الخميس، 14 فبراير 2008

الجــــــــــــــــــــــواز من افنــــــــــــدينا


تخيلوا اول مرة يدق بابنا عريس....ولما سمعت ماما بتقول فى عريس اتقدملك قلت زى نبيلة السيد فى الفيلم" معجولة دى عريس يا بوى" ..عريس يا ماي.مع العلم انى كنت اليطة ونغشة وحلوة كده وشايفة نفسى حبتين ولما عرفت ان فى عريس جاى ولسه واصل من بلاد بره طازة قلت لا لازم تبانى يا بت وكأنك بدر منور ولا القمر فى زمانه وقعدت اشوف هلبس ايه واحط فوشة هنا وفوشة هنا وفجاءة لقينا الباب بيخبط فقلت للهانم اختى اللى مبتتحركش من مكانها ابدا انت يا فالحة قومى افتحى الباب شوفى مين اللى متصربع على عمره ده ..قامت قالت يوه كل حاجة انا هو مفيش غيرى فى البيت ده ولا ايه؟؟قلتلها معلش افتحى ياختى وامرك لله بكره اوصى بابا يجيبلنا شغالة او واحدة تقعد وراء الباب شغلتها تفتحه وتقفله علشان الهانم على رجليها نقش الحنة.افتحى ياختى افتحى وفتحت لقيت عيل صغير بيقولها عمو بيقولكم انه هيجى كمان ساعة ماشى ابقى قولى لبابا يا شاطرة.قامت الهانم اختى اتامزت بشفايفها وخرجت صوت ولا صوت الضفدعة شاطرة طيب يا سيدى تأمرش بحاجة تانية؟وقفلت الباب وبعدين قالت اجهزوا بقى لحسن العريس باشا هيجى كمان ساعة ولازم يشوفنا على سنجة عشرة يلى يا ختى انتى وهى عايزين نخلص منكم بقى .قلتلها طيب يلى يا حلوة روقى البيت لحسن قرب يجى وايه كل واحدة منهم قعدت تتحايل على التانية ويتعزموا على بعض.المهم لبست واتشكيت على الاخر وحططت ميكب وقعدت ابص فى المراه واقول ما تزوقينى يا ماما اقوام يا ماما واختى تبصلى وتقلى مين ادك النهاردة لما نشوف بقى العريس شكله ايه وانا قلت اه اياك يطلع واد حلو كده ومسمسم مش عجر.وقعدنا نعمل العصير ونحضر الجاتوه لغاية لما الباب خبط قمنا كلنا جرينا نستخبا وكاننا هنلعب استغماية فماما قالت يا هبلة انتى وهى يا خيبتنا وقمنا بصينا لبعض وضحكنا قالت واحدة تفتح يا مزاغيد الراجل على الباب راحت الهانم الصغيرة فتحت وهى راسمة الدور ومكسوفة وصوتها واطى ومش طالع وقالت اهلا بحضرتك ثوانى انادى بابا فسمعنا بيقولها اوام يا شاطرة قالت فى سرها "شاطرة هو كله النهاردة بيقولى يا شاطرة ليه ايش عارفهم انى شاطرة ومش خيبة "بابا يا بابا واحد بيسأل عليك ادخله فرد بابا طبعا وقليله ثوانى وجاى قامت قالت له اتفضل فى الصالون فبصينا كلنا من بعيد لقينا واحد طويل زى النخلة وشايل فى ايده ورد والايد التانية فى جيبه وايه دخل بيه مسبهوش بره اظاهر كان هياخده وهو نازل تانى.ولما بابا راح وسلم عليه قاله انا الاستاذ سيد محاسب بشركة مقاولات فبابا قال اهلا وسهلا تشرفنا واخواتى هاتك يا ضحك سيد اسمه سيد الاسامى دى بطلت من زمان ويضحكوا رحت مصبرة نفسى وعلشان الكسفة قلتلهم ايه الراجل مش باسمه يا هطل بشخصيته فقعدوا يضحكوا ويغنوا بصوت واطى سيد يا سيد قمت قلت فى سرى يفضحك ربنا الحكاية باينة من اولها مش كفاية انه شبة الزعافة !سمعنا بابا عمال يقول شرفت يا بنى يا مرحب البيت نور وهو ايه يا سلام على الالطه اللى اهله فيها حاطط رجل على رجل ويقول مرحب بك يا عمى طبعا البيت منور بيه وبصحابه قام بابا نده ماما يا حاجة تعالى سلمى على الضيوف وفين الواجب انتى بخيلة ولا ايه؟وضحك الشاى اوام راح المخفى رد وقال لا بلاش شاى عادى انا مش بشرب الا ابو فتلة قام بابا قال وهو محرج هاتوا حاجة ساقعة احسن وجاتوه يقوم يرد يقول انتم بتجيبوا الجاتوه من ابو كام ؟؟فبابا دارى على الموضوع ندخل فى التفاصيل يا بنى ايه طلباتك؟ساعتها ماما نادت على براحة تعالى خدى الحاجة وقدميها ...
رحت داخلة معاها وقلت بردوا ميجراش اهو ناخد فكرة ونبص بصة يمكن من قريب احسن وقدمت الساقع والجاتوهوسلمت انا وماما ولما بصيت ودققت فى شكله قلت فى سرى اعوذ بالله ايه ده وعلى ايه الالطة دى خسارة الجاتوه فى جتتك دا احنا جايبين الحتة ب 2.50يعنى مش لاى حد وقلت ولو ان الشكل مش كل حاجة اما نشوف يمكن يكون فى مميزات تانية وشوية ماما غمزتنى قال يعنى افتحى بقك واتكلمى وانا ايه منطقتش وقعد يقول لبابا انا كنت مسافر الامارات وعندى كل حاجة شقة لا شقتين فاتحهم على بعض فى مدينة نصر وعندى مكتب محاسبة بتاعى مشغل فيه تلاتة فكرنى بالراجل اللى كان مع محمد صبحى انا عندى تلاتة وكمان عندى يا عمى عربية اخر موديل وهجيب لعروستنا عربية والشبكة اللى تختارها وكمان ممكن افتحلها سنتر تجميل اهو تتسلى رحت قلت لنفسى بغيظ"السنتر ده تفتحه ليك انت علشان انت محتاج يجى 100 عملية تجميل"وحسيت كده انه اليط ومتعنتظ ومناخيره فى السما على ايه مش عارفة وكل حاجة يستعرض قاعد يقولى تعرفى يا انسة انا بحط اغلى برفان فى العالم ايو والله رحت ابتسمت ابتسامة خفيفة وقلت من تحت درسى اه شمه ما هو واضح وانا عماله اقول الريحة الغريبة دى جاية منين؟قام فرح اوى بنفسه كده وقام قال اصلى برفان يجنن رحت هزا راسى اه اه ماشى وكمان تعرفى انا بلبس اغلى انواع الهدوم والساعات كله مستورد وحياتك ولو لقيت حد لابس حاجة موجودة عندى برميها حتى ولو مكنتش لبستها غير مرة واحدة بصراحة حسيت انه اوفر اوى قلت فى سرى ايه ياربى ده ايه البلوة ده انا عايزة واحد لذيذ وابن ناس بجد مش بيتمنظر ايه فين الرجاله الحلوة المتواضعة اللى تجذب الواحد من اول نظره؟ودورت وشى لماما وبصوت واطى بقى دى يبقى اخرة صبرى حرام عليكوا يرضيكى برضه اتجوز الزرافة الاليطة دى؟ راح بابا خد باله وقال اهلا اهلا يا بنى والله ولاد الاصول بيبان عليهم قام الظريف بصلى وهو بيضحك وانتى بقى بتحب تلبسى اى ماركات؟اه علشان ابقى ابعت اجيبهملك من بره رحت بصله ها انا مش بلبس بتريق راح مخضوض كده على عمره قلتله اقصد مش بلبس الا مصرى بحب المصرى على راى نانسى عجرم وبشجع الصناعة المصرية اوى اصل اللى من بره مش بيعجبنى اصله بيبقى منفوخ كده ونافش ريشه على الاخر وطبعا انا كنت برمى الكلام علي ساعته وبعدين راح قال طيب تحبوا اجيب الحاجة امتى؟علشان تتعرف وقبل ما نرد النور قطع!!!!!!رحت قلت بلاش بلاش تيجى خليها مكانها وفى سرى اذا كان قطع منك ومن وشك امال لما تيجى هى هتولعولنا فى البيت؟يا دى النيلة على البخت انا ناقصة عله مكفاية الواحد معلول بما فيه الكفاية وفجاءة لقيت بابا بيقول بنت رحت قلت انا اقصد ان احنا اللى نروحلها يا بابا خلي الحاجة مستريحة واستأذن وعلطول النور جه راحوا اخواتى ضحكوا بصوت عالى وقالوا بسخرية" الخير على قــــــــدوم العرســـان ".

هناك 12 تعليقًا:

ابن حـجـر الـعـسـقـلانـى يقول...

بصراحة حكاية طريفة جدا .. بس تعرفى ... دة عريس لقطة .. دة ممكن يجيب لك أى حاجة .. يعنى لو كنتى طلبتى منه جاتوه من أبو الواحدة بتلاتة جنيه إلا ربع .. كان ممكن يجيب لك دستة

و على العموم ألف مبروك على مدونتك الجديدة و أهلا بك فى الفضاء التدوينى .. و أنا سعيد إنى من أوائل المعلقين

الدرويش المرووش يقول...

مبروك على المدونه

عقبال التمليك

الراقـــص مع الذئـــــاب يقول...

aالسلام عليكم

مبروك دخولك عالم التدوين

ومبروك عليكي العريس ابو فتلة...قصدي اللي بيحب الشاي ابو فتلة

سلام

صوت من مصر يقول...

تعرفى فكره البلوج جميله فى زمن اصبح الجواز صعب من الطرفين

غني يابهيه يقول...

هى فكرة البلوج حلوه
بس اتمنى انك تناقشى بحياد
لأنى حاسس انك ضد الرجاله من أولها
بهيه هاتستنى زيارتك
مبروك المدونه

أحمد سلامــة يقول...

مبروك المدونة يا
عروسة :)

Yahia يقول...

مواقف محرجو كتتتتير بيتعرضولها البنات في موضوع جواز الصالونات ده، على الرغممن أني راجل بس برده حاسس بالاحراج اللي ممكن تتعرضله البنات ، ومش عارف ايه الحل أو البديل عشان العرسان الجداد يشوفوا بعض وياخدوا قرار بالزواج أو غيره، ولو الموضوع ممشيش بيكون محرج للطرفين كمان ممكن يأثر بالسلب بعد كده في حياتهم ويخافوا يدخلوا في تجارب جديدة بعد كده

تحياتي

أبو الفـــداء يقول...

مبروك دخولك عالم التدوين..

وشكرا لمرورك

موجة يقول...

جنة جنة أه جنة ..
حقيقي المدونة دي شكلها جامدة جدا قوي خالص .. أول بوست بيدل على ما سيأتي بل يملأنا شوقا لما سيأتي
الموضوع الذي يحمله وصف المدونة موضوع شائق جدا وهام للغاية
وحديثة بيخوفني من اللحظة دي والواحد رايح يتقدم لواحدة .. الواحد بيتصور لو مثلا وهو قاعد النور قطع ههههههه
حقيقي أسلوبك جميل في الكتابة والسرد فيه انسيابية وتواصل يعكس المصداقية و القدرة الأدبية

ربنا يوفقك في التمهيدي وتحضري الرسالة كده و تناقشيها على خير وبتوفيق

تسمحيلي أكون ضيف دائم في المدونة عندك

خالص تحياتي
احمد
تمهيدي ماجستير علوم سياسية

Unknown يقول...

يخرب عقلك ايه ده انا عماله اضحك من ساعتها

ههههههههههههه
مبروك عليكي المدونه
نوجا
ارض الاحزان عادت للحياه

hamssah يقول...

حقول ايه يا جنه دمك خفيف بجد
وواضح ان روح المرح عائليه
شكلي حكمل قرايه للاخر
همسه

Asmaa mahaba يقول...

ههههههههه فكرتينى بالعريس ابو شوت وكاب ومعاه بى ام بابا جايبهاله
وكان فافى خالص...بابا بصله من سكوت وقال معندناش بنات للجواز يا ابنى ...
بعد ما مشى بيقول لماما بنتك ارجل منه ههههههههههه
تحياتى ليكى اسلوبك هايل
سومه_87