الأربعاء، 16 يوليو 2008

تلاته عصير .............وصلحه


الواحد بقاله كام يوم مخستع وتعبان .....رجعت من الشغل عيانه وعندى شوية برد ماما اول ما شافتنى قالت" ايه ده وشك اصفر كده ليه زى الليمونه ....مالك ايه اللى جرالك؟؟

انا" يعنى هيكون ايه اللى جرالى من ساعة الخطوبة الهنيه وانا تعبانه ومستويه"...بس عندى شوية برد

"فى سر" منك لله يا كوكو.......... يا ابن ام قويق"

طيب يا ماما انا هادخل استريح شويه

شوية ولقيت ماما جت تصحينى"اصحى خطيبك بيتصل يطمئن عليكى"

انا" كده بردوا يا ماما حرام عليكى فزعتينى .....مش كفايه الكابوس اللى شفته فيه كمان اصحى على سيرته والله ده حرام"

ماما "بنت عيب ردى الراجل بيعمل الواجب"

المهم كلمته وقالى انه هايجى هو وتنت اوسة الننوسة واخدين بالكم من تنت دى اصلى بدلعها......علشان يزورونى ويطمئنوا انهم لسه ما خلصوش عليا.

وصلوا بالسلامة ومعاهم 3 علب عصير من ابو جنيه وربع طبعا الحاجة مش بقيمتهم زى ما انتم عارفين ..........وكتر الف خيرهم انهم اشتروا اصلا ده فى حد ذاته انجاز.

انا بقى كنت عيانه جدا وعماله اكح واعطس والبرد اشتد اوى....... اول ما دخلوا عليا الاوضه طبعا انا نايمة على السرير........ واول ما طنط دخلت راحت مشاورة بايدها من بعيد ولا اللى ايدها مقطوعة.

"سلامتك يا عروسة ابنى الف سلامة.....متاخذينيش مش هقدر اسلم عليكى ........اصلى بتعدى بسرعة والواحد مش ناقص"

انا" لا يا طنط وانا بردوا يرضينى اعديكى......بعد الشر عليكى" وفى سرى" قال بعد الشر قال "

كوكو جاى يسلم عليا...راحت مامته شدته من القميص وقالت له بشويش" من بعيد لحسن تتعدى يا حبيبى"

المهم انها حاسستنى انى عندى جرب"

قلت يلا هيصة بهيصة وعياء بعياء ......قعدت ابرق لها واهرش لحد ما رعبتها وما بقتش قاعدة على بعضها!

شوية راحت بصت وقالت لماما"وهى مين اللى عداها ....اكيد حد فى الشغل وتيجى تجبلكم انتم القرف"

ماما ردت" والله مش عارفة بس الموضوع مش مستاهل ده شوية انفلونزا"

طنط "لا بس خلى بالكم بردوا الواحد ما يضمنش احسن لها تقعد فى اوضة لوحدها وما حدش يدخل عليها"

انا فى سرى" الهى تتحبسى طول عمرك يا بعيدة فى اوضه ضلمة ومليانه فيران...ليه شايفانى عندى حصبه ولابسالك احمر"؟؟

كوكو بص لى بحنان واشفاق "سلامتك يا حبيبتى ان شاء الله اللى يكرهوكى يارب ميه مرة"

انا فى سرى" اخيرا فتحت بقك ومااااااااماااااااااات"ماااااااااااااااااااااااااء" وان شاء الله يارب اللى يكرهونى مليون مرة مش ميه بس بس يارب الدعوة تستجاب وانتم فاهمين قصدى بقى"

طنط" وبعدين معاك بلاش تقعدى مع حد عيان ........اه ولا انتى بقى ناوية بعد الجواز ترجعى كل يوم للواد عيانه......وضحكت "

لا احنا عايزين عروسة مفرفشة ومنعنشة"

انا فى سرى" اه......دى تلاقيها فى الموالد مش هنا حضرتك.....وبعدين انتى خايفة على حق الدواء اللى هيدفعوا ابنك مش كده ؟؟ اه من لئمك ومكرك يا ست انتى.....شوية شوية تقولى ......عايزة شهادة ضمان مدى الحياة"

شوية الباب خبط ماما بصت لكوكو"معلش يا حبيبى افتح الباب ده شكله حد من الصيدليه اصل بعت اجيبلها دواء"

كوكو ببجاحة"وحضرتك دفعتى حقه؟؟

ماما تنحت"لا افتح انت بس وانا هاديك الفلوس"

طنط"يا اختى بلا دواء بلا كلام فاضى......هاتلها بس انتى العصير اللى انا شاريهولها ده حلو اوى فواكه ومغذى"

فى سرى"الله الغنى عن عصايرك والله تلاقيكى بصالى فيه شكلك عايزة تمويتينى مش تخففينى"

انا"ماما لا انا مش عايزة عصير.....هاتى اى حاجة تانية"

طنط برقت كده واتامزت" يا اختى بلا دلع بنات ميرء.......هو العصير مش احسن من ابصر ايه ......الميلك كشك اللى بتشربيه علطول ده......ده انتى حتى علمتيلى الواد يشربه كل شوية يا اختى بلا كلام فارغ"
والله ما عارفة عاجبكم فيه ايه......حاجات كلها صناعى مش طبيعى"

انا فطست من الضحك انا وماما"ميلك كشك......يا لهوتى يا انا يا امه
شويه شويه هيبقى بصارة كمان ..وبدل ما نطلب مع الميلك شيك شاليموه هنطلب تقليه"

ايه الجهل والفضايح دى...اه لو كان سمعك عم ماكدونالدز......كان زمانه لم عزاله من البلد كلها ورحل"

كوكو" معلش يا حبيبتى ماما اصلها بتحبك وتخاف عليكى اوى"

انا" اه مفهوم .........ما هو باين اهو"

حبه وراحت بصت لماما" يا حاجة بنتك وشها اصفر........ قومى بس هات لها العصير اللى انا شارياه"
انا" والله ما ليش نفس شوية وابقى اشرب العصير اللى حضرتك شارياه .......وقعدت ااكد على كلمه شارياه لحسن تفضحنا....... وتقول نسبناه لنفسنا ولا حاجة"

شوية وجت واحدة جارتنا تزورنى لما عرفت انى تعبانه .......وجايبه معاها كارتونه تفاح وكارتونه عصير

الجارة" سلامتك يا حبيبتى الف الف سلامة.....والله زعلت لما عرفت من ماما انك عيانه وقلت لازم اجيلك"

انا " ربنا يخليكى لى يارب وما يحرمنيش منك"

طنط" اتامزت....... اه اعملى فيها تامر حسنى بقى......يلا يعنى ما سمعناش منك البقين الحلوين دول....ولا ناس ناس ...."

الجارة" ودى معقولة......... ده انتى الخير والبركة يا حاجة"

انا" شايفة الناس اللى عندها ذوق.....مش اللى معدومين منه خالص يا باى"

شوية راحت بصت لماما" يا حاجة هات لها العصير اللى انا اشترتهولى ........ايه انتى مكسلة ولا ايه"

وراحت بصه للجارة" اه اصلى والنبى لما عرفت انها عيانه قلت اشترلها عصير ياوتها شوية"

الجارة "كلك كرم يا حاجة وذوق ربنا يخليكى ليها"

الهانم شوية شوية .........كانت هتنزلها لنا فى الاخبار تحت عنوان جبنلها عصير علشان تبرطع زى الحمير!!

"فى سرى" ما تسكتى بقى ارحمينا والله اقوم اكبه كله على راسك وراس ابنك .........وارتاح .............شوية .........شوية تطالبينا بحقه 3 جنيه و75 قرش.

جارتنا بصت لماما" بقولك ايه انا جبتلها من العصير اللى بتحبه هات لها منه "

ماما "طيب تشربى عصير يا حاجة انتى وكوكو"

كوكو" ماشى يا طنط بس يا ريت ساقع ويكون فريش"

فى سرى " اصل الباشا كان فاكر نفسه عند فرغلى بتاع العصير"

طنط " اوكيه بس ساقع اوى وما يكونش مسكر وفى كوبايه"

فى سرى" عماله تتامرى على ايه على العصير ابو 3 جنيه!!

ماما " وانتى يا حبيبتى هاجيبلك معاهم"

انا " اوكيه يا ماما بس شوكولاته"

طنط "اشمعنا يا اختى هتشربى دلوقتى...ما هو من شوية ما كانش ليكى نفس .......اتفتحت يعنى دلوقتى"؟؟

اه يا طنط اصلها بتفتح كل يوم من 5 الى 6 .........وضحكت

المهم شربوا العصير وطنط فطت من مكانها وقالت" نستاذن احنا بقى علشان لسه هنزور بنت اختى ..........اصلها بعافيه حبتين"

ماما "لا سلامتها الف سلامة سلموا عليها"

كوكو بصى لى واتسهوك" سلامتك يا حبيبتى شدى حيلك....وانا هاطمئن عليكى كل يوم"

طنط من بعيد " سلامتك يا روحى ....هابقى اطمئن عليكى "

انا " الله يسلمكم ميرسى"

شوية وراحت طنط عطست راحت بصت لكوكو وقالت " شفت ادينى اتعديت ......مش قلتلك نبقى نيجى لما تخف اتفضل ادامى "

وراحت بصت لماما وقالت لها "بقولك ايه .... هى مش جاراتكم جابت لكم كرتونة عصير؟؟
ماما ردت" اه ليه فى حاجة؟؟
طنط" لا بس كنت بقول طالما عندكم كرتونة عصير ..... هاتى العصير اللى انا اشتريته........ نرجعه اصل خسارة كده هيبقى كتير........... ونبقى نجيبلها غيره المرة اللى جايه "

هناك 45 تعليقًا:

radwa يقول...

هييييه هيييييييه

اول تعليق

ههههههههههههههه والله انتى تحفه

وطنط حشريه دي اتحف ..تستاهل هى وابنها يتحطوا فى متحف ..ويتكتب تحتهم نبذه عنهم

بس حرام الناس مالهاش ذنب ضغطها يعلى
.......

شويه جد بقى

هو فى فعلا زى طنط حشريه دي وابنها؟؟

لا فظاع بجد ... ده لو فى حد زيهم كده فى الواقع ..ينقط البشر واحد واحد

ربنا يعافينا ويبعدنا عنهم

kochia يقول...

بصراحة حماتك لووز
انا لومنك كنت ظبطها .. بس الحماة ممكن يستحملوها عشان خاطر عيون ابنها
بس لما يبقي ابنها من غير عيون تستاهل يبقي فقع المرارة كدو ببلاش

ولا صح مش ببلاش
3 علب عصير من ابو جنيه وربع
عارفاه
ليا معاه ذكريات العصير ابو جنيه وربع ده

بالهنا والشفا

تحياتي

maha zein يقول...

مش فهمة ده بجد ده ولا ايه
يعني ده انتي مخطوبة فعلا
طيب لو صح انتي فعلا بتتكلمي جد عن الموقف
اعذريني انا مش فهمة حاجة
هو طبعا البوست جنان
ودمك خفيف لكن
هل صح ولا من وحي خيالك
خاصة انى قريت كذا واحد لقيت انهم بردو عن نفس الاشخاص
ارجو الافادة
اصلي مستغربة شوية
وحبة اطمن عملتي ايه في التمهيدي بتاعك
نجحتي
اصل نتيجتي لسة مطلعتش

فارس بلا جواد يقول...

السلام عليكم ورحمة الله وبركاته
اول زياره ليا
بس بصراحه مدونه دمها خفيف وحلوه بجد
تحياتى

عاشقة القمر يقول...

لا لا مش ممكن .. انا مش متخيله ان طنط دي فيه منها في الدنيا .. واللي مش متخيلاه اكتر اني يصادفني حظي ويسعدني زماني ويجمعني بواحده زيها .. يختييييييييييييي .. ربنا معاكي يابنتي

Princesa ... WHiSPeR يقول...

هههههههههه والله تحفة ودمك زى السكر

كلبوشستان يقول...

هو انتي اي مشكله تحصل تلصقيها في كوكو

طب الراجل ذنبه ايه

دا باين عليه بيحبك وغلبان ومستهوك على الاخر

دا حتى ما جابشي سيرة العصير

بقولك شوفي لي واحد عصير معاكي يكون فريش وفي كوبايه وملوش علاقه بالميلك كشك بتاعك

يلا فتك بعافيه

blue-wave يقول...

بجد ربنا يكرمك
انا فطست على نفسى من الضحك
وبعدين الست معاها حق
يعنى عندكوا كرتونة عصير هاتعملو ايه بالعلب اللى هيا جيباها؟
كتر خيرها انهما ماخدتش شويه من اللى جارتكم جابتهم كمان:))

ٍSOU يقول...

الف سلامة عليكة ..اجر و عافية ان شالله
قوليلى بجد..هو الكلام دة بجد ..الكلام اللىبيحصل مع حماتك و ابنها ؟؟
اصل لو كدة انتى اية اللى جبرك يابنتى .. الوضع صعب بصراحة ..يلا ربنا يهديى الكل يارب و يكملك بعقلك

كيكى عوووووو يقول...

عووووووووووووووووووووووووو انا جيت اتخديتى
...............................
اخيرررررررررررررررررررررررررا
ظهرتى
لولىىىىىىىىىىىىىىىىىىىىىىىىى
اولىىىىىىىىىىىىىىىىىىىىىىىى
عاملة اييييييييييييييييية واحشنىىىىىىىىىىىىىىىىىىى موووووووووووووووووت
اموااااااااااااااااااة
.........................
ههههههههههههههههههههههههههههههه
طب الصراحة الست عندها حق..هى اولة هى وكوكو بالعصيررررررررر تبيعوا ولا حاجة
ههههههههههههههههههههههه
عوووووووووووووووووووووو

بنت مصريه يقول...

انتى بتتكلمى جد
قالت لمامتك هاتى العصير اللى احنا جايبينه يا سنه سوخه ايه المنظر ده
هههههههههههههههههههه
دانتى ف ملك هههههه
تعالى زورينى

رئـــــيسـة حزب الأحلام يقول...

ههههههههههههههههه
ههههههههههههههه
لا تعليق
تحياتى لكى

M.a.r.y.o.o.o.m يقول...

المهم انها حاسستنى انى عندى جرب"
هههههههههههههههه
المهم بس انتي بتتكلمي جد خدت العصير اللي اشترتهولك دي بجد تحفه دي ست فظيعه اوي لو خدته بجد وربنا يكون في عونك منها

غير معرف يقول...

هههههههههههههههههههههههههه
هههههههههههههههه
والله موتينى من الضحك بس عايزة اعرف حاجة هو كلامك ده بجد وانتى فعلا مخطوبة لواحد امه عاملة كده طيب لو على امه محلولة لكن شكله هو كمان مش عاجبك طيب لية وافقتى عليه دى حياتك يا حبيبتى ولازم تكونى مرتاحة ومتقبلة الوضع والانسان اللى هيشاركك حياتك

معلش طولت عليكى

تحياتى

شهرزاد يقول...

ههههههه
المهم سلامتك الف سلامة..
وربنا يعينك على حماتك..

من اولها وكده .. هتعمل ايه بعد الجواز؟؟
هههههه.. دمك خفيف جدا
شكرا لزيارتك يا عروسة

تحياتي لك

maha zein يقول...

عروسة ننوسة
اذيك
انا قريت تعليقك عندي
بس الي لاحظته ان يظهر حصل خلط فى الموضوع
انا مدونتي الاساسية هي التانية الي اسمها انها الحياه
لكن مدونة اقلع همومك
هي مدونة جديدة عملتها كوسيلة لعمل الخير
فكرتها اني سايبة ميل معين للناس الي عندها مشكلة يكتبوها ويبعتوها وانا انشرها وكده
يعني مش انا صحبة القصة خالص
ارجو انك تزوريني في مدونتي الخاصة انها الحياه
تحياتي يا عروسة يا ننوسة وعقبالى اعرف نتيجتي بالنجاح انشاء الله في التمهيدي بتاعي بكرة

سفروتة يقول...

ههههههههههههههههههههههههههههههههههه

ههههههههههههههههههههههههههههههههههه

هههههههههههههههههههههههههههههههههه
مش ممكن انا بجد خلاااااااااااااااااااص

والله انتي ملكيش حل

بس هو ممكن سؤال صغنطط

هو فعلا الموضوع ده بجد يعني ...يعني انتي مخطوبة فعلا

ولا ايه النظاااام؟

تحياتي يا قمر

:)

maiosha يقول...

هههههههههههههههههه
بجد إنتى زى العسل .. لأ والله زى العسل

أنا لو منك أمسك فى العريس ده بإيدى وسنانى .. دى حماتك زى العسل أهى على الأقل هتفضلى تضحكى على طول

أنا بقى لو كنت منك كنت قولتلهم لأ انا عايزة العصير بتاع حماتى حبيبتى ولا كنت عمرى أرجعهولها أبدا

ههههههههههههههههه
بس بجد إنتى زى السكر

تحياتى

me يقول...

ههههههههههههه

يا بنتى اهم جم

الله يرحموا الرحوم خطيبى كان بيكلمنى فى التليفون و دمتم

يالا بخاطرهاااااا

انت شرباااااااات و الله

تشااااااااااووووووووو

me يقول...
أزال المؤلف هذا التعليق.
ahmed_k يقول...

ههههههههههههههه
الحكايه كلها كوووووم والسطر الأخير كوم لوحده
ايه خفت الدم دي يا عروسه
انا لو عروستي اللي لسه معرفهاش دمها خفيف كده كنت اتجوزتها علطول ههههه

ومتزعليش ليكي عندي 3 عصير ابو جنيه وربع بدل اللي خدتهم حماتك

إبن مصر يقول...

اولا الف سلامه عليكى وانشالله البطه السوده بتاعت الجيران اللى فى الدور الرابع
ايه الحكايه وانتى بتقولى مذكراتك على طول بيجى فى دماغى الفنانه احسان القلعاوى
وهى بتقول
يا حبيبى دودى
بس هنا كوكى ههههههههههههه
تحياتى على البوست الرائع
nageh

mohra يقول...

انا قريت المدونه كلها من اخرها لاولها؟( يعنى بالعكس)
تحففففففففففففه
دمك شربات يا عروسه لكن الكلام ده حقيقى؟؟؟؟
يعنى واضح ان شخصيته مش عجباكى و كمان ماديا مش مناسب طب مكمله ليه؟؟؟مش كفايه انه يكون امور يعنى!!!!
لو بتحبيه...فكرى كويس لو حقيقته زى ما بتحكى...و لو قابله مايصحش تسيحيله كده ...لو عشان الجواز و السلام مش هينفع...اما لو ده كله تأليف فانت جامده جدا يا بنتى

يا ريت تعرفينى بجد

ربنا يوفقك على كل حال

عروسة ننوسة يقول...

عروسة ننوسة
اولا لازم تعرفوا ان الكلام ده فعلا حصل حقيقى بس لواحدة صاحبتى مش انا خالص مع بعضى التخيلات منى ....لكن فعلا دى قصة حقيقية كمان اخف من اللى كان بيحصلها فى الواقع

shabfa2re يقول...

عطشتونى ههههههههه

رحيق الحياة يقول...

ههههههههههههه

بجد يا ننوسة ربنا يجازيك كل خير

ضحكت للحد معتش قادرة اكتب

بس برافو عليكي عايشتينا جو الحكاية كأني جزء منه

برافو عليكي

Unknown يقول...

ههههههههههههه
يا لهوي انا لو دي حماتي
اقوم اعضها وان شا ءالله اخد بعدها 21 حقنه مش مهم

El - Shandwely يقول...

ههههههههههههههههههه
قريت البوست ده بتاع تلات مرات لحد دلوقتى ومستمر فى كريزة ضحك مش راضيه تخلص .. دمك زى العسل

السهم المكسور يقول...

هههههههههههههههه
البوست رائع واسلوبه جميل جدا
واحب اقول لكي ان ده اللى بيحصل بجد

ويا ريت تبعتيلي كرتونة العصير علي الايميل عشان ماتفسدش هي كمان
وانا لو عندي حما زي دي كنت انتحرت

مدوناتك جميله وارغب لو توافقي علي تبادل الروابط معي

_**( قلب الأسد )**_ يقول...

هههههههههههههههههههههههههههههههه
ايه دة كله ايه دة كلة بصراحة مافيش زى كدة ابداُ
وانا عاوز اشوف كوكو لو ينفع اتعرف عليه
ههههههههههههههههههههههههههههه
دا انا كرهت اسمة من كلامك دة
هههههههههههههههههههههههههههههههههههههههههه
تقبلى تحياتى واستمرى فى ابداعك

nado يقول...

يابنتى هو انا اغيب اغيب وانتى لسه مع الاسمه كوكى ده شوفتى اهو جاب ليكى المرض هو امه اقصد ام اربعه واربعين سيبه وجوزك سيد سيده .... واحشتينى كتير وانا كنت الفتره الفاتت فى امتحانات ولسه ماخلصه بجد بوست جميل

M.a.r.y.o.o.o.m يقول...

انتي من ساعتها مكتبتيش حاجه خالص

wanna b a physician يقول...

هههههههههههههههههههههههههههههههههههههههههههههههههههههههههههههههههههههههههه
معنديش كلام تانى اصل يادوب احلق علبة عصير من اللى فى التلاجة

ادم المصرى يقول...

هههههههههههههههههه يستى معلش عشان خاطر حبيك بردو رضاه من رضاها ولا يهمك هيا كلها كام يوم وتسبلك الدنيا معلش استحمليها بقه ههههههههههههههههههههههه لئما بصى كل يوم اعمللها ايس كريم كدا من الحر بدل مطلع حرها عليكى انتى حولى تشغليها بى اى حاجه

nody يقول...

ههههههههههههههههههه
دى اول زياره لىه لمدونتك
بس بجد دمك خفيف
كريمه اوى حماتك
تحياتى

ليكوريكا يقول...

اموووووت واعرف هيا صابره عليهم ليه

ولا اقولك ربنا يصبرها عشان نقرا كل مره حاجه جميله زي دي

تحياااتي

ليكوريكا :)

نونو يقول...

حسبى الله ونعم الوكيل
فية اية يا بنتى
هى مالها معاكى كل بوست تحب فيييكى اكتر من اللى قبلة
ربك اللى بيستر السؤال بقى
مامتك ادتها العصير ولا لأ
أوعى تكون ادتهولها
هضايق كتتتير

ساعد نسرين الايمن يقول...

مليك كشك
هههههههههههههههههههههههه
انا ضحكت اوي عليه
في حد ميعرفيش ينطقها
اسمها مليك وشك
ربنا يكون في عونك
فكرتني باللي حصلي ف الاجازة
اه ابقي اقريئها يمكن تفيدك

Mafrousa يقول...

ههههههههههههههههههه
انا قريت البوست و اتفرست كالعاده...ماهو انا كل لما ادخلك دلوقتى بتفرس
و كنت حكتبلك كلمتين زي التعليق اللي فااااات
و بعدين و انا نازله...لاقيتك كاتبه انه مش انتي
هديت و الفرسه راحت
و قلت الحمد لله سمعت كلامي و ادت سي كوكو بتاعها لصاحبتها تشربه
هههههههههههههههههههههههههههههه

RASHA يقول...

بوست لطيف ومدونة جميلة اول زيارة وحتكرر على طول

الريم يقول...

والهى دمك شربات ومدونتك زى السكر واجمل شئ الميلك كشك ده جامد ديه اوى

Unknown يقول...

الحمد لله إني مريت علي كل التعليقات ووجدت تعقيبك علي القصة .. و قلت لنفسي : صح كدة مش معقول الرومانسية كلها و الأحاسيس العالية جداا اللي قريتها في خواطر و شجون ، مش معقول تتوافق مع اللي بيتكتب هنا لأن واحدة رومانسية رقيقة زيك ايه اللي يجبرها ترتبط بواحد زي كوكو
عموما انتي اسلوبك جنان و عندك حبكة قصصية رائعة فعلا بتخليني اعيش الجو مع أبطال القصة
أنا لو عندي وقت كنت قرأت كل مواضيعك بس كل يوم هادخل علي النت لازم هاقرأ واحدة علي الأقل
أنا سعيد جدا بما تكتبيه و موفقة دائما و إلي الأمام و علي فكرة أنا باشتغل في دار نشر و توزيع و لو تقدري تجمعي كل اللي بتكتبيه في كتاب ، أعتقد هايبقي له صدي طيب ان شاء الله بس إوعي تنشريه برة .. إحنا أولي من غيرنا
لك دائما تحياتي

ساندى يقول...

طب انتى ايه اللى جابرك على طنط نيله ديه اللى عاوز يولع فيها وابنها الحيله يابنتى ده لاها جواز احسن والا انتى غاويه فقع مراره وعندى سؤال هو ده مواقف ليكى فعلا والا حكايات من تأليفك ؟ ياريت نعرف عشان لو من تأليفك فبجد اسلوبك حلو ومضحك ولو بجد يبقى لازم يابنتى تكشفى عن نفسك والا انتى عاوزه تموتى شهيده بفقع المراره والا تموتى على ايد عشماوى بعد ما تولعى فى طنط وكوكو ننوس عين امه ؟

ساندى يقول...

طب انتى ايه اللى جابرك على طنط نيله ديه اللى عاوز يولع فيها وابنها الحيله يابنتى ده لاها جواز احسن والا انتى غاويه فقع مراره وعندى سؤال هو ده مواقف ليكى فعلا والا حكايات من تأليفك ؟ ياريت نعرف عشان لو من تأليفك فبجد اسلوبك حلو ومضحك ولو بجد يبقى لازم يابنتى تكشفى عن نفسك والا انتى عاوزه تموتى شهيده بفقع المراره والا تموتى على ايد عشماوى بعد ما تولعى فى طنط وكوكو ننوس عين امه ؟

model يقول...

دي حماة .. يعنهي عايزة اقول الفاظ خارجة و مستحرمة
اييه ده
ارحمي نفسك و فلسعي من دي اشكال
صعب اوي يا عروسة تبهدلي نفسك مع الكائنات دي
بخل و قلة ادب وبعد كده هيتحول لاستناف مادي
ما الابيحة ست جيرانها و بتفررض اتاوات عليهم عشان ترحمهم من لسانها اللاذع

موديل المحروق دمها