الأحد، 16 مارس 2008

لــــــــــــــبن...ســــــــــــــمك...تمـــــــــر هنـــــــدى



خرجنا نشترى شوية حاجات لوازم البيت مفروشات وستاير كده يعنى ...المهم واحنا بنتفرج البيه قال ايه مش عاجبه حاجة كل ما نختار حاجة يقول لا مش عجبانى هى بصراحة مش هى اللى مش عجباه ده سعرها اصل خلاص بقيت عارفاه.
يبص لماما ويقول ايه ده ياطنط دى الاسعار مولعة ..طيب ينفع نتجوز ومنجبش الحاجات دى؟ هى فلوس وخلاص ..ماما بقى تبص بغيظ وتقول ايه يا بنى وده معقول بردوا فى عروسة ما بتشتريش الحاجات دى؟وهى من جواها عايزة تديله حته علقة

وقالت بغيظ....امال انت فاكر ايه كل حاجة بقيت غالية امال عايزين تتجوزوا وبس ؟ يقوم يرد يقول "اه يا طنط بس مش كده هو المرتب هيقضى ايه ولا ايه...ولا صحيح البركة فيكى وفيكى انتى كمان يا حبيبتى مهو ايد على ايد تساعد ومرتبى على مرتبك يا دوب يقضى مصاريف الشهر!

المهم بصيت وقلت "اه بس انا كنت بفكر اقعد من الشغل استت يعنى.....طبعا نزل عليه سهم الله وقال وهو متنح ها لالا معقول ده دى بقعدة البيت وحشة ومملة وبعدين يا حبيبتى ازاى هتحققى ذاتك وانتى فى البيت؟ طبعا انا كان نفسى احقق ذاتى فى المطبخ لكن هو طبعا بيفكر فى المرتب مش فى تحقيق الذات...وبعدين كمل كلامه وكمان يا حبيبتى اكيد انتى ليكى احتياجات على الاقل تيجيبيها ومتحرميش نفسك من حاجة...قلت فى سرى(يا بجاحتك ده اللى اختشوا ماتوا)ايه الكارثة اللى اتحدفت على دى ده عايز واحدة تتكفل بيه مش تتجوزه.

شوية وماما قالت لى بقولك انتى مش عاجبانى اختارى اللى انتى عاوزاه وهو يشترى امال احنا نازلين ليه ...شوفى انتى عايزة ايه ولا كل حاجة احنا اللى هنعملها؟ امال الباشا ده هيجيب ايه ولا احنا اللى هنشترى كله وهو هيتفرج زى طرزان .

المهم كل ما ندخل محل ونقف نختار نلاقية فص ملح وداب شوية بنشترى الستاير ولما جينا ندفع ندور عليه ولا لقينوه وماما تدفع ونساله كنت فين..يقول معلش كنت بشترى سجاير ها خلصتم

حبة ودخلنا معرض مفارش قعد يختار ويغلب البايع ولون ده لا وده اه ولما سمع السعر وجينا ندفع يقوم يتعنتظ اوى ويقول لصاحب المعرض تصدق ان حاجتكم رخيصة اوى اوى طبعا ماما لما سمعت كده كانت هتطبق فى زمارة رقبته تقتله لاننا مش هنعرف نفاصل معاه وطبعا ادبسنا بسببه قلنا خلاص هو حر يدفع وطبعا ندور ملقنهوش وماما تدفع.

ماما بقى شاطت على الاخر وقالت لى ايه يا بنتى وبعدين هو يصح كده هو جاى ياخد عروسة على الجاهز؟

وشوية شرف ومعاه علبة كانز بيبسى واحدة بس لى....... بصراحة استغربنا من الحركة وماما قالت ..ايه انت كنت فين كل ما ندخل معرض نبص نلاقيك مشيت!قام رد ببجاحة "معلش يا طنط اصل الجو حر وانا هموت من العطش اتفضلى" بيعزم علينا بعلبته تخيلواكان ناقص يقولنا خدوا حبة كل واحدة بق ....يعنى نخمس كلنا فى واحدة المهم بصيت له كده وقلت لازم اكسفه يمكن يحس على دمه ده لو كان عنده اصله ولو انى اعتقد ان فصيلته نادرة الوجود.

متشكرين يا سيدى انا هروح اشترى لى انا وماما "طبعا انا استنيت اشوف رد فعله " لقيته بكل بجاحة بيقول"طيب اشترى من السوبر ماركت اللى هناك ده علشان حاجته نضيفة اوى!

طبعا انتم متخيلين الصدمة مش محتاجة اوصفها ...بقينا انا وماما بنكلم نفسنا منه...معقولة دى احنا كنا شاكين انه بخيل لكن بعد الموقف ده اتاكدنا انه رئيس جمهورية البخلاء"

وكالعادة فوتنا بمزاجنا وعدناها وقلنا كانه نسى يجبلنا مش معقول هنهد الجوازة علشان علبة بيبسى !

ودخلنا محل تانى نشترى منه شوية حاجات وبعدين المرة دى وقف والحمد لله مهربش لكن قال لماما معلش يا طنط انا مش عامل حسابى ممكن تدفعى انتى وبعدين نتحاسب؟ طبعا احنا مفيش فرق بينا

انا بقى حبيت اكسفه وابجح زيه"على فكرة احنا فى فرق بينا انا ست وانت راجل وبشنب ....راح ضحك وقال عادى يا حبيبتى ما انا عارف . وخد الكلمة على انها هزار بس ايه انا كنت هتفرس واتنقط منه!وبصراحة جت لى حالة غريبة تشبه الصرع وبقيت زى المجانين و كنت عاوزة اعضه عضة كلب .

وقلت فى سرى بتريقة "يا صلاة الزين يا صلاة الزين هو ده العريس اللى عليه العين"والله شكلى انا اللى هشتغل وانت هتقعد فى البيت وهصرف عليك وكمان كل يوم ارجعلك بالغلا ومعايا علبة سجايرك!

ورجعنا البيت بعد جولة مريرة مع كوكو وماما طبعا روحها فى مناخيرها لدرجة انها اتحشرت منها ومبقتش قادرة تتنفس .....وكل شوية تعدى تقوله نورتنا شرفتنا كترتنا.....

وكان قصدها علتنا شلتنا قرفتنا عرتنا فضحتنا "اصلى انا المترجم السامى للغة ماما فى البيت"

المهم بصى لى وقالى .....عايز اتكلم معاكى شوية "قلت يمكن يصلح المواقف الطين اللى عملها او حس وهيدفع اللى عليه"لقيته بيقول وهو متعنتظ على الاخر وحاطط رجل على رجل عايزين نتكلم جد شوية ..تعرفوا ساعتها فكرنى "باحمد راتب" فى مسلسل رمضان"منص" كان كل شوية حاطط رجل على رجل ولابس شبشب وشوراب مقطع زى المنخل! وقلت فى سرى" على راى المثل شحات وعايز عيش فينو"اللى يشوفك يفتكرك فارس ف ساحته .. ميعرفش انك حتى الشراب شاحته .. !

المهم قلت له ها"قال تصدقلى الحاجة بقت غالية اوى اوى والله الواحد ما عارف يلاقيها منين ولا منين ولا يعمل ايه فى الزمن ده شغل الصبح وشغل بالليل ومفيش فايدة....عارفة الاسبوع اللى فات الارز كان بكام والنهاردة بقى بكام ...غلى اوى ده وصل الضعف ولا السمك بقى مولع واللحمة والفراخ بس تعرفى ممكن نبقى نشتريهم من الجمعية ..انا بقيت بصه ومتنحة فراخ ايه ولحمة ايه ده احنا شوية شوية كنا هنكاكى!وقلت له"هو ده الكلام اللى انت عايز تقولهولى يا خويا؟وفى سرى بجد راجل معندكش دم شوية وكمل كلامه وقالى انتى معايا اصل الموضوع ده مهم

وراح مكمل القصيدة والابيات الزيتيه والسمنية "اقصد الابيات الشعرية"وقال...اسكتى ولا الزيت ولا السكر والمصيبة الكبيرة فى اللبن البودرة والسيريلاك!

انا اتخضيت وبرقت ايه السيريلاك!قلت يمكن ماماته لسه ما فطمتوش ولا حاجة مش عايزة اظلمه ...شوية وقالى ايوا اللبن بتاع الاطفال غلى اوى وكمان مش موجود فى السوق تعرفى والله بفكر اجيب شوية من دلوقتى للاولاد واخزنهم لحسن يقل من السوق ومنلقهوش بعد كده.

انا قلت ولاد ولاد مين راح قالى ولادنا "قلت انت هتلبسنى مصيبة؟ مش كفاية المصايب اللى عماله تنزل على من ساعة ما شفتك.

قالى يا حبيبتى انا اقصد نجيب اللبن ونشيله لانه هيغلى لحد ما نتجوزوبعنتظة ايه رايك فى خطيبك وتفكيره؟

قلت بصراحة وبسخرية"لا ده انا معايا عقلية علمية معملية مستفزة"

وبعدها فقدت النطق وتنحت وقمت علشان انفجر فى العياط براحتى .......راح نده على "ايه انتى رايحة فين ؟ احنا لسه مخلصناش كلامنا طيب تعالى نغير كلامنا ونقول حاجة حلوة

قلت يمكن يعدل كلامه قام قال **تعرفى نسيناه حاجة مهمة نشترى كمان كرتونة جبنة وحبة معلبات وحلاوة اهم حاجة الحلاوة ....ولا اقولك نبقى نعمل بطاقة تموين!!!!!!!!!!

رحت قايمة فاتحة الباب ومده ايدى يعنى معناها اتفضل بره

رايح قام واقف وقالى كده بردوا بتطردينى ....قلت له لا بس الحق روح هتلقنا الحلاوة قبل ما الناس تقفل!!!

هناك 30 تعليقًا:

Mahmoud(WHYME) يقول...

إسلوبك جميل والمواقف مسخرة
وموضوع الكانز هاهاها
أعجبتنى المدونة فعلا والبوست ده رائع
تحياتى لك ولأسلوبك المنفرد
وأشكرك على تعليقك الجميل بمدونتى المتواضعة
محمود

EmY يقول...

ههههههههه ايه كوكو اللقطه ده
عايز تربه مش عروسه ده يجيب شلل رعاش
مستحملاه ازاي

البلوج كلو جميل اوي

بطوط حبوب يقول...

عايز ارد رد يعكس الوضع
يعنى هو ممكن يكون بيبص انكم طلباتكم كتير ومحملينه فوق طاقته وانتوا شايفين الدنيا مولعه يعنى يعمل ايه يولع فى نفسه
مش عارف هتقولى ايه؟

coffee break يقول...

يخرب عقلك
ضحكتينى ضحك رهيب
انتى لسة مخطوبة للبنى آدم دة؟
و ازاى بعد كل المواقف دى قدرتوا تستحملوه؟
دة باين من يوم الشبكة انهم طماعين
مش من يوم الشبكة، دة من يوم ما امه قالت ايد على ايد تساعد
و بعدين لو طاقته مش كدة ما تشوف له كانت واحدة من مستواهم
يعنى انتوا ماكنتوش فى قصة حب عشان يحصل كل دة
دى طلعت نزلت جوازة صالونات
صالونات ايه
دى جوازة حمامات
ايه الجوازة المهببة دى

بحبها يقول...

تحياتى وما اكتر ابتسامتى وانا اقرا هذا السهل المعبر الواقيعى الى اكثر الحدود وشكرا على زيارة مدونتى وانا فى انتظر تعليقاتك ومشاركتك المتميزة

SKOBL- Little Lazy Me يقول...

هههههه .. مش عايز اجرح بس بجد ده عريس راجل راجل يعني .. بس بجد هل كل المواقف دي حصلت .. ما حسش .. يا نهار اسود .. ليكوا حق يا ستات تشتموا فينا ليل نهار لو الرجالة بالمنظر ده !

الربان يقول...

تحياتي

الموضوع ،في رأيي ، جاد جدا ...و رغم انك كتبتيه باسلوب ساخر جميل ، الا انه
يبقي من الامور الجادة.

في رأيي ، ان قبل النزول للشراء يجب ان يكون هناك تفاهم علي الماديات...يعني ببساطة تعرفي امكانيات
العريس المادية التي يمكن ان يدفعها لشراء الستائر...و ان كانت تناسب ما
تنويا شراؤه فعلي بركة الله...
اما إن كانت لا تناسب...فاطلبي منه الانتظار الي حين استكمال المبلغ...و بهذا
تكوني و ضعتيه امام مسؤلياته ..لانه سيعرف انه هو من سيتحمل الانفاق..
التفاهم قبل الشراء مهم جدا في رأيي.

تحياتي و تقديري.

almasry يقول...

اسلوبك فى السرد جميل (دى مش مجامله علشان انتى ممكن فى يوم تدرسيلى أصلى على طول بدبلر وممكن أفضل فى الجامعه لحد ما تعلمى دوكتوراه )


انتى شكلك مطلعه عينه .. بس انصحك براحه شويه عليه أحسن مايطير ولو طار مفيش بندقيه هتجيبه


وعلى فكره انا لو عرفته مش هقوله لأنى مش خباص.

تحيــاتى
المصـــــــرى

عبده الرايق يقول...

ههههههههههههه
رئيس جمهوريه البخلاء ؟؟؟؟؟؟؟؟
ضحكتينى جدا جدا

Desert cat يقول...

ههههههههههههههههه
ده انتى هتدخلى الجنة انك استحملتى كل ده
انا لو منك كان زمانى دلوقتى خنقته

صحفية روشة يقول...

يا ستى هو انف ومتنك ومتعنتظ
وزقه راقى ومش بيعجبه حاجة بالساهل
كالعادة فطستينى من الضحك

الدائخ يقول...

و لا مؤاخذة يعني .. أنت حتتجوزي شرابة خرج .. أنت إيه اللي جابرك ع الجوازة دي يا ستي ..
بلاها ..

ولا أقولك ..
أنت كان مفروض تخدي عليه وصولات أمانة أحسن ..

احساس لسه حى يقول...

عزيزتى
ايه ده عريس ده ولا مصيبه

هو جى علشان يتجوزك ولا يجننك

بجد فى عريس كده ممكن يعمل الحاجات دى بمنتهى بجاحه

قوليلى هو ايه مميزاته بالضبط

نفسى الاقى ميزه فيه تخلي اى عروسه تتمسك بيه

يا جماعه انا على كده عريس لقطه

اه شحات بس لقطه بالنسبه للانسان ده

ده قبل الجواز وبيعمل كده وعايش دور الاستهبال فى كل شئ حتى البيبسى استخسره فيكى

اكيد ده ناوى اهلك يصرفوا عليكى وعليه فى الاخر

ومرتبه للسجاير والقهوة والباقى يحوشه عند مامته

طردته بجد اخير

يا طول بالها

اسلوبك جامد قوى بس العريس هيشلنى يا ماما عاوزه ياخد علقه تفوقه ولا وصلة كلام تهزقه

تحياتى
سلام

صالح سعيد يقول...

بصراحه ملكيش حل
من احلى البوستات اللى قريتها
اسلوبك فى السرد اكثر من رائع
تابعت الماساه قصدى الموضوع للاخر بدون ملل
وبصراحه ده اسمه عقاب مش عريس
لا بجد المفروض تحاولى تغيرى طبعه ده
لانه يخنق بجد
ده انا اتضايقت من تصرفاته فما بالك باللى هيبقى فى وشه اربعه وعشرين ساعه
لا بجد ربنا يكون فى عونك
متزعليش منى
خسارة فيه خفة دمك
ومنى منك اغيظه واجيب كانز واشربه لوحدى ادامه
ولو سالك جبتى واحد كانز ليه
قوليله
القناعه كانز لايفنى
ههههههههههههه
تقبلى تحياتى
ووعد بمتابعة مدونتك الجميله

واحد بيدور علي قلبه يقول...

مبداء برضه بس دا لو العرسان كلها كدا يبقي حاجه انس قوي وان شاء الله ولا هنشوف جواز لا رجاله ولا ستات

علاء يقول...

انتي تحفة ماشاء الله ربنا يحميكي

الشنكوتي الكبير يقول...

لا كده في حاجه مش مظبوطه
اقولك من غير زعل يعني
انا بصراحه جيت هنا مره من فتره كبيييييره
وبعدين اول ما شفت فكرة المدونه قلت اكيد هتقلد البنت عايزه اتجوز دي
وتلاقي اسلوبها هيبقى مش حلو زي التانيه والفكره مش هتنفع تتقلد اصلا
وكمان الصوره اللي انت يحاطاها قلت اكيد دي عيله في ثانوي وعجبتها صورة موزه حلوه من جله وحاطاههالنا
ومقرأتش حاجه مشيت على طول
وعاشر مره اكرر متحكمش من المظهر احكم بعد ما تقرأ وتشوف بنفسك

بجد اسلوبك فزييييييييع
المواقف تجنن واسلوبك في التريقه يهبل
تسلم ايدك طبعا واعذريني على تسرعي في الحكم واني مهنتكيش بالمدونه من بدري بجد تسلم ايدك
تحياتي واقبلي تهنئتي المتأخره دي

"هتقعد فى البيت وهصرف عليك وكمان كل يوم ارجعلك بالغلا ومعايا علبة سجايرك!
"

حلوه قوي الحته دي انتي تجنني

سلاااااااااااااااااااااااااااام

عبدٌ من عباد الله يقول...

انت لسه مع الاستاذ
حبيب ماما ده
ربنا يهديكى

مروة الزارع يقول...

يااااااااة مدونة هايلة انا سعيدة لأكتشافها تحياااااااتى ليكى يا قمررررررررررر

3abdo me7tas يقول...

مممممممم
لاتعليق
البنت وامها يستاهلو كل اللى يحصلهم

الجمعاوي الاصيل يقول...

فعلاً هو ده السمك لبن تمر هندي

فزلوكة يقول...

لأ دا فظيع
بخييييييل آخر حاجة

ربنا رحمك يا بنتى

المرة الجاية خدى بالك
أعصابك يا بنتى

simple girl.. ..simple dream يقول...

البوست الجديد مسخرة
انا لو من مامتك كنت جبته من قفاه وخليته يدفع غصب عن عينه
ربنا يكون فى عونك

ضد الظلم يقول...

انا فى الاول حسبت ان انتو دخلين على طمع وبعدين اكتشفت حقيقته بس كان المفروض من اول الكنز تديلو فوق دماغو ده انتى صبوره قوى بس اسلوبك مميز ولزيز وضحكتينى

Dessouky يقول...

ههههههههههههههه
علي فكرة انا بجد موت من الضحك

وموضوع الكانز دا كان رهيب

انا كمان تنحت علي فكرة

ربنا يكون في عونك
دا جوازة فوق المريبة
انا حسة انكوا في الفلانتين كل واحد هيحوش علشان يجيب علبة حلاوة و في عيد جوازك هتفتحوا واحدة كانز وتخمسوا في سجارة
ههههههههههههههه

ربنا معاكي

wanna b a physician يقول...

هو الراجل معزور برضوة يعنى الكانز غالى
ربنا يكون فى عونك

secret-love يقول...

اسلوبك طيب
بس اشمعنا النوع ده من المواضيع اللى حبيتى تكتبى فيه

not crazy يقول...

مجنونة انتى ولكن احسنتى

رئـــــيسـة حزب الأحلام يقول...

دة بخيل وجلدة

الشنكوتي الكبير يقول...

فين الجديد ولا انتي اتدبستي واتجوزتي فرضيتي بالأمر الواقع وخلاص


سلااااااااااااام