الأربعاء، 26 مارس 2008

الحقيـــــــــــــــــــــــــــــــــــنى يا مــــــامى ....انا بعيـــــــــــط يا مامى



كوكو بقى النهاردة عمل انجاز هايل يستحق عليه مصاصة كلمنى فى التليفون وانا فى الشغل وقال انه هيعدى على قلت ايه ده مش معقول ايه الجرأه دى وقلت فى سرى"ربنا يستر خير اللهم اجعلوا خير"
واحدة صاحبتى شافتنى وكانى مش مصدقة نفسى قالى لى "ايوا يا عم مين ادك خطيبك كلمك اكيد قالك كلام حلو انطقى بسرعة ...فقلت لها لا بس قال هيعدى على ودى اول مرة...قالت لى يااااااااه حلو اوى اكيد هيفسحك ولا هيدخلك السينما ...يا بختك عقباللى انا كمان يارب بس ابقى احكيلى على اللى هيحصل بالتفصيل" المهم بصت لها وقلت لها مستعجلة على المصايب ليه خليكى بعقلك كده احسن ..وفى سرى قال هيفسحنى ويدخلنى السينما قال"ده لو ركبنى مواصلات علشان اروح يبقى كويس"البت دى شكلها هبلة ومش عارفة عرسان اليومين دول!
ووصل الافندى وقالى ايه رايك مش بذمتك مفاجأه حلوة؟ قلت "حلوة اوى بس خير اللهم اجعله خير "ويا ترى طنط سمحت لك تجيلى لحد الشغل؟ قام قال" تعرفى قلت لها تعالى اتمشى معايا على الاقل تشمى هواء بس ما رضيتش قالت ما اقدرش امشى
رحت قايلة بغيظ" يا دى النيلة كمان هتجيبهالى الشغل علشان تعلوا صحباتى وتكرهوهم فى الجواز مش كفاية ماما وبابا واخواتى "
وبعدين ايه هو انت جاى مشى ولا ايه؟ قال "طبعا اصلى بحب اعمل رياضة" والمشى مفيد جدا
وبعدين انا كنت جنبك هنا فى شغل وقلت اعدى عليكى بالمرة فى سكتى ..قلت اه يعنى زيارة مش مخصوصة...المهم الجو كان حر موت وفضلنا مشين لحد ما خلاص كنت هقع فى الشارع كل شوية اقول لنفسى اصبرى يمكن يقعدك فى مكان نتغدا او يعزمنى حتى على كوباية مياة وايه ولا هو هنا وعمال يرغى عن شغله
بصيت له وقلت "انا خلاص تعبت ممكن نركب؟ قال "ايه انتى بتتعبى بسرعة كده ليه اصبرى اهو نكون قصرنا المسافة شوية علشان التاكسى ماياخدش كتير
انا بصراحة كنت هطق منه ومشينا شوية وكنت هموت من العطش الجو حر قلت ايه البعيد ما بيفهمش خالص رحت قايلة انا عطشانة اوى.....قام رد ببرود تعرفى وانا كمان ايه رايك قلت فى سرى ها اخيرا هتعزم على بحاجة ..لقيته قال فى كولدير هناك اهو تعالى نشرب مياة ساقعة!
قلت والله مافى اسقع ولا ابرد منك ! ورديت ببجاحة انا مش بشرب من الشارع وكمان انت ازاى بتشرب من الشارع امال فين اع وموع وايخى وبقرف ؟ قال لا دى مياه حلوة وبعدين انا هشرب بايدى مش من الكوباية وانتى لو عطشانة ومش قادرة تستنى لما نروح روحى اشترى بيبسى المحل هناك اهو عقبال ما اشرب
انا وقفت متنحة كالعادة وقلت "حسبى الله ونعم الوكيل الهى تقع فى الكولدير وتغرق ....صحيح راجل معندوش دم"
شوية ومشينا نستكمل مسيرة اربعة ايام لحد ما نوصل للبيت ولقيت نفسى خلاص ضغطى وطى وهقع رحت مصرخة فيه "بقولك ايه انا تعبت ولازم اركب لحد البيت....قال "اصبرى حبة كمان احنا خلاص قربنا انتى مش بتحبى الرياضة ولا ايه " قلت "لا انا طول عمرها بكرهها وكنت ادبى بكره الرياضة موووووووووووووووووووووووووووووت"
قال طيب ايه رايك نستنى الاتوبيس؟ انا اتخضيت وقلت له حرام عليك كنت سيبتنى اركب عربية الشغل اتوبيس يا مفترى ...اسفة انا ما بركبش اتوبيسات"
راح قال وهو هيموت يا عينى "خلاص هنركب تاكسى وامرى الى الله"
راح مشاور للتاكسى ووقف يتفاوض معاه هياخد كام لحد البيت....قلت اللهم طولك ياروحى وركبنا
وطول الطريق وانا عماله اضحك فى سرى واقول تلاقيه هيموت دلوقتى يا عينى" وشويى افتكر صحباتى واضحك واقول هقلهم ايه دول احكيلهم على الخيبة ...ولا اقلهم على انى دخلت السينما واحكيلهم الفيلم اللى انا كنت فيه وهو فى احلى من كده فيلم؟
وحبة خد باله راح سالنى ايه بتضحكى ليه؟ قلت "لا بس اصلى صاحبتى كانت بتحكيلى على خطيبها وبتقول انه بخيل اوى "قال "يااااه اعوذ بالله من البخل والبخلاء الواحد ما يكرهش اد البخل اعوذ بالله قوليلها تسيبه ده هيعذبها" وانا ايه فطصت على روحى من الضحك واقوله حاضر ما هى زمنها عرفت واضحك
ولما وصلنا عند البيت لقيته عمال يحط ايده شوية فى الجيب الشمال وحبة فى اليمين وشوية راح قايلى "معلش يا حبيبتى مش معايا فكة معاكى انتى علشان نحاسب التاكسى؟!
المهم خد منى الفلوس وحاسب التاكسى وانا ايه متنحة ومذهولة على الاخر وهو عامل عبيط
وطلعنا البيت واول ما سلم على ماما يقولها"بنتك دى يا طنط رقيقة خالص مش بتحب المشى ولا المواصلات بس انا بردوا خفت عليها وركبتها تاكسى لحد هنا"وانا ابص له واقول فى سرى "اه بامارة الفكة"
تعرفى يا طنط اتمشينا وقعدنا نتفرج على المحلات والله كانت تمشية تحفة وماما تبص وتقولى بجد قمت قايله"اه من ناحية تحفة فهى تحفة وبصراحة كانت ناقصاكى انتى وطنط وخصوصا طنط علشان كنا استريحنا منها للابد
وشوية ورجلى وجعتنى اوى وقعدت اصرخ من الوجع وماما تقول معقولة كل ده من الفسحة؟ وهو يضحك ويقول مش بقولك رقيقة اوى يا طنط
ويبص يقولى وبعدين بقولك ايه انتى لازم تخسى علشان تقدرى تمشى كده ما ينفعش
قلت له"اخس انا من ساعة ما عرفتك بقيت عشرة كيلو .....اه يا رجلى ....اه"
وفى نهاية القاعدة اتفق مع ماما ننزل تانى يوم نشترى شوية حاجات وقعدنا مستنين ساعة ساعتين تلاتة ولا حس ولا خبر قلت بصراحة احسن جت من عند ربنا الهى تكون اتكسحت زى ما كسحتنى "
ماما بقى قلقت وقالت لا اتصلى بى شوفية اتاخر ليه قلت يا ماما انا اتصلت بيه من شوية ومامته قالت نزل وجاى فى السكة
قالت لا معلش بردوا اتصلى تانى يا بنتى ....قلت لها متقلقيش تلاقيه لسه فى نص الطريق ما هو يا دوبك اصله بيجى موتورجل"
المهم اتصلت لقيت الست مارلين مونرو بترد قلت لها معلش يا طنط اصل كوكو لسه ما وصلش ايه فى حاجة؟
ردت على بصوت مسهوك"اه يا حبيبتى معلش مش هيقدر يجيلكم النهاردة قلت ليه يا طنط خير؟
قالت"يا حبيبى وهو جايلكم حبيب عين امه ركب تاكسى وعمل حادثة " قلت وكانى مخضوضة "معقولة يا طنط حادثة جامدة؟ قالت لا ده واحد خدش التاكسى بعربيته من وراء بس ابنى حبيبى اتخض وكلمنى فى التليفون وقالى تعالى يا مامى الحقينى انا خايف رحت خارجة انا واخوه وجبته وجينا اه وانا مستغنيه عنه ولا ايه " قلت لها بتريقة "لا معقولة تستغنى عنه وده كلام ..."طيب وهو فين دلوقتى اطمئن عليه؟ قالت "معلش يا حبيبتى شوية وابقى كلميه لحسن من ساعتها وهو خايف وانا منيماه فى حضنى ...الحمد لله ان الواد ما ضاعش منى" اه وانا مستغنية عنه ولا مستغنية؟
المهم قفلت السكة وانا متنحة وعمالة اضحك وماما تقولى ايه يا بنت مالك فى ايه خطيبك ما شرفش ليه؟
وانا مسخسخة من الضحك واقول يا لئيم يعنى وانت لوحدك بتركب تاكسى بس ايه وشك كان حلو عليه اوى.....وماما تقول بقولك فى ايه"رحت قلت"لا.....اصل ربنا بيخلص ذنب ناس من ناس وذنب تاكسى من تاكسى " وعجبى

هناك 10 تعليقات:

shamapharmacy يقول...

الله ينور و ارجو الاستمرار

shamapharmacy يقول...

انا عملت مدونه الغرض منها الدعوه ارجو مساعدتى على نشرها

الراقص مع الذئاب يقول...

السلام عليكم
مدام مش عاجبك كدا طرقعيه
بدل ما هو حارق دمك كدا

الشنكوتي الكبير يقول...

اه يا جشعه يا مفتريه
انا كنت حاسس برده انك عايزه تستغلي الواد المسكين
بقى عايزه تركبي تاكي يا مفتريه
في حد بيركب تاكسي في الغلاء ده
مش ترحمي الراجل شويه هو ايه لازم تشفطيه

وبعدين كل شويه عطشانه عطشانه
ماله الكولدير يعني مش دي ميه برده اهو احسن من الساقع اللي هتشربي وتغرمينا في تمنه ولونه اسود ومنعرفش اصلا بيعملوه من ايه

يعني يبقى موت وخراب ديار

وبعدين انتي عايزه تشربي ساقع يا ساقعه
هو يدفع ليه هو هيشرب من الكولدير وراجل نفسه حلوه
انتي بقى يدفع لك ليه
وبعدين لو انتي كنتي قلتيله يركب معاكي عربية الشغل كنتم وفرتم اللفه دي كلها مش تغرميه حق التاكسي
اما عن الفكه بقى
فمعلش يعني هو كل واحد بيتزنق مش مفروض مراته تساعده
امال بعد الجواز مرتبك هتعملي بيه ايه
مش هتساعديه على غلاء المعيشه ولا داهية تكوني عايزه تتستتي وتحطي رجل على رجل واصرف يا حبيبي انت على البيت لوحدك

انا مش عارف امال عايزين تتجوزوا ازاي وانتوا معندكوش احساس بالمسؤليه خالص كده

روحي يا شيخه بوسي ايدك شعر ودقن


كان معكم تنح بيه المعفن من امام محكمة زينهم

انا قلت اغيظك زي ما بتغيظنا بخطيبك التحفه ده
سلاااااااااااااااااااااااام

شاب نفسة يحقق حلمة يقول...

السلام عليكم
الاول انا عاوز افهم انتي مخطوبة والمواقف دي بتحصلك ولا المواقف دي من دماغك
انا بدخل عندك كتير بس من غير معلق ودي اول مرة تعليق
بس لو انتي مخطوبة اللي يجبرك علي كده ده كفاية زي ماقريت يعني في البوست اللي فات انة بخيل
ولو مش مخطوبة يبقي عندك ملكة الابتكار للمواقف الكوميدية
تحياتي ليكي

almasry يقول...

مقدرش أقولك الا الله يكون فى عونك فعلا انا لوبنت مش هتجوز وهعمل اضراب

تحيـــــاتى
المصـــــــــرى

rona يقول...

بجد كل سنه وكلهم طيبين مدونه جميله

SKOBL- Little Lazy Me يقول...

"ويا ترى طنط سمحت لك تجيلى لحد الشغل؟ قام قال" تعرفى قلت لها تعالى اتمشى معايا على الاقل تشمى هواء بس ما رضيتش قالت ما اقدرش امشى
دي كتنت أول واحدة ..
قال "ايه انتى بتتعبى بسرعة كده ليه اصبرى اهو نكون قصرنا المسافة شوية علشان التاكسى ماياخدش كتير
طب كويس و الراجل صريح من أولها اهه :)
لقيته قال فى كولدير هناك اهو تعالى نشرب مياة ساقعة!
دي بقى قوية و الله
وانتى لو عطشانة ومش قادرة تستنى لما نروح روحى اشترى بيبسى المحل هناك اهو عقبال ما اشرب
انا وقفت متنحة كالعادة وقلت "حسبى الله ونعم الوكيل الهى تقع فى الكولدير وتغرق ....صحيح راجل معندوش دم"
دم مين ياختي بس .. ده مش معقول .. الراجل ده حاجة من التنين ، يا اما بيستقصد ، يا اما بيستعبط !
قال طيب ايه رايك نستنى الاتوبيس؟
لأ رهيب بجد ، يابنتي حتى ما بيغيرش عليكي من بهدلة التوبسات
"معلش يا حبيبتى مش معايا فكة معاكى انتى علشان نحاسب التاكسى؟!
المهم خد منى الفلوس وحاسب التاكسى وانا ايه متنحة ومذهولة على الاخر وهو عامل عبيط
لأ شفتي الحنية .. حبيبتي ، انتي كل ما تعوزي تسمعي كلمة حلوة خليه يركبك تاكسي بس اعملي حسابك في فكة

"يا حبيبى وهو جايلكم حبيب عين امه ركب تاكسى وعمل حادثة " قلت وكانى مخضوضة "معقولة يا طنط حادثة جامدة؟ قالت لا ده واحد خدش التاكسى بعربيته من وراء بس ابنى حبيبى اتخض وكلمنى فى التليفون وقالى تعالى يا مامى الحقينى انا خايف رحت خارجة انا واخوه وجبته وجينا اه وانا مستغنيه عنه ولا ايه " قلت لها بتريقة "لا معقولة تستغنى عنه وده كلام ..."طيب وهو فين دلوقتى اطمئن عليه؟ قالت "معلش يا حبيبتى شوية وابقى كلميه لحسن من ساعتها وهو خايف وانا منيماه فى حضنى ...الحمد لله ان الواد ما ضاعش منى" اه وانا مستغنية عنه ولا مستغنية؟
دي بقى القبل القاضية ، امالالقاضية ايه؟؟
بتاعة البخل ، ههههههههههه ,,, كده يبقى لا بيستقصد ولا بيستعبط .. كده يبقى مش في وعيه .. اسف اذا كنت باجرح بس مش معقول
أنا يا بنتي حاولت ألاقي حته في البوست مش صالحة للتريئه ، ده انا حتى بصفتي راجل حاولت ألاقيله مخرج و ما عرفتش .. ده لابس القضية لابسها !!!

nado يقول...

لا بجد هايله بتمتعى بروح الدعابه فى كتبتك
ربنا يوفقك ولامام دايما وانا بجد سعيده قوى بمعرفتك

غير معرف يقول...

واللة انت ى واحدة ست فاضىة والفاضى ىعمل قاضى