السبت، 16 فبراير 2008

يا فرحتى يا فرحتى ....النهارده قراية فاتحتى



النهاردة بقى هو يوم وميعاد الزيارة التانيه للعريس اياه ابن امه .كلنا قاعدين لابسين وجاهزين ومحضرين الحلو والحادق ومن كله حاجات انما ايه عمر ماماته ما شفتاها .بس يلى قلت مش خسارة لغاية دلوقتى هو عريسى....
وسمعنا صوت ناس كتير تحت البيت رحنا جرينا انا وقرايبى على البلكونه وبصينا لقينا العريس وامه واخوه وخلانه وخلاته....اتخضينا ايه ده يا منيل جايب معاك الفريق القومى ماما كانت هتصوت قالت ايه ده كله "وبرقة"ايه شغل الناس البلدى ده هو احنا لسه عملنا حاجة امال فى الخطوبة هنعمل ايه ..وبتكلم نفسها خلاص كانت هتتجنن "اه اكيد هيجيب الشارع كله معاه ....لالالالا انا قلبى مش مستريح للجوازة دى طيب كان يقول دى قلة ذوق .معلش اصل ماما ست بنت ناس كده وابهه حاجة عليوه مش زى ست قفا عفوا... اقصد الست حماتى وبعدين شرفونا ومبقناش عارفين نقعدهم فين بالرغم من ان الريسبشن كبير لكن العدد كان كتير وقعدنا نسلم هنا وهنا ونحط طبق هنا وهنا وكوباية هنا لما تعبنا وكان هاين علينا نقولهم قوموا معندناش بنات للجواز.

شوية ابص الاقى واحدة عملة الوانات كتير كده والتانية حط ورد هنا وهنا زى الست اللى كانت فى عبد الغفور البرعى"لابسة ورد ورد ورد"والتالتة الانيقة اللى فيهم كانت عاملة حاجات غريبة اوى قلت ايه دول ستات زينا ولا انا بيتهيالى!!ولقيت ماما كل شوية بتضحك من تحت لتحت وكأنها بتتحسر على وعايزة تقول ايه دول بقى دول قرايب دول!.وبصراحة كمان كانوا اوفر فى الكلام.
شوية يبصولى من تحت لتحت وواحده تطبطب على كتفى شوية كده وكانت هتخلعهولى وتاخده وهى ماشية وحبتين واحده تطبطب على رجلى وحماتى تقولى خدى قشريلى دى"فاكرونى بمارى منيب "مع لبنى عبد العزيز." وهى بتقولها خدى قشر البندق باسنانك علشان تشوفها مركبة طقـم ولا لا!.
قال يعنى بيطمنوا وكانوا بيعملولى كشف هيئة علشان كده الباشا كان جايب معاه كونسولته.
مع انهم كلهم فى نظرى رجالة مقلوبين ستات....المهم واللهم طولك يا روح ضحكة صفرا لديه وفتحة بق لديه وهزة راس لديه الحكاية مشيت المهم اننا خلصنا كل الاصناف اللى عندنا وكانهم ماكلوش بقالهم سنة والبت الشغالة ياعينى غلبت معانا كانت شوية وهتسيب لنا البيت يضرب يقلب وجت حطت اخر حاجة قدامهم قاموا ايه بصوالها كده وسلمواعليها وقالولها" انت ليه مش بتقعدى معانا كل شوية تقدمى حاجة وتدخلى "الهوانم كانوا فاكرينها قريبتنا"رحت قلتلهم لا دى الشغالة وممسكتش نفسى من الضحك وقلت فى سرى عادى ما يضرش....بس يلى كل ده ما كانش فارق معايا اد ما كان فارق الراجل اللى هتجوزه المهم هو اى نعم كل واحدة من قرايبه كانت بتزغر لجوزها من بعيد كان بيتكتم لكن قلت وانا مالى المهم هو ...انا عايزة راجل اسمع كلامه مش العكس وقلت يمكن هو مش زيهم وخليكوا فاكرين كلمة راجــــل دى اوى ها.......علشان هنحتاج لها بعد كده فى كلامنا كتييييير .حبيتين وراحت الهانم حماتى فطت كده زى الفالوطة وقالت"نقرأ الفاتحة" وكنا يعنى متكلمناش فى حاجة ولا دخلنا فى تفاصيل والرجالة ما شاء الله عليهم ولا كلمة ولا نفس كأنهم فى معسكر وبياخدوا الاوامر من الستات .قام بابا وماما اتكسفوا وحسوا انهم ادبيسوا المهم قراناها . وشوية وزغروطة والعريس ولا هو هنا وكأننا كنت بنقراها لحد تانى خالص يعنى بصراحة الراجل عمل اللى عليه كفاية انه لبس وجه ورفع ايده قرا الفاتحة وسلم الحمد لله مشيوا وصوت حماتى لسه بيرن فى ودنى مبروك يا كوكو صبرت ونلت يا عيون ماما يلى بقى سندنى يا حبيب ماما وراح الباشا كوكو مسلم ومسند ماما ووخدها فى ايده ولا الحابيبه.
وبصيت لقيت المعسكر اللى عندى بيبصلى وبيقولولى"بتريقة" مبروك يا سوسو خلاص قرانا الفاتحة .
فبصيت لهم بغيظ كده وقلتلهم اه احنا قرانا لكن كل واحد ونيته وانا نيتـــــى بقى"وبسخرية"اتمنيت انها تكون على روح الــمـــــرحومة !!.

هناك 20 تعليقًا:

DrShall يقول...

رائع ايه الحلاوه دى بس............

رئيس جمهوريه نفسى يقول...

انتى بتتكلمى بجد يعنى فى القرن الواحد وعشرين فى ناس بتتعامل كده وبالطريقه دى لما تروح تخطب وتحط بندقه واكسرى دى واعملى دى

حياة تستحق الانقاذ يقول...

والله يا ننوسة ضحكتيني اوووي
انا معاكي الواحد يعيش ويشوف
ومش هيضحك اوي غير اللي عمال يجرب

دمتي بخير :)

أم المييس

shirry يقول...

ولو انها اول زيارة ليا ومنتش عايزة اقولك كدة بس هية تدبيسة فعلا ربنا معاكي
بصي المهم في الحاجات دي بالذات اتبعي احساسك
ياتري انا علي ايامي العرسان شكلها ايه
ياخوفي يا بدران لا الرجالة تخلص

صوت من مصر يقول...

سوسو بجد حتى لو هو مقتنع بالطريقه دى من الجواز كان يجى لوحده مش لازم امه واخته والبقيه تاتى حسب الترتيب عشان محدش يزعل
بجد ياريت تقرى الفاتحه بضمير لانها قران مش ؟

غني يابهيه يقول...

يابنتى والله انا عدلت البوفيل عشانك انتى
اولا اسمى مصطفى
انتى كنتى كاتبه بتقولى ( تعرفى )
ثانيا عايزك تجاوبى بجد على سؤالى البنات عايزه ايه راجل بجد وحمش
ولا واحد ننوس امه
ثالثا نفهم من البوست ده انك خلاص ادبستى
مستنى الرد

جميز يقول...

أرجو انك ماتزعليش من تعليقى

أولاً عجبنى جدا اسلوبك الظريف فى الحكاية

ثانياً : و صفك لأسرة العريس بـ البلدى يخللينى أسألك إيه المشكلة فى الناس البلدى ؟ و لما قولتى إن الشغالة شبههم هيخللينى برضه أسألك هى الشغالة مش شبه كل الناس ولا إيه ؟ و آخر حاجة أنا مش عارف إيه المشكلة لما أم تدلع ابنها و تقول له يا كوكى , و لما الإبن ياخد أمه فى ايده زى الحبيبة ؟

أرجوكى ماتزعليش , و خصوصاً ان دا مش غرضى بالتأكيد , دا مجرد استغراب أو اختلاف

تحياتى ليكى

الربان يقول...

تحياتي

اولا مبروك الفاتحة....

في رأيي ان المهم او الاهم، ان شئت ، هو العريس نفسه... و أكيد خلال فترة الخطوبة هاتقدري تحكمي علي شخصيته و تصرفاته.... من الممكن ان يكون العريس
متاخد ههههههه ، لكن حين يشعر بالالفه
معك يكون علي طبيعته....

تحياتي و تمنياتي بالتوفيق ...

على باب الله يقول...

مدونة دمها خفيف قوي

أضحكتيني بجد

---

أتمني لك التوفيق

اجري على الله يقول...

الاستاذه العزيزه gannah
اول زياره وانشاء الله ليست الاخيره

مبروك الفاتحه عقبال بقيت سور القران
وان كانت الفاتحه كانت فيها الزياره المهيبه دي يبقى اكيد البقره حاتكون الزياره عامله ازاي؟؟؟؟؟؟؟
المهم
دي كوميديا عائليه ومايهمكيش الراجاله ماليه الدنيا
لكن خدي بالك الناس بتشوفنا بنفس الطريقه اللي احنا بنشوفهم بيها

اتمنى ان نتواصل دائما
الشاعر بن هلال

مصطفى محمد يقول...

جنة

اولا : نايس عنوان ، نايس صورة ، نايس بلوج
ثانيا : سرد التفاصيل حلو .. عيشتيني في الجو كما رأيتيه
ثالثا : انت حرة تمام الحرية في وصف أي حد بالصفة اللي انت نفسك فيها .. زي ما انا حر اني أعلق على وصفك
رابعا : لما قالوا للشغالة اقعدي و قلتي ما ماانتو زيها .. انا شخصيا أعيب عليكي اسلوب زي ده
خامسا : انا برضه شايف ان الفاتحة على المرحومة احسن يكتيير من الفاتحة على حاجات بتيجي هوب كد

سلامات

البنت الشقيه يقول...

مدونه جميله جدا بجد انا دخلتها بالصدفه وعجبتنى وكلامك بسيط ولذيذ ولا وصفك للعريس ابن ماما كوكى كان حكايه انا لو مكانك كنت رميته من الشباك عشان يسترجل

ربنا معاكى ويارب اشوفك قريب عندى فى مدونتى


لولو

جهاد خالد يقول...

ههههههههههههه
ايه ده يا بنتي
ايه الكرنفال اللي كاتبة عنه ده
بس أنا عايزة أسأل سؤال
هو ده من خيالك وللا ده حصل بجد؟؟

لو بجد
يبقى
ربنا يكون في عوووووووووونك

متابعة ان شاء الله

احمد الجيزاوى يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

انا عرفت سبب انى الجوزات مبتمش كتير

تحياتى
الف شكر على الضحك دة كله
احمد الجيزاوى

ابو صهيب ( الجمعاوي الاصيل)سابقاً يقول...

ههههههههههههههههههههههه

والله حاجة تضحك فعلاً

ربنا يكون في عونك

وتعيشي وتشوفي غيرها

(احمد سكر ) يقول...

صراحه وانا عارف انى راى هيزعلك
بس معلش هقوله
مهما كانت الاسباب
ومهما كانو النس دول
ماينفعش التريقه على خلق الله كدا

انتى دمك خفيف فعلا
بس دا ميدكيش الحق انك على الملأ كدا تتريقى على الناس

مهما كانت فيهم العبر

وطالما باباكى ومامتك وافقو

يبقو الناس ددول مش وحشين

متزعليش منى

وتقبلى مرورى

احمد سكر

نهياوية يقول...

دي اول زيارة ليا
مدونة دمها خيف اوي
ومتخصصة جدا
ده شغل الاعلام
تحياتي

غني يابهيه يقول...

انتى زعلتى ولا ايه
ولا اتطبتى بجد للراجل ده ....؟

الطائر الحزين يقول...

احنا لسه رافضين عريس لأختى علشان مش عارف يحدد ميعاد يجى نتفق فيه مع اننا قبلنا من حيث المبدأ وقلنا لن تختلف فى ماديات

وعلى رأى المثل كل واحد ونيتة

اول زيارة لك

ربنا يكرمك ويوفقك

تحياتى

DrShall يقول...

بس ممكن ناس كتير تعمل كدا وهيا مش واخده بالها أو أول مره أو ممكن أفسرها
أى تفسير انحيازا بقى .....بس فى الآخر أنا كنت بهزر معاكى
تحياتى