الاثنين، 2 يونيو 2008

عــــــــزومــة مراكبيــــــــــــــــــــه على الطبليــــــــــــــــــــه


الكابتن كوكو هو وطنط حماتى اللى طبعا كلكم عارفين اد ايه انا بموت فيها وازاى مقدرش يعدى على يوم من غير ما اسمع صوتها او اشوفها"متشفوش وحش ان شاء الله"

بابا بقى قال لما اكسفهم شوية ولو انهم زى ما انتم عارفين "ما بيحسوش على دمهم" اصلى بابا فال انهم المفروض يعزمونا عندهم فى البيت معقول تبقى البنت مخطوبة وما نعرفش بيت اهل خطيبها؟

ماما...."اكسفهم يمكن يحسوا وقولهم انت كانك بتهزر"...احنا عايزين نعرف بيتهم وحياتهم شكلها ايه.

بابا بقى قاعد مع كوكو وبص له وضحك" ايه يا بنى اللى ما فى مرة قلت يا عمو اتفضل عندنا انت وطنط....ايه انتم بخلاء ولا ايه....وضحك؟

انا فى سرى"ده برضوا سؤال يا بابا...ده عدى المرحلة دى بكتير وما شاء الله عليه بقى رئيس جمهورية البخلاء وعنده شعب وبلد بحالها "عيلتهم"كلهم بخلاء والحمد لله"...معلش اصل بابا مش متابع الانتخابات كويس"!

ماما ضحكت "صحيح انتم معزمتوناش ولا مرة انتم مش عايزين نزوركم ولا ايه؟

حماتى وهى مفروسه وبتطلع الكلمة بالعافية مع ابتسامة صفراء"معقول يا حاجة ازاى تقولى كده....دا احنا بيتنا بيت الكرم والجوده...بس انتم بس تشرفونا"

بصراحة الود ودها تقول انتم كده زفتونا قرفتونا هتدينونا...اه ما احنا هنخليهم يستلفوا كده او يحوشوا علشان العزومة!

كوكو بص لبابا وماما "خلاص يا طنط انتم معزومين عندنا ان شاء الله يوم الخميس الجاى.....وبص لمامته"ولا ايه رايك يا ماما الميعاد مناسب ليكى؟

راحت هزا راسها وقال يعنى بناخد ميعاد من وزيرة الخارجية"من كتر مشغوليات ساعدتها"

ماما قالت" وبالمرة بقى نتفق على بقية العفش عايزين نخلص بقى"

وجـــــــــــــــــــاء موعـــــــــــــد الزفارة" ااااااف"

عفوا اقصد الزيارة"

اشترينا هدية وجاتوه ورحنا ولما شافونا استقبلونا ولقينا عندهم ناس لدرجة اننا كنا قاعدين فوق بعض"طبعا ده كنايه عن وسع المكان"

المهم سلمنا وخدت طنط اوسة الهدية والجاتوه وقالت بعد ما عينتهم طبعا " وايه لزومه التعب ده بس ما كانش له لزوم والله ...احنا كلفناكم كده"

ماما "لا ولا تعب ولا حاجة ......دى حاجة بسيطة كده".

انا فى سرى" مالهاش لزوم! ده احنا اصلا لو كنا مجبناش حاجة كنا اتفضحنا فى المنطقة "

شوية وكوكو يبص لنا ويضحك"منورين والله يا طنط" الست مامته بصت له كده وغمزت له يقوم يقدم الحاجة الساقعة والجاتوه"ده على اساس انه الشغالة"

المهم قدم الحاجة ساقعة وعزمت هى علينا عزومة مراكبيه"ما تشربوا يا جماعة البيت بيتكم ولا انتم مش عطشانين....."

واول ما بدانا نمد ايدينا هبت فينا خضتنا بصت لماما "لا بلاش انتى يا حاجة البيبسى مش كويس عليكى علشان السكر اه بعدين تتعبى تقولى مننا"

انا بقى اتفرست قلت لها"طيب ما فيش دايت يا طنط؟

راحت بصت لى كده بثقة"لا والنبى مش بــــــــــايت" انا مبدخلش بيتى الا كل حاجة طازة! احنا لسه شارينه "

انا وماما قعدنا نضحك فى سرنا ورحت قلتلها" سورى يا طنط انا اقصد بيبسى من غير سكر"

بصت لى وقالت"لا ...انتى اصلك ليكى حاجات بصراحة مش عندنا وبعدين مش مهم احنا نبقى نعمل للحاجة حاجة تانيه"

حبيتن وبدانا نمد ايدينا على الجاتوه وكان فى طبق كل واحد حتة واحدة قالت لى "بلاش تاكلى منه كتير ...اه انا خايفة عليكى لحسن تتخنى وانتى مش ناقصة"انا بصراحة اتكسفت وكان هاين عليا احدفها بالشوكة والحوسها بالجاتوه"

وبصت لماما "وانتى بلاش يا حاجةعلشان السكر والنبى انا خايفة عليك ليعلا"

الصراحة حبه"وكانت هتقوم تلم الاطباق مننا ...وتقولنا كفاية كده اكل ومشاريب!

ماما قالت تحبوا نشترى بقيه الحاجات امتى؟وتحبوا نشترى ايه الاول؟

ردت طنط" السفرة دى اهم حاجة فى الجهاز..وانا عايزاها ب 12 كرسى"

انا وماما اتخضينا....ماما قالت"ايه يا حاجة سفرة ايه احنا اتفقنا على المطبخ الاميريكان" ايه لزومها السفرة؟

هبت فينا كانت هتعضنا"الحق يا ابنى اسمع شوف عايزين يجوزوك من غير سفرة علشان الناس تاكل وشنا"

انا قلت لها"يا طنط المطبخ الاميريكان مش بيحتاج سفرة..وفى سرى" 12 كرسى ينزلوا على راسك يفشفشوها ان شاء الله"

كوكو بص لماما"يا طنط اصل السفرة شىء اساسى عند ماما ..امال بس هناكل ازاى على الارض؟

بصراحة هو حسسنى انه هو ومامته اللى هيتجوزوا مش انا ...انا قلت له"يا ابنى افهم المطبخ الاميريكان فيه بار وكراسى يعنى مش بيحتاج سفرة.....ده حاجة مودرن"

الهانم سمعت كده هبت فيا" لا ...لا السفرة ام 12 كرسى يا بلاش...."اظاهر انها كانت عندها عقدة من رقم 12"

انا قلت فى سرى " بلاش ...بلاش وهو ده حاسباه عليا عريس....يا شيخة روحى افطميه الاول ...قال عايزة سفرة قال...روحى هاتيله عروسة لعبه!

ماما حاولت تفهمها بشويش وكوكو يقول.....معلش علشان خاطر ماما السفرة لازم دى حاجة اساسية عند الناس كل قرايبنا وجيرانا واصحابنا عندهم سفرة انا ابقى اقل منهم...وبعدين مش مهم نبقى نحط السفرة جنب البار"

انا بقى"اه ده على اساس انى ساكنه فى معرض مش شقة"

وكنت هطق من غباوته.... سفرة جنب مطبخ اميريكان فكرنى ساعتها بهانى رمزى"فى غبى منه فيه"ياربى هو بعينه بغباوته"

شوية وقعدت الهانم تبرطم وتقول"انا مش عارفة ايه التقاليع الغريبة دى شوية شوية هتقوليلى اوضة النوم لا كمان...وراحت بصت لى وقالت كله منك ومن "ميلودى"والشوف تايم"اللى لحسوا مخك"

انا وماما بصينا لبعض وقلنا نكتفى بالجرعة دى المره دى وقمنا نستاذن"

كوكو"معقول ودى تيجى يا طنط؟لا عيب والعشاء"

ماما قالت بسخريه لا يا حبيبى مفيش داعى احنا خلاص بطننا اتملت على الاخر كفاية كرم ماما معانا"

هى قالت"لا ودى تيجى بردوا لازم تتعشوا....امال انا حضرت المحمر والمشمر لمين انتم لازم تدوقوا اكلنا....لحسن تقوله علينا بخلا"

انا فى سرى"معقول بخلا ...حتى بامارة البيبسى والجاتوه"

شوية لقيناها جايبة الاكل وداخله بيه الاوضة قعدنا نبص شمال يمين ...مالقناش سفرة.....وشوية لقيناهم بيعزموا علينا والاكل محطوط على تربيزة صغيرة جدا شبه الطبليه!

كوكو"يلا يا جماعة اتفضلوا."

طنط" ايه انتم مكسفوين ولا ايه...يلا احنا اهل "

انا وماما انتباتنا حالات غريبة دخلت كلها فى بعضها شوية تنحان على ضحك على ذهول

انا بصيت لكوكو وقلت بسخرية"امال فين السفرة ام 12 كرسى؟؟

كوكو ضحك بهبل ورد قال"سفرة مين قال اننا عندنا سفرة ب 12 كرسى ده ولا ب6 حتى....اصل ماما بصراحة بتفضل الاكل على الطبلية اصلها صحية!!

وكل نقطة وانتم منقوطين!

هناك 81 تعليقًا:

كيكى عوووووو يقول...

عوووووووووووووووووووووووووووو...جيت..ههههههههههههههههههههه....عارفة قوليلوا...مش هنقدر نجيب السفرة ام12..علشان فعلا عندكوا حق..الطبلية..احلى واحسن وصحية يا كوكا

ياسر يقول...

...روحى هاتيله عروسة لعبه!
بصراحة ابن ماما دة عاوز عروسة بلاستيك علشان متاكلش
علي فكرة دة الا انا كنت بقصدة في البوست بتاعي
لازم البنات يتعرفوا كويس جدا علي الشاب واهلة
ونشاتة واسلوبة في بيتهم ازاي معاملتة وتعاملة
مع اهلة ومفيش مانع اهل البنت يسالوا عن الشاب
بطريقة غير مباشرة يعني الجيران الشغل مش
عدم ثقة في الشاب لاا سمح الله بس المثل
بيقول(حرص ومتخونش)دة مستقبل بنتهم
وعائلتها مستقبلاا ومعاكم حق في الزيارة دي
وضحتلكم حاجات كتير اكيد كانت غمضة عنة
وعن اهلة والوسط الذي نشاء فية فارس الاحلام
وياريت كل البنات يعملوا ذيك مكنش دة بقي حالنا

خالص تحياتي

Mafrousa يقول...

بقولك ايه الست حماتك ديه والواد كوكو بتاعها ده فرسونى و طلعوا عينى
انتى عارفه لو انتى العروسه ديه و فى الاخر اتجوزتيه,,,
والله حلال فيكى اللى بيتعمل هههههههههههه
انا اتفررررررررررررست

emy يقول...

ههههههههههههه
حلوة العزومة دى اوى
بس بصراحة عندك حق انا جاتلى النقطة وانا بقراها
امال انتى تعملى اية
ربنا معاكى بقى

الطائر الحزين يقول...

ممكن يجيب السفرة بعشرين كرسى كمان
بس تحطوها فى الشارع

موائد رحمن يعنى

امل يقول...

يا خبر ابيض ايه الناس الخنقة دي
ده انا اعصابي تعبت
اعوذ بالله اوحش حاجة البخل

wanna b a physician يقول...

انا باقول المرة الجاية مش تجيبوه جاتوه ولا حاجة زى ما هى قالت مضر بالصحة ولا اية بلاش احسن
و12 كرسى ليه قصر هو طيب ابقوا اشتروا سفرجى لعبة معاكم

rovy يقول...

والله يا بنتى انا اتفرست من كوكو وام كوكو انت مستحملاه ازاى ده انا اجوزك سيد سيده بس انتى خلاصينا منه قبل ما اتهور واخنقه هو ومامته ام 12 كرسى لما يتكسره على دماغها سورى يعنى .
ربنا يصبرك عليهم
نحياتى
rovy

Unknown يقول...

السلام عليكم رحمة الله وبركاته
الجوازة دى شكلها مش حيتم(ماتزعليش منى)لما انت لسه على البر وكل الاختلافات والخلافات دى موجودة امال حتعملى ايه لما تدخلوا فى الجد ويبدأ الكلام عن التنجيد والستاير والمفارش ووووووو
كلام لا ينتهى ومشاكل ليست لها اخر.
خديها من قصيرة وخلى ماما وبابا يوفروا صحتهم وفلوسهم ويشوفوا عريس تانى!!
اوانافى رأىّ صراحة قعدة الخزانة احسن مليون مرة من جوازة الندامة
وشكرآلزيارتك مدونتى اول مرة وان شاءالله دائمآ منورانى
وتقبلى تحياتى

عبده الرايق يقول...

اخس على كده
لسه فى ناس بتاكل على ترابيزه
نو
نو
نو
انا باكل على الارض

Unknown يقول...

ايه يا بنتى العسل دة؟؟ وبعدين ايه اللى مصبرك على الغلب دة واضح من كلامك ان كوكو اسم النبى حارسه وصاينه عريس لقطة لدرجة انك ممكن تسيبيه بسهولة.... بس حلوة
شكرا على زيارتك مدونتى والظاهر انى هاقرفك من هنا ورايح وانت كمان ابقى تعالى زورينى على فكرة احنا كمان ماعندناش سفرة باااااااااااى

غير معرف يقول...

سبحان الله
قريت ف الأول كلماتك بمدونة أخري وعن حنينك للماضي .. وبعدين دخلت هنا قعدت اضحك .. اسلوبك الساخر والجميل ف العرض أقنعني بأن أسلوبك فعلاص متطور وحر .. ربنا يوفقك

سلوى يقول...

بـــ 12 كرسي جنب المطبخ الأمريكاني

طبعا من كتر العزومات اللي بيعملوها

:)

إجرى يا بنتي وإوعي يحصلوكي

إلا البخل

هههههههه

تحياااااااااتي

أحمد بكر يقول...

هيه عاوزه سفره 12 كرسى علشان تبقى تتعزم عندكوا بعد الجواز و يمكن تعزم الحبايب كمان
خلى بالك و خليكى على فكرة الامريكانى دى
تحياتى

غير معرف يقول...

مدونتك حلوة كتييير الله يوفقك

بنكون مسرورين لو بتفوتى لعندنا :)

يوميات فنانه مفروسه جداا يقول...

يا بنتي اي بخل مش مشكله الا الاكل يا جنه
راجعي نفسك يا بنتي الفرصه لسه قدامك
بلا سفره بلا كوكو
ربنا معاكي يا اوختشي
سلام

almasry يقول...

آنسه منار


هى حماتك دمياطيه ؟ وأكيد انتى دقهلاويه لأن اللى بيقفشوا حركاتعم لازم كانوا يعرفوهم واحنا الحمد لله نعرفهم قوى بس بحد خماتك خايفه عليكى .. ده انتم لما تعيشوا مع بعض هتعملوا أحلى شغل

========

ملحوظه : متقوليش اسم بلدك لأنك سبق وقلتيها وانا لسه فاكره

غير معرف يقول...

موضوعاتك حلوة و بس نفسنا نشوف تحقيقاتك الصحفية

كيكى عوووووو يقول...

انتو زعلانين ولا ايييييييييييية مفيش حاجة جديدة

غير معرف يقول...

سفرة ياكسوفي مالها الارض خخخخخخخ
:0)) ربنا معاكي

دعاء مواجهات يقول...

ازيك ياعسوولة

بجد دمك زى العسل

ربنا يوفقك يااارب


نورتى مدونتى

البوست الجديد التطرفى المواجهاتى نزل

ويهمنى رايك

بيس

Empress appy يقول...

مالها الطبليه صحيه يا شيخه هههههههههههههههه معلش مقصره انا معاكي

Empress appy يقول...

مالها الطبليه صحيه يا شيخه هههههههههههههههه معلش مقصره انا معاكي

ادم المصرى يقول...

السلام عليكم ليا كذا تعليق
********
الاستاذ دا فى المناطق الشعبيه بينطبق عليه اسم بيحب اعدت الفسحه ...
***********
والمناطق الشعبيه اوى اوى بيحب اعدت النسوان
*************
وفى المناطق الرقيه شويه اسمو ابن ناس اوى
*************
والرقيه شويتين اسمو دا مؤدب ومتربى
*)************
وفى المناطق الرقيه جدا جدا جنتل مان
************** ليه بقه فى المناطق الشعبيه بيستهزأو بى الراجل ده لئنى الشباب الى فى المناطق الشعبيه اغلبيتهم رجاله اوى واشتغلو وتعبو لحد محقق بعضهم اهدفهم فى الحياه واتعملو معا ناس كتير
**************

كذالك البنت لزم قبل متتعرف بشب تحاول تتئكد من النقطه الخطيره دى وهيا الى معاها ده راجل ولا قناع او ساتر من النوع الذكورى ولكن بداخله شيئ انوسى جدا

شكرا لئتاحه الفرصه لتعليق

واتمنا زياره مدونتى من الجميع

Tamer Nabil Moussa يقول...

ههههههههه

كوكو دة لقطة اوعى تفرتى فية

بوست مميز

تحياتى

عًٍمًرٌٍوٍ آلنْوٍبٌَِى يقول...

هههههههههههههههههههههههههه
هههههههههههههههههههههههههه
هههههههههههههههههههههههههه
مع ان ده اول تعليق ليا فى مدونتك
بس معنديش غير الضحك هكتفى بية
وسلميلى على كوكو
بجد بوست يجنن يفطس من الضحك

تحياتى ليكى
واتمنى زيارتك ليا فى مدونتى

غير معرف يقول...

عروسة ننوسة

واللهمن حقك تكونى مفروسة

اخلعى منه يا بنت الناس واوعى تورطى

نفسك احسن يعلمك البخل

انا قريت اكتر من بوست والمدونة

بتاعتك دى دمها خفيف قوى وكمان

هادفة ياريت الناس اللى بتقرأ

الكلام بتاعك ده تفهمة كويس علشان

اللى داخل على جوازة منمهم يعرف

ازاى يتعامل مع اللى المفروض يرتبط
بيه

وكمان الناس تتعلم حسن الاختيار

تحياتى

الاديب العاشق

عرفة فاروق السيوطى

شفـقــة و إحســــان يقول...

حلو اوى موضوع السفرة ام 12 كرسى دى مفيش كمان سفرة ب 12 ترابيزة!

ريمان يقول...

ههههههههههههههههههههههه

لاء بجد انا جاتلى الف نقطه مش نقطه واحده

كوكو ده لسه صغنن فعلا محتاج عروسه لعبه

هههههههههههههههههههه

بوست راااااائع يا قمر

ومدونه دمها خفيييييييييف

اهو ده عيبه يقول...

اولا ازيك

ايه الست الغريبة دى ده بخل صعب قوى
وراسها والف سيف لازم السفرة ام 12 كرسى
ليه عامله غرفه اجتماعات
وايه الكرم الحاتمى فى الجاتوه ده
مش بعيد مقدمالكم من الجاتوه بتاعكم

ربنا يرحمنا

kochia يقول...

عزيزتي جنة
مدونتك ظريفة اوي ودمها خفيف
انا لفيت كدة لفة علي السريع بس همخمخ فيها بعدين
عاوزة اشوف الحكاية دي ايه اصلها من فصلها
وشكرا علي مرورك عندي .. يعدت بيكي جدا

تحياتي

Asmaa mahaba يقول...

ههههههههههه مفيش دايت يا طنط ايه يا بنتى الانافه اللى انتى فيها دى كويس انها شربتك بق ميه
على فكره انا اغلقت مدونه هايه مؤقتا لكن بفكر افتحها نظرا للطلب الكبير عليها
تحياتى ليكى سومه_87

snohe يقول...

صديقتى العزيزه كان الله فى عونك
اقترح عليكى تسيبى كوكو مع امه يعيشوا
زى ما هم عايزين مع السفره ام 12 كرسى.
يا بنتى انتى لو اتجوزتيه لازم تعرفى انك هتعيشى بطريقته فى التفكير هو وامه
الافضل( شيل دا من دا يرتاح دا عن دا)

المستنصر بالله يقول...

اول مره اجى مدونتك بس ما شاء الله دمك خفيف جدا بالتوفيق يارب

mohamed يقول...

هههههههههههههههههه طراتك تحفه بجد دمك زي العسل

إبن مصر يقول...

كوكو كوووووووووووووووووووو
يابنتى بلاش احسنلك ولا مطبخ ولا أمريكانى ولا حاجه
كويس انك على البر وربنا يستر
انا من رأى تتجوزى واحد يفهم يعنى ايه مطبخ امريكانى
انما ده مش يعرفه لا هو ولا امه بتاعت مولتى وشوف تاين دى
ودورى على عريس تانى
اقولك اتجوزينى انا
ههههههههههههههههههههه
تشرفت بمعرفتك

كوارث يقول...

هههههههههههههههههه
دنتي طلعتي مشكلة
بس اللي اعرفه ان السفرة المفروض عالعريس !
و الطبلية عالعروسة !
على راي الوزير في فيلم تامر حسني " مكانش فيه مش بدودو ؟ "

أمل فتحى عزت يقول...

لقد كتب التاريخ أسمك فى دايرة الحارة يلا وتعالى معانا الى الحلقة الثالثة فى حارة عمى رمزى مع خالص تحياتى
مدونتك جميلة وخفيفة الدم

كيكى عوووووو يقول...

برضوا مفيش حاجة جديدة

حبيبـــــــة القمـــــر يقول...

ههههههههههههه طب حذاري من الجوازة دي
سيبك منها صدقيني
دي عليكي بخساارة
ال 12 كرسي ال
اياكي والبخل دا مرض ملوش دوا وبعدين خدي بالك
بيبقى معدي

بجد مدونتك لذيذه اوى اوى

funckydoctor يقول...

هههههه
ده يشوفله عروسة مولد
طب ماتعملو الصالون قعدة عربى بالمرة
أسلوبك مميز
شكرا على الزيارة
تحياتى

غير معرف يقول...

Thanks to the owner of this blog. Ive enjoyed reading this topic.

GiGi world يقول...

العروسه القمر انت بجد قمر وبقولك ايه المطبخ الامريكانى ده انت خايفه من بوش ولا ايه ييجى يحتلكم فقلتى اعمل الى هو عايزه
خليكي يابنتى فى السفره زي حماتك مابتقول
وهاتيها ب36 كرسي وابقى اسكنى بقى فى استاد القاهره علىف كره يسع ل100000 شخص
انت بجد قمر واسلوبك تحفه ربنا يكرمك يارب

موناليزا يقول...

يابنتى مطبخ امريكانى ايه اللى هيفهموه قولى انا عايزة طبلية

Gannah يقول...

جنة
اتمنى انى مكنش السبب انك غيرتى من جنة الى عروسه ننوسة وبصراحة كان لازم تغيريها لعروسة مفروسة
وبما ان الطبلية صحية اية رأيك تجيبى واحدة تسع 12 مكان كده نحقق احلام طنط ويبقى فى بيتك حاجة اجيبشيان اوريجينال
الله يكون فى عونك يا أختى
تحياتى

حنين القلب يقول...

والله انا بقالى فترة ادور على مدونتك من ساعه ما قريت البوست بتاع المطبخ الامريكانى بس الحمد لله لقيتك اخير
بجد كوكو ده يجنن ولا الست مامته ربنا يخليها ليكى
يا بنتى الجوازة دى مش هتنفع صدقينى
والله طول البوست بضحك وعندك حق 12 كرسى يفشفشوا راسها وراس كوكو كمان
دمك عسل
سلام

Miss. Sosa يقول...

السلام عليكم
12 كرسي !!
واضح ان حماتك ست كريمة كرم حاتمي امال هتأكل مين على ال 12 كرسي دول
حرام عليكي ظلماها ومشوشه سمعتها يا شيخة

انتى ايه اللي مصبرك على الجوازة ديه يا بنتي !!

كيكى عوووووو يقول...

حررررررررراااااااااااام كدة....اكتبى حاجة جديدة بقى

Unknown يقول...

دي أول زيارة لمدونتك مني بس وعد تبقى المدونة دي دايما في بالي وأول زياراتي بس انت شرفيني بزيارتك لمدونتي المتواضعة جدا وحطي لمساتك عليها وأكون منونك جدا جدا جدا
تحيتي ومدونتي هنا عشان متتعبيش نفسك
http://kanyatklam.blogspot.com

nado يقول...

والله يابنتى مالكيش حق ظلمتيه ايه يعنى لما يقعد سنه ونصف مايعزمكيش عند اهله وايه يعنى ماتعرفيش عنه وعن اهله اى حاجه عادى وهو انتى لسمح الله هاتجوزى! خليكى روحك رياضيه وتقبلى الاخر ياجميل يااجمل عروسه


ولاعزاء للسيدات .....................................................................................................................

_**( قلب الأسد )**_ يقول...

بصراحة كرم ما بعدة كرم
ربنا يخليكو على وش بعض
ههههههههههههههه
بصراحة كلمات رائعة

الباحث عن الحقيقة يقول...

كويس انهمجابوا بيبسي
وطلعوا مش عاملين مقاطعة للمنتجات الامريكية
ساعتها كان هيبقى
لا مش شويبس يا استاذه
عصير قصيب في كيس كمان مش كوبايات

بيتنا القديم يقول...
أزال أحد مشرفي المدونة هذا التعليق.
RaRa يقول...

هههههههههههههههه
جميلة اوى والله معقول فى ناس كدا
لسه عايشين فى عهد زمان
ربنا يعوضك خير

blue-wave يقول...

بجد بجد تحفه
اول زيارة وشكلى كدا هاكون زبون بس تعمليلى تخفيض

غير معرف يقول...

لك الله بصي يابنتي حطي فستانك
في سنانك واخلعي

كيكى عوووووو يقول...

ارقع بالصوت ولا اعمل ايييييييييييييية مفيش جديد

أحلام عمرنا يقول...

هههههههههههه
والله انتي دمك خفيف
ايه اللي جابرك على كده يا بنتي
اخلعيه وانتي الكسبانه
ولا انتي مصدقتي ياه عليكم البنات حتموت على الجواز
مبيصدقوا يلاقوا حد يخبط على الباب حتى ولو بتاع النوررر
تحياتي ليكي اسلوبك رائئئئئئئئع بجد
دريم

غير معرف يقول...

اولا دي اول مرة ادخل مدونتك دي
و قريتها كلها من اول بوست لاخر بوست

في الاول كنت مخنوووووووووووق مووت من كوكو ده
و مخنوق منكم اكتر انكم صابرين عليه بمواصفاته دي

بس لقيتك في البوست بتاع التاج بتقولي انك متجوزة و بتحبي جوزك جدا جدا جدا
فعرفت انه البوستات دي يا اما من خيالك يا اما لواحدة صاحبتك مثلا
انما مش انتي يا اما لواحد غير سي كوكو
لانه مستحيل رجل بالمواصفات دي الست ممكن تحبه في يوم من الايام
حتى لو ولعلها صوابعه العشرين شمع (( و ده مش هيحصل اساسا))
تحياتي لأسلوبك

( أنا كنت حطيت التعليق فى بوست قبل ده( علشان كنت فاكره الاخير ) بس حطيته هنا تاني لاني لقيت ده اخر بوست

PrInCeSS BeRy يقول...

هههههههههههه انا جالى كلو ونقطة وكل الحجات اللى بتدايق بجد

فرسونى كوكو وفوكو دول هههه

تسلمى بجد

rovy يقول...

فينك يا عروسه ...
وحشتينا
فين الجديد

tarek alghnam يقول...

هههه
اية يابتى اللى غصبك على العريس والحماة دية يااما انتى بقى مصممة تكفرى سيئاتك بهم
بوست رائع ومدونة جميلة
تقبلى تحياتى
ومتعك الله بالحب والسعادة

Unknown يقول...

حرمتينا من زيارتك للمدونة عندي ليه..أتمنى تكرريها
تحيتي

ليكوريكا يقول...

هههههههههه

بس مش 12 كرسي كتير ؟

ده حتي فريق الكوره 11 واحد بس

ربنا يخلي الحموات يارب

عشان نفضل نقرا نوادرهم لحد منموت لان شاء الله

:))

ليكوريكا

بنت مصريه يقول...

انا اول مره اعلقلك
بس نصيحه منى لو عايزه الجوازه دى تتم على خير
متزعليش منى انا زى اختك
بس انا شايفه انك مش بتحترمى خطيبك خالص
يعنى شويه تفولى دا غبى
وشويه تقولى هتحسبه علينا عريس
نصيحه منى لو مش مقتنعه بيه
يبقى اخرجى بالمعروف احسن دلوقتى
عشان الجواز المفروض يتبنى عالاحترام ولو متبناش عالاحترام
ممكن ينهار
ف انتى دلوقتى عالبر فرجعى نفسك
واذا كان بيرضى امه
ف هى امه
حاولى تكسبيها عشان توافق على طلبك
لكن ماتطالبيهوش انه يتحدى امه ف حاجه
اتمنى لكى كل التوفيق يا اختى العزيزه

بنت مصريه يقول...

انا اول مره اعلقلك
بس نصيحه منى لو عايزه الجوازه دى تتم على خير
متزعليش منى انا زى اختك
بس انا شايفه انك مش بتحترمى خطيبك خالص
يعنى شويه تفولى دا غبى
وشويه تقولى هتحسبه علينا عريس
نصيحه منى لو مش مقتنعه بيه
يبقى اخرجى بالمعروف احسن دلوقتى
عشان الجواز المفروض يتبنى عالاحترام ولو متبناش عالاحترام
ممكن ينهار
ف انتى دلوقتى عالبر فرجعى نفسك
واذا كان بيرضى امه
ف هى امه
حاولى تكسبيها عشان توافق على طلبك
لكن ماتطالبيهوش انه يتحدى امه ف حاجه
اتمنى لكى كل التوفيق يا اختى العزيزه

!!! عارفة ... مش عارف ليه يقول...

عارفة
أنت غلطي في حاجة
بدل ما كنتي تاخدي جاتوه
كان المفروض تحطي لهم صوباعين ديناميت

وتريحي نفسك منهم


تحياتي

Geo Amr يقول...

الله يكون فى عونك وحرام عليكى نفسك

سوسا ومودى يقول...

لالالا ده كتييييير مرارتى أتفقعت
أيه ده يا بنتى هما فى ناس كده أصلا

بس مدونتك فكرتها حلوة أوى أوى
بس بينى وبينك جت على الوتر الحساس
أصلى شوفت من الاصناف ديه كتير
هههههه
ربنا يلطف بينا
يااارب

محمد حلمي مخلوف يقول...

هههههههه لذيذة قوي انتي دمك خفيف قوي
وبعدين انتي مجبوره عليه ليه غيريه وايه يعني

كيكى عوووووو يقول...

انتى فين بجد
طمنينى عليك

بيتنا القديم يقول...

امممممممممم

طب لما حضرتك مسحتي التعليق

ليه كتبتي مكان كلمة كومنت "قول اللى

انت عاوزه"...؟!!

ليه مش تخليها "اكتب اللي انا"

عاوزاه..الغريب ان ده كان مجرد رأي

مش كلام

عيب او يجرح حد..!!

على فكرة النقد احيانا بيكون افضل

بكتير من التصفيق الاجوف..!!

تحياتي

الإتربي اللولبي يقول...

و الله يا بنتي أنا شايف بدل ما اوسخ لساني بإني اشتمه حاولي انتي تفسخي الخطوبه لأني لو ابتديت شتيمه في أمه مش هاخلص

ياخراااااااااااااااااااااااااابييييييييييييييييييييييييييييييييييييييي

التائب يقول...

السلام عليكم ورحمه الله وبركاته
بجد انا بشكرك على انك دخلتى فى قلبى الضحك
وبجد بوست رائع وجميل جدا
والله الموفق

بيتنا القديم يقول...

عروسة ننوسة
..........
لا عليك عزيزي..!!
انا بس افتكرتك زعلت مني..!!
وبحسب ان القصص دي تخصك..!!
بصفتك عريس يعني وبتخوض مغامرات
فاحببت ان انكشك لنعلم ما فى جعبتك
على العموم احنا اخوات يا مان
ومش في راجل يزعل من راجل عشان شوية
مشاريب..!!
والله المشاريب النهاردة على حسابي
انت عزيز عليا يا صاحبي..!!
(:
(:
(:
ملحوظة:
.......
انا رجل
ولست فيميل..!!
ــــــــــــــ
بجد تشرفت بمعرفتك ومش تزعلي حصل خير
يتحرق العرسان على ايامهم الملغبطة
ولتحيا المرأة بلا اعداء ..!!

arsenalwy يقول...

دمك زى العسل

بس دة لو خطيبك انصحك انك تسيبيه فورى

وخليكى مصممه على المطبخ الامريكان

Unknown يقول...

كمان عالطبليه؟؟؟

لكان هالمعركه كلها عشان شو؟؟ بس فرد عضلات؟؟

اذا كانو بهالبخل قولي "يا فكيك" و اهربي بنفسك أحسن

شو بدك بهالغلبه الواحد مش ناقص:)

Mafrousa يقول...

انتي من يوم العزومه المشئومه ديه و انتي مختفيه خير؟؟؟؟

rovy يقول...

وحشتينى جدا و بجد بدأت اقلق عليكى من فضلك طمنينا .. يااارب تكونى بخير
ربنا يحفظك و يطمنا عليكى اختى الكريمه

nado يقول...

ايه يابنتى فينك يارب تكونى بخير

وغيابك عنا باذن الله خير .... ربنا يوفقك وياريت تطمنينى عليكى

عاشقة القمر يقول...

هههههههههههههههه .. بجد تحفه وحياة ربنا مش ممكن اللي هما فيه ده .. انا لغاية دلوقتي ماقريتش غير موضوعين بس شكلي هكملهم كلهم عشان اكمل معاكي بقيت الشقة .. اصل واضح من الموضوعين ان طنط حماتك بتحط في شقتك اللي كان نفسها يبقى في شقتها .. هو ماحدش ادى طنط خبر ان انتي اللي هتتجوزي مش هي .. ههههه .. لا وكوكو مش قادرة اقولك .. ولا اقولك المرة الجاية قوليلي هو خطيبك فعلا ولا ايه الحوار عشان اقدر اقولك D: