السبت، 1 مارس 2008

زفــــــــــــــــــــــــــه.....وكوســــــــــــه....ومعــــــــــــــــازيم




النهاردة بقى اقدر اصوت واقول باعلى حسى….يا لهوتى يا لهوتى جه يوم فرحى انا وبلوتى
وطبعا مفهوم مين هو بلوتى (واللى هيستغبى ميسألنيش).

المهم حجزنا الفرح طبعا فى فندق ... اه ما احنا مشينا كلمتنا بس على حسابنا

طبعا وماما وبابا نبهوا على الافندى سى كوكو انه ميعزمش ناس كتير يعنى علشان العدد.

قامت الست هانم حماتى قالت وهي بتشهق

"لا ودى معقولة دا احنا مش هنعزم حد خالص احنا كل اللى هيجى من طرفنا خلاته وخلانه وعمامه بس لا جيران ولا اصحاب ولا كلام من ده يعنى متخافوش الحكاية هتبقى ملمومة اه ودى تيجى بردوا هو احنا مدخلناش فنادق قبل كده ولا ايه؟"

انا بقى بصراحة كنت شاكه فى الاخرانية.

المهم احنا نبهنا وعملنا اللى علينا وتمام التمام ....

وجه اليوم المنتظر المفروض انه منتظر

جه يوم الفرح يا سلام سلم الشقة كانت هتتكلم بصيت لقيت حماتى ومعاها كوكو وارطة ناس لمة وهيصه وناس ملهاش اول من اخر وعمالة تزغرط ... بصراحة انا قلت البداية مش مشجعة بعد ما شفت كل الناس دى قلت وماله

فرح شوارعيكو اهو كان هيلميكو.

كل دول كانوا طالعين يقبضوا على "
اقصد يزفونى"

ماما بصت لى كده وكان فى نفسها حاجة عايزة تقولها انا عرفتها

"احنا مش اشكال فنادق بالمنظر ده"

وبعدين غمزت لى وقالت براحة "يا خوفى "

انا قلتلها قلبى حاسس ان اللى انتى خايفة منه هيحصل هيحصل

والست حماتى كانت ايه ولا مارلين مونرو شياكة ايه وميكب ايه اخر حلاوة.

حماتى بقى نادت على كوكو اللى كان مستنى بره وقالت له
كوكو تعالى يا حبيبى علشان تاخد عروستك.... تعالى شوف جمالنا وبصيت لى......" ايه الحلاوة والجمال ده يا عروستنا اللهم صلى على النبى قمر يا اخواتى قمر ... بس كان نفسى تزودى الاحمر والاخضر شوية يلا
مش مهم خليها فى الليلة الكبيرة

بس ايه انا كنت هاموت منها اصلها كانت عايزانى ابقى زى عروسة المولد!
الافندى بقى جه وخدنى وانا ايه وشى احمر ومكسوفة موت
وهقع من فستانى طبعا ما انا عروسة وكل العرايس بيبقوا كده....لاقيته بقى متشيك على الاخر..... كان نفسى اقوله "ايه النضافة دى اخيرا طلعت اللى تحت البلاطة"

اصلى بصراحة كنت خايفة يكسفنى ادام الناس والاقى بدلة كده ولا قميص لونه فوحلؤى بس الحمد لله كان متناسق.
واول مرة يغازلنى ويقولى...
ايه الجمال ده بصراحة فرحت اوى مش علشان غازلنى لا علشان اول مرة ميقولشاتكلمى انتى يا ماما... والله كنت عاملة حسابى انى هحط ايدى فى ايد مامته وانها اللى هتقعد جنبى فى الكوشة لكن الحمد لله المرة ادى طلعت "اوت".

وزفونا ارطة المعازيم لحد باب الفندق وهناك لقيت ناس لا ليها اول من اخر اللى تسلم واللى تبوس واللى تطبطب واللى تلزق جنبى ماكنتش قادرة اتنفس سحبوا كل الاوكسجين وانا كنت مركزة مع ماما اللى كان هيغمى عليها لما لقيتهم عازمين الشارع كله اه مهى الحكاية كانت ببلاش

وابو بلاش كتر منه

قعدت فى الكوشة بعد تفكير عميق اقعد ولا اروح...وقلت يارب عدى الليلة دى على خير دى ليلة واحدة فى العمر وانا من ساعة ما شفت الجدع ده معدتش عليا ليلة حلوة يارب اكرم.

وشوية.... قعد يكلمنى ويغازلنى وهو مكسوف وعينه رايحة جاية على مامته قلت حتى فى الفرح امال لما نتجوز هتعمل ايه هناخدها تعيش معانا.

وحبتين ولقيت طنط حماتى مش عايزة تسيبنى يلا قومى ارقصى يلا تعالى وعايزانى ايه مرقصش اى رقص ... مش عاجبها رقصى وعمالة تمسكنى عايزانى ارقص رقصة "عجين الفلاحة "طبعا عارفينها.

وانا عمالة اقول تعبت ايه يا ست انتي ... انتى مبتهمديش ... اتهدى شوية ... ايه ما بتتعبيش

دى كانت ولا الخيل هدت الدنيا هد وهدتنى معاها والفرح كان ايه على راى الباشمهندس عدوية

"زحمة يا دنيا زحمة".

الغريبة بقى انى حسيت انى فقدت البصر من كتر الزحمة مبقتش شايفة حد اى حد لا ماما ولا بابا ولا قرايبى قلت تقريبا "غزو التتار ده قعد عليهم "

شوية وناس تيجى حبة وناس تسلم ولا فيلم عماد حمدى وتحية كاريوكا "ام العروسة".

واسال خطيبى ...يابنى مين اللى هناك دى؟؟ يضحك ويقول معرفش

طيب مين اللى سلمت عليا بحرارة دى ؟؟ يقول لا مش واخد بالي

طيب مين اللى هناك ده ابو شنب يقف عليه الصقر ؟؟ يقول اسالى ماما

حبيتن وجت واحدة هرتنى بوس واحضان وكمان شيلتلها العيال اصلها كانت عايزة تتصور مع العريس اقوله مين الهانم يقول اه دى بقى اخت جوز بنت عمة ماما

اه اصله كان عازم السلاله كلها بتاعة العيلة.

اقول فى عقل بالى" مش هتعزموا حد ها الحكاية هتبقى ملمومة انا قلت انتم ما تستروش ابدا "

على كده كان لازم الفرح نعملوا فى الاستاد وبردوا ما كنش هيكفيكم!

شوية وفتح البوفية ويا ريته ما فتح يا ريته كان "هاى تى "ولا" سندوتش جبنة رومى "

على الاقل كل واحد كان خد له سندوتش وروح ....!

مش هقدر اوصف اللى حصل كان لازم تيجوا علشان تصوروا بنفسكم

واحنا بنوزع المعونة لمجاعة افريقيا!

وشوية ولبست الشبكة الحمد لله حماتى جابتها معاها اصلى كنت خايفة لتخليها عندها ليوم الدخلة المصيبة بقى ان بلوتى خلى كارثتى تلبسنى شبكتى يا دى النيلة اخرس ورضينا كمان اكتع يلا..... وعديتها اهى ليلة.

شوية واشتغل الدى جى بعد ما طنط راحت وشوشته فى ودنه
يشغل اغانى من اياها قلت يا خوفى يا بدران... اكيد اغانى على وزن "البت الحلوة الفلاحة""ولا ادحرج واجرى يا رومان".

قعدت اخمن لحد ما شغل اغنية" اركب الحنطور" وخلافه وحماتى ايه هايصة واديلو ايدى
وهى تتحايل عليا ارقص والمشكلة انى مش لاقية اصلا مكان احط رجلى علشان اقف!

امة لا اله الا الله حواليه ... لحد ما جه ميعاد انتهاء الفرح.....
"
ان .......ان ......ان ......ديج"

وهاتك يا بوس من دى وحضن من دى وصورة مع دى وقرصة رجل من دى لغاية ما حسيت انى خلاص هفقد الوعى بس حمدت ربنا انها عدت على خير وماخرجناش منها بخساير.

وادور على بابا وماما واخواتى مش لاقياهم ماشفتهمش خالص طول الفرح قلت لنفسى"
تلاقيهم كانوا معزومين علىالفرح اللى فى القاعة اللى جنبنا بصراحة اصلهم غطسوا وهربوا من الفرح " بالبلدى على راى حماتى قالوا يا فكيك!
وبعدين لقينا "مارلين مونرو" حماتى واقفة على راسنا اقصد وراءنا عايزة تتصور وتقعد على حجركوكو وشوية قعدت وهاتك يا بوس فيه فرحانة اوى ما هو فرح وهاصت .

لكن المفــــــــاجأة.......

انها بصت لنا وقالت لنا ....( يا ولاد هو مش فاض مننا اكل وبقية التورتة؟؟ اللى فضلم من البوفيه يعنى مش شايفة حد جابهم لنا !!

اه امال ايه مش فلوس دافعينها دى ولا ايه ؟؟

شوية ابص يمين الاقى ولاد خالاته بيقطعوا البلالين بتاعة الكوشة ياخدوها

وابص شمال الاقى ولاد خيلانه بيقطفوا الورد من الكوشة

شكلهم كانوا هيروحوا بيه عيد ميلاد

ولا هيطلعوا على حد الارافه!



"والله يسامحـــــــــــــــــــــــــــــــــك يلى فى بـــــــــــــالى"

هناك 28 تعليقًا:

Soooo يقول...

ده انتي طلعتي حواااااااااااااااار

-----
شدتني قوي كلمة (حماتي سابقا).. اللي زي دي عمرها ماهتكون حماه حاليه


متابع القصه


سلاموووووووووووز

احساس لسه حى يقول...

عزيزتى

بصراحة اسلوبك ساخر جدا

انتى جيبة خفت الدم دى منين قولى

انا مكنتش عارف انك بتنزلى بوستاتك كلها ورا بعضها كده

بس انا قريت كله من اول ما اتقدموا لحد الطوبة بتاعتك اقصد الخطوبة بتاعتك

دى مفيش اى لحظة رومانسية بينى وبينه خالص

ايه مفيش كلمة بحبك بينكم هحبك ابتديت احبك اى كلمة حب

الواد اه خجول بس بااااااااااااارد

الواد اه مؤدب بس بخييييييييييييل

الولداه متعاون بس هيطلع عينك

ايه يا بنتى الصبر ده كله ده صبر ايوب

امتا هتنفجرى بقه فيهم وتقولى كفااااااااااااااااااااااية

هتستنى 25سنة ولا اية لما تجيبوا جمال

ربنا يعينك اتمنا تقومى بثورة بقه البوست الجاى

تحياتى على اسلوبك الرائع

قوليلى صحيح انتى مدخلتيش البلوج التانى ليه بتاعى خشيه

بس بلاش سخريه ربنا يخليكى

سلام

نفرتيتي يقول...

ايه ده كله يا قلبك يا بنتي كتر خيرك بس علي فكرك في ناس كتير زي كده صوابع ايديك مش واحدة بس الخحمد لله ان ربنا كرمك من كوكو وام كوكو
اما طريقتك في كتابة القصة بيدل علي انك محترفة في السرد وده واضح برده منخفة دمك اللذيذة في البوست مش تتاخر علينا في البوست الفرقعة

3abdo me7tas يقول...

ههههههههههههههههههههههه
هههههههههههههههههههههههه
هههههههههههههههههههه
اهو انا قريت البوست كله ومضحكتش
بس جملة واحده بس اللى قعدت موت على الضحك منها وهى آخر جمله اللى بتقول
اننا انسحبنا بشويش من الفرح وعملنا نفسنا من المعازيم
عملنا نفسنا من المعازييم
هههههههههههههههههههههههههه
هههههههههههههههههههههههههه
مش قادر بجد اتكلم
والله يا بنتى لو ده كانت حقيقة يبقى
البقاء لله ولا عزاء للسيدات
أشوفك بعدين بقى
ربنا يكرمك بإبن الحلال
بس يكون راجل مش زى العريس ده
ربنا يكرمك يا رب

غمض عينيك يقول...

يااااااااه
تعبتيني ضحك
ايه دا فرح ولا فيلم كوميدي
ومين عم كوكو دا ولا مامته جرندايزر
اسلوبك حلو مووت وطريقة سردك تحفة وشكل دماغك عالية اخر حاجةاصلا

محمد سمير

صوت من مصر يقول...

الف 100000000.0 مبروك
هههههههههههههههههههههههههههههه

3abdo me7tas يقول...

ازيك

أنا حر يقول...

انت محتاجة فرقة كوماندوز تنقذك من الجوازة العبقرية دي .... ايه يابنتي اللي غصبك على الجوازة اللي مش باين ليها الوان دي
اهربي دلوقتي احسن ما تتورطي أكتر من كده وقتها حماتك مش هترحمك ابدا
اسلوبك حلو قوي
تحياتي

rommantic يقول...

عملنا نفسنا من المعازيم
ازاى
دمك خفيف جدا
ودى اول مره ازور البوست عندك وان شاء الله مش الاخيره
سلام

عبدالرحمن كمال يقول...
أزال المؤلف هذا التعليق.
عبدالرحمن كمال يقول...

المؤثر في البوست يا جماعة إنها كانت تجربة حقيقة ليها مش قطعة أدبية مكتوبة بعناية ومزخرفة لفظيا ، الحلو في الموضوع أنه شيء عادي وطبيعي بيحصل بس جنة صاغته بطريقة ساخرة لذيذة ، بس أنا متأكد إن الراجل العبيط ده مش جوزك دلوقتي صح ؟ وإلا مكنتيش تقعدي تشتمي فيه كده وحتى لو لسة مرتبطm بيه أحب أقولك ألف مبروك :)))) و سلميلي على حماتك ، عبدالرحمن كمال

3abdo me7tas يقول...

ايه هو مفيش أخبار عن اى حاجه بعد الفرح ولا ايه
ولا قامت جهه من حقوق الإنسان بإغتيال العريس وأمه
إزيك ؟

MKSARAT - SAYED SAAD يقول...

بصراحة
موقف يكسف بصراحة
بس على رأي سو انتى طلعتى حكاية
تحياتي

Unknown يقول...

مش تعزموني
:(

Unknown يقول...

ههههههههههه ايه ده معزمتنشي علي الفرح ليه اشمعني انا يعني

سلامي لحماتك سابقآ

عبدالرحمن كمال يقول...

دا انا فكرتك انتي المعذبة في الأرض بقى وده حياتك المتنيلة بس الحمد لله انه طلع واحدة صاحبتك والحمد لله إن فيه خيال :))) بس بصي في حاجة لازم انبه عليها ، في البلوج بتاعتي تهيسه هي مش بتاعتي ولا حاجة دا إحنا 6 طلبة من طب إسكندرية بنكتب فيها أنا إسمي المهيس الأكبر ,وأسمي الحقيقي عبدالرحمن وأنا اللي بكتب مقال عوادم اليومي عشان انتي لما رديتي بتعليق كان على قصة صديقي (الدائخ ) هو اللي كاتبها ، خدي بالك كويس والنبي انا مش ناقص إكتئاب :)))

كلية السياحة والفنادق يقول...

إسلوبك جميل وساخر
شر البلية ما يضحك
تحياتى لقلمك المنفرد

كلية السياحة والفنادق يقول...

بوست جميل وإسلوبك رائع هاهاهاها
تحياتى لك

ღϠ₡ღأمير الهدوءღϠ₡ღ يقول...

ههههههههههههههه

تنفع سيناريو فلم
او مسلسل

هههههههههههه

NilE_QueeN يقول...

ايه الجوازه اللى مش عايزه تتم دى

منتظره نهاية الحدوته

almasry يقول...

كنت طمعان أحضر الفرح....... ويارب كل البنات تتجوز.. بس ازاى هيتجوزوا واحنا مقلعين عن الجواز؟

تحيــــاتى
المصرى

سنووايت يقول...

هههههههه
المهم عملوا ايه بباقي التورتة!!

Desert cat يقول...

انا قريت المدونة بتاعتك كلها يا جنا
ده انتى ليكى الجنة يا بنتى
متابعة ان شاء الله
فى انتظار الباقى

كلاكيت تانى وتانى يقول...

قوليلى انتى كل يوم تنخطبى ولا كل دى احلام لو حقيقة فعلا ليكى الجنة ع رأأي قطة الصحراء تحياتى

momken يقول...

ههههههههههههههه
والله انتى سكر
ودمك زى العسل

ايه التلزيق ده

هموت من الضحك
تسلم ايدك
تحياتى

سندباد يقول...

اقول مبروك

د/اجدع بنوته يقول...

ياخراشىىىىىى

هو ف كده

انا لو مكانك كنت اتشليييييييييت

ربنا يلهمك الصبر والسلوان

هههههههههه

Asmaa mahaba يقول...

هههههههههه طيب وايه اللى جابرك يا بنتى ما تعنسى معانا وخلاص ولا هو وجع قلب
تحياتى ليكى سومه_87