الاثنين، 12 مايو 2008

التــــــــــــــــــــــاج الملـــــــــــــــــكى


من موقعى هذا بتوجه بالشكر لصاحبة مدونة الجواز وسنينه التى اهدتنى التاج الملكى وده اجمل هدية اتهديت بها منذ دخولى عالم التدوين......المهم انى لازم اجاوب على الاسئلة
بسم الله نفتح ورقة الاسئلة ونبدا الاجابة................ من غير غش
السؤال الاول....اذكر عشر اشياء عن نفسك....والله هحاول على اد ما اقدر بس هو السؤال ده اجبارى؟؟
السؤال التانى...اختار خمس اشخاص تهدى لهم التاج....يوه كتير ما يتعدوش"ولا واحد يستاهلوا"
السؤال التالت...لا تهدى التاج لمن اهداه اليك....حاضر وهو انا عبيطة ادهوله تانى؟؟
هيا بنا نجاوب....احم احم يا ساتر هعرف نفسى كله يوســـــــــــــــــــــــــــــــــــع

  1. انسانة عادية بحب الرومانسية واكره الذل والعبودية ونفسى تتحقق لى اكتر من امنية"طماعة بقى"
  2. ذات شخصية مستقلة وراسى ناشفة وشوية عنيدية
  3. ملتزمة الى حد ما ومابلبسش مينى جيب ولا جلابية يعنى فى الوسطية
  4. احب الحياة واعشق الجنون وقلمى هو السلاح الوحيد اللى برفعه ادام جوزى
  5. بحب بابا وماما واخواتى مووووووووووت خاصة بعد ما عرفت قيمتهم بعد الجواز
  6. بحب ربنا ونبينا وبحاول على اد ما اقدر اكون عفيفة شريفة امينة
  7. ذات رقة متناهية ومشاعر حساسة وملموسة ودمعتى قريبة جدا نظرا لانها ساكنة قريب من عينى
  8. بحب جوزى جدا جدا جدا الى ما لا نهاية لدرجة الوفاه وما بصدق يخرج من البيت علشان يسيب لى النت حبة
  9. ذكيه وطموحة ونشيطة شعلة نشاط واحب عمايل البيت والمطبخ ما قولكوش تيجوا تحكموا بنفسكم
  10. متعاونة ومسالمة وصوتى ما بيطلعش بس لو طلعت فى شرى ما فيش ياما ارحمينى
السؤال التانى.....اهدى التاج لمين
اولا...لصحفية روشة صاحبة مدونة نميمة عالمصطبة
ثانيا...لصاحبة مدونة حماتى ملاك
ثالتا....لمسيو عبده صاحب مدونة عبده الرايق
رابعا....للشنكوتى الكبير صاحب مدونة شاب شنكوتى
خامسا...الدائخ صاحب مدونة فكرة وكيبورد وحبة تهيس
والله كان نفسى اهدى التاج لناس كتير جدااااااااااااااااااا بس اعمل ايه مش مسوح لى الا بخمسة

هناك 6 تعليقات:

واحدة مفروسة يقول...

كلنا بنستى اجوازتنا يخرجوا علشان نقعد على النت براحتنا هههههههه

بس تصدقى الاهل بيزيد تعلقنا بيهم بعد ما نتجوز فعلا ...لاننا بنبعد و بيوحشونا

تحياتى

DEW يقول...

ههههههههه
ونبي تقوليلي وتنصحيني اتجوز ولا لا
اصل انا عازب وبصراحة مقالاتك بتخليني الغي الفكرة خالص

الجواز و سنينه يقول...

اديكى اتعصرتى اهه يا جميل
و قريتى و اعترفتى باللى فيها
بس بجد ماشاء الله عليكى زى العسل
و فعلا كلنا بنستناهم يخرجوا بس انا عيالى مطهقنى من عارفه اقعد على النت منهم خالص
يلا ضريبه الامومه و بصبر نفسى و اقول الجنه تحت اقدام الامهات
ردودك زى السكر
على فكره ابقى حوشى التدقيق الاملائى

الشنكوتي الكبير يقول...

متشكرين يا جميل على التاج بس انا جالي من ناس كتير واولهم بنت خيخه وحاولت اجاوب عليه
ولو اني معرفتش اجاوب قوي عنه
اقولك هاجاوبه تاني هنا علشان خاطرك

1 ايهاب
2 خاطب وبحارب علشان اجوز في الغلاء الفزيييييييع ده
3 كنت زمان هادئ الطبع جدا
4 حاليا دماغي من كتر اللي شفته بقت مولعه دايما وعايز احقق حاجات كتير جدا
5 بحب المزز جدا جدا ومحدش يقولي انها كلمه رخمه
6 بحب التدوين جدا
بحب الالعاب البلاي ستيشن جدا جدا
7 بحب التصوير مع فاخر صاحبي
8 بعشق فكرة السفر
9 بعشق حاجه اسمها اسكندريه مع اني مش اسكندراني
10 خايف من ربنا قوي بس طمعان في رحمته قوي

سلاااااااااااااااااااام

صحفية روشة يقول...

ميرسى على التاج يا جنه
ومعلش ان امش متابعة اوى اليومين دول عشان الامتحانات
بس ميرسى اوى ليكى انك فكرانى هى دى الصحوبيه ولا بلاش
وانا شايفاكى بتقولى جوزى
انتى اتجوزتى
الف مبروك
انا داخله على جواز انا كمان اهو

الدائخ يقول...

و الله كان بودييا جنة
بس امتحانات و البال مش رايق
دا غير إننا عاملين انقطاع دلوقتي

بعد العودة حاجاوب، و لاتزعلي