ومامته من البلكونه

طنط بصت له وهى مش عاجبها" هو انت كل حاجة حاضر ....لما نشوف اخرتها ايه فيك انت والمعدله"

احم احم ..........تقصدنى انا طبعا

وجـــــــــــــــــــــــــــــــــــاءت النقـــــــــــــــطه التاليه

انا قلت لماما .....ايه احنا مش هنتغدا قبل ما ننزل؟

ماما ردت" لا يا حبيبتى مفيش وقت....... خطيبك زمانه جاى متاخريناش وهو يبقى يغدينا"

انا ضحكت " يغدينا ...حرام عليكى يا ماما يبقى انتى كده......... ناويه تموتينا من الجوع "

المهم كوكو وصل ومعاه واحد قريبه ...اظاهر جايبه علشان يشيلنا الحاجة .....اصل كوكو رقيق بياكل رقاق كتير.......مش بتاع الحاجات دى....وكان جايب معاه عربيه واحد صاحبه علشان نحط فيها الحاجة......... ده نظرا طبعا للتوفير

بصيت له وحبيت اتريق وقلت له " ايه ده مش معقول تكون طلعت اللى تحت البلاطه واشتريت عربيه؟؟

راح بص لى ببرود " لا طبعا يا حبيبتى وانا عبيط علشان ابعزق فلوسى.... ده انا بعت البلاطة نفسها......وبعدين دى عربيه واحد صاحبى............ بيحبنى اوى ولما طلبتها قالى متغلاش عليك

واهو نوفر حق تاكسى!

قلت له" لا فالح ما انت هتحط بحق التاكسى بنزين"

رد قال" لا ما انا واخدها منه فيها بنزين

انا قلت له" يا ساتر يارب ....... طيب ربنا يستر وترجعهاله سليمه"

شوية ولقيناه ياخد كل مطب ومطب......... ولا كانه راكب عربيه لورى ومحمل معاه غنم.

...المهم انه دغدغنا.... حبه ......والعربيه وقفت بينا ...فضيت بنزين

يقوم يقول وهو بيبص للعربيه ....وده وقته بردوا يعنى لازم تغرمينا ...........ما الواحد كان خد تاكسى اوفر

شوية ودخل محطة البنزين ......نلاقيه طلب من الراجل خمسه لتر... تخيلوا ؟؟

شوية شوية كان هاين عليه يحطلها زيت اكل علشان يوفر"

رحت بصيت لماما وقلتلها.....هيغدينا ها؟؟

اذا كان مش راضى ياكل العربيه اللى هتوصلنا هياكلنا احنا؟

"والله لو كانت العربيه بتتكلم..... لكانت صرخت 100 صوت ......والله صعبانه عليا "

ماما قالت لى" انا علشان مش هاكل؟؟ قلتلها .......لا العربيه..... بس صاحبها يستاهل

المهم وصلنا المعرض ..... ودخلنا نشترى المرتبه....... لقيناه عمال يبص يمين ويبص شمال ولا فاهم حاجه فى اى حاجة

ويقول " والله ماما كان عندها حق التنجيد احسن واوفر ....ده شغلهم اى كلام ....بقى القطن..... ولا حشو ورق الكلينكس ده؟؟

انا بصيت له وانا فى قمه الغيظ وقربت اشد فى شعرى.....ورق كلينكس ! ارحمنى يارب

المهم اشترينا المرتبه......... قبل ما صاحب المعرض يسمعوا ويضربه بيها....... واحنا معاه

شوية ولقينا طنط بتتصل بكوكو........انا بصت له وقلت" ايه خير .....فى حاجة ..وفى سرى" الحربايه عايزة ايه".....ناويه تسم بدنا بايه المرة دى؟

رد وهو بيضحك بسخافه" والله ماما بتحبك موووت"

بصت له وقلت فى سرى....ان كان القمح يساوي التبن ....يبقي الحما تحب مرات الابن

كوكو قال"اصلها بس بتقول هتجيلنا على الشقة....... علشان تشوف المرتبه

رديت بغيظ" قصدك تعاينها.

المهم وصلنا الشقة ولقينا الست حماتى وصلت

وقعدت تتفرج على المرتبه وتضغط عليها شمال ويمين وفوق وتحت .......المهم ماخلتش فيها حته الا لما عملتلها كشف

هيئه ......اصلها تقريبا كانت شغاله منجد قبل كده

وراحت قعدت على المرتبه تتنطط ولا العيال الصغيرين

وراحت بصت لى وقالت" لا والله برافو عليكى .......حلوة ومتينه تستاهل حقها ....ومريحة كمان ....الا قوليلى هى دى محشيه اسفنك؟؟

راح كوكو فرح اوى وقال لها " تصدقى يا ماما نفس الا قلته لما كنا بنشتريها فعلا حلوة ومريحه

حماتى بصت لابنها وقالت" لا بقولك ايه ......زى ما اشتريت لعروستك مرتبه اسفنك ..........لازم تشترى لامك

حبيبتك واحده .....اه بدل المرتبه القطن اللى قطمت دهرى"

انا وماما لما سمعناها بتقول كده كنا هنقلبها من على المرتبه هى وابنها......امال كنتى عاوزانا ننجد ليه لما القطن بيقطم الدهر؟؟

انا بقى من باب المجامله وانا مفروسة" اتفضلى يا طنط ...وهى تغلا عليكى...وفى سرى ...خسارة فى جتتك"

راحت فرحت اوى وبصت وقالت"خلاص مقبوله ......واهى تبقى بدل فلوس النقطة اللى ضيعتوها عليا "

هناك 50 تعليقًا:

غير معرف يقول...

Thanks to the blog owner. What a blog! nice idea.

R-H-S يقول...

ههههههههههه
بجد حماتك دي فظيعه ربنا يحميهالك
بس انتي طلعتي جدعه انك اديتيهالها انا افتكرتك هتقوليها اتفضليها بس هي بكذا
خلي العريس بقي هو اللي يشتري التانيه

تحياتي وبجد بوست هايل

Mafrousa يقول...

عروسة انا مش عارفة اقرى الكلام من برة
انا حقراة دلوقتي من جوه مع التعليقات و بعدين اعلق

Mafrousa يقول...

هههههههههه
اتفرستي زيي
هههههههههههههههههه
تصدقى ...انا بتفرس منك كل لما ادخل
اوعي و النبي يا شيخه تكوني اتجوزتيه
بليييييييييييييييز
انا مش عاوزه اموت ناقصه عمر
ههههههههههههههههههه

كيكى عوووووو يقول...

جنة ازيك اييييييييييييية اخبارك كويسة متغبيش كدة تانى علينا..اشوفك احلى دكتورة فى الدنيا ياررررررررررب ركزى اوك....
..............................
بالنسبة للبوست...مفيش ولا كلمة فى البوست غير مجرد الوان احمر واخضر
.................................
بس واضح انك اشتريت حاجة لحماتك يابنتى اقتليهم احسن
......................................
نسيت اقول عوووووووووووووووووووو انا جيت اتخديتى

غير معرف يقول...

جنة ازيك؟ تقريبا فى مشكلة فى الEncoding
بس أنا أخدتهcopy&paste على الword
وقريته.
الست حماتك دى تشل أوى بجد أوعى تكونى اتجوزتيه؟!!!!!!!!!
أصل أنا أعرف نوعية الناس دى بتوع "أب بلاش كتر منه" و أصحاب نظرية الإستنصاح.

ربنا معاكى و الله يكون فى عونك بجد.

غير معرف يقول...

Your blog is very creative, when people read this it widens our imaginations.

عاشــــــ النقاب ـقــــة"نونو" يقول...

يا نهاااااااااار ابيض
بجد اخدتها ولا عملتوا ايه
ربنا يعينك يارب
وتؤجري على احتمالك
تحياتي

ميرا ( وومن ) يقول...

عروسة ننوسه
اول زيارة لمدونتك وبجد بجد هايله
واوعي تكوني اتجوزتي كوكو
والحمد لله اني مبعديش اكتر من مرحلة التعارف
خالص تحياتي

walaa يقول...

ههههههه
ما هى عندها حق مش ضيعتوه عليها قاوس النقطه
تخدها بدلها
تحياتى ولاء

رحيق الحياة يقول...

ههههههههه

تسلم ايدك يا عروسة ضحكتيني من قلبي ربنا يفرح قلبك

شكرا علي مرورك بمدونتي

wanna b a physician يقول...

ان كان القمح يساوي التبن ....يبقي الحما تحب مرات الابن

ههههههههههههههههههههههههههههههههههه
حلو المثل اوى بس مش كل صوابعك زى بعضها
هى عايزه تجيب قطن بقا ويملى الدنيا يتعب الصدر وتقعدوا تكحوا للسنة الجاية

Unknown يقول...

هااااااااهااااااااااااااااااىىىىىى يخرب عقلك يا بت انت...............
اخيرا كتبت حاجة جديدة بس ايه العسل دة؟؟؟؟؟ قولى لحماتك جيبى المراتب من ماستربد نوم افضل تساوى حياة افضل

بنت مصريه يقول...

يلبنتى وايه اللى زانقك طيب
مدام مش عجبك العريس
متخلصى م الجوازه دى
والله صدقينى الاحترام مهم جدا ف انجاح العلاقه الزوجيه
وبعدين على فكره القطن النضيف
اغلى من المراتب الفايبر الجاهزه
وصحيا احسن كمان

أمل فتحى عزت يقول...

السلام عليكم
بكل الحب والاحترام ادعوك لمتابعة الحلقة الرابعة من حكاية عمى رمزى وعم عمارة فى الحارة تعالوا نسمع ونشوف العفاريت بتقول ايه عن الحارة
مع خالص تحياتى

nado يقول...

حمد الله على السلامه ياقمر ايوه كده عايزين البوستات الجامده دى بس ياريت اجمد حاجه عندك على دماغ حماتك مش تقولى ليه مرتبه
انتى حنينه قوى ...

!!! عارفة ... مش عارف ليه يقول...

بوست هاااااااايل

بس شوري عقلك قبل ما توصلي للمأذون أحسن كده خلاص قربتي تدخلي في الجد

تحياتي

محمد حلمي مخلوف يقول...

بعد كل ده خدت المرتبة
ي ست معندهاش دم خالص

صالح سعيد يقول...

الموضوع حلو بجد
بس فيه مشكله كبيره وهو انه كبير جدا
لو اتعمل على 3
اجزاء كان هيبقى احسن بكتير
يا ريت تراعى النقطه دى
الحاجه لما تبقى صغيره ومكثفه بتدى تاثير اكبر واحلى
بس برضه منكرش ان اسلوبك حلو
تحياتى

blue-wave يقول...

البوست هايل ويجنن فعلا
تحياتى

rovy يقول...

لا لا لاااااااااا ما تقوليش انها اخذتها بجد لا بجد ده مستحيل يكون فى من نوعها كثير ... انت صعبانه عليه علشان الحروب اللى حتصارعيها فيها بس اللى مطمنى عليكى انك جادعة و حتقدرى ان شاء الله تغلبيها .. عوضك على الله فى المرتبه وان شاء الله تعوضيها و ياريت تكونى اتعلمتى الدرس و اوعى تانى تعزمى عليها بأى حاجه ..
اللى نفسى اعرفه انتى بجد حتكملى مع كوكو ده .. !!!!!!!!
ادينا متابعين ومين عارف يمكن تعرفى تصلحيه و كله بثوابه .

تقديرى و تحياتى
rovy

_**( قلب الأسد )**_ يقول...

هههههههههههههههههههههههه
ايه دة كلة ليه دا كلة
دا كوكو دة طبع ذى اسمة اما امه انا بدأت اكرها
هههههههههههههههههههههههههه
ربنا يوفقك
بصراحة كتاباتك مميزة جدا

حبيبـــــــة القمـــــر يقول...

هههههههههههههههههههههه

عسل يابنتي
مش ممكن كتاباتك دي
بتهلكني ضحك
ربنا يسعدك ويوفقك يارب
بس فكري
وبعد كده
فكري تاني
وبعد كده فكري تااااااااالت
دا عمري يابنتي مش لعبه

عاشقة القمر يقول...

يالهووووووووووووووووووووووي
ههههههههه .. عايزة اقولك ان انا كنت هتشل وانا بقرأ البوست .. ايه الحما دي .. بعدين ايه العزايم اللي هي كانت عايزة تعملها على التنجيد دي يعني انتوا اللي هتنجدوا وكمان هتجيب اهلها وكل اللي نقطتهم في يوم من الايام عندكم في البيت .. يا نهااااااار .. دي مش ممكن .. ربنا ما يكتب على حد ابدا بحما زي دي :)
بعدين سوري في السؤال هو انتي ايه اللي جابرك على كوكو وامه وانتي مش طايقاهم كده ..
رغيت كتير انا .. بس عايزة اقولك ان دي اول زيارة ليا في مدونتك بس ان شاء الله مش هتكون الاخيره .. انتي عسوله جدا وطريقتك عسوله زيك واكيد هاجي هنا تاني كتير ان شاء الله .. وصحيح عجبتني اوي اوي اوي -إن كان القمح يساوي التبن كانت الحما حبت مرات الابن دي - عجبتني مووت وكتبتها كمان اصلي كنت اول مرة اسمعها
تقبلي تحياتي واعجابي ..

موناليزا يقول...

يابنتى ماتعزميش على حماتك باى حاجة وماتبدايش معاها كلام
خلى اللقاء بينكم يعدى على خير

a.aTeYa يقول...

ههههههههههههههههههههههههههههه

انا موعدكيش انى كملت قرايه عشان بتفقع من الحموات بس لحد ما قريت البوست مسخرة اخر حاجه :D :D

ليكوريكا يقول...

طب ليه يا عروستنا تعملي فنفسك كده

حرام عليكي نفسك

دنتي هيجيلك الضغط والسكر وهبقي زبونه دايما لصيدليات ليكوريكا :)))

ربنا يخليلنا كوكو وحماتك عشان نسترزق

ليكوريكا

شفـقــة و إحســــان يقول...

يا عروسة دى مش حماه دى حمى
ههههههههههههههه
بس انتى اسلوبك جميل جدا .....ضحكتينى كتير
احسان اللوذعى

اهو ده عيبه يقول...

ايه ياختى الست اللى ميتى ع الدنيا دى
ومش هاين عليها فلوس النقطة تروح
اعوذ بالله
لا وبعد كده عينها راحت ع المرتبة وعايزة زيها
ربنا يلطف بينا

أحمد زاهر يقول...

ربنا يخليلك حماتك بجد فى كده فى الدنيا
ربنا يستر

•√أريـ السمر ـج√• يقول...

ميل جداً أسلوبك و كلماتك من القلب

حقيقي استمتعت بالمدونة كتير

أسعد الله قلبك
و دمتى بكل الود

كيكى عوووووو يقول...

عوووووووووووووووووووووووو
............................
جاية اسلم واطمئن على الجميل واقول
وحشتينىىىىىىىىىىىىىىىىىىىىىىىى
عووووووووووووووووووووووو

ahmed_k يقول...

هههههههههههههههههه
اما والله وكسه
وكمان خدت المرتبه
مش كان التنجيد أوفر
اهو بدل متنجدوا مرتبه واحده
اشتريتوا اتنين ههههههههههههه

والله مدونتك دمها زي العسل

ولا النقطه
بلاوي ايه دي بس ههههههههه

استمري
كوني الأبتسامه
في وسط الظلام

وتقبلي خالص مودتي

ahmed_k يقول...

انا لسه مكملتش كلامي

انا بصراحه مشفتش عروسه متنجدش
التنجيد دايما عالعروسه
معلش احنا بنتكلم جد دلوقتي
بس حكاية الحفله بتاعت التنجيد دي اللي ملهاش لازمه
انا شفت ناس عامله دي جي في الشارع والمنجد شغال في وسط الحاره
ولما سألت عرفت انه في القاهره بيعملوا حفله للتنجيد

بصراحه استغربت الوضع لأنه معندناش الكلام ده
هي حفلة الحنه وحفله الجواز وبس
لكن يوم الشبكه ويوم التنجيد مبيحصلش عندنا فيهم لا دعاوي ولا حفله

وفي النهايه عايز اشكرك لتعليقك في مدونتي واللي كان طريقي للتعرف علي مدونتك اللذيذه الرائعه

سلام بقه علشان صوابعي تعبت من الكتابه

سلااااااااااااام

Desert cat يقول...

ســــــؤال جديــــــد
على مدونة برنامجنا الإذاعى
http://netonradio.blogspot.com/
أنت تسأل والكمبيوتر يجيب
والذى يذاع يوميا الساعه 9.10 صباحاً ما عدا يوم الجمعه
على إذاعه البرنامج العام
الســـــؤال هــــو
تسمح لى اقرا افكارك ؟شكرا
الأشاره حمراء الأشاره خضراء صفراء لافرق فانت متاخر متاخر عن موعدك ....ايه كل العربيات دى؟
المرور متوقف لا يتحرك وبعدين لو اقدر اطير!؟؟؟
وتفكر وتسرح ....ما هو السكه واقفه....تفتكر حيخترعوا سيارات تطير؟؟؟؟
ونحب نعرف منك بماذا اجبت .
اهلا وسهلا بارائكم واقتراحاتكم
تمنياتنا بدوام التواصل

روح شرقيه يقول...

يا بنتى الحقى اهربى من الجوازه دى
دى مش جوازه دى ورطه والله بجد ورطه
الله يكون فى عونك فى ستات كده يا الله دى مارى منيب كانت بقى ملاك فعلا بالنسبه لحماتك
الله يكون فى عونك ويخلصك منهم على خييييييييييييييييييييييييييييير

نونو يقول...

يا ساتر على حماتك الله يكون فى عونك
خسارة فييها المرتبة
حسبى الله ونعم الوكيل
تنام علييها

نونو يقول...

بجد انا قريت المدونة كلها تحفة جدااااااااااااااا
وان شاء الله اكون زبونة فى مدونتك الجميلة عجبتنى جداااااااا

إيثار يقول...

ههههههههههه
ربنا يعين كل اللي
لي حماة زي دي
بوست رائع

تحياتي

أمل فتحى عزت يقول...

حملة للرد الاعتبار
.......................
حيوا معى العين الساهرة للحفاظ على المقدسات وعودة الحق لأصحابه عندما أعاد الدكتور/أسامة السعداوى صياغة التاريخ المصرى القديم لقد نصر العالم الجليل تراث الاجداد وقدمه للآحفاد لينهلوا العلم من أوسع أبوابه تعالوا يا أبناء مصر

نطرق باب النابغةالدكتور /أسامة السعداوى لنعرف منه الحقيقة


قودوا معى حملة الشرف والكرامة فى رفع الظلم عن أجدادكم وانتم أصحاب كلمة فلتكن فى موضعها فلا استقامة للمستقبل الا بتصحيح مسار تاريخنا واحياء علومنا وحضارتنا


ادخلوا الموقع الخاص بالعالم من على صفحة مدونتى الرئيسية
ولكم منى جزيل الشكر

إبن مصر يقول...

عروسه ننوسه
انا كده هزعل بقا انا فاكر انى علقت على الموضوع ده قبل ما اسافر وعلى العموما انا كنت داخل اشوفك واشوف ردودك وبجد انتى كل تعليقات على الست دى جامده اوى اوى براحه على حماتك شويه
تحياتى

غير معرف يقول...

لا بجد حرام وانتى مستحملة كل ده ازاى
ضحكتينى قوووووووووووى ولسة ياما هنشوف
هههههههههههههههههههههههههههه

بنت من زحل A girl from Saturn يقول...

كل ده عشان هو امور شويتين
ده لو كان اتقدم لى انا كان زمانى طردته هو ووالدته شر طردة
إيه اللى غاصبك على كده
ده واحد عروسة وشقة بالزمة ده راجل ده

كيكى عوووووو يقول...

u عوووووووووووووووووووووووووو

............................
عاملة اييييييييييييييييييييية
هتنقشى الدكتورة امتى...ربنا معاكى
وحشتينى والله
عوووووووووووووووووووووووووووووو

حنين القلب يقول...

يا لهوووووووووووووووووووووووى
يخرب بيت الحموات اللى بالشكل ده والازواج كمان
يا شيخه انا مرارتى اتفقعت والله انتى ليكى الجنه وانتى كده كده هتدخليها بعد شهر العسل مباشرة اذا كان مش قبله كمان
ليه يا بنتى يقطع الجواز اللى بالطريقه دى
يا حبيبتى والله سيبكك من كوكو ده ده حتى كفايه اسمه يشل وامه تجيب جلطه
انتى مش بتخافى على نفسك خافى على مامتك وباباكى دول هينفضوكم واخدت كمان المرتبه
يا رب ما توعى تنام عليها
سلام بقى مرارتى اتفقعت الحق اروح احجز فى المستشفى

. يقول...

i am new in blogging world
this my blog
http://aliaawwe.blogspot.com
waiting for your comments
thanks

عاشقة القمر يقول...

ايه ده هو انا هزعل منك ولا ايه .. فين الجديد انا مستنية بقالي كتيييييييير اوي ..

كيكى عوووووو يقول...

عوووووووووووووووووووووووووووو
.............................
طاااااااااااااااااااااااال
غيابك اووووووووووووووووووووووى
...................................عووووووووووووووووووووووووووووووو

M.a.r.y.o.o.o.m يقول...

لالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالا
دي بجد بجد بجد بجد بجد بجد ست تنقط انا ضغطي علي منها
ههههههههههههههههه

model يقول...

لا ده انا حسبنت على الست دي
ربنا ينجيكي منها هي و ابنها الجلدة ده
موديل