الاثنين، 19 مايو، 2008

ياااااااا عاااااااااااالم...ياااااااااااااااهووووو.....عايزين نامركوه



الجميل بقى النهاردة ان البيه والست هانم حماتى جاين علشان يكملوا علينا وننزل نشترى معاهم الاجهزة الكهربائية...........انا بينى وبينكم قلت لماما واحنا فى المطبخ بنقطع بصل ودموعنا نازلة......" بقولك ايه يا ماما ما بلاش ننزل معاهم لحسن المرة دى تجيلك انتى وبابا سكتة قلبية"!!
ماما وهى عمالة تعيط من البصل ودى احسن مناسبة نجيب فيها سيرتهم واحنا بنعيط قالت"والله يا بنتى انا حاسة ان الجوازة دى هتقضى على كل اللى فى البيت وعلى الجيران كمان.....بس نعمل ايه باباكى عايز يفرح بيكى ونفسنا نشوفك عروسة وشباب اليومين دول كلهم بقوا كده.
انا قلت لها" والله يا ماما قعدتى جنبكم احسن من الفرقع لوز ده اللى كل شوية يتنطط كمان الواحد لما يتجوزه اكيد هيسيب قعدتكم ويقعد على ابواب الجوامع"!
المهم نزلنا نتشل شوية وكنا مسلًَََمين امرنا لله.....انا قلت لسى كوكو"بصى بقى يا سيدى طبعا ده بعد ما اتجرات وبحلقت له شوية ....قال يعنى بخوفه....انا عايزة المطبخ يكون اميريكان اوكيه؟؟
قالى باستغراب وكانى اديتله على نفوخه"امريكن .....يعنى ايه هو احنا مش هنشترى من هنا من مصر؟؟
وشوية والهانم حماتى قالت.."امريكن ايه وبتاع ايه يا بنتى ايه الكلام ده هو احنا لسه هنستورد من امريكا؟؟ لا ...لا معقول ؟؟
ماما بصت لها وقالت "ايه فى ايه يا حاجة؟؟ مالك خير ؟؟ ردت "تعالى يا حاجة شوفى بنتك بتقول ايه؟؟قال عايزة مطبخ من امريكا ,,وده كلام بردوا ولا علشان الواد طيب ولا هى مصاريف وخلاص؟؟ بقولكم ايه المثل بيقول ....."على اد لحافك مد رجليك"
انا قلت فى عقلى"اذا كان على اد لحافك يبقى ان شاء الله مش هنعمل حاجة لانك ابنك رجليه قصيرة واوزعه"!
بقى مطبخ اميريكان معناه انى هاشتريه من امريكا ....ربنا يورينى فيك يوم بمدفع ولا دبابة من هناك تخلصنا بقى منك "ورحت مصرخة" يا عاااااااااااااااااااااااااااااالم ...يا هووووووووووووووووو
ماما استغربت وفطست من الضحك وحاولت تفهمها "يا ستى هى تقصد مطبخ استايل اميريكان حاجة كده ليها كراسى وبار زى ما تقولى المطبخ مفتوح على الريسبشن يعنى مش مقفول "راحت عملت نفسها بتفهم"اه ....مالوش باب يعنى مش كنتى تقولى كده اصل اختلط على الامر بس بردو وليه تبقى مكشوفة كده وهى بتطبخ؟؟ والمطابخ بتاعتنا مالها وبتاعة زمان دى كانت زى الفل مطبخ خشب زان حتتين فوق وتحت وادرف ونملية ....لا لا هو فى زى مطابخنا بلا كلام فاضى"
هو بقى ابتسم كده وبص لمامته"صح يا ماماه....دى النمليه اهم حاجة فى المطبخ
انا قلت باشمئزاز" ايه يا بنى ده نملية ايه وعنكبوت ايه" انا عايزة استايل اميريكان"
حماتى بقى هبت فيا "ايه وبعدين معاكى براحة على الواد انتى فاكرانا مبنفهمش ولا ايه؟؟ لا انا ابنى متعلم احسن تعليم وبنفهم كويس اوى "
قلت لها"يا طنط سورى انا مقصدش انكم مابتفهموش ... ابسوليوتلى" وفى سرى" يا شيخة روحى يا بتاعة النملية "
بصى يا طنط انا عايزة استايل معين فى دماغى وبعدين انا اللى هستعمل المطبخ ده واطفح السم لابنك فيه.......اقصد هطبخ لابنك فيه"
ردت قالت"اه بس ابنى حبيبى هو اللى هيدفع"
انا من حرقة دمى سكت بقى مستخسره فيا مطبخ وانا اللى جايبة الشقة اللى ان شاء الله هدفنكم فيها!!
المهم رحنا اتفرجنا على الاجهزة وسيبنا المطابخ خاااالص وقلنا نبقى نحل مشكلة امريكا دى بعدين لانها هتحتاج وقت طويل!!
ماما لقيتها بتشاورلى على بوتاجاز سيمبل كده وبسيط واهم حاجة فيه انه هيليق على المطبخ "بوتاجاز مسطح"
طبعا وكالعادة لقيت حماتى بتتأمز اوى وبتمصمص بشفايفها مش عاجبها ومعترضة وتقول"ايه ده .....هو ده البوتاجاز......الحق يا ابنى البوتاجاز اللى عايزة تجيبهولك ده ولا بتوع البوفيهات اللى بيعملوا عليه شاى وقهوة......ايخيه...ده ذوق ده؟؟
انا بقى كان هاين على اعضها وقلت لها وانا محروقة"وماله يا طنط ده بوتاجاز هايل وعملى جداوالشعلة بتاعته فظيعة"فى سرى...." الهى تتشوى عليها انتى وابنك "
كوكو قالى "لا يا حبيبتى عايزة رأيى ...انا قلت اخيرا هتتحفنا بارائك....وانت عامل زى ناس موافقون"موافقة" اقرف ودنى وسمعها اطربنى اطربنى"
ماما كلامها صح...ايه ده يا حبيبتى ده زى بتوع القهاوى عم محروس صاحب القهوة اللى على ناصية شارعنا حاطه... معقول بردو ابقى زى عم محروس حبه كمان تحطيلى فى المطبخ شيشة !
قلت فى سرى "بتاع القهاوى اقول ايه ما انتم متخلفين صحيح .....هقول ايه واشرح لكم ايه كبيركم سيبرتيه ولو قعدت اشرح يبقى افتكر انى اروح اجيب البوتاجاز من امريكا اسرع"!
وبعدين حبه جد بقى" يا كوكو ....ده بوتاجاز هايل وهيليق على المطبخ اللى انا عاوزاه اما البوتاجاز التانى ابو اربع رجلين ده مش هيليق فى المطبخ الاميريكان وبعدين رجلين ايه هو انا هحط حمار باربع رجلين ".
الست هانم حماتى"بقولك ايه ......هو مفيش غير" بوتاجاز المصانع" بيعيش ويعمر العمر كله ....وهنروح بعيد ليه مهو عندى وشغال ميه ميه زى النار الله اكبر عليه بقاله 35 سنة اه ولا انتى عايزة كل شوية تغيرى حاجة....الحاجات دى مناظر بس مابتعش ....وانا ابنى كمان هيجيب منين ولا منين ده كله ... اسمعي كلام حماتك تكسبى"
انا قلت لها اه"بوتاجاز مصانعكو هيعيش ويقرفكو" المهم انا دماغى جزمة قديمة ومش هتنازل عن بوتاجازى وقال اسمع كلامها اكسب قال ده ان مخسرتش اللى ورايا وادامى يبقى كويس....انتى مش حطيتى بوزك فيها تبقى خربت وعليه العوض !!
شوية وبصت لماما"ايه يا حاجة متعقلى بنتك شوفى لك حل معاها بنتك دى اللي عمالة تخترع لنا ....شوية امريكا وشوية ابصر ايه...ومادرك ايه يا ختى انا عارفة بتجيب الحاجات دى منين..."
ماما كانت قرفت على الاخر"يا ستى افهمى الشقة شقتهم والعفش عفشهم والحاجة حاجتهم احنا مالنا بقى ما علينا الا اننا نبارك ونهنىء ....سيبيهم يختاروا احنا هناخد زمنا وزمن غيرنا.....وقال العروسة للعريس والجرى للمتاعيس.
هى بقى لقحت علينا بالكلام"اه بس انتى عارفة العرسان فى الزمن ده قليلة...واللى معاه قرش يخاف عليه مش يبعزقه والحاجات اللى بتختارها بنتك تقاليع غريبة ...خليها تبطل تتفرج على النايلتيفى"!
انا وماما لما سمعنا كده كنا هنموت من الضحك"مهى دى اخر حاجة سمعت عنها" المهم ماما بصت لها وهى هتشد فى
شعرها "يا ستى سيبيها تفرح وهما احرار" وبصت لكوكو"ولا ايه رايك يا ابنى متتكلم "
كوكو بقى متنح"والله يا طنط اللى تشوفه ماما.....هى عارفة ذوقى وانا كمان بيعجبنى ذوقها"
انا كنت خلاص على اخرى منهم رحت شديته على جنب وقلت له"
انت يا ابنى بقولك ايه انا اللى هعيش فى البيت ده مش طنط وانا اللى لازم اختار جهازى بنفسى فاهم؟
رد على بتناحة"بالراحة يا حبيبتى بهدوء مهى حاجتى هى حاجة ماما بالظبط..... والله دى بتحبك اوى بس البوتاجاز اللى انتى اخترتيه شكله غريب وبعدين امريكا قطعت عننا المعاونة وانتى لسه بتشجعى صناعتهم!!
كمان عايز اسالك سؤال" هو احنا هنحط البوتاجاز ده فين اقصد يعنى هنحطه فوق المطبخ ولا على كرسى ولا ايه؟؟ اصلى مش شايف له رجلين!!
انا بقى جات لى حالة من الخرس وكان هيغمى عليا من الغباء.....ولما حس انى هعيط واصرخ وسط الناس لحق نفسه وقال"خلاص خلاص مش مهم نبقى نسال فى الموضوع ده بعدين "
رحت قلت له"يعنى خلاص اخيرا اقتنعت وهتشتريه هو والمطبخ الامريكانى؟؟؟
رد ببرود" اه بس علشان هو على ذوقك يبقى على حسابك وانا على حسابى الرجلين !!

هناك 45 تعليقًا:

A.SAMIR يقول...

وهو انتم لازم تنزلوا برابطة المعلم كدة تشتروا كل حاجة؟
علشان تشتري دماغك خليه هو يشتري وانتي في البيت
الدنيا حر برضة

واحدة مفروسة يقول...

الراجل ده كوكو بجد يا جنه
وان شاء الله حماتك حتقعد على قلبك فى الاخر
و خديها من اختك حكمه بلاها الجواره اللى حتجيب الضغط و القلب و الشلل ديه

حماتــــــــــــي ملاااااااااااك يقول...

بصي المطبخ الامريكاني ده ماينفعش في مطابخنا
بجد بيبقي شكله وحش أوي ومابيبقاش له خصوصية ولما يبقي عندك معازيم بيبقوا كاشفين البيت كله

ضد الظلم يقول...

هههههههههه
بالنسبه للاكتر حاجه استفزتنى
ابنك رجليه قصيرة واوزعه
ده مش عيب ياماما دى حاجه اى حد يبقى فخور بيها
بس حماتك تحفه انتى مستحملها ليه هما ممضينكو وصل امانه
اسلوبك ذى العثل
تحاياتى

الربان يقول...

تحياتي

اسلوبك جميل في السرد..و خفة دم محببه.

في رأيي ، انه قبل الخروج للشراء يستحسن ان تتفرجي مع العريس علي بعض
الكتالوجات...للمطابخ مثلا..و هي متوفرة علي الانترنت..و تتفقوا...هذا يسهل المأمورية الشرائية و يقلل من الوقت الضائع...

عموما انا عندي قناعة شخصية...ان اصارح الطرف الاخر بأمكانياتي المادية
و اترك لها حرية اختيار الاثاث في حدود
هذه الامكانيات...
لان الزوجه هي من ستقضي معظم وقتها بالمنزل...فيجب ان تشعر بالارتياح فيه.


تحياتي و تقديري....و تمنياتي بالتوفيق

tamer.sala7 يقول...

علي فكرة كوكو ده شكله عايز من ابوكي مبلغ وحياخدك تخليص حق

هو ده التفسير الوحيد اللي يخليكو مستحملينو

أبا يحيى وادم يقول...

السلام عليكم ورحمه الله وبركاته
احيك على الاسلوب الجذاب فى العرض
أما التعقيب على ما بداخله فتركته لنفسى وجزاكم الله خيرا والسلام عليكم
أخوك
د/احمد جمال

زيزو الشقى يقول...

انا مدون جديد

دى اول زيارة ليا


مدونتك حلوة اوى ودمها شربات

عز الدين


سلااااااااام

EmY يقول...

احتمال يتهمك انك عميله لامريكا و بترجي لافكار صهيونيه

بس انا كمان بحب المطابخ الامريكان ستايل تفتكي انا كده عميله زيك

الراجل اهو مش معترض طول ما انتي الي هاتدفعي عايزا ايه اكتر من كده يا مفتريه

تحياتي يا قمر

الإتربي اللولبي يقول...

يا نهار أبو أمه كحل

إيه العيله الواطيه اللي انتوا وقعتوا فيها دي ؟؟

أنا أسمع ان الواحده تتجوز راجل ... إنما تتجوز كوكو .. ده اللي ما يصحش

أنا لو منك أرمي له دبلته ف وشه .. ده لو مخطوبه .. و لو مكتوب كتاب .. أطلب الطلاق و ابريه طالما ما دخلناش

هذا و بالله التوفيق و الله و رسوله أعلم

هاتسعدني زيارتك و تعليقك

سلام عليكم

el_assel يقول...

ما أنتي اللي غلطانة من الاول

انتي ايه اللي مصبرك علي كده

ده كده وانتوا لسة مخطوبين

يعني فترة عصير الليمون والشحر والبحر وكده
وانتي عاملة كده معاه
ربنا يصبرك بقي



علي فكرة الولاد ممكن مايكونوش بيهموا قوي في الحاجات دي
بس اكيد يعرفوا ان المطبخ الامريكان بيتجاب من انجلترا من امريكا هه؟؟

اكيد عارفين ان انتيس حتحطي البوتاجاز علي الارض علي طول كرسي ايه وكلام فاضي ايه


وربنا يخليلنا الفضائية المصرية
والله سبب من اسباب تخلف بعض افراد الشعب المصري




سلاماتي

قلب الأسد..مش هسكت يقول...

هههههههههههههههههههههههه
لا بصراحة انا تخنقت من كوكوا
دة ايه دة انا عاوز اسأل سؤال واحد انت اية الىمصبركم عليه
انا طبعاًجاى اهدى النفوس بس
ههههههههه
بوست اكثر من رائع
تقبلى تحياتى

Salah Slim يقول...

يا ست الكل
اسلوبك يجنن وخفيف الظل لا بعد الحدود وربنا يعينك على حماتك وسي كوكو وما يجيبوش ليك الضغط ... وضح الموضوع مش هيقف عند الشراء اثناء الخطوبة ولكن التدخل بعد الزواج ممكن يقلب الحياة لجحيم ..
تقبلي مروري وتحياتي

Baker يقول...

شكلك بعد الجواز هتنضمى لمدونه حماتى ملاك

maiosha يقول...

ههههههههههههههه
سلام عليكم ..هى دى أول زيارو ليا للمدونة فأنا لسه مخدتش فكرة كاملة عنها بس رأيى هيبقى من أخر بوست قريته لغاية لما أخد تاكسى وأنزل أشوف المدونة من الأول

أولا إنتى إسلوبك لذيذ جدا ودمك خفيف ..لكن مش عارفة ليه حاسة إنك متحاملة علىكوكو شوية
هو صحيح كوكو على الأخر وواضح إنه بتاع ماما.. بس براحة عليه هو حد لاقى عرسان الأيام دى

أما بقى حماتك دى اللى فاكرة إن المطبخ الأمريكانى هتجبيه من أمريكا..هههههه
فأحسن حاجة إنكو لما تحيبوا تجيبوا حاجة للشقة بعد كده تحبسى طنط دى فى أى أوضة وتخدى كوكو من إيده وتجيبه اللى إنتوا عايزينه ..

تقبلى مرورى وإن شاء الله متكونش أخر زيارة

تحياتى

زيزو الشقى يقول...

كتبت احد موضوعاتى وسوف ترى افكارى

تحياتى

عز

سلاااااااام

سبهللة عالآخر يقول...

ايه العسل دة
دة انتى هاتخلينى اقرا المدونة كلها من اول بوست لاخر بوست
بس لو الموضوع دة بجد
اوعى تكملى معاه
انا زمان من عشر سنين تقريبا كنت مخطوبة لنفس العينة بتاعة مامابتقول دى وطبعا فسخت الخطوبة
والحمد لله حاليا متجوزة جوازة فل وجوزى الحالى يضرب خطيبى الاولانى بالشوز وما ندمتش
اوعى تكملى الجوازة
ولو خايفة تعنسى ما تخافيش عندى ليكى بدل العريس اتنين وتلاتة ومهندسين زى الفل دة غير ان ليهم ميزة مهمة جدا
انهم رجالة
على فكرة انا اول مرة ادخل عندك
ونسيت اقولك ان انا وزوجى والعرسان اللى عندى ليكى كلنا مهندسين ديكور وبالتالى العريس هايتفهم جدا وجهة نظرك
اما بالنسبة للمطبخ الامريكان فكرة هايلة جدا وبتدى وسع للشقة بس لازم يكون طول الوقت بيبرق ومافيش مواعين فى الحوض والا هاتفضحينا لو جالك ناس على غفلة
اما بالنسبة للبوتاجاز المسطح فهو افضل ميت مرة من البوتاجاز العادى ابو رجلين وديل
وطبعا لما تجيبى البوتاجاز المسطح هاتجيبى فرن منفصل وترفعيه فوق ومش هايتكسر ضهرك طالعة نازلة تشوفى اللى فى الفرن
استوى ولا لأ
على فكرة انا بنصحك على اعتبار ان البوست دة موقف حقيقى واوعى تكونى بتهزرى ازعل اوى على حرقة قلبى عليكى وعلى شبابك اللى هايضيع مع كوكو دة

زيزو الشقى يقول...

شكرا لكى على متابعتك لمدونتى

بالتوفيق و النجاح

تحياتى لكى

wanna b a physician يقول...

اه هو المطبخ الامريكان مش حلو فى المساحات الضيقة بس لو مساحة كبيرة عادى
اما بقا موضوع مصانعكوا هتقرفكوا
كل زمن وليه حاجة يعنى الاستايلات الجديدة هايله وكويسه وبتعيش برضوة وهو مش يعرف ان فى حاجات تتحط عليها البوتاجاز
هههههههههههههههههههههههه

سمراء يقول...

قادة الخزانه ولا جوازة الندامه
تحياتي
اشكرك على مرورك وتعلقيك الرقيق
سمراء

حنين القلب يقول...

ههههههههههههههههههههههههههههههههههههههههه والله العظيم انتى سكرة
طول ما انا بقرى البوست عماله اضحك لدرجه جوزى بيقول الوليه اتجننت.
بصى يا ستى اولا ده مش ينفع ده ابن ماما خالص وبعدين ما هو قالك امريكا قطعت المعونه وانت لسه بتشجعى صناعتهم يعنى هو اصلا مش من هنا ولا هيفهمك
وبعدين اسمعى كلام حماتك تكسبى وابقى قابلينى طبعا لو كسبتى والاخر هو حلها ليكى قالك هاتى انتى المطبخ وهو هيجيب الرجليين
نصيحه منهى صغننه
سيبك من كوكو ده وانا هجيب ليكى شاب اسكندرانى عسسسسسل يستاهلك
سلام يا منار

حنين القلب يقول...
أزال المؤلف هذا التعليق.
Desert cat يقول...

ههههههههههه
صح يا ماماه النمليه اهم حاجه فى المطبخ
والنبى كوكو باين عليه تحفه
انا لو منك احتفظ بيه للذكرى

واحد بيدور علي قلبه يقول...

هو انتي يا جنه لسه سليمه انا بيتهيئلي انك بقي عندك ضغط وسكر وكل حاجه يا بنتي اهربي.

ساره البحر يقول...

دمك زي العسل جد
وسيبك من استاذ كوكو ده اللي ماشي وراء كلام مامته ههههههههههههه
وانا معاكي المطبخ الامريكان تحقه اوي
تحياتي ليكي

يوميات فنانه مفروسه جداا يقول...

وربنا ضربات قلبي ذادت وانا بقرأ البوست ده والضغط عالي عليه.
بلاها يا بنتي الجوازه ديه بلا كوكو بلا بتاع وكمان جايبينله الشقه يا خبتي يا خبتي الله يرحمك يا جدي .
الله يصبرك يا بنتي علي بلوتك

sasatifa يقول...

هههههههههههههههه
ربنا يخليلك كوكو ،هو عندو كام سنه؟ على العموم اللى جابلك يخليليك
مدونتك حلو وخفيفه اوى

طائر الحرية يقول...

موضوع جميل جدا
بالتوفيق ليكى
تحياتى

طارق الغنام يقول...

اختى الكريمة
ماشاء الله على خفة دمك
بوست رائع
الزواج لازم يكون فية تفاهم
وقبل العفش والذى منة لازم يكون الحب والمودة
والا بلاها زواج
تقبلى تحياتى
وادعوكى لزيارة مدونتى المتواضعة
تحياتى

كيكى يقول...

ههههههههههههه....العريس دة..اديلوة بمبة واخلصى من مامتة كمان

.:.-=- ELGaZaLy-=-.:. يقول...

هههههههههههههههههه

انا شايف ان الناس كلها ظالمة اخويا كوكو ...الراجل ابن امة ودة شئ مستحب

لان مهمتك بعد الجواز انة تخلية ابنك انتى...
بس وماما رهيبة ربنا يخليها لكوكو ويحفظها

خفة دمك رهيبة والمدونة كلها جميلة ...تحياتى

Jana يقول...

طب يا جنة مانتى اللى غلطانة عشان بتتفرجى على النايل تى فى
امال لو قلتلهم بتتفرجى على الشو تايم .حيعتبروكى عميلة للموساد ويبلغوا عنك ولا ايه ؟؟؟
هههههههه

دمك زى الشربات ...عقبال ما نشرب شربات فرحك ..بس لازم ادعيلك بكوكو بالذات ولا ينفع نبدل !!؟؟؟

تحياتى

Nour يقول...

طبعا انا فعلا مغرم بالاسلوب الساخر لانه يدل على قوة العقل ... فى علم النفس
وفكرتينى بكاتبى المفضل محمود السعدنى خصوصا كتابه ( حمار من الشرق )
المهم انت هايلة
وبالمناسبة انا كاتب فى مدونتى موضوع عن الحموات ممكن تهديه لحماتك وهى هتتبسط منك موووووت الموضوع اسمه ( هيدجر والحموات ) عشان متضوريش كتير
تحياتى
نور الدين محمود

almasry يقول...

عريسك ده يخنق


انتى مش بقيتى بتيجى ليه هو انا كنت بخيل فى يوم ولا حاجه لسمح الله؟


ده احنا مجال واحد وانا لسه كان عندى امتحان علاقات عامه وطبعا مذاكرتش الاعلان واتنفخت فى الامتحان زى العاده


وكمان من بلد واحده يعنى المفروض تشجعينى وتاخدى بالك من أخوكى الصير والله انا لسه نونو فى التدوين .. قلبك رق صح؟ هنزورينى

انا مستنى


تحيـــــــاتى
المصــــــــــرى

شفقة و احسان يقول...

ايه يا جنة ده دانتى فعلا جنة شقة وعفش وبوتاجاز مسطح احمدك يارب ايه رايك تخلى كوكو ياخد شفقة والله هتعلمه الادب.....ههههههههههههههه

rovy يقول...

السلام عليكم
ايه يا جنه ده كوكو لسه مدوخك كده
وبعدين ما فيش حد يأخذ معاه حماته وهو بيجيب حاجته ..
ولازم الاول تقعدى مع عريسك الكوكو ده وتفهمبه ايه اللى انتى بتحبيه وعاوزاه وياريت تفرجيه على كاتالوجات يمكن يفهم واوعى تأخذى حماتك تانى معاكى وانتى بتشترى حاجتك
وربنا يتمم لك عل خبر .. عاوزيت تفرح بيكى بقى .
دمت بخير
تحياتى
rovy

كيكى يقول...

هاى جنة ازيك لسة مكتبتيش حاجة جديدة...ولا زعلانة مع العريس..

•√أريـ السمر ـج√• يقول...

اسلوبك بالسرد بيه خفة دم تجنن

حقيقي استمتعت كتير بالمدونة كلها

كنت حاقولك خدي كوكو اقنعيه انما شكله مفقود بيه الامل :)

دمتي بكل الود و الصبر

المتحرش بها يقول...

فطستنينى من الضحك

Gannah يقول...

عرسان اخر زمن..دى جوازة ايه دى قال يا أختى قعدة الخزانة ولا جوازة الندامة
كمان نشتريلو البوتاجاز اهو ده اللى ناقص
الله يصبرك على حماتك
طبعا اسلوبك دمه خفيف جدا كالعادة
تحياتى

Dr.Mohammed Gohary يقول...

مساء الخير

أنا جي أمسي ومروح دوغري
(دوغري يعني علي طول في قاموس السواقين)


انا قلت باشمئزاز" ايه يا بنى ده نملية ايه وعنكبوت ايه" انا عايزة استايل اميريكان"

هههههههههههههه عكنبوت ههههههههههههههه عكنبوت
دامدة دي


بصى يا طنط انا عايزة استايل معين فى دماغى وبعدين انا اللى هستعمل المطبخ ده واطفح السم لابنك فيه.......اقصد هطبخ لابنك فيه"

يلا عالبركة يستاهل والله
وابقي اعزمي امه علي طبقين سم فران

نياهاهااااااي


غير" بوتاجاز المصانع"

يا نهار اسود
هو لسه في حد فاكره
دا اتلغي من بعد الحرب
يانهار احمر

الست دي من الهند صح؟؟؟؟؟؟؟؟؟
هههههههههههههههههههههههههههههه


خليها تبطل تتفرج على النايلتيفى

ايوه يا شيخة
هيا الـ
nile tv
دي اللي عاملة المشكله
ههههههههههههههههههههههههه
يخربيت الهبل


اه بس علشان هو على ذوقك يبقى على حسابك وانا على حسابى الرجلين

مفيش من خطيبك دا قرصين لعلاج حالات الـ hypotension
او انخفاض الضغط

دا يبقا لووووووووووووووووز

ههههههههههههههههههههههههههههه

تحياتي

وابقي عدي
ولا هيا كانت مرة ودمتم؟؟؟

أحمد الشاعر يقول...

اولا دي اول مرة ادخل مدونتك دي
و قريتها كلها من اول بوست لاخر بوست

في الاول كنت مخنوووووووووووق مووت من كوكو ده
و مخنوق منكم اكتر انكم صابرين عليه بمواصفاته دي

بس لقيتك في البوست بتاع التاج بتقولي انك متجوزة و بتحبي جوزك جدا جدا جدا
فعرفت انه البوستات دي يا اما من خيالك يا اما لواحدة صاحبتك مثلا
انما مش انتي يا اما لواحد غير سي كوكو
لانه مستحيل رجل بالمواصفات دي الست ممكن تحبه في يوم من الايام
حتى لو ولعلها صوابعه العشرين شمع (( و ده مش هيحصل اساسا))
تحياتي لأسلوبك

مصطفى الطيب يقول...

لا بجد انتى عبقريه بجد مش عارف اقولك ايه
انا بجد معجب جدا بكتبتك وليكى بعض الافيهات الجمدة
بس ليه سوال مهم هو دة حقيقى ارجو الرد ضرورى
واتمنى لكى كل التوفيق
والله الموفق

عاشقة القمر يقول...

اااااااااااااه .. لالا لا بجد لا كتير عليا والله كتير عليا اللي بيحصل ده .. ده انا ضغطي علي من مجرد القرايه امال انتوا حاصلكم ايه يا عيني مع التعامل .. هههههههه .. بجد مش قادرة اصدق ان لسه فيه شخصيتين زي دول .. معلش يا جميلة والنبي اصلي مزنوقة في سؤال .. هو مين اللي جابلك الجوازة الفزززززززيعه مش الفظيعه لا الفززززززززيييييييعه دي ؟ ..
انا هقوم انام قبل ما اتشل .. كفاية عليا كده النهاردة D:
تقبلي تحياتي ومواساتي D:

اللي شايل همه يقول...

هي حماتك دي تقفيل ايه...؟ولما بتحبي تزيتيها او تشحميها ...ليها صيانة ولا بتوديها عند أحمد العجلاتي...؟؟
بس انا حاسس كده غن فيه حاجة مش طبيعية ...ايه اللي محببك في سي دوكو بتاعك ده طالما هو كده
ولا انتي بتألفيلنا الحكاوي دي ولا هي تجارب ناس آخرين؟؟؟
كل هذه تساؤلات الشارع المصي عن الشبكة القديمة واين ذهبت
تابعونا بعد الفاصل
.......................
اطلب زيروتسعمية تكسب فورا عجل هدية
اتصل حالا واحجز بيتك على كوكب زحل ...للإستعلام والمخابرة الأسطى مرسي ابو دراع

سمن النخلتين ....ممكن حتتين