السبت، 29 مارس 2008

عــــــــــــــــــــــــــــــيد ميلاد الليلة مـــــــــــين..يخرب بيت المطنشين


النهاردة عيد ميلاد الباشا كوكو....قلنا يلى نعمله عيد ميلاد ونخليها علينا ولو انه ميستهلش نجيبله شمع وتورته كبيره فالياه* المهم ماما بقت محتارة يا عينى مش عارفة تجيبله ايه وقعدت تقول معلش يا بنتى اصل ده اول عيد ميلاد لى وكمان الهدية من قيمة الواحد وقعدت تسالنى انتى هتجيبيله ايه بصراحة انا كنت ناوية اجيبله رصاصة او رصاصتين اضربه بيهم بس او حبة مفرقعات افرقع بيهم نفوخه المكعبرة دى لكن بصراحة لقيتهم غالين وكمان خفت على السجاجيد عندنا ليتوسخه ...

ماما بعد تفكير عميق "استقرت على ساعة سينيه ولو انها خسارة فى جتت امه اما انا فبلا فخر قررت اشترى له طقم ايه حاجة ابهه بيجامة ومعاها ليفة وصابونة ماركة "اسمنتكو"لتجحيت البشرة وتقشير وسلخ الجلد لحد ما يبقى ناعم كالفتافيت يلى علشان نخلص منه .

وكمان بابا اشترى له كرافت حلوة موت بردوا خسارة فى رقبة امه بس بردوا مفيدة للشنق والخنق وقطع الرقبة ان شاء الله على ايدى....المهم كلنا اشترينا حاجات مفيدة ومهمة لاى عريس زيه بيفكر يتجوز اليومين دول.

واتصل بينا وماكانش يعرف اننا عملين له عيد ميلاده عندنا وحب يتهرب من الحضور بحجة انه هيخرج الست زعبله مامته يفسحها ...فقلت له بصوت طخين .... "هاتها عندنا واحنا نفسحها يا حسب الله "اقصد قلت له يجيبها معاه

والحمد لله وصلوا بسلام وامان ومعتقدش انهم هينزلوا بردوا بسلام وامان المهم سلمت على الست مامته وهاتك يا بوس قال يعنى الحب مقطع بعضه ياختى وبصوا لقيونا كلنا مجتمعين احنا واقاربناوعاملين ومحضرين تورته وشمع واتفاجاوا اننا عاملين عيد ميلاده طبعا فرحوا اوى ده طبعا مش علشان العيد ميلاد لا"علشان هيتعشوا وهيحلوا كمان"

وجت الحاجة زعبله وقالت لى"كده بردوا مش كنتى تقولى انك عاملة عيد ميلاد لكوكواخص عليكى علشان كنت جبت له حاجة حلوة"قلت لها يا طنط ما كفاية هو عليكى هو فى احلى من كده قال يعنىالهانم كانت مستنية نفكرها بعيد ميلاد اسم النبى حرسه وصاينه"

وقعدنا نغنى ونصقف وقطعنا التورته وحان موعد تقديم الهدايا...........ان ان ديج...المقولة الافتتاحية لرفع الستار

ماما تقدمت واديتله الساعة يقوم يقول..... "ساعة ميرسى يا طنط لكن بقولك ماركتها ايه تقوم الست هانم زعبله تبص لماما وتقول "اصل حبيب عينى مش بيلبس اى ماركة اصل لو الحاجة مش اصلى بيتجيب له حساسية"نسيت تقولنا انه اصلا جربان

بصت لهم انا وماما بغيظ وكان هاين على ماما تاخدها منه تانى وترجعها وقلت"دى ساعة سينيه تعرفها "راح رد طبعا وهو انا بلبس الا اغلى الماركات؟؟ قلت فى سرى"اخ يا نارى منك ومن كدبك....هو انت تعرف اصلا يعنى ايه سينيه تلاقيك افتكرتها ماركة سنيه مش سينيه!

وتقدم بابا بهديته فقال** شكرا يا عمو بجد كرافته جميلة راحت الهانم فقعانه كومنت لازم طبعا امال دورها ايه"شكرا يا حاج وايه لزمته التعب؟ بس ما كنش فى الوان احسن من كده .....انا بقى اللى اتفقعت منها اه اللون الابيض مش عاجبها عايزة فحلوىء واصفر واحمر وبمبه مسخسخ !

ثم جاء دورى*** فى تقديم المفرقعات النوويه التى كادت تنسفهم من العمارة خالص بس يلى خليها علينا واوعدكم اجيبهاله ان شاء الله العيد ميلاد الجاى ده ان عدى عليه اصلا....

اتفضل هدية يارب تعجبك انت وطنط......الهانم بقى لما فتح الهديه راحت مديانه صوت صاروخى كلابى"طيب البيجامة وعرفناها امال الليفة دى لزمتها ايه؟حد قالك انه مابيستحماش؟ واتامزت بشفايفها

انا بقى بكل برود"لا يا طنط انتى فهمتينى غلط دى ليفة وصابونة وحجر سورى حاجة فيرى استايل.....علشان حضرتك وانتى بتليفيه يبقى جلده يطلع فى ايداكى" راحت مبرقة وقالت ايه"قلت لها اقصد يخلى الجلد ناعم واملس غير الليفة العادية صدقينى وجربى دى حاجات بتاعة الناس الهاى كلاس وحاجات ايه فيرى اكسبنسف"

المهم فقعتها وحرقت دمها يلى ماهى علطول حرقة دمنا كلنا على الاقل احنا عندنا دم مش زيها صلصة حمرا!

ولاد خالتى بقى كانوا حاضرين العيد ميلاد قعدوا يرشوا الورق الصغنن ده بتاع اعياد الميلاد وهى ايه كانت هتموت واحنا بنرش عليه وعلى راسه كلنا بصراحة كنا بنهزر وغرقنا وهو كنا متوصين بيه اوى لقينها فطت من مكانها"ايه ده يا ولاد لالالالا مش كده براحة على الولد ايه الحاجات اللى بتلمع دى لا كفاية يا حبيبى تعالى هنا جنبى مالكش دعوة بيهم" وكاننا اولاد الجيران ومامته بتحرج عليه يلعب معانا"

قلت لها "ايه يا طنط سيبيه ما احنا زينا زيه قامت قالت*** لا سورى يا حبيبتى ازاى هيروح كده وهو بيلمع انت عايزة الناس تضحك عليه؟ رحت قلت فى سرى""ياااااااااااااااااااااه وهو كل ده ومضحكوش ؟ راحت هبت فيا"ايه بتقولى ايه" فقلت لا يا حبيبتى ما تاخديش فى بالك انا اقصد اقولك انه الورق ده مفهوش جليتور" متخافيش تقوم ترد كده بردوا بتقولى عى خطيبك جى تور!انا ابنى تور؟قعدت اضحك فى سرى وقلت لها يا طنط ما اقصدش انا اقصد الورق !

وعدت الليله والحمد لله وبعد مرور كام اسبوع كان عيد ميلاد ماما...

وهو بيتصل بيه قلت له ان النهاردة ما ينساش انه عيد ميلاد ماما وانه يجى بالليل هو والست زعبله واكدت عليه فقعد يرغى ويقول طيب اجيب ايه لست الحبايب ايه رايك اجيب لها حاجة دهب ولا بيرفيوم اه الواحد لازم يجيب حاجة غالية من قيمته المهم قلت له هات على ذوقك...مع انى كنت شاكة فيه

وحان الموعد ودق جرس الباب ووصل الباشا والست هانم حماتى وايه ايد وراء وايد قدام

انا بقى فى سرى"يمكن يكون جايب حاجة دهب وحس على دمه ودم اللى خلفوه"

وعملنا العيد ميلاد وكلنا قدمنا هديانا وجه دورهم ولا حس ولا خبر كم توقعت اصل ايه هما زى التوقعات المرئية بتاعة الثانوية عامة

قلت بردوا يمكن حاططها هنا ولا هنا وشوية بردوا لا حس ولا خبر وحبتين وكلوا التورته بالسم المسكر وشربوا البيبسى بعد ما شربونا من كيعنا وبردوا لا حس ولا خبر قلت ما بيدهاش بقى نستخدم معاه اسلوب البجاحة العفيف"

قربت منه وبصوت خفيف "ايه يا عم ما تطلع بقى الهدية ولا ناوى ترجعها ؟

راحت الست هانم سمعتنا فردت "هدية هدية ايه يا حبيبتى ده كوكو اجمل هدية" قلت له "ايه يا ابنى انت نسيت عيد ميلاد ماما ولا ايه؟

قام قال "اخ معقول"وكان الواد فقد الذاكرة " اه دا انا نسيت والست هانم مامته تبص بخباثة وتقول كده بردوا مش كنتم تقولوا طيب كويس انك فكرتينا قبل ما نمشى علشان نعمل الواجب ونقول لماما كل سنة وانتى طيبة وعقبال مليون سنة" اه امال احنا ناس نعرف الواجب والاصول ....والسنة الجاية ان شاء الله نفرح بيكم

رحت متنحة كالعادة وقايلة "قصدك نفرح فيكم ان شاء الله .....وصوتوا عليك بدرى يا بعيد" وعلى راى المثل "تجيبها كده تجيلها كده هى كده"

هناك 21 تعليقًا:

momken يقول...

ههههههههههه
مبدائيا دمك شربات

كمان واضح اسم النبى حرسه وصاينه كريم
وكل فلوسه ضايعه على اصحابه
كمان واضح انه لارج جدا زى مامته

والنوع ده هيسعدك هيسعدك يا هبله
دانتى لو تعرفى مامته بتتكلم عليكى ازاى من وراكى
بتموت فيكى

بحبك بتحبك كده

ياله بالهنا والشفا

البوست رلئع

تحياتى

واحد بيدور علي قلبه يقول...

ان اقلت مينفعش اقري البوست من غير ما افقعك كومنت زي الهانم حماتك
دي من زمن الحموات الفاتنات هي تقرب لماري منيب بس ماري كانت ارحم بس يمكن تيجي اخر الفيلم تغير رايها وربنا يهديها
بس والله انتي صبوره قوي مش عارف بتجيبي الصبر عليهم دا منين دا انا وراجل لو مكانك من البلكونه علي طول او اطلق عليهم صواريخ ماركة اف 16 يلا
انا كنت جاي اهدي النفوس.

Miso soup يقول...

انتي متاكده ان الحكايات حقيقية و لا احلام (اقصد كوابيس) اليقظة؟

تــــايه ومش تـــايه يقول...

شكلك هتموتى عليه .ده كلو ومستحملاااااااااااااااه ليه؟؟
انا بهدى النفوس اوعى تفهمينى غلط

شاب نفسة يحقق حلمة يقول...

ههههههههه
يخرب عقلك
دمك زي العسل
نفسي اتعرف علي البية ده
قوليلية يجي عندي المدونة بتاكسي وقلية متخافش طارق اللي هيحاسب
ههههههههههه
تحياتي ليكي

صوت من مصر يقول...

جميل جدا وكل سنه والتورته لسه بخير

almasry يقول...

المهم كل سنه وكوكو طيب .. وانا كمان طيب أصل مفيش حد بيعبرنى .. انا عيد ميلادى زى اليومين دول ، امته بالظبط مش عارف لكن انا عارف انى عايش بقالى كتير

ا لـعـبـد لـلــه يقول...

البوست فعلا جميل لكن الألوان كتي كده ومش مزبطه مع بعضها دي ملحوظه رفيعه..ممكن أسأل سؤال؟ يعني ايه سنييه؟أنا بهرج طبعا وعلى فكرة الراجل وأمه تقريبا قرايب..صدقيني ماتستغربيش

raspoutine يقول...

بوست جميل ولذيذ وحقيقى دمك خفيف
تحياتى

SKOBL- Little Lazy Me يقول...

يا لهوي عليه .. بصراحة .. فظيع يا بنتي الواد ده ، رهيب .. ربنا يعين بجد ، طب ده انت يلو كنتي عزمتيني أنا كنت على الأقل حاجيب هديه .. ما هي جمايل ، يا ساتر يا رب ، فظيعه السيده و ابنها .. أنا كنت علقت قبل كده و قلتلك لو في رجالة كده يبقى حلال اللي بيحصلنا .. دلوقتي بأقولك ، لو كوكو كده ، يبقى مهما تعملي فيه هو و الست مامته بعد كده حلال أوي أوي و يفضلكم وسع فيالحلال لأي حاجة .. و انت يقال ايه دهب و بيرفيوم .. ده جابلك كوكو بحاله ، بصراحة مامتك كانش عيد ميلادها يبقى عيد ميلاد من غيره .. يلا كل سنة و الست الوالدة بخير
كل التحيات
كل التحيات

عبده الرايق يقول...

طبعا غلطه كوكو انه مقالشى
كانوا الناس جابوا الهديه
وعموما كويس انهم افتكروا وسلموا
قبل ما يمشوا

نوري يقول...

كوكو
واضح انه من فصيلتي
مانتي عارفه
انا مش بجيب هدايا ابداااااا
بس بجد انتي ليكي الجنه
ده انتي مخطوبه وبيتعمل فيكي كده
امال لما تتجوزي هيحصلك ايه يابنتي
لعلمك حماتك دي متتسبش كده
انتي حطي رجلك بس في عش الزوجيه
وشبشبلها مترحميهاش

انا كان معايا لتر بنزين كبتهم ع النار وهما هيقومو بالواجب بس مش عايزه احس اني انا كنت السبب

يلا بقي(بست وشز فور يو يا مون)0

انا انصاري يقول...

طلما مش طايقيت بصض كده طيب متسبكو من موضوع الجواز ده خالص

Khadieja Eshra يقول...

جميلة جدا يا عسولة
انا اول مرة ادخلك بس المدونة بتاعتك حلوة قوى

أنا حر يقول...

احلى حاجة في العريس ده وامه انهم بيخلوكي تكتبي البوستات دي
تحياتي

غير معرف يقول...

ربنا يهديكى
تلف تلف الأيام
و لسه بتناكفى فيه هو و أمه

rommantic يقول...

ايه يابنتنى ده كل دى خفه دم
انت كده فى الحقيقه برده
اسلوبك لذيذ اوى بحس انى بسمع مش بقرء
سلام

Miso soup يقول...

ايه فينك يا جنة .. اوعي يكون كوكو شاغلك عنا .. ازعل اوي :)

3abdo me7tas يقول...

انا كده بعترف واقول
انا فعلا كرهت الواد ده بجد

ba7re يقول...

كل سنة و كوكو طيب

اسجل اعجاب بمدونتك

و باى :)

كلام على بلاطة يقول...

كل عام وانت بخير وخفى على كوكو
يحسن يحسدوكو
ويدكو وش دوكو