الثلاثاء، 11 مارس 2008

رحــــــــــــــــــلة الى دميــــــــــــــــــــــطه



العريس باشا وصل وكلنا كنا فى انتظاره المفروض اننا هنخرج بقى نتفرج على العفش والذى منه فات شهرين ومعملناش اى حاجة ولما وصل.......
ماما سألته عملت ايه فى موضوع الشقة يارب يكون فى اخبار حلوة قامت الست حماتى مارلين مونرو ردت نيابه عنه كالعادة....ان شاء الله
خير متقلقوش راح بابا بص لها وقال ايوا يعنى وصلت لغاية فين يا ابنى عايزين نعرف.... الباشا بقى بص لمارلين مونرو وغمزها قال يعنى ترد هى اصله اظاهر فى اليوم ده كانت مامته ماكله سد الحنك...المهم ضحكت ضحكة صفراء وقالت والله يا جماعة احنا موصين ناس تدور ولسه مردوش علينا ماما بصراحة جالها ذهول وقالت ايه يا ابنى وانت ليه متدورش هما الناس هما اللى هيعيشوا فيها؟؟
ضحك وقال" لماما معلش يا طنط اصلى مقدرش ادور اليومين دول ...ماما قالت ليه يا حبيبى هو فى حاجة ولا الماديات يعنى راح قال حاجة نزلت علينا ولا القنبلة الذرية"معلش يا طنط اصل الجو حر اوى وانا مش بخرج فى الحر لو حضرتك عايزانى انا اللى ادور ممكن ناجلها للشتاء" انا قلت فى سرى....يا نهار ابوك اسود ده احنا لسه فى اول الصيف الهى ما يجى عليك شتا يا كوكو يا ابن ام كوكو"
ومامته تبص لماما وتقول.... معلش يا حاجة اصله بصراحة مش بيحب الخروج فى الصيف ابنى وانا عارفه الحر بيفرهضه وادينا موصين ناس ومدينهم المواصفات اللى احنا عايزنها اصله يا حبيبى مبيطقش الحر"حبيب عين امه طالع زى بالظبط ماما قالت... لها وهى متنرفزة "ازاى يعنى امال بيروح شغله ازاى بيروح فى الشتاء بس معقول كده اللى انتم بتقوله ده يا جماعة؟ راحت الست مارلين مشوشرة على الموضوع وقالت..... مش يلا بنا بقى علشان نلحق المحلات ونتفرج على العفش من بدرى.انا بقى قلت طيب العفش ايه لزمته طالما مفيش شقة والا اظاهر اننا كنا هنحطه فى اوضة البواب لغاية ما نجيب الشقة....وبعدين ماما قالت ماشى نشوف نزلنا كلنا وطبعا معانا الست هانم ده طبعا علشان تغير الكفولة للبيه اصله زى العيال الصغيرين مبيعملش حاجة من غير ماما.
المهم ماما قالت نشوف فى مدينة نصر احنا نعرف كام معرض كده كويسين وحاجتهم شيك اوى راحت مارلين مونرو اتخضت وكشت كده ....ولا اللى دلانا على راسها حلة مولوخية وقالت بصوت ضفدعى مسرسع هو انت عايز تتفرج فى مدينة نصر يا كوكو؟ راح طبعا رد الاجابة المتوقعة اللى تشوفيه يا ماما المهم راحتك زى ما انتى عايزه مش حضرتك اللى هتختارى على ذوقك؟ انا بقى اللى المرة دى اتفزعت وقلت"يا حلاوة يا ولاد هى اللى هتختار امال انا لزمتى ايه فى القاعدة فردة جزمة"!
بصينا لبعض انا وماما وشوية كنا هنستاذن ونمشى بصراحة اتعلينا...مش انا قلتلكم قبل كده يادى الهنا يا دى الهنا الست دى هتشلنا"
المهم عدناها وماما قالت مش يلا بقى؟ راحت قالت لماما احنا يا حبيبتى مش هنشترى عفش كل يوم وعفش مدينة نصر والحاجات دى مش مضمونة كلها شكل بس وسنة وتبوظ اه اسالينى انا علينا وعلى دمياط كل اللى عايزينه هنلقيه هناك دى عيلتنا كلها مبتشتريش الا من دمياط قال مدينة نصر قال وهو العفش يبقى عفش الا من دمياط"؟
وراحت بص لى وقال يعنىبتقنعنى.....تعرفى انا عفشى كله من هناك اه هو ده الكلام اوض نوم خشب زان حاجة تعيش معاكى العمر كله تعرفوا انا هوديكم كام محل كده اعرفهم وهتدعولى" طبعا وشوية شوية هنروح بور سعيد نشترى فستان الفرح من هناك امال اظاهر انهم بيجيبوا كل حاجة من بلدها! انا بصراحة قلت انا عن نفسى هدعى عليكى وعلى ابنك وعلى اللى كانت السبب فى الجوازة دى وبعدين ممكن اقتل نفسى بعدها!
الباشا كوكو راح سمع كلام مامته وحاطط ايده فى ايدها وقال.... والله يا جماعة تعالوا نتفرج مش هتخسروا حاجة ده ذوق ماما هايل واهو الواحد يجيب حاجة تعيش علشان منفكرش نجيب تانى دى حاجة العمر ...انا بصيت له وقلت ربنا يقصف عمرك .
قال تعيش العمر كله قال وكأنه ضامن
انه هيعمر معايا بالشكل ده انا وراءك والزمن طويل يا كوكو ولقينا ما باليد حيلة قلنا هيا بنا الى دمياط. .
وصلنا والحمد لله
بعد حوالى 4 ساعات الى* دمياط الشقيقة *....
وماما طبعا
مش عاجبها وعمالة تنفخ ومتنرفذة وشوية وهتولع فى نفسها وربما فكرت تروح راس البر ترمى نفسها فى البحر ارحم من العذاب والقرف اللى كنا فيه...المهم قعدت تلففنا يمين وشمال ومحل هنا ومحل هناك واذا عجبتنى حاجة تاخد كوكو على جنب وتغمزله
وشوية خدتنا المعرض اللى اشترت منه
وهى عروسة حاجة ايه من قديم الازل تنفع تتحط فى الانتخانة.
وشوية وتقولى شايفة العفش حاجة ايه ابهة اختارى انتى ومالكيش دعوة...وحبة مش مديانى فرصة اتفرج انا وماما كل شوية تقول الله ايه رايكم فى دى وحبة الله تعالى ايه رايك فى دى ... وتنادى على صاحب المعرض بكام دى ولما تسمع السعر تتخض وتقول ياه معقول انتم مالكم بقيتم غالين كده دا انتم اسعاركم كانت رخيصة وتحكى لصاحب المعرض حكايتها وانها اشترت عفشها كله من دمياط بألف جنية" وطبعا انا مش هعلق علشان الالف جنية ده اللى من زمان ما كنتش على ايامى فخاف اظلمها ممكن فى الوقت ده كانت تشترى عفش وشقة وعربية الله واعلم....المهم انى حاسيت انها هى اللى بتتجوز وبتختار عفشها مش انا وانا وماما كنا متفرجين فقط..... وفضلنا ندخل هنا وهنا من معرض لمعرض لحد ما رجلينا ماتت وكنا عايزين رجلين بلاستيك تقريبا لففتنا كل معارض دمياط وكانت بتحكى فى كل معرض حكايتها وحكايه عفشها لما حسستنا انه عفش محطوط فى القصر الملكى!
واخيرا دخلنا معرض وعجبنى فيه حاجات قلت"
يلى بقى اهو نخرج من البلد دى بحاجة ونبقى عملنا بالمشوار الطويل ده وكمان هى قالت لى شاورى وانا اجيب لك ...المهم قلتلها على فكرة يا طنط انا عاجبانى اوضة النوم دى قالت وماله يا روحى نشوفها ولما سألت صاحب المعرض لقيناها بتقرب منا وتقول" لالا تصدقى دى خشبها اى كلام ومش حلو خالص اقلكم انا مش شايفة حاجة عدلة فى البلد دى....ايه رايكم لو نرجع نشوف فى مدينة نصر!
بصراحة بصينا لبعض انا وماما* وقلنا مقولتنا الشهيرة اللى بنقولها من ساعة ما شوفناهم "حسبى الله ونعم الوكيل " وخدنا بعضنا وركبنا عربيتنا وسبناهم فى دمياط .

هناك 19 تعليقًا:

كلية السياحة والفنادق يقول...

الى جنة
الرحلة كانت فريدة من نوعها
تحياتى لكى
وأشكرك على مرورك الجميل بمدونتى المتواضعة
وأحييكى على البوست الجميل وكتابتك الفريدة
محمود

Ahmed Mostafa يقول...

دي مش حما دي حمة

3abdo me7tas يقول...

ازيك يا جنه
انا بصراحة قريت البوست
بس مش هقدر أعلق زى كل مرة لان المود بتاعى مش متظبط الأيام دى
بس أنا شايف ان العروسة حاجهة من الإتنين
يا إما وحشة ومش لاقية حد يتجوزها
يا إما كبرت فى السن وعايزين يخلصو منها
بذمتك دى واحد حد يقدر يعيش معاه ولا مع أمه
بصراحة
خسبنا الله ونعم الوكيل

أحساس لسه حى ...أنا مش موافق يقول...

عزيزتى
شوفى مش عيب ان الانسان يحاول يوفر

ومش عيب انه يدور على اشياء فى حدود امكانياته

بس العيب انه يكون معاه ويبخل على نفسه وعروسته

والعيب انه ميكنش صريح وواضح مع الناس اللى هينسبهم ويكون عيلته

وباين من اهل الزوج الحماه يعنى انها بتفرش الارض ورد وعند الدفع تهرب وتشيله

لالزم تكون فى وقفه مع اى ناس جاين ينسبونا

والعروسه كمان لازم نعرف انها هتعيش مع الانسان ده ولازم تشوف تفكيره ازاى

وممكن ينفذ طلباتها بس بعدين يطلع عينها

كل كلامك ده بيحسسنى انه انسان مرفه ومش بتاع شقا بجد

وكمان مش غنى علشان يقدر يعيش من غير شقا

هى هتستحمل لامتا

العروسه طبعا

لامتا بجد

تحياتى اسلوبك جميل فى الحوار

باين عليكى كاتبة قصص ساخره من زمان

سلام

khobayb يقول...

هههههههههههههههههه

طيب وهي ايه اللي جابرها ؟

لما من أولها بيعملوا كده

أمال بعد كده ايه اللي هيحصل ؟

---

بس جدعان إنهم سابوهم في دمياط

د/اجدع بنوته يقول...

ياعينى يابنتى

عندك حق والله

يادى الهنا يادى الهنا

الست دى هتشلنا

ربنا يكون ف عونك

رئـــــيسـة حزب الأحلام يقول...

اية الاخبار والاحوال

سفير السلام يقول...

السلام عليكم
اولا مبروك الف الف مبروك وان شاء الله ربنا يتمم بخير
وعجبتني بصراحه خفة دمك اقرا سطر وبعدها اضحك الموضوع خذ مني ساعه
وانا من راي انه تشتروا شقة في القطب الشمالي او في الاسكا على شان في الصيف يطلع اما مدام مونرو حماتك هاهاها تحفه يارب ماتطلعي حما مثلها
انا لما تزوج حدور على بنت امها ميته وشبعانه موت وان شاء الله نرتاح
وحتكلم بجد شويه
مش عيب لو وفرتوا لانه اللي بتفروه حيبقى ليكم في الاخر وتحملي حماتك شويه على شان خاطر كوكو
وشكرا على مرورك بمدونتي وتعليقك
سلام

أنا حر يقول...

انتم المفروض كنتم رجعتوا بعربيتكم وعربيتهم علشان يرجعوا ماشيين علشان تنتقموا منهم
اقولك على حاجة بخصوص العريس ده وامه
انا مش مطمن
:)
تحياتي

غير معرف يقول...

مدونة فكرتها حلوة و دمها خفيف جدا
ربنا يوفقك بس يا ترى بتكتبي في مجالات تانية ؟

ابو صهيب ( الجمعاوي الاصيل)سابقاً يقول...

بصراحة الله يكون في عون العروسة

دي متعوسة

وحماتها عاملة زي القرع لا الكوسة

وعريسها خبته موكوسة

وربنا يعنها ويحميها وتكون من العين محروسة

تحياتي

Yahia يقول...

انا مش قادر اتصور ان فيه (راجل) بيعمل كده ، بس واضح ان الدنيا فيها كتتتير .... بس مكلمتيش عملتوا ايه في مدينة نصر

سلام

shirry يقول...

دي كانت مغامرة بس جامدة
يلا ربنا يوفقك
علي فكرة انت هتدخلي الجنة حدف من غير حساب علشان حماتك دي
يلا ربنا يهديها

almasry يقول...

انا باجى وانتى مش بتزورينا

المهم انتى مالك جايه على الست مارلين ليه دى باين علشيها ست زى العسل ده بردو الجزاء بتاعها علشان بتحاول تحافظ على فلوس ابنها عفش ايه وكلام فارغ ايه ياحاجه سيبك انتى أهم حاجه صحتك

وبعدين انتى لو كنتى نزلتى فى مكان جامد فى دمياط من المعارض اللى هيه بجد معارض كانت الحاجه سابت هدومها رهن هناك

والباشا العريس اللى ماماته بتتكلم بدل منه دايما ده يسمحلى أقول عليه انه "نتايه" يعنى انثى لكن بلغه الفلاحين

ويارب يتمم بخير بعد سنه بعد اتنين المهم انه ينوى ويغلط ويقع ف الفخ ويتجوز.

تحيــــاتى
المصـــــــــرى

عبده الرايق يقول...

دميااااااااااااط
دمياط
دمياط
اه فاكرها
بس ساعدينى
هى فى افريقيا ولا اسيا ولا اوروبا

Unknown يقول...

لا بجد الكلام ده بجد

طب تعيشي مع واحد مش طايقه ليه

جسر الى الحياة يقول...

كان الله فى عونك يا جنة كانت رحلة عذاب
بس عايزة اعرف المحروس ده اصبح كان ولا ما زال موجود اتمنى انه يكون عريس فعل ماضى لانه بالشكل ده مينفعش خالص للمستقبل
تحياتى وربنا يوفقك ان شاء الله

يوميات مواطن مصرى يقول...
أزال أحد مشرفي المدونة هذا التعليق.
drpharma يقول...

هايل بس ياريت الحجاب ياجنة