الثلاثاء، 13 مايو 2008

لا هاعتبك ولا الومك.......قليل الاصل من يومك


النهاردة بقى مستنين كوكو علشان نعرف عمل ايه فى موضوع الشقة ولو انى متاكدة انه مبيعملش حاجة خالص اصله زى ما بيقولوا "على رجلية نقش الحنة
المهم وصل الباشا والست طنط هانم وماما قالت لى تعالى سلمى على عريس الهنا هو ومامته خرجت سلمت وهاتك يا بوس واحضان وده طبعا من فرط حبى الشديد لطنط شوية وبابا سلم عليهم وقال "ها يا ابنى ايه اخبار الشقة لقيت ولا لسه عايزين نكمل بقيه العفش"
طبعا "الهانم "مامته سبقت بالكلام ده على اعتبار ان ابنها اخرس وهى بتنوب عنه ....."براحة يا حاج على الواد وهو هيعمل ايه يعنى يقطع نفسه اهو بيدور ومكلف ناس تدورله ما احنا قلنا الكلام ده قبل كده"ماما بقى اتفرست منها فهبت فيها زى الباجوراصلها كانت مولعة منهم"ما احنا عارفين الكلام ده وبعدين يعنى هنجوز البنت فى الشارع؟؟
فردت الهانم"يا حاجة احنا مش ساكتين وبنعمل اللى علينا والباقى على ربنا ده حبيب عين امه والله بيرجع من الشغل هلكان ومعندوش وقت"
بابا بقى من طيبته وحنيته قال "طيب بص يا ابنى احنا عندنا الشقة ومش هتغلى على بنتنا احنا عايزين نفرح بيها المهم انك تحطها فى عينيك واحنا يا ابنى بنشترى راجل" ماما طبعا بصت لبابا وكانها عايزة تقوله انت اتسرعت.
وانا بقى لما بابا قال احنا بنشترى راجل قعدت" ابص يمين وشمال كنت هاموت واعرف يقصد مين !!!
المهم ان بابا فجر المفاجأه وماما قالت اكيد بقى هيشيلوها جميل وهيحسوا على دمهم لكن على مين"دول توكسفين ولا بيهمهم"
بس اعمل ايه الواحد لازم يتجوز اهو يلاقى حاجة تساعده فى البيت ولما يعىء يلاقى حد يطفحه الدواء اهو حاجة تسلى الواحد وتوجع دماغه.
المهم انهم لما سمعوا موضوع الشقة ده بداوا الفيلم الهندى وكان كوكو ولا اميتاب تشان"والله يا عمو انا هحطها جوه عينى"ده على اساس انى رمش"انتم والله اكتر من اهلى ....حبتين وطنط" اوسة" كملت الفم والله يا جماعة مش عارفين نقولكم ايه ده احنا هنحطها جوه قلبنا "
وانا اقول فى سرى"اه يا نارى منك ومن لئمك ما انتى كنتى لسه عمالة تتنططى علينا من شوية زى الفرقع لوز"
وشوية وقالت"صحيح يا جماعة مقولتوش الشقة فين مكانها؟؟ ومساحتها كام متر؟؟
وكوكو"اه صحيح كلام ماما مظبوط اوعوا تكون فى مكان نص كم؟؟ اه انا برستيجى لا يسمح ...لازم يكون مكان هاى وشيك ده طبعا علشان يليق بى وبنتكم.
والهانم "فعلا ابنى ما يسكنش فى اى مكان طبعا وعروستنا.
ماما بقى المرة دى كانت هتقوم تديهم بالجزمة وبنرفزة"احنا ما نديش لبنتنا حاجة وحشة كمان اللى مش عاجبه يورينا هو"
انا بقى قلت "صحيح اكل وبحلقة"
ولقيت ماما بتشاورلى اقوم اجيب لها دواء الضغط طبعا عندها حق جالها هبوط من ثقالة الدم والنفخة الكدابة
بابا قالهم"الشقة فى مكان راقى وشيك اوى احنا منجبش لبنتنا حاجة وحشة.
ردت الهانم"طيب ايه رايكم بكره نعدى عليكم نروح نشوفها علشان بعد كده ننزل نشترى العفش
وجـــــــــــــــــــــاء الشلل التالى"اقصد اليوم التالى"
وخرجنا كلنا متجهين للشقة واول ما وصلنا كوكو باشا قال"يااااااااه الشقة بعيدة اوى انا كنت فاكرها قريبة الواحد هيروح الشغل من هنا ازاى؟
والهانم قالت"اه والله يا ابنى عندك حق المكان حلو بس بعيدة ولا اقولك اللى جاب الشقة ربنا يخليه ويجيب العربيه وضحكت"
طبعا كلنا اتنقطنا بس عدينها على سبيل الهزار مع انى لو من بابا كنت دوست عليهم بالعربية وخلصت منهم
كمان مش مكفيهم عروسة وشقة هدية وكمان عايزين العربية ده ايه الحلاوة اللى احنا فيها دى؟؟؟
دخلنا الشقة واول ما دخلت قالت"الشقة دى كام اوضة انا مش شايفة غير اوضتين؟؟
امال انا هنام فين ده يا دوبك اوضة ليهم واوضة للاطفال....دى مساحتها مش كبيرة اوى !!
وكوكو طبعا حبيب امه"اه صحيح انتم معملتوش حساب ماما ولا ايه ؟؟
ماما قالت بغيظ"ليه هى ماما ناوية تعيش معاكم ولا ايه؟؟ رد قال"لا يا طنط انا اقصدى لما تيجى تزورنا وتقعد عندنا كام يوم...ولا اقولك مش مشكلة ابقى انيمها فى اوضتى وانام انا بره دى ماماه !! وهى بقى "ربنا يخليك ليه يا قلب ماما"
انا طبعا لما سمعت كده كنت هخنقه واخلص منه وارتاح للابد .
عاملين تتامروا على اوضتين طيب ورونا انتم هتعملوا ايه !! قال يعنى من كتر عفشكم دا انتم كبيركم كنبة وكرسى وان جبتوهم يبقى كويس"
شوية وزادت فرستنا اكتر ما احنا مفروسين وقال"كمان المطبخ صغير شوية ولون الشقة مش اد كده ولا ايه يا ماما؟
ردت الهانم"فعلا معاك حق يا ابنى لونها مقفول كئيب شوية مش لون عرايسى كده" لالا لازم الالوان دى تتغير والسيراميك كمان وياريت لو تفتحوا بلكونة المطبخ على المطبخ علشان يوسع ولا ايه رايك يا كوكو؟؟
انا وماما بقى واقفين مستمعين فقط ومتنحين نشوف ايه اخرتها.
بابا قال"والله يا ستى اعملوا اللى انتم عايزينه دى شقتهم وهما احرار فيها"وقال على راى المثل... اطبخى يا جارية كلف يا سيدى"
راح الباشا كوكو حارق دمنا كلنا لدرجة اننا فعلا حسينا اننا هنولع"معقول يا اونكل دى شقتكم وانتم اعملوا فيها اللى انتم عايزينه احنا علينا نختار وانتم تنفذوا ولا ايه يا مامى؟
اوسة هانم ردت وقالت"يسلم بقك ياحبيبى هو ده الكلام الموزون"
طبعا بابا وماما بدون تعليق ووقعوا من طولهم وانا كنت عاملة حسابى محضرة دواء الضغط لماما ودواء السكر لبابا وكمان شحنه الموبيل علشان لو حصل تطورات اكلم الاسعاف!!
ولما شافوا اللى حصل لبابا وماما كوكو قال "ايه فى ايه هو انا قلت حاجة غلط؟الهانم قالت"وده معقول وانت تطلع منك العيبة تلاقيهم بس مرهقين من المشوار
وبصت وقالت لى "بقولك ايه يا حبيبتى متقوليلهم طالما تعبوا كده من المشوار يشوفولنا شقة تانية قريبة واكبر من دى ...اه احنا اصلنا خايقين عليهم ولا هما يعنى مش هيجوا يزوروا بنتهم؟؟ لا يا بنتى اقنعيهم احنا قلبنا عليهم .
وانا بقى جت لى حالة ذهول وكل اللى عملته انى ما اتكلمتش بس شاورت له يتكلم من على الموبيل ويطلب لنا عربية الاسعاف !!!
فرد وقال"يا ترى الاقى معاكى رصيد"!!




هناك 23 تعليقًا:

ياأبت...إني رأيت يقول...

مدونتك جميلة وروحها خفيفة وكمان اتركتف ع الأخر

الجواز و سنينه يقول...

يابنتى خديها كلمه حكمه
الواطى مش بيريح غير فى الجزم ( سورى للكلمه بس ده مثل كده و الله )
بس بجد تسلم اديكى

Ehab يقول...

ابوكي ده لقطه
ولوا حمايا الحمد لله عسل وبحبه جدا وبيعزني ويعاملني حلو قوي الحمد لله كنت استلفت ابوكي شويه بس الحمد لله

اما حكاية الشقه مش تخلوا عندكم رحمه بالواد الغلبان هيروح الشغل ازاي يعني انتي مش شايفه المواصلات عامله ازاي
وبعدين زعلانين ليه ان حماتك السكره هتقعد معاكي قد عشره خمستاشر سنه كده عادي يعني ولا تسيبك تستفردي بالواد الساذج وتسقيه حاجه وتضيعي التربيه اللي هي ربتهاله وتقلبيه راجل

انتوابقيتوا صعبين خالص
اخص عليكم

ومن مكاني هذا بقول لفوفو خطيبك
اللي يلاقي الدلع وميتدلعش يستاهل ضرب الجزم عيش يا ابني عيش

هههههههههههههههههه

سلااااااااااااااااااااااااااام

Gannah يقول...

ايه ده؟ دى حاجة تفرس
عرسان اخر زمن و ابوكى ده ما فيش منه
لو العرسان بالشكل ده يبقى بناقص الجواز خالص و خلينا كده فى التراوة احسن
دمك خفيف يا جنة جداااااااااا
تحياتى

المـــفـــــــقــــــــوعـــــة مــرارتـهــا يقول...

بصي ياجميل التاج انا جاوبت عليه قبل كدة في مدونتي التانية
ملحوقة المرة الجاية
تحياتي

الربان يقول...

تحياتي

كلام في سرك...انفدي بجلدك...و خيرها
في غيرها...هههههه.


تحياتي و تقديري

mostafa rayan يقول...

لو اللبي بتحكيه دة بجد يبقي فكك منه
انتي حد هايل قوي عروسة وشقة وعائلة محترمة
الرجالة الكويسين كتير

_**( قلب الأسد )**_ يقول...

ياريت نلاقى عروسة بالشقة فى الزمن الى احنا فيه دة
ممكن تلغى تأكيد الكلمة

_**( قلب الأسد )**_ يقول...

السلام عليكم ورحمة الله وبركاته
انا اقصد بإلغار كلمة التأكيد هى التى تظر عند التعليق على البوست
تجد مجموعة حروف لا بد ان يكتبها المعلق فى الخانة الى تحتها فإلغاء هذة الخاصية يعمل على كثرة التعليق
ويتم الالغاء من اعدادات التعليق والسلام

aya يقول...

يا نهار ابيض

انا هاموت

انا كده هجرالى حاجة

هو فيه ناس كده؟
يعنى هو فيه حد فى الدنيا معندوش احساس للدرجة ديه ؟

يا عينى عليكى يا بنتى

لا

يا عينى على والدك ووالدتك

ده الجوازة الغبرة ديه يا بنتى

ايه اللى رميكى على المر
واوعى تقولى اللى امر منه؟
هو فيه امر من كده؟؟؟

Unknown يقول...

بجد انتي عسل يا جنه البوست يجنن

ايه البرود ده مش معقوله هو فيراجل كده

ده مش بس بخيل و ابن امه ده يجيب شلل و تخلف عقلي و ضغط و سكر و حتي بلهارسيا

بس انتي مختفيه فين

تحياتي

غير معرف يقول...

هههههههههههههههههههههههه
ايه ده يابنتي بصي ده عاوز شويه
بنزين وعود كبريت واخلصي
ولا اقولك البزين غلي خساره فيه
بصي هو فعلا عنوان التوبك كويس لاهاعتبك
ولا الموك قليل الاصل من يومك

حاجات جوايا يقول...

انتى أكيد بتهزرى
صح
لو الكلام ده حقيقى اوووووووعى تتجوزيه
الراجل لازم يبقى راااااجل
مش شحاته وإمارة كمان
ده كان من باب أولى أصررررر على الرفض حتى لو تمثيل
اهو يبقى اسمه عنده كرامة
مش مصدق

على فكرة الموقف ده حصلى قبل كده
ومصدقوا بابا قالهم عندنا شقة
مامته كلمتنى وقالتلى والله باباكى ه راجل طيب وانا برضه كنت متوقعة منه كده
بصراحة .. قلبت عليهم الطرابيزة وفركشت الجوازة الخيخة دى
انا احب جوزى يبقى عنده كرامة مش ما يصدق يعتمد على أهل مراته

والحمد لله انا دلوقتى متزوجة .. وعندى محمد وساكنة مع زوجى مش مع اهلى

دمتى بخير أختى
سالى

كيكى عوووووو يقول...

هههههههههههههههههه
لا ملعوبة... ايةةةةةةةةةةة.العريس دة...مدونتك خفبفة ولطيفة

غير معرف يقول...

السلام عليكم

انا بجد متابعة من زمان وعندي سؤال ملح جدا جدا
هو انتي بتتكلمي جد ؟
انتي بتفكري ترتبطي بكدة بني ادم ؟
ليه بس يا بنتي ؟
و الله بجد مستغربة جدا جدا جدا
دا عايز دادة مش زوجة
غير انك هتشوفي الويل لانك كدة هتتجوزي امه مش هو يا حبيبتي

!!

بجد دا بيحصل ولا ايه ؟

Unknown يقول...

ازيك يا جنه عامله ايه
لو ممكن تتواصلي معايا عن طريق الميل

terter.e88@gmail.com

او سيبيلي الميل بتاعك ضروري لو سمحتي

تحياتي

سنووايت يقول...

هههههههههههههه
ظلماهم يا جنة , يعني طنط خايفة علي بابا وماماوكمان عايزة اودة علشان لما تيجي وتقيم عندكم ما تغتتش عليكي في اودتك
لا بجد تحفة

شاب نفسة يحقق حلمة يقول...

انا عاوز اعف بقي ايه اللي هيحصل بعد الجواز
كل ده واحنا لسه علي البر
امال لما نغوط شوية بقي
ههههههههههههههه
تحياتي ليكي

سبهللة يقول...

انتى عارفة لو ما فسختيش الخطوبة النيلة دى
انا هاخاصمك
بس ها
ولسانى مش هايخاطب لسانك تانى ابدا
يا بنتى انا اللى هايجيلى الضغط
حراااااااام عليكى
والمثل بيقول قعدة الخزانة ولا جوازة الندامة
وعقلك فى راسك تعرفى خلاص

سارة يقول...

ايه العسل ده هههههههههههه


طيب سؤال اي وحدة بتوافق على عريس علشان فيه مميزات ايه هى مميزات العريس ده ؟؟؟؟؟؟؟؟؟؟؟ بجد ايه هو اللي يشد ليه

Dr.Mohammed Gohary يقول...

أول مرة أزورك
وان شاء الله مش هنقطع الزيارات بتيتاً
خـــــــــــــــــالـــص
ان شاء الله

بالنوسبة للموضوع

فوق الفظيع بجد
تحت المريع أه والله

والله يا عمو انا هحطها جوه عينى"ده على اساس انى رمش"
ههههههههههههه جديدة دي
هههههههههههههههههههههههههههه

اللى جاب الشقة ربنا يخليه ويجيب العربيه
ههههههههه لا والنبي
يا حلاوه
ما بناقص دي جوازة
ماعندكوش عروسة كمان؟؟؟
ناس ما عندهاش دم

بقا لو اتجوز كدا وأهلك اللي جايبين ليه كل حاجة يحس ازاي انه راجل
دا حاجة تغيظ
وكمان ست الكوتكوته عايزه عربية ياخي ايه دا كنتي اديها بوكس في عينها اعمليلها عاهة مستديمة
ههههههههههههههههههههههه


هزورك تاااني اكيد

معلش الامتحانات

موضوع هايل ضحكت بجد

تحياتي
ومتاخديش في بالك
وخدي بالك من صحتك الشوجر ماشي في الزوغيرين اليومين دول
تحياااتي

fofo يقول...

اكيد دة هزار لانك لو صحيح قبلتى غريس كدة لا انتى ولا اهلك ناس عندكوا كرامة واكيد معيوبين

غير معرف يقول...

mac : اولا انتي مش عندك شجاعه لان لو عندك شجاعه كنتى ربيتي حماتك ومتخليههاش تعاملك كدة ،، بس بس منظرك وحش ومكنتش متوقع من صاحبه مدونه يحصلها كدة يا خساره عالتدوين وناس الدوين وكمان داقت بيكي الدنيا وملقتيش غير كوكو دة كوكو ده انا عارفو من ايام الاعدادى كانت مامتو اللى بتدخلو الفصل وكمان انا بشكر مامتك وبباكى على صبرهم وام كوكو دى ست كويسه بس مكانتش عاوزة المعامله دى ،، ثم انتى كل حاجه تقوليها فـ سرك اومال ازاى مدونـه ثم لما تحبي تتجوزى ابقي شوفيلك شاب استايل زى كدة دة انا اعجبك بحط جيل فـ شعرى وعندى حزام بتووكتين وشوفي الجي بقا
عندى بحر فـ اليكس وتلات اهرمات فـ الجيزه وعندى خيمه 3مطارحح وحمامين ومطبخ اميركاني ومش هركبكعربيات بقا والكلام الفارغ ده لا عندى فيل مرسيدس وجمل 182 بس الجمل بعتو مركز الصيانه فـ قريش عشان يصلح .
لو موافقه على الجواز كلميني عالرقم ده











01010101010 بعد الساعه 15 بتوقيت حلوان :ي

وشكرا للموضوع
mkrona10@yahoo.com
mac_@hotmail.fr