حبيبـــــــــــــى يا منفض لى ...امتى هتقبضنى

كلنا قاعدين مستنين نشوف رؤية هلال شهر رمضان وفرحنا اوى اول لما عرفنا انه بكره .....وكلهم ايه قاعدين يبصولى ويضحكوا وكل واحد بكلمة وانا اقلهم **ايه بقى ما تنقطونا بسكاتكم اخواتى اللى يقول اما نشوف عريس الهنا هيجيب ايه. واللى ترد تقول ...ياما جاب الغراب لامه وانا فى سرى" وانا متغاظة"الله يكسفك اما نشوف هترفع راسى ولا هتدلدلها زى كل مرة؟؟ وعلى العموم انا حاسة انك هتقطعها مش هدلدلها وبس!
شوية وكلمنى كوكو يقولى كل سنة وانتى طيبة وقالى انه هيجى تانى يوم رمضان يفطر معانا قلت له "اوع تنسى الفانوس .قام قال حاضر بس كده عيونى..
شويتين والتليفون مبطلش رن والكل بيهنىء ويسأل العريس جاب ايه؟ وانا طبعا بفشر واتعنتظ واقول "يوه ده جاب الديب من ديله وجاب وجاب ومن اغلى حاجة...وبتريقة اصله ايه مبحبح اوى على الاخر مشفتش حد فى كرمه.وبينى وبين نفسى شكله هيسيب الديب وهيجيب ديله"
وجت ميعاد الزيارة واسم النبى حرسه وصاينه جه ايد وراء وايد قدام....بصراحة انا وشى جاب الوان من الكسوف والكل قعد يضحك عليه .
وكالعادة سالته باستخدام اسلوب البجاحة العفيف"ايه فين الفانوس؟ قال"طيب قولى كل سنة وانت طيب...وبعدين يا حبيبتى انا لفيت مصر بحالها شارع شارع محل محل الفوانيس خلصت!
انا اتخضيت"خلصت ازاى مصر كلها خلصت فوانيسها على حظى؟
قال"ايوا هو ده اللى حصل حتى حاجات رمضان وحشة اوى السنة دى مش عارف ليه..وبعدين يا ستى الفوانيس دى بتاعة العيال الصغيرين واحنا كبرنا على الحاجات دى ولا ايه يا طنط؟ ماما ضحكت له ضحكة تود فى داهية...شوية شوية كانت هتحدفه بالاطباق وماما بصت لى كده وقالت "عريس ايه ده يا اخواتى لا فانوس ولا بلحايه؟ ربنا يكون فى عونك يا بنتى....
كان يجى يشوف خطيب بنت خالتك عامل معاها ايه بلا نيلة على رجالة اليومين دول..."
المهم يلا يا بنتى نحضر الفطار المدفع هيضرب...رحت قلت اه لو المدفع ده يضرب وتيجى الطلقة هنا يا سلام يبقى احلى رمضان عدى على"
شوية وحطينا الفطار وتعمدت محطش خشاف ادامه ....راح بصى لى وقال"ايه احنا هناكل من غير ما نشرب ايه فين البلح؟ رحت قايلة وانا مفروسة "اسكت مش لفينا زيك على كل المحلات ومالقناش حاجة حلوة السنة دى فمشترناش "راح قال برخامة"اظاهر انكم رحتم نفس المحلات اللى رحتها"
وعدى رمضان والحمد لله بدون خساير وجاءت يوم الوقفة***
ماما قالت"ايه متنحة ليه ...متخافيش اكيد هيجى ويعيد عليكى ويديكى العيدية والكحك" رحت قايلة بغيظ "اه زى الفانوس "والنبى لو شفتى منه كحكايه ابقى قابلينى"
الباشا شرف هو والهانم مارلين مونرو ومعاهم طنط اوسة وطنط نغنوشة اقصد خلاته وخلانه جاين يعيدوا علينا وطنط شايلة شنطة فيها حاجة اد كف الايد وحطتها ادامها طول القاعدة تقريبا والله واعلم كانت هتنزل بيها تانى"
شوية قدمنا الحادق والحلو والمشروب وحبتين طنط قررت تحن علينا وتطلع اللى فى الشنطة....وقالت لى كل سنة وانتى طيبة انا جبتلك كحك العيد كحك ايه يستاهل بقك" ابص الاقى طبق فيه عشر كحكات يا نهار اسود طبعا ما هو يادوبك ادوق" ما شاء الله عليها "بتريقة"قلت فى سرى "ما شاء الله لا تقولى كحك العبد ولا لابور طنط جابت لى من الدوار"
طبعا انا وماما سخسخنا من الضحك وشوية كانوا هيصعبوا علينا ونديهم احنا العيدية!
الغريبة ان طنط كل شوية كانت عماله تذلنا وتقول"ابقى افتكرى طنط اهو انا جبتلك كحك العيد نص بملبن ونص بعجوة"وشوية وتمد ايدها تاخد من الكحك وتدفس فى بق كوكو وتبص لى وتقولى دوقى انت مش بتدوقى ليه"
وهزيت راسى وقلت فى سرى"اه ما هو يا دوبك ادوق وهو انتى جايبة غير عينات علشان نختبرها اصلها اظاهر كانت فاكرانى دكتورة تحاليل"
حبتين وقدمنا من الكحك اللى احنا شارينه قامت قالت بأنافة وعجرفة"لالا مش حلو اوى انتم اشتريتوه منين؟ لا تعرفوا اللى اشترهولى كوكو احلى اصله من الغالى اوى
انا وماما بصينا لبعض وماما قالت لها"هو الكحك ده انتم عاملينه ولا شارينه؟
ردت"لا ده من اللى انا عاملاه قلت ادوقكم عمايل ايديه.....لكن فى كحك تانى اشترهولى كوكو حبيب عينى اصل مش باكل الكحك الا من بره وبصراحة كوكو اصله ما يفوتش مناسبة.... اشترى لى الفانوس وادانى العيدية واشترى لى الكحك من اغلى حته "رحت بصت له بصة كلها شر وغل وشوية وكنت هشد فى شعرى لحد ما ابقى قرعة"عمال تقولى الفانوس ده لعب عيال...يعنى الست مامتك هى اللى نغة؟ شوية شوية تجيب لها بزازة اه يا نارى على اللى يسيبنى عليك انت وهى كنت عملت منكم كحك بالبنى ادمين "ورحت غمزاه ومديله شلوت خفيف فى رجله وقلت "بقى الفوانيس خلصت ؟ وبتاعة العيال ها؟قام رد ببرود" كل سنة وانتى طيبة يا حبيبتى ما رمضان خلص ....وعلى العموم ما تزعليش رحت قلت له ها هتشترهولى؟ قالى لا هبقى اجيب لك فانوس ماما تلعبى بى شوية!!! وكل سنة وانتم طيبين.

عــــــــــــــــــــــــــــــيد ميلاد الليلة مـــــــــــين..يخرب بيت المطنشين

النهاردة عيد ميلاد الباشا كوكو....قلنا يلى نعمله عيد ميلاد ونخليها علينا ولو انه ميستهلش نجيبله شمع وتورته كبيره فالياه* المهم ماما بقت محتارة يا عينى مش عارفة تجيبله ايه وقعدت تقول معلش يا بنتى اصل ده اول عيد ميلاد لى وكمان الهدية من قيمة الواحد وقعدت تسالنى انتى هتجيبيله ايه بصراحة انا كنت ناوية اجيبله رصاصة او رصاصتين اضربه بيهم بس او حبة مفرقعات افرقع بيهم نفوخه المكعبرة دى لكن بصراحة لقيتهم غالين وكمان خفت على السجاجيد عندنا ليتوسخه ...

ماما بعد تفكير عميق "استقرت على ساعة سينيه ولو انها خسارة فى جتت امه اما انا فبلا فخر قررت اشترى له طقم ايه حاجة ابهه بيجامة ومعاها ليفة وصابونة ماركة "اسمنتكو"لتجحيت البشرة وتقشير وسلخ الجلد لحد ما يبقى ناعم كالفتافيت يلى علشان نخلص منه .

وكمان بابا اشترى له كرافت حلوة موت بردوا خسارة فى رقبة امه بس بردوا مفيدة للشنق والخنق وقطع الرقبة ان شاء الله على ايدى....المهم كلنا اشترينا حاجات مفيدة ومهمة لاى عريس زيه بيفكر يتجوز اليومين دول.

واتصل بينا وماكانش يعرف اننا عملين له عيد ميلاده عندنا وحب يتهرب من الحضور بحجة انه هيخرج الست زعبله مامته يفسحها ...فقلت له بصوت طخين .... "هاتها عندنا واحنا نفسحها يا حسب الله "اقصد قلت له يجيبها معاه

والحمد لله وصلوا بسلام وامان ومعتقدش انهم هينزلوا بردوا بسلام وامان المهم سلمت على الست مامته وهاتك يا بوس قال يعنى الحب مقطع بعضه ياختى وبصوا لقيونا كلنا مجتمعين احنا واقاربناوعاملين ومحضرين تورته وشمع واتفاجاوا اننا عاملين عيد ميلاده طبعا فرحوا اوى ده طبعا مش علشان العيد ميلاد لا"علشان هيتعشوا وهيحلوا كمان"

وجت الحاجة زعبله وقالت لى"كده بردوا مش كنتى تقولى انك عاملة عيد ميلاد لكوكواخص عليكى علشان كنت جبت له حاجة حلوة"قلت لها يا طنط ما كفاية هو عليكى هو فى احلى من كده قال يعنىالهانم كانت مستنية نفكرها بعيد ميلاد اسم النبى حرسه وصاينه"

وقعدنا نغنى ونصقف وقطعنا التورته وحان موعد تقديم الهدايا...........ان ان ديج...المقولة الافتتاحية لرفع الستار

ماما تقدمت واديتله الساعة يقوم يقول..... "ساعة ميرسى يا طنط لكن بقولك ماركتها ايه تقوم الست هانم زعبله تبص لماما وتقول "اصل حبيب عينى مش بيلبس اى ماركة اصل لو الحاجة مش اصلى بيتجيب له حساسية"نسيت تقولنا انه اصلا جربان

بصت لهم انا وماما بغيظ وكان هاين على ماما تاخدها منه تانى وترجعها وقلت"دى ساعة سينيه تعرفها "راح رد طبعا وهو انا بلبس الا اغلى الماركات؟؟ قلت فى سرى"اخ يا نارى منك ومن كدبك....هو انت تعرف اصلا يعنى ايه سينيه تلاقيك افتكرتها ماركة سنيه مش سينيه!

وتقدم بابا بهديته فقال** شكرا يا عمو بجد كرافته جميلة راحت الهانم فقعانه كومنت لازم طبعا امال دورها ايه"شكرا يا حاج وايه لزمته التعب؟ بس ما كنش فى الوان احسن من كده .....انا بقى اللى اتفقعت منها اه اللون الابيض مش عاجبها عايزة فحلوىء واصفر واحمر وبمبه مسخسخ !

ثم جاء دورى*** فى تقديم المفرقعات النوويه التى كادت تنسفهم من العمارة خالص بس يلى خليها علينا واوعدكم اجيبهاله ان شاء الله العيد ميلاد الجاى ده ان عدى عليه اصلا....

اتفضل هدية يارب تعجبك انت وطنط......الهانم بقى لما فتح الهديه راحت مديانه صوت صاروخى كلابى"طيب البيجامة وعرفناها امال الليفة دى لزمتها ايه؟حد قالك انه مابيستحماش؟ واتامزت بشفايفها

انا بقى بكل برود"لا يا طنط انتى فهمتينى غلط دى ليفة وصابونة وحجر سورى حاجة فيرى استايل.....علشان حضرتك وانتى بتليفيه يبقى جلده يطلع فى ايداكى" راحت مبرقة وقالت ايه"قلت لها اقصد يخلى الجلد ناعم واملس غير الليفة العادية صدقينى وجربى دى حاجات بتاعة الناس الهاى كلاس وحاجات ايه فيرى اكسبنسف"

المهم فقعتها وحرقت دمها يلى ماهى علطول حرقة دمنا كلنا على الاقل احنا عندنا دم مش زيها صلصة حمرا!

ولاد خالتى بقى كانوا حاضرين العيد ميلاد قعدوا يرشوا الورق الصغنن ده بتاع اعياد الميلاد وهى ايه كانت هتموت واحنا بنرش عليه وعلى راسه كلنا بصراحة كنا بنهزر وغرقنا وهو كنا متوصين بيه اوى لقينها فطت من مكانها"ايه ده يا ولاد لالالالا مش كده براحة على الولد ايه الحاجات اللى بتلمع دى لا كفاية يا حبيبى تعالى هنا جنبى مالكش دعوة بيهم" وكاننا اولاد الجيران ومامته بتحرج عليه يلعب معانا"

قلت لها "ايه يا طنط سيبيه ما احنا زينا زيه قامت قالت*** لا سورى يا حبيبتى ازاى هيروح كده وهو بيلمع انت عايزة الناس تضحك عليه؟ رحت قلت فى سرى""ياااااااااااااااااااااه وهو كل ده ومضحكوش ؟ راحت هبت فيا"ايه بتقولى ايه" فقلت لا يا حبيبتى ما تاخديش فى بالك انا اقصد اقولك انه الورق ده مفهوش جليتور" متخافيش تقوم ترد كده بردوا بتقولى عى خطيبك جى تور!انا ابنى تور؟قعدت اضحك فى سرى وقلت لها يا طنط ما اقصدش انا اقصد الورق !

وعدت الليله والحمد لله وبعد مرور كام اسبوع كان عيد ميلاد ماما...

وهو بيتصل بيه قلت له ان النهاردة ما ينساش انه عيد ميلاد ماما وانه يجى بالليل هو والست زعبله واكدت عليه فقعد يرغى ويقول طيب اجيب ايه لست الحبايب ايه رايك اجيب لها حاجة دهب ولا بيرفيوم اه الواحد لازم يجيب حاجة غالية من قيمته المهم قلت له هات على ذوقك...مع انى كنت شاكة فيه

وحان الموعد ودق جرس الباب ووصل الباشا والست هانم حماتى وايه ايد وراء وايد قدام

انا بقى فى سرى"يمكن يكون جايب حاجة دهب وحس على دمه ودم اللى خلفوه"

وعملنا العيد ميلاد وكلنا قدمنا هديانا وجه دورهم ولا حس ولا خبر كم توقعت اصل ايه هما زى التوقعات المرئية بتاعة الثانوية عامة

قلت بردوا يمكن حاططها هنا ولا هنا وشوية بردوا لا حس ولا خبر وحبتين وكلوا التورته بالسم المسكر وشربوا البيبسى بعد ما شربونا من كيعنا وبردوا لا حس ولا خبر قلت ما بيدهاش بقى نستخدم معاه اسلوب البجاحة العفيف"

قربت منه وبصوت خفيف "ايه يا عم ما تطلع بقى الهدية ولا ناوى ترجعها ؟

راحت الست هانم سمعتنا فردت "هدية هدية ايه يا حبيبتى ده كوكو اجمل هدية" قلت له "ايه يا ابنى انت نسيت عيد ميلاد ماما ولا ايه؟

قام قال "اخ معقول"وكان الواد فقد الذاكرة " اه دا انا نسيت والست هانم مامته تبص بخباثة وتقول كده بردوا مش كنتم تقولوا طيب كويس انك فكرتينا قبل ما نمشى علشان نعمل الواجب ونقول لماما كل سنة وانتى طيبة وعقبال مليون سنة" اه امال احنا ناس نعرف الواجب والاصول ....والسنة الجاية ان شاء الله نفرح بيكم

رحت متنحة كالعادة وقايلة "قصدك نفرح فيكم ان شاء الله .....وصوتوا عليك بدرى يا بعيد" وعلى راى المثل "تجيبها كده تجيلها كده هى كده"

الحقيـــــــــــــــــــــــــــــــــــنى يا مــــــامى ....انا بعيـــــــــــط يا مامى

كوكو بقى النهاردة عمل انجاز هايل يستحق عليه مصاصة كلمنى فى التليفون وانا فى الشغل وقال انه هيعدى على قلت ايه ده مش معقول ايه الجرأه دى وقلت فى سرى"ربنا يستر خير اللهم اجعلوا خير"
واحدة صاحبتى شافتنى وكانى مش مصدقة نفسى قالى لى "ايوا يا عم مين ادك خطيبك كلمك اكيد قالك كلام حلو انطقى بسرعة ...فقلت لها لا بس قال هيعدى على ودى اول مرة...قالت لى يااااااااه حلو اوى اكيد هيفسحك ولا هيدخلك السينما ...يا بختك عقباللى انا كمان يارب بس ابقى احكيلى على اللى هيحصل بالتفصيل" المهم بصت لها وقلت لها مستعجلة على المصايب ليه خليكى بعقلك كده احسن ..وفى سرى قال هيفسحنى ويدخلنى السينما قال"ده لو ركبنى مواصلات علشان اروح يبقى كويس"البت دى شكلها هبلة ومش عارفة عرسان اليومين دول!
ووصل الافندى وقالى ايه رايك مش بذمتك مفاجأه حلوة؟ قلت "حلوة اوى بس خير اللهم اجعله خير "ويا ترى طنط سمحت لك تجيلى لحد الشغل؟ قام قال" تعرفى قلت لها تعالى اتمشى معايا على الاقل تشمى هواء بس ما رضيتش قالت ما اقدرش امشى
رحت قايلة بغيظ" يا دى النيلة كمان هتجيبهالى الشغل علشان تعلوا صحباتى وتكرهوهم فى الجواز مش كفاية ماما وبابا واخواتى "
وبعدين ايه هو انت جاى مشى ولا ايه؟ قال "طبعا اصلى بحب اعمل رياضة" والمشى مفيد جدا
وبعدين انا كنت جنبك هنا فى شغل وقلت اعدى عليكى بالمرة فى سكتى ..قلت اه يعنى زيارة مش مخصوصة...المهم الجو كان حر موت وفضلنا مشين لحد ما خلاص كنت هقع فى الشارع كل شوية اقول لنفسى اصبرى يمكن يقعدك فى مكان نتغدا او يعزمنى حتى على كوباية مياة وايه ولا هو هنا وعمال يرغى عن شغله
بصيت له وقلت "انا خلاص تعبت ممكن نركب؟ قال "ايه انتى بتتعبى بسرعة كده ليه اصبرى اهو نكون قصرنا المسافة شوية علشان التاكسى ماياخدش كتير
انا بصراحة كنت هطق منه ومشينا شوية وكنت هموت من العطش الجو حر قلت ايه البعيد ما بيفهمش خالص رحت قايلة انا عطشانة اوى.....قام رد ببرود تعرفى وانا كمان ايه رايك قلت فى سرى ها اخيرا هتعزم على بحاجة ..لقيته قال فى كولدير هناك اهو تعالى نشرب مياة ساقعة!
قلت والله مافى اسقع ولا ابرد منك ! ورديت ببجاحة انا مش بشرب من الشارع وكمان انت ازاى بتشرب من الشارع امال فين اع وموع وايخى وبقرف ؟ قال لا دى مياه حلوة وبعدين انا هشرب بايدى مش من الكوباية وانتى لو عطشانة ومش قادرة تستنى لما نروح روحى اشترى بيبسى المحل هناك اهو عقبال ما اشرب
انا وقفت متنحة كالعادة وقلت "حسبى الله ونعم الوكيل الهى تقع فى الكولدير وتغرق ....صحيح راجل معندوش دم"
شوية ومشينا نستكمل مسيرة اربعة ايام لحد ما نوصل للبيت ولقيت نفسى خلاص ضغطى وطى وهقع رحت مصرخة فيه "بقولك ايه انا تعبت ولازم اركب لحد البيت....قال "اصبرى حبة كمان احنا خلاص قربنا انتى مش بتحبى الرياضة ولا ايه " قلت "لا انا طول عمرها بكرهها وكنت ادبى بكره الرياضة موووووووووووووووووووووووووووووت"
قال طيب ايه رايك نستنى الاتوبيس؟ انا اتخضيت وقلت له حرام عليك كنت سيبتنى اركب عربية الشغل اتوبيس يا مفترى ...اسفة انا ما بركبش اتوبيسات"
راح قال وهو هيموت يا عينى "خلاص هنركب تاكسى وامرى الى الله"
راح مشاور للتاكسى ووقف يتفاوض معاه هياخد كام لحد البيت....قلت اللهم طولك ياروحى وركبنا
وطول الطريق وانا عماله اضحك فى سرى واقول تلاقيه هيموت دلوقتى يا عينى" وشويى افتكر صحباتى واضحك واقول هقلهم ايه دول احكيلهم على الخيبة ...ولا اقلهم على انى دخلت السينما واحكيلهم الفيلم اللى انا كنت فيه وهو فى احلى من كده فيلم؟
وحبة خد باله راح سالنى ايه بتضحكى ليه؟ قلت "لا بس اصلى صاحبتى كانت بتحكيلى على خطيبها وبتقول انه بخيل اوى "قال "يااااه اعوذ بالله من البخل والبخلاء الواحد ما يكرهش اد البخل اعوذ بالله قوليلها تسيبه ده هيعذبها" وانا ايه فطصت على روحى من الضحك واقوله حاضر ما هى زمنها عرفت واضحك
ولما وصلنا عند البيت لقيته عمال يحط ايده شوية فى الجيب الشمال وحبة فى اليمين وشوية راح قايلى "معلش يا حبيبتى مش معايا فكة معاكى انتى علشان نحاسب التاكسى؟!
المهم خد منى الفلوس وحاسب التاكسى وانا ايه متنحة ومذهولة على الاخر وهو عامل عبيط
وطلعنا البيت واول ما سلم على ماما يقولها"بنتك دى يا طنط رقيقة خالص مش بتحب المشى ولا المواصلات بس انا بردوا خفت عليها وركبتها تاكسى لحد هنا"وانا ابص له واقول فى سرى "اه بامارة الفكة"
تعرفى يا طنط اتمشينا وقعدنا نتفرج على المحلات والله كانت تمشية تحفة وماما تبص وتقولى بجد قمت قايله"اه من ناحية تحفة فهى تحفة وبصراحة كانت ناقصاكى انتى وطنط وخصوصا طنط علشان كنا استريحنا منها للابد
وشوية ورجلى وجعتنى اوى وقعدت اصرخ من الوجع وماما تقول معقولة كل ده من الفسحة؟ وهو يضحك ويقول مش بقولك رقيقة اوى يا طنط
ويبص يقولى وبعدين بقولك ايه انتى لازم تخسى علشان تقدرى تمشى كده ما ينفعش
قلت له"اخس انا من ساعة ما عرفتك بقيت عشرة كيلو .....اه يا رجلى ....اه"
وفى نهاية القاعدة اتفق مع ماما ننزل تانى يوم نشترى شوية حاجات وقعدنا مستنين ساعة ساعتين تلاتة ولا حس ولا خبر قلت بصراحة احسن جت من عند ربنا الهى تكون اتكسحت زى ما كسحتنى "
ماما بقى قلقت وقالت لا اتصلى بى شوفية اتاخر ليه قلت يا ماما انا اتصلت بيه من شوية ومامته قالت نزل وجاى فى السكة
قالت لا معلش بردوا اتصلى تانى يا بنتى ....قلت لها متقلقيش تلاقيه لسه فى نص الطريق ما هو يا دوبك اصله بيجى موتورجل"
المهم اتصلت لقيت الست مارلين مونرو بترد قلت لها معلش يا طنط اصل كوكو لسه ما وصلش ايه فى حاجة؟
ردت على بصوت مسهوك"اه يا حبيبتى معلش مش هيقدر يجيلكم النهاردة قلت ليه يا طنط خير؟
قالت"يا حبيبى وهو جايلكم حبيب عين امه ركب تاكسى وعمل حادثة " قلت وكانى مخضوضة "معقولة يا طنط حادثة جامدة؟ قالت لا ده واحد خدش التاكسى بعربيته من وراء بس ابنى حبيبى اتخض وكلمنى فى التليفون وقالى تعالى يا مامى الحقينى انا خايف رحت خارجة انا واخوه وجبته وجينا اه وانا مستغنيه عنه ولا ايه " قلت لها بتريقة "لا معقولة تستغنى عنه وده كلام ..."طيب وهو فين دلوقتى اطمئن عليه؟ قالت "معلش يا حبيبتى شوية وابقى كلميه لحسن من ساعتها وهو خايف وانا منيماه فى حضنى ...الحمد لله ان الواد ما ضاعش منى" اه وانا مستغنية عنه ولا مستغنية؟
المهم قفلت السكة وانا متنحة وعمالة اضحك وماما تقولى ايه يا بنت مالك فى ايه خطيبك ما شرفش ليه؟
وانا مسخسخة من الضحك واقول يا لئيم يعنى وانت لوحدك بتركب تاكسى بس ايه وشك كان حلو عليه اوى.....وماما تقول بقولك فى ايه"رحت قلت"لا.....اصل ربنا بيخلص ذنب ناس من ناس وذنب تاكسى من تاكسى " وعجبى

لــــــــــــــبن...ســــــــــــــمك...تمـــــــــر هنـــــــدى

خرجنا نشترى شوية حاجات لوازم البيت مفروشات وستاير كده يعنى ...المهم واحنا بنتفرج البيه قال ايه مش عاجبه حاجة كل ما نختار حاجة يقول لا مش عجبانى هى بصراحة مش هى اللى مش عجباه ده سعرها اصل خلاص بقيت عارفاه.

يبص لماما ويقول ايه ده ياطنط دى الاسعار مولعة ..طيب ينفع نتجوز ومنجبش الحاجات دى؟ هى فلوس وخلاص ..ماما بقى تبص بغيظ وتقول ايه يا بنى وده معقول بردوا فى عروسة ما بتشتريش الحاجات دى؟وهى من جواها عايزة تديله حته علقة

وقالت بغيظ....امال انت فاكر ايه كل حاجة بقيت غالية امال عايزين تتجوزوا وبس ؟ يقوم يرد يقول "اه يا طنط بس مش كده هو المرتب هيقضى ايه ولا ايه...ولا صحيح البركة فيكى وفيكى انتى كمان يا حبيبتى مهو ايد على ايد تساعد ومرتبى على مرتبك يا دوب يقضى مصاريف الشهر!

المهم بصيت وقلت "اه بس انا كنت بفكر اقعد من الشغل استت يعنى.....طبعا نزل عليه سهم الله وقال وهو متنح ها لالا معقول ده دى بقعدة البيت وحشة ومملة وبعدين يا حبيبتى ازاى هتحققى ذاتك وانتى فى البيت؟ طبعا انا كان نفسى احقق ذاتى فى المطبخ لكن هو طبعا بيفكر فى المرتب مش فى تحقيق الذات...وبعدين كمل كلامه وكمان يا حبيبتى اكيد انتى ليكى احتياجات على الاقل تيجيبيها ومتحرميش نفسك من حاجة...قلت فى سرى(يا بجاحتك ده اللى اختشوا ماتوا)ايه الكارثة اللى اتحدفت على دى ده عايز واحدة تتكفل بيه مش تتجوزه.

شوية وماما قالت لى بقولك انتى مش عاجبانى اختارى اللى انتى عاوزاه وهو يشترى امال احنا نازلين ليه ...شوفى انتى عايزة ايه ولا كل حاجة احنا اللى هنعملها؟ امال الباشا ده هيجيب ايه ولا احنا اللى هنشترى كله وهو هيتفرج زى طرزان .

المهم كل ما ندخل محل ونقف نختار نلاقية فص ملح وداب شوية بنشترى الستاير ولما جينا ندفع ندور عليه ولا لقينوه وماما تدفع ونساله كنت فين..يقول معلش كنت بشترى سجاير ها خلصتم

حبة ودخلنا معرض مفارش قعد يختار ويغلب البايع ولون ده لا وده اه ولما سمع السعر وجينا ندفع يقوم يتعنتظ اوى ويقول لصاحب المعرض تصدق ان حاجتكم رخيصة اوى اوى طبعا ماما لما سمعت كده كانت هتطبق فى زمارة رقبته تقتله لاننا مش هنعرف نفاصل معاه وطبعا ادبسنا بسببه قلنا خلاص هو حر يدفع وطبعا ندور ملقنهوش وماما تدفع.

ماما بقى شاطت على الاخر وقالت لى ايه يا بنتى وبعدين هو يصح كده هو جاى ياخد عروسة على الجاهز؟

وشوية شرف ومعاه علبة كانز بيبسى واحدة بس لى....... بصراحة استغربنا من الحركة وماما قالت ..ايه انت كنت فين كل ما ندخل معرض نبص نلاقيك مشيت!قام رد ببجاحة "معلش يا طنط اصل الجو حر وانا هموت من العطش اتفضلى" بيعزم علينا بعلبته تخيلواكان ناقص يقولنا خدوا حبة كل واحدة بق ....يعنى نخمس كلنا فى واحدة المهم بصيت له كده وقلت لازم اكسفه يمكن يحس على دمه ده لو كان عنده اصله ولو انى اعتقد ان فصيلته نادرة الوجود.

متشكرين يا سيدى انا هروح اشترى لى انا وماما "طبعا انا استنيت اشوف رد فعله " لقيته بكل بجاحة بيقول"طيب اشترى من السوبر ماركت اللى هناك ده علشان حاجته نضيفة اوى!

طبعا انتم متخيلين الصدمة مش محتاجة اوصفها ...بقينا انا وماما بنكلم نفسنا منه...معقولة دى احنا كنا شاكين انه بخيل لكن بعد الموقف ده اتاكدنا انه رئيس جمهورية البخلاء"

وكالعادة فوتنا بمزاجنا وعدناها وقلنا كانه نسى يجبلنا مش معقول هنهد الجوازة علشان علبة بيبسى !

ودخلنا محل تانى نشترى منه شوية حاجات وبعدين المرة دى وقف والحمد لله مهربش لكن قال لماما معلش يا طنط انا مش عامل حسابى ممكن تدفعى انتى وبعدين نتحاسب؟ طبعا احنا مفيش فرق بينا

انا بقى حبيت اكسفه وابجح زيه"على فكرة احنا فى فرق بينا انا ست وانت راجل وبشنب ....راح ضحك وقال عادى يا حبيبتى ما انا عارف . وخد الكلمة على انها هزار بس ايه انا كنت هتفرس واتنقط منه!وبصراحة جت لى حالة غريبة تشبه الصرع وبقيت زى المجانين و كنت عاوزة اعضه عضة كلب .

وقلت فى سرى بتريقة "يا صلاة الزين يا صلاة الزين هو ده العريس اللى عليه العين"والله شكلى انا اللى هشتغل وانت هتقعد فى البيت وهصرف عليك وكمان كل يوم ارجعلك بالغلا ومعايا علبة سجايرك!

ورجعنا البيت بعد جولة مريرة مع كوكو وماما طبعا روحها فى مناخيرها لدرجة انها اتحشرت منها ومبقتش قادرة تتنفس .....وكل شوية تعدى تقوله نورتنا شرفتنا كترتنا.....

وكان قصدها علتنا شلتنا قرفتنا عرتنا فضحتنا "اصلى انا المترجم السامى للغة ماما فى البيت"

المهم بصى لى وقالى .....عايز اتكلم معاكى شوية "قلت يمكن يصلح المواقف الطين اللى عملها او حس وهيدفع اللى عليه"لقيته بيقول وهو متعنتظ على الاخر وحاطط رجل على رجل عايزين نتكلم جد شوية ..تعرفوا ساعتها فكرنى "باحمد راتب" فى مسلسل رمضان"منص" كان كل شوية حاطط رجل على رجل ولابس شبشب وشوراب مقطع زى المنخل! وقلت فى سرى" على راى المثل شحات وعايز عيش فينو"اللى يشوفك يفتكرك فارس ف ساحته .. ميعرفش انك حتى الشراب شاحته .. !

المهم قلت له ها"قال تصدقلى الحاجة بقت غالية اوى اوى والله الواحد ما عارف يلاقيها منين ولا منين ولا يعمل ايه فى الزمن ده شغل الصبح وشغل بالليل ومفيش فايدة....عارفة الاسبوع اللى فات الارز كان بكام والنهاردة بقى بكام ...غلى اوى ده وصل الضعف ولا السمك بقى مولع واللحمة والفراخ بس تعرفى ممكن نبقى نشتريهم من الجمعية ..انا بقيت بصه ومتنحة فراخ ايه ولحمة ايه ده احنا شوية شوية كنا هنكاكى!وقلت له"هو ده الكلام اللى انت عايز تقولهولى يا خويا؟وفى سرى بجد راجل معندكش دم شوية وكمل كلامه وقالى انتى معايا اصل الموضوع ده مهم

وراح مكمل القصيدة والابيات الزيتيه والسمنية "اقصد الابيات الشعرية"وقال...اسكتى ولا الزيت ولا السكر والمصيبة الكبيرة فى اللبن البودرة والسيريلاك!

انا اتخضيت وبرقت ايه السيريلاك!قلت يمكن ماماته لسه ما فطمتوش ولا حاجة مش عايزة اظلمه ...شوية وقالى ايوا اللبن بتاع الاطفال غلى اوى وكمان مش موجود فى السوق تعرفى والله بفكر اجيب شوية من دلوقتى للاولاد واخزنهم لحسن يقل من السوق ومنلقهوش بعد كده.

انا قلت ولاد ولاد مين راح قالى ولادنا "قلت انت هتلبسنى مصيبة؟ مش كفاية المصايب اللى عماله تنزل على من ساعة ما شفتك.

قالى يا حبيبتى انا اقصد نجيب اللبن ونشيله لانه هيغلى لحد ما نتجوزوبعنتظة ايه رايك فى خطيبك وتفكيره؟

قلت بصراحة وبسخرية"لا ده انا معايا عقلية علمية معملية مستفزة"

وبعدها فقدت النطق وتنحت وقمت علشان انفجر فى العياط براحتى .......راح نده على "ايه انتى رايحة فين ؟ احنا لسه مخلصناش كلامنا طيب تعالى نغير كلامنا ونقول حاجة حلوة

قلت يمكن يعدل كلامه قام قال **تعرفى نسيناه حاجة مهمة نشترى كمان كرتونة جبنة وحبة معلبات وحلاوة اهم حاجة الحلاوة ....ولا اقولك نبقى نعمل بطاقة تموين!!!!!!!!!!

رحت قايمة فاتحة الباب ومده ايدى يعنى معناها اتفضل بره

رايح قام واقف وقالى كده بردوا بتطردينى ....قلت له لا بس الحق روح هتلقنا الحلاوة قبل ما الناس تقفل!!!

رحــــــــــــــــــلة الى دميــــــــــــــــــــــطه

العريس باشا وصل وكلنا كنا فى انتظاره المفروض اننا هنخرج بقى نتفرج على العفش والذى منه فات شهرين ومعملناش اى حاجة ولما وصل.......
ماما سألته عملت ايه فى موضوع الشقة يارب يكون فى اخبار حلوة قامت الست حماتى مارلين مونرو ردت نيابه عنه كالعادة....ان شاء الله خير متقلقوش راح بابا بص لها وقال ايوا يعنى وصلت لغاية فين يا ابنى عايزين نعرف.... الباشا بقى بص لمارلين مونرو وغمزها قال يعنى ترد هى اصله اظاهر فى اليوم ده كانت مامته ماكله سد الحنك...المهم ضحكت ضحكة صفراء وقالت والله يا جماعة احنا موصين ناس تدور ولسه مردوش علينا ماما بصراحة جالها ذهول وقالت ايه يا ابنى وانت ليه متدورش هما الناس هما اللى هيعيشوا فيها؟؟
ضحك وقال" لماما معلش يا طنط اصلى مقدرش ادور اليومين دول ...ماما قالت ليه يا حبيبى هو فى حاجة ولا الماديات يعنى راح قال حاجة نزلت علينا ولا القنبلة الذرية"معلش يا طنط اصل الجو حر اوى وانا مش بخرج فى الحر لو حضرتك عايزانى انا اللى ادور ممكن ناجلها للشتاء" انا قلت فى سرى....يا نهار ابوك اسود ده احنا لسه فى اول الصيف الهى ما يجى عليك شتا يا كوكو يا ابن ام كوكو"
ومامته تبص لماما وتقول.... معلش يا حاجة اصله بصراحة مش بيحب الخروج فى الصيف ابنى وانا عارفه الحر بيفرهضه وادينا موصين ناس ومدينهم المواصفات اللى احنا عايزنها اصله يا حبيبى مبيطقش الحر"حبيب عين امه طالع زى بالظبط ماما قالت... لها وهى متنرفزة "ازاى يعنى امال بيروح شغله ازاى بيروح فى الشتاء بس معقول كده اللى انتم بتقوله ده يا جماعة؟ راحت الست مارلين مشوشرة على الموضوع وقالت..... مش يلا بنا بقى علشان نلحق المحلات ونتفرج على العفش من بدرى.انا بقى قلت طيب العفش ايه لزمته طالما مفيش شقة والا اظاهر اننا كنا هنحطه فى اوضة البواب لغاية ما نجيب الشقة....وبعدين ماما قالت ماشى نشوف نزلنا كلنا وطبعا معانا الست هانم ده طبعا علشان تغير الكفولة للبيه اصله زى العيال الصغيرين مبيعملش حاجة من غير ماما.
المهم ماما قالت نشوف فى مدينة نصر احنا نعرف كام معرض كده كويسين وحاجتهم شيك اوى راحت مارلين مونرو اتخضت وكشت كده ....ولا اللى دلانا على راسها حلة مولوخية وقالت بصوت ضفدعى مسرسع هو انت عايز تتفرج فى مدينة نصر يا كوكو؟ راح طبعا رد الاجابة المتوقعة اللى تشوفيه يا ماما المهم راحتك زى ما انتى عايزه مش حضرتك اللى هتختارى على ذوقك؟ انا بقى اللى المرة دى اتفزعت وقلت"يا حلاوة يا ولاد هى اللى هتختار امال انا لزمتى ايه فى القاعدة فردة جزمة"!
بصينا لبعض انا وماما وشوية كنا هنستاذن ونمشى بصراحة اتعلينا...مش انا قلتلكم قبل كده يادى الهنا يا دى الهنا الست دى هتشلنا"
المهم عدناها وماما قالت مش يلا بقى؟ راحت قالت لماما احنا يا حبيبتى مش هنشترى عفش كل يوم وعفش مدينة نصر والحاجات دى مش مضمونة كلها شكل بس وسنة وتبوظ اه اسالينى انا علينا وعلى دمياط كل اللى عايزينه هنلقيه هناك دى عيلتنا كلها مبتشتريش الا من دمياط قال مدينة نصر قال وهو العفش يبقى عفش الا من دمياط"؟
وراحت بص لى وقال يعنىبتقنعنى.....تعرفى انا عفشى كله من هناك اه هو ده الكلام اوض نوم خشب زان حاجة تعيش معاكى العمر كله تعرفوا انا هوديكم كام محل كده اعرفهم وهتدعولى" طبعا وشوية شوية هنروح بور سعيد نشترى فستان الفرح من هناك امال اظاهر انهم بيجيبوا كل حاجة من بلدها! انا بصراحة قلت انا عن نفسى هدعى عليكى وعلى ابنك وعلى اللى كانت السبب فى الجوازة دى وبعدين ممكن اقتل نفسى بعدها!
الباشا كوكو راح سمع كلام مامته وحاطط ايده فى ايدها وقال.... والله يا جماعة تعالوا نتفرج مش هتخسروا حاجة ده ذوق ماما هايل واهو الواحد يجيب حاجة تعيش علشان منفكرش نجيب تانى دى حاجة العمر ...انا بصيت له وقلت ربنا يقصف عمرك .
قال تعيش العمر كله قال وكأنه ضامن انه هيعمر معايا بالشكل ده انا وراءك والزمن طويل يا كوكو ولقينا ما باليد حيلة قلنا هيا بنا الى دمياط. .
وصلنا والحمد لله بعد حوالى 4 ساعات الى* دمياط الشقيقة *....
وماما طبعا مش عاجبها وعمالة تنفخ ومتنرفذة وشوية وهتولع فى نفسها وربما فكرت تروح راس البر ترمى نفسها فى البحر ارحم من العذاب والقرف اللى كنا فيه...المهم قعدت تلففنا يمين وشمال ومحل هنا ومحل هناك واذا عجبتنى حاجة تاخد كوكو على جنب وتغمزله
وشوية خدتنا المعرض اللى اشترت منه وهى عروسة حاجة ايه من قديم الازل تنفع تتحط فى الانتخانة.
وشوية وتقولى شايفة العفش حاجة ايه ابهة اختارى انتى ومالكيش دعوة...وحبة مش مديانى فرصة اتفرج انا وماما كل شوية تقول الله ايه رايكم فى دى وحبة الله تعالى ايه رايك فى دى ... وتنادى على صاحب المعرض بكام دى ولما تسمع السعر تتخض وتقول ياه معقول انتم مالكم بقيتم غالين كده دا انتم اسعاركم كانت رخيصة وتحكى لصاحب المعرض حكايتها وانها اشترت عفشها كله من دمياط بألف جنية" وطبعا انا مش هعلق علشان الالف جنية ده اللى من زمان ما كنتش على ايامى فخاف اظلمها ممكن فى الوقت ده كانت تشترى عفش وشقة وعربية الله واعلم....المهم انى حاسيت انها هى اللى بتتجوز وبتختار عفشها مش انا وانا وماما كنا متفرجين فقط..... وفضلنا ندخل هنا وهنا من معرض لمعرض لحد ما رجلينا ماتت وكنا عايزين رجلين بلاستيك تقريبا لففتنا كل معارض دمياط وكانت بتحكى فى كل معرض حكايتها وحكايه عفشها لما حسستنا انه عفش محطوط فى القصر الملكى!
واخيرا دخلنا معرض وعجبنى فيه حاجات قلت" يلى بقى اهو نخرج من البلد دى بحاجة ونبقى عملنا بالمشوار الطويل ده وكمان هى قالت لى شاورى وانا اجيب لك ...المهم قلتلها على فكرة يا طنط انا عاجبانى اوضة النوم دى قالت وماله يا روحى نشوفها ولما سألت صاحب المعرض لقيناها بتقرب منا وتقول" لالا تصدقى دى خشبها اى كلام ومش حلو خالص اقلكم انا مش شايفة حاجة عدلة فى البلد دى....ايه رايكم لو نرجع نشوف فى مدينة نصر!
بصراحة بصينا لبعض انا وماما* وقلنا مقولتنا الشهيرة اللى بنقولها من ساعة ما شوفناهم "حسبى الله ونعم الوكيل " وخدنا بعضنا وركبنا عربيتنا وسبناهم فى دمياط .

زفــــــــــــــــــــــــــه.....وكوســــــــــــه....ومعــــــــــــــــازيم

النهاردة بقى اقدر اصوت واقول باعلى حسى….يا لهوتى يا لهوتى جه يوم فرحى انا وبلوتى…
وطبعا مفهوم مين هو بلوتى (واللى هيستغبى ميسألنيش).

المهم حجزنا الفرح طبعا فى فندق ... اه ما احنا مشينا كلمتنا بس على حسابنا

طبعا وماما وبابا نبهوا على الافندى سى كوكو انه ميعزمش ناس كتير يعنى علشان العدد.

قامت الست هانم حماتى قالت وهي بتشهق

"لا ودى معقولة دا احنا مش هنعزم حد خالص احنا كل اللى هيجى من طرفنا خلاته وخلانه وعمامه بس لا جيران ولا اصحاب ولا كلام من ده يعنى متخافوش الحكاية هتبقى ملمومة اه ودى تيجى بردوا هو احنا مدخلناش فنادق قبل كده ولا ايه؟"

انا بقى بصراحة كنت شاكه فى الاخرانية.

المهم احنا نبهنا وعملنا اللى علينا وتمام التمام ....

وجه اليوم المنتظر المفروض انه منتظر

جه يوم الفرح يا سلام سلم الشقة كانت هتتكلم بصيت لقيت حماتى ومعاها كوكو وارطة ناس لمة وهيصه وناس ملهاش اول من اخر وعمالة تزغرط ... بصراحة انا قلت البداية مش مشجعة بعد ما شفت كل الناس دى قلت وماله

فرح شوارعيكو اهو كان هيلميكو.

كل دول كانوا طالعين يقبضوا على "اقصد يزفونى"

ماما بصت لى كده وكان فى نفسها حاجة عايزة تقولها انا عرفتها

"احنا مش اشكال فنادق بالمنظر ده"

وبعدين غمزت لى وقالت براحة "يا خوفى "

انا قلتلها قلبى حاسس ان اللى انتى خايفة منه هيحصل هيحصل

والست حماتى كانت ايه ولا مارلين مونرو شياكة ايه وميكب ايه اخر حلاوة.

حماتى بقى نادت على كوكو اللى كان مستنى بره وقالت له كوكو تعالى يا حبيبى علشان تاخد عروستك.... تعالى شوف جمالنا وبصيت لى......" ايه الحلاوة والجمال ده يا عروستنا اللهم صلى على النبى قمر يا اخواتى قمر ... بس كان نفسى تزودى الاحمر والاخضر شوية يلا
مش مهم خليها فى الليلة الكبيرة

بس ايه انا كنت هاموت منها اصلها كانت عايزانى ابقى زى عروسة المولد!
الافندى بقى جه وخدنى وانا ايه وشى احمر ومكسوفة موت وهقع من فستانى طبعا ما انا عروسة وكل العرايس بيبقوا كده....لاقيته بقى متشيك على الاخر..... كان نفسى اقوله "ايه النضافة دى اخيرا طلعت اللى تحت البلاطة"

اصلى بصراحة كنت خايفة يكسفنى ادام الناس والاقى بدلة كده ولا قميص لونه فوحلؤى بس الحمد لله كان متناسق.
واول مرة يغازلنى ويقولى... ايه الجمال ده بصراحة فرحت اوى مش علشان غازلنى لا علشان اول مرة ميقولشاتكلمى انتى يا ماما... والله كنت عاملة حسابى انى هحط ايدى فى ايد مامته وانها اللى هتقعد جنبى فى الكوشة لكن الحمد لله المرة ادى طلعت "اوت".

وزفونا ارطة المعازيم لحد باب الفندق وهناك لقيت ناس لا ليها اول من اخر اللى تسلم واللى تبوس واللى تطبطب واللى تلزق جنبى ماكنتش قادرة اتنفس سحبوا كل الاوكسجين وانا كنت مركزة مع ماما اللى كان هيغمى عليها لما لقيتهم عازمين الشارع كله اه مهى الحكاية كانت ببلاش

وابو بلاش كتر منه

قعدت فى الكوشة بعد تفكير عميق اقعد ولا اروح...وقلت يارب عدى الليلة دى على خير دى ليلة واحدة فى العمر وانا من ساعة ما شفت الجدع ده معدتش عليا ليلة حلوة يارب اكرم.

وشوية.... قعد يكلمنى ويغازلنى وهو مكسوف وعينه رايحة جاية على مامته قلت حتى فى الفرح امال لما نتجوز هتعمل ايه هناخدها تعيش معانا.

وحبتين ولقيت طنط حماتى مش عايزة تسيبنى يلا قومى ارقصى يلا تعالى وعايزانى ايه مرقصش اى رقص ... مش عاجبها رقصى وعمالة تمسكنى عايزانى ارقص رقصة "عجين الفلاحة "طبعا عارفينها.

وانا عمالة اقول تعبت ايه يا ست انتي ... انتى مبتهمديش ... اتهدى شوية ... ايه ما بتتعبيش

دى كانت ولا الخيل هدت الدنيا هد وهدتنى معاها والفرح كان ايه على راى الباشمهندس عدوية

"زحمة يا دنيا زحمة".

الغريبة بقى انى حسيت انى فقدت البصر من كتر الزحمة مبقتش شايفة حد اى حد لا ماما ولا بابا ولا قرايبى قلت تقريبا "غزو التتار ده قعد عليهم "

شوية وناس تيجى حبة وناس تسلم ولا فيلم عماد حمدى وتحية كاريوكا "ام العروسة".

واسال خطيبى ...يابنى مين اللى هناك دى؟؟ يضحك ويقول معرفش

طيب مين اللى سلمت عليا بحرارة دى ؟؟ يقول لا مش واخد بالي

طيب مين اللى هناك ده ابو شنب يقف عليه الصقر ؟؟ يقول اسالى ماما

حبيتن وجت واحدة هرتنى بوس واحضان وكمان شيلتلها العيال اصلها كانت عايزة تتصور مع العريس اقوله مين الهانم يقول اه دى بقى اخت جوز بنت عمة ماما

اه اصله كان عازم السلاله كلها بتاعة العيلة.

اقول فى عقل بالى" مش هتعزموا حد ها الحكاية هتبقى ملمومة انا قلت انتم ما تستروش ابدا "

على كده كان لازم الفرح نعملوا فى الاستاد وبردوا ما كنش هيكفيكم!

شوية وفتح البوفية ويا ريته ما فتح يا ريته كان "هاى تى "ولا" سندوتش جبنة رومى "

على الاقل كل واحد كان خد له سندوتش وروح ....!

مش هقدر اوصف اللى حصل كان لازم تيجوا علشان تصوروا بنفسكم

واحنا بنوزع المعونة لمجاعة افريقيا!

وشوية ولبست الشبكة الحمد لله حماتى جابتها معاها اصلى كنت خايفة لتخليها عندها ليوم الدخلة المصيبة بقى ان بلوتى خلى كارثتى تلبسنى شبكتى يا دى النيلة اخرس ورضينا كمان اكتع يلا..... وعديتها اهى ليلة.

شوية واشتغل الدى جى بعد ما طنط راحت وشوشته فى ودنه يشغل اغانى من اياها قلت يا خوفى يا بدران... اكيد اغانى على وزن "البت الحلوة الفلاحة""ولا ادحرج واجرى يا رومان".

قعدت اخمن لحد ما شغل اغنية" اركب الحنطور" وخلافه وحماتى ايه هايصة واديلو ايدى
وهى تتحايل عليا ارقص والمشكلة انى مش لاقية اصلا مكان احط رجلى علشان اقف!

امة لا اله الا الله حواليه ... لحد ما جه ميعاد انتهاء الفرح.....
"ان .......ان ......ان ......ديج"

وهاتك يا بوس من دى وحضن من دى وصورة مع دى وقرصة رجل من دى لغاية ما حسيت انى خلاص هفقد الوعى بس حمدت ربنا انها عدت على خير وماخرجناش منها بخساير.

وادور على بابا وماما واخواتى مش لاقياهم ماشفتهمش خالص طول الفرح قلت لنفسى"تلاقيهم كانوا معزومين علىالفرح اللى فى القاعة اللى جنبنا بصراحة اصلهم غطسوا وهربوا من الفرح " بالبلدى على راى حماتى قالوا يا فكيك!
وبعدين لقينا "مارلين مونرو" حماتى واقفة على راسنا اقصد وراءنا عايزة تتصور وتقعد على حجركوكو وشوية قعدت وهاتك يا بوس فيه فرحانة اوى ما هو فرح وهاصت .

لكن المفــــــــاجأة.......

انها بصت لنا وقالت لنا ....( يا ولاد هو مش فاض مننا اكل وبقية التورتة؟؟ اللى فضلم من البوفيه يعنى مش شايفة حد جابهم لنا !!

اه امال ايه مش فلوس دافعينها دى ولا ايه ؟؟

شوية ابص يمين الاقى ولاد خالاته بيقطعوا البلالين بتاعة الكوشة ياخدوها

وابص شمال الاقى ولاد خيلانه بيقطفوا الورد من الكوشة

شكلهم كانوا هيروحوا بيه عيد ميلاد

ولا هيطلعوا على حد الارافه!



"والله يسامحـــــــــــــــــــــــــــــــــك يلى فى بـــــــــــــالى"

بالدبل فرحونا.........ومن قفانا جرجرونا

النهاردة بقى كلنا قاعدين منتظرين الباشا العريس والست حرمه..عفوا اقصد امه وهما طبعا طلبوا يجوا علشان عايزين يحددوا ميعاد الفرح والشبكة والذى منه..

المهم وصل العريس والست مامته وقعدنا كالعادة نحط الحادق والحلو والسخن والبارد وقامت الست هانم قالت احنا بقى النهاردة جايين نحط النقط على الحروف ونتفق على ميعاد الفرح طبعا كان قصدها تنقطنا احنا مش الحروف ما علينا قالت احنا عايزين بقى نفرح بعروسة ابنى الجميلة دى وبننوس عين امه فى الكوشة واشيل ولادهم...

ماما قالت بعد ما ضحكت يارب يسمع من بقك ربنا وبصت لبابا وقالت شوف بقى يا حاج هنعمل الشبكة فين عايزين نفرح بالبنت دى اخر العنقود قام بابا قال طبعا امال واحنا عندنا كام عروسة ....احم احم انا طبعا دى انا

الست هانم بقى اتخضت كده وكأن لدعتها عقربة وبرقت كده وبصت لابنها وقالت فرح ! احنا هنعمل الشبكة والفرح مع بعض ويا ريت نوفر ويبقوا عندكم هنا فى البيت مهو واسع

بصراحة كلنا تنحنا وبصينا لبعض وبابا قالها ازاى يا ست هانم لا طبعا احنا عايزين نفرح ونعزم القرايب والاصدقاء وهنا مينفعش قامت طلعت زى القرد وقالت ليه يا حاج ما المكان هنا شرح وبرح وواسع اوى قلت فى سرى"يا ساتر عليكى كأنك هتوريثنا بالحياة....وكأنها التكية بتاعة باباكى قعدة تقسمى زى ما انتى عايزة يا ساتر"

ماما بصت كده واتنرفذت لا طبعا مينفعش يا ست حسناء كمان احنا لازم نعمل شبكة لوحدها وفرح لوحده امال البنت هتلبس الشبكة كده من غير حس ولا خبر؟ ازاى يعنى ايه الكلام ده؟

الهانم بقى اه ....لا ما هو اصل الشبكة هتكون حاجة بسيطة كده مش محتاجة فرح مش دى بردوا هدية العريس للعروسة؟

ماما بقى كانت هتخرج من شعورها ايه؟؟؟حاجة بسيطة يعنى ايه يا ابنى متتكلم احنا اتفقنا على شبكة كويسة تليق بالبنت ولا ايه؟؟

ولا انتم ناوين تشبكوها بدبلتين!! وفى سرى"والله تلاقيهم كانوا عاملين حسابهم على دبلتين فضة ....اه اصلها شبكة صيد مش دهب!

الباشا بقى بص لماما وقال اصل يا طنط ويبص لمامته ما تتكلمى يا ماما اه اصل كل حاجة ماما هى اللى بتعملها وتقررها وتقولها وشوية شوية هى اللى هتلبس الشبكة وتقعد جنبه فى الكوشة!!

المهم بصت لنا كده وقعدت تقول معلش الصبر جميل (وبسهوكة وحيلة)يا جماعة كوكو اصله معهوش فلوس يعمل فرح ....بينى وبين نفسى اه مهو اصله بيكاكى بس دى الحاجة الوحيدة اللى بيعرفها

بصينا لبعض وقلنا امال ايه؟دى احنا كنا عايزين نعمله فى دار او فندق يليق بمستوانا ..الهانم بقى قالت ايه...دار او فندق طيب وكوكو هيجيب منين بصوا اذا كنتم عايزين تعملوا اعملوا انتم اهو بردوا بتفرحوا ببنتكم..احنا بصراحة مش معانا تكاليف الفرح.اه شوية شوية كان هيبقى فرح فى فندق شوارعيكو!

بابا بقى حب يصلح الموقف قبل ما ماما ترتكب جناية وترميهم من البلكونة وقال خلاص ماشى يا جماعة الخطوبة علينا والفرح عليكم مفيش فرق راحت فرحت اوى كده وشمت نفسها اه اهو كده الكلام ...ماشى وربنا يسهل من هنا لحد الفرح وكأنها هتخنسر وهدبسنا ومش هتعمل فرح ولا حاجة

المهم ماما قالت وهى متغاظة منهم ومن بابا طيب يا ستى نتفق بقى على الشقة والعفش علشان نبقى على نور من اولها انتم طبعا عارفين مستوى البنت ولازم تكون الشقة كويسة وفى مكان كويس

راح الباشا بص لمامته اه طبعا ماما اتكلمى انتى ...اه اصل ماما هى اللى قاعدة جوا بقه وبتتكلم نيابة عنه.

قالت ان شاء الله بس يبقى وش العروسة حلو عليه واحنا نجيبها فى احسن حته ربنا يكرم "وكأنهم بيشحتوا على"

ماما قالت هو معندوش شقة؟؟قالت لها بصراحة لا بس ان شاء الله كوكو هيجيبها اهو يحوش هو والعروسة مع بعض مش هى بردوا بتشتغل؟؟؟ اهو القرش على القرش مع كام جمعية هيدخلها كوكو ويجيبوا الشقة ونفرح بيهم ...بصراحة كلنا اتخضينا وكأن الكلام نزل علينا رصاص ايه القرش على القرش يا خى قرش ياكلك انت وهى ..ونفرح بيهم دا احنا مش هنفرح خالص .

ماما قالت هو مش محوش تمن الشقة؟امال جى يتجوز ازاى؟ الست هانم حلمكم علينا يا جماعة براحة انتم عارفين شباب اليومين دول هما حيلتهم حاجة يا حسرة فلوسهم رايحة على المواصلات وعلى السجاير ومرتبهم ادى وش الضيف ..عينى عليهم معلش اعذروا وبصلة طبعا ده استنادا الى مقولة ده بصلة المحب خروف وهو اصلا محيلتوش حق لا البصلة ولا الخروف!

بابا بقى قال وبعدين يا بنى صحيح الكلام ده امال انت جى تتقدم على اى اساس ؟

بص لبابا بخجل وبلئم كده ...معلش يا عمى انت بردوا عندك اولاد شباب زى واكيد الظروف واحدة وانا والله هعمل كل جهدى والبركة فى ماما مش كده يا حبيبتى؟

هى بقى اه كده يا حبيب ماما والله لو معايا ما قصر يا كوكو

ماما قالت بس مش معقول كده يعنى احنا هنعمل خطوبة لحد امتى "انا قلت لحد اجل غير مسمى" طنط بقى ان شاء الله بالكتير سنتين ويتجوزوا ..ماما قالت طيب والعفش نظامه ايه؟

الهانم ردت محلولة هدخل كوكو جمعيتن باسمين وتدبر متقلقوش وانتم بقى همتكم معانا...وتبص لى وانت يا عروستنا يا حلوة خلى بالك من شغلك اوعى تسيبه الايد على الايد بتساعد وانا بصلها متنحة"اه ماشى شوية شوية تقوليلى انه هيقعد هو فى البيت وانا اللى هشتغل وارجع له بالمرتب واجيب له كمان السجاير!

يا دى النيلة ايه الخيبة دى ...والله انا حاسة انه بيشحت على وشوية شوية هناجر اوضة البواب نتجوز فيها يا دى الهنا يا دى الهنا ....اهو النحس جه وملاش غيرى انا "

الغريبة ان بابا قعد يمشى المواضيع ويطيب خاطر ماما وكأنه اخر راجل فى العالم اصل بابا كان نفسه يفرح بيه اوى وكمان كان بيقول انه شخص لا بيهش ولا بينش وانه طيب دى كانت وجهة نظر بابا وكمان انه بيتكسف ودى صفة مش موجودة فى شباب اليومين دول المهم ماما وافقت باعجوبة بس بشرط انه يجهز شقة وعفش خلال سنة

وطبعا ابقوا قابلونى دى ان اشترى جزمة وشراب يبقى كويس ...

وجاء يوم شراء الشبكة ...........وطبعا الهانم كانت محضرلناصايغ معرفتها حاجة وصاية بيبع نحاس مش دهب المهم موفقتش وقررت انى اختار الشبكة من عند الجوهرجى اللى يعجبنى اه ما هى دى الحاجة الوحيدة اللى هختارها "ما هى دبلة الخطوبة اللى تلبسها متتجوزش الا لما تبقى كركوبة".

ودخلنا المحل واتفرجنا وعينى كانت هتطلع على حاجات تحفة بس لميت الدور واختارت حاجات معقولة لكن لقيت الهانم مش عاجبها وعمالة تبص لابنها وتتامز يمين وشمال عايزة هى اللى تختار..مش بقولكم هى اللى هتلبسها!

كمان كانت اختيارتها ايه... بصراحة كريمة موووووووووووووووووووت طبعا بتريق ده الود ودها تشترى لى شبكة فضة اصلها بتعزنى اوى ومش بتبخل على بحاجة!

وشوية تغمز لابنها وتاخده على جنب عاملين يتفاوضه مع بعض على اللى هيدفعوه..واخرتها ماما اللى كملت فلوس الشبكة اصلها بصت لماما وقالت لها معلش مكناش عاملين حسابنا الا على دبلتين ومحبس وخاتم صغير كده طبعا ماما اتكسفت ادام الجوهرجى ودفعت الباقى وهزات راسها كده معلش الجيب واحد...وهى ايه شوية شوية هتولع فى الواد وامه والشبكة وانا كمان!

راحت الهانم بعد ما خرجنا مزغرطة بصوت مسرسع وهو ايه فرحان اوى وعمال يبوس فى ايدها وكتافها فكرنى بفيلم ابو العربى وصلاح عبد الله بيقول(الله الله عليكى يا ماما زغروتك حلوة اوى كمان يا ماما).

طبعا ما هى كانت فرحانة اننا بناخد على قفانا وعاملين ندفع وبعدين راحت بصلنا كده وقالت"طيب هاتوا الشبكة بقى نخليها عندنا لحد الفرح"

ماما اتغاظت موت وبصت لها كده ايه؟ الشبكة يا هانم بتفضل عند العروسة لحد يوم فرحها

الهانم بقى مش عاجبها طبعا قالت اه اصلنا عايزين نفرج قرايبنا عليها علشان يفرحوا

فى سرى"يا لئيمه...بقى بردوا علشان يفرحوا ولا علشان تضمنى حقك؟ اه اصلها خافت نرجع فى كلامنا راحت ماما اتكسفت وايدتهلها ...بصت لها وقلت بصوت واطىء"يــــــــــــارب تضيع منك ويتوه ابنك يا قادر يا كريم...

وساعتك تحب تقول ايه فى مناسبة زى ادى"حسبى الله ونعم الوكيل"